1. Kasi Yehova wakutemwa ŵanthu wuli? Longosorani.

YEHOVA wakutemwa ŵanthu ŵakujiyuyura. Ŵekha awo mbakujiyuyura ndiwo ŵakuŵa paubwezi wakukhora na iyo. Kweni “ŵakujikuzga wakuŵamanyira patali.” (Sal. 138:6) Tose tikukhumba kukondweska Yehova na kuŵa nayo paubwezi. Ntheura tili na vifukwa vyakupulikikwa vyakuŵira ŵakujiyuyura.

2. Kasi tizgorenge mafumbo wuli mu nkhani iyi?

² Mu nkhani iyi, tizgorenge mafumbo ghatatu agha: (1) Kasi kujiyuyura ni vichi? (2) Chifukwa wuli tikwenera kuŵa ŵakujiyuyura? (3) Mphawuli apo chingaŵa chakusuzga kuŵa ŵakujiyuyura? Nga umo tiwonerenge, para tili ŵakujiyuyura, tikukondweska mtima wa Yehova na kusanga chandulo.—Zinth. 27:11; Yes. 48:17.

3. Kasi kujiyuyura ni vichi?

³ Kujiyuyura chikung’anamura kuŵa wambura kujinotha panji kujitukumura. Baibolo likulongora kuti munthu wakujiyuyura wakumanya kuti Yehova Chiuta ni mukuru kuluska iyo kweniso wakuchindika ŵanyake. Wakumanyaso kuti ŵanyake ŵakumuluska pa vinyake.—Fil. 2:3, 4.

4-5. Chifukwa wuli munthu munyake wangawoneka nga ngwakujiyuyura apo ndimo waliri nadi yayi?

⁴ Ŵanthu ŵanyake ŵakuwoneka nga mbakujiyuyura, apo ndimo ŵaliri nadi yayi. Ŵangawoneka ŵakufwasa, panji ŵangachindika ŵanyawo chifukwa chakuti ndimo ŵapapi ŵawo ŵali kuŵasambizgira. Kweni mu mtima ŵangaŵa kuti  mbakujinotha chomene. Ndipo zuŵa linyake ŵakuzakalongora umo ŵaliri nadi.—Luka 6:45.

⁵ Ŵanthu ŵanyake ŵakufwatuka kuyowoya maghanoghano ghawo, kweni ichi chikung’anamura kuti mbakujikuzga yayi. (Yoh. 1:46, 47) Ndipouli, ŵanthu ŵanthena ŵakwenera kuchenjera chomene kuti ŵaleke kujithemba. Kwali ndise ŵasoni panji yayi, tose tikwenera kuyezgayezga kuti tiŵe ŵakujiyuyura.

6. Kuyana na 1 Ŵakorinte 15:10, kasi tikusambirako vichi kwa mpositole Paulosi?

⁶ Wonani chiyelezgero cha mpositole Paulosi. Yehova wakamugwiliskira ntchito kwambiska mipingo yiphya mu misumba yakupambanapambana. Nakuti panji ndiyo wakachita vinandi mu uteŵeti kuluska mpositole waliyose wa Yesu Khristu. Ndipouli, Paulosi wakajikwezganga yayi pakati pa ŵabali ŵanyake. Mwakujiyuyura, wakayowoya kuti: “Ndine muchoko chomene pa ŵapositole, ndipo nili wakwenelera yayi kuchemeka mpositole, chifukwa nkhatambuzganga mpingo wa Chiuta.” (1 Kor. 15:9) Pamanyuma, Paulosi wakati wali paubwezi wakukhora na Yehova chifukwa chakuti wakaŵa wapadera panji wakachita vinandi yayi, kweni chifukwa cha lusungu lukuru lwa Chiuta. (Ŵazgani 1 Ŵakorinte 15:10.) Paulosi ntchiyelezgero chiwemi chomene pa nkhani ya kujiyuyura. Mu kalata iyo wakalembera Ŵakhristu ŵa ku Korinte, wakajikwezgapo yayi nangauli ŵanyake mu mpingo ŵakamususkanga.—2 Kor. 10:10.

7. Kasi mubali munyake wakumanyikwa wakalongora wuli kuti ngwakujiyuyura?

⁷ Ŵanthu ŵanandi ŵa Yehova ŵakhozgeka chomene na nkhani yakulongosora umoyo wa Mubali Karl F. Klein, uyo wakaŵa mu Wupu Wakulongozga. Mu nkhani yake, Mubali Klein,  mwakujiyuyura wakayowoya ivyo wakabudiskanga na masuzgo ghanyake agho wakaŵa nagho kwa nyengo yitali. Mwachiyelezgero, mu 1922 kakaŵa kakwamba kuchitako mulimo wakupharazga nyumba na nyumba. Kweni wakawona kuti mulimo uwu ngwakusuzga chomene mwakuti kwa vyaka viŵiri wakaleka dankha kuchitako mulimo uwu. Pamanyuma apo wakateŵeteranga pa Beteli, mubali munyake wakamupa ulongozgi, kweni wakamusungira vyakusingo mubali uyu kwanyengo yitali. Kweniso Mubali Klein wakalwarapo nthenda yakusuzgika maghanoghano. Ndipouli, wakaŵaso na mauteŵeti ghanandi ghapadera. Mubali Klein wakalongora kuti ngwakujiyuyura chifukwa wakayowoya yekha ivyo wakabudiskanga nangauli wakaŵa wakumanyikwa chomene. Ŵabali na ŵadumbu ŵanandi ŵakumukumbuka Mubali Klein chifukwa chakuti wakaŵa wakujiyuyura. *

8. Kasi lemba la 1 Petrosi 5:6 likutovwira wuli kumanya kuti Yehova wakukondwa para tili ŵakujiyuyura?

⁸ Chifukwa chikuru icho tikuŵira ŵakujiyuyura ntchakuti tikukhumba kukondweska Yehova. Mpositole Petrosi wakalongosora makora fundo iyi. (Ŵazgani 1 Petrosi 5:6.) Pakuyowoyapo za mazgu gha Petrosi, buku la “Wize Uŵe Mulondezgi Wane” likuti: “Kujikuzga kuli nga ni poyizoni. Ivyo vingachitika chifukwa cha kujikuzga ni viheni chomene. Mbukhaliro uwo ungapangiska munthu waluso chomene kuŵa wambura ntchito kwa Chiuta. Kweni kujiyuyura kungapangiska munthu waluso luchoko kuŵa wakukhumbikwa chomene kwa Yehova. . . . Chiuta [wazamumukwezgani] para mukujiyuyura.” * Nadi, chinthu chiwemi chomene icho tingachita nkhumukondweska Yehova.—Zinth. 23:15.

9. Chifukwa wuli ŵanthu ŵanyake ŵaŵenge nase paubwezi para ndise ŵakujiyuyura?

⁹ Padera pakukondweska Yehova, tikusangaso vitumbiko vinandi para tili ŵakujiyuyura. Tikuŵa paubwezi na ŵanyithu. Chifukwa wuli? Ghanaghanirani za ŵanthu awo mukukondwa para mukuchezga nawo. (Mat. 7:12) Tikukondwa yayi para tikuchezga na munthu uyo wakukhumba kuti tenderenge waka maghanoghano ghake ndipo wakupulika yayi vyaŵanyake. Kweni tikukondwa para tikuchezga na Ŵakhristu ŵanyithu awo ŵakulongora kuti ‘ŵakutilengera chitima, ŵakutemwa  ŵabali, ŵa mtima wa chiwuravi, na ŵakujiyuyura.’ (1 Pet. 3:8) Ntheura nase tikwenera kuŵa ŵakujiyuyura, ndipo para tachita nthena ŵanyithu nawo ŵaŵenge nase paubwezi.

10. Chifukwa wuli chikuŵa chipusu ku ŵanthu ŵakujiyuyura kuzizipizga para ŵasangana na masuzgo?

¹⁰ Kujiyuyura kukutovwiraso kuti tiŵenge ŵakukondwa. Ndipouli, nyengo zinyake tiwonenge kuti vinthu vinyake vikwenda makora yayi. Themba lavinjeru Solomoni likati: “Nawonapo ŵateŵeti ŵakwenda pa mahachi, kweni ŵakaronga ŵakwenda pasi nga mbateŵeti.” (Muph. 10:7) Nyengo zinyake ŵanthu awo ŵali na maluso ghapadera ŵakulumbika yayi. Ndipo nyengo zinyake awo ŵalije maluso ghapadera ndiwo ŵakulumbika. Nangauli vingaŵa nthena, Solomoni wakayowoya kuti tikwenera kuzomerezga waka umo vinthu vyaŵira kuluska kukhuŵara panji kukwiya. (Muph. 6:9) Para tili ŵakujiyuyura, vitisuzgenge yayi kuzomerezga umo vinthu vyaŵira pa umoyo withu.

11. Kasi tikwenera kuchita wuli para tapika ulongozgi?

¹¹ Zuŵa lililose tikuŵa na mwaŵi wakulongora usange ndise ŵakujiyuyura. Wonani viyelezgero vichoko waka ivi. Para tapika ulongozgi. Tikwenera kukumbuka kuti para munthu munyake wapatura nyengo kuti watipe ulongozgi, ndikuti tabuda nadi. Nyengo zinyake para munyithu wakutipa ulongozgi, pakwamba tingawukana. Tingamba kumususka uyo watipa ulongozgi panji kughanaghana kuti wanguwupeleka makora yayi. Kweni para tili ŵakujiyuyura, tiwupokelerenge waka ulongozgi uwo.

12. Kuyana na Zintharika 27:5, 6, chifukwa wuli tikwenera kumuwonga uyo watipa ulongozgi? Longosorani.

¹² Munthu wakujiyuyura wakuwonga para wapika ulongozgi. Tiyelezgere kuti muli ku maungano gha mpingo. Apo mukuchezga na Ŵakhristu ŵanyinu, mbwenu munyake wakumutolerani pamphepete na kumuphalirani kuti vyakurya vyakhalira mu mino ghinu. Kasi mungajipulika wuli? Panji soni zingamukorani. Kweni mungamuwonga uyo wamuphalirani. Nakuti mungamba kughanaghana kuti mphanyi munyake wangumuphalirani mwaluŵiro. Ndimo tikwenera kuchitiraso para Mkhristu munyithu watipa ulongozgi, tikwenera kumuwonga. Tikwenera kumuwona kuti ni mubwezi withu, mulwani withu yayi.—Ŵazgani Zintharika 27:5, 6; Gal. 4:16.

13. Kasi tingalongora wuli kuti ndise ŵakujiyuyura para ŵanji ŵapika mauteŵeti ghanyake?

¹³ Para ŵanyithu ŵapika mauteŵeti ghanyake. Jason uyo ni mulara mu mpingo wakuti:  “Para ŵanji ŵapika mauteŵeti ghanyake, nyengo zinyake nkhujifumba kuti, ‘ŵalekerachi kusankha ine?’” Kasi namwe ndimo mukujipulikira? Ntchiheni yayi ‘kunwekera’ milimo mu gulu la Yehova. (1 Tim. 3:1) Kweni tikweneraso kuŵa maso. Chifukwa wuli? Chifukwa ntchakuti para tiŵenge maso yayi, mbwenu tambenge kujikuzga. Mwachiyelezgero, mubali wangamba kughanaghana kuti ndiyo yekha wangakwaniska kuchita mulimo unyake. Panji muwoli wake wangamba kughanaghana kuti ‘mfumu wake ndiyo wangachita makora mulimo uwo kuluska mubali munyake.’ Kweni para tili ŵakujiyuyura, tingaghanaghana nthena yayi.

14. Kasi tingasambirako vichi kwa Mozesi para ŵanji ŵapika mauteŵeti?

¹⁴ Tingasambirako kwa Mozesi umo wakachitira ŵanji ŵati ŵapika milimo yinyake. Mozesi wakazirwiskanga chomene mulimo wake wakulongozga mtundu wa Israyeli. Kasi Mozesi wakachita wuli apo Yehova wakazomerezga kuti ŵanthu ŵanyake ŵateŵetere nayo lumoza? Wakachita sanji yayi. (Maŵa. 11:24-29) Wakajiyuyura na kuzomera kuti ŵanji ŵamovwireko mulimo wakweruzga ŵanthu. (Eks. 18:13-24) Ichi chikawovwira kuti Ŵaisrayeli ŵaleke kulindilira nyengo yitali kuti milandu yawo yeruzgike. Apa Mozesi wakalongora kuti wakaghanaghaniranga chomene ŵanthu kuluska udindo wake. Ichi ntchiyelezgero chiwemi chomene kwa ise. Tikwenera kumanya kuti usange tikukhumba kuti Yehova watigwiliskire ntchito, tikwenera kuŵa ŵakujiyuyura kuluska waka kuŵa na maluso ghapadera. Nangauli “Yehova ngwapachanya, kweni wakuwona ŵakujiyuyura.”—Sal. 138:6.

15. Kasi ŵabali na ŵadumbu ŵanandi vinthu vili kusintha wuli pa umoyo wawo?

¹⁵ Para uteŵeti wasintha. Mu vyaka vyasonosono apa, ŵabali na ŵadumbu ŵanandi awo ŵakateŵetera Yehova vyaka vinandi ŵakapika  mauteŵeti ghanyake. Mwachiyelezgero, mu 2014, gulu likati kuŵengeso ŵalaŵiliri ŵa chigaŵa yayi, ntheura ŵalaŵiliri ŵa chigaŵa na ŵawoli ŵawo ŵakapika mauteŵeti ghanyake. Kweniso kwambira mu chaka ichi, gulu likati ŵalaŵiliri ŵa dera awo ŵafiska vyaka 70 ŵalutilirenge yayi kuchita uteŵeti wawo. Ndipo ŵabali awo ŵali na vyaka 80 panji kujumpha ŵaŵengeso ŵalaŵiliri ŵa milimo ya wupu wa ŵalara yayi. Kweniso ŵanandi awo ŵakateŵeteranga pa Beteli ŵakaphalirika kuti ŵakachite upayiniya. Ŵanyake ŵali kuleka uteŵeti wawo chifukwa cha ulwari, kupwelelera mbumba, panji pa vifukwa vinyake.

16. Kasi ŵabali na ŵadumbu ŵanyake ŵakalongora wuli kuti mbakujiyuyura uteŵeti wawo ukati wasintha?

¹⁶ Ŵabali na ŵadumbu aŵa chikaŵaŵira chakusuzga kuzomerezga kuti vinthu vyasintha. Tikukayika yayi kuti ŵakatemwanga chomene uteŵeti uwo ŵakawuchita vyaka vinandi. Ŵanyake ‘chitima’ chikaŵakora chomene apo mauteŵeti ghawo ghakasinthanga. Kweni pati pajumpha nyengo ŵakamba kuzgoŵera. Chifukwa wuli? Chifukwa ntchakuti ŵakatemwanga Yehova. Ŵakamanya kuti ŵakajipeleka kwa Chiuta, uteŵeti yayi. (Kol. 3:23) Mbakukondwa kuchita uteŵeti uliwose uwo ŵapika. ‘Ŵakumuthulira Yehova vyose ivyo ŵakwenjerwa navyo,’ chifukwa ŵakumanya kuti wakuŵapwelelera.—1 Pet. 5:6, 7.

17. Chifukwa wuli tikuwonga kuti Mazgu gha Chiuta ghakutichiska kuti tiŵe ŵakujiyuyura?

¹⁷ Tikuwonga chomene kuti Mazgu gha Chiuta ghakutichiska kuti tiŵe ŵakujiyuyura. Kujiyuyura nkhuwemi kwa ise na ŵanyithu awo tikuchezga nawo. Kukutovwiraso kuzizipizga masuzgo agho tikukumana nagho. Chakuzirwa chomene ntchakuti tikuŵa paubwezi na Dada withu wakuchanya. Tili ŵakukondwa chomene kumanya kuti nangauli ‘Ngwapachanya na Wakukwezgeka,” kweni wakutemwa na kuzirwiska ŵateŵeti ŵake ŵakujiyuyura.—Yes. 57:15.