NKHANI YAKUSAMBIRA 38
Chitani Vinthu Mwamahara Panyengo Yamtende
“Charu chikaŵa bata ndipo kukaŵavya nkhondo kulimbana nayo mu vyaka ivi, chifukwa Yehova wakamupa chipumulo.”—2 MID. 14:6.
SUMU 60 Ŵanthu Ŵangapona
CHILATO CHA NKHANI IYI *
1. Kasi mphawuli apo chingaŵa chakusuzga kuteŵetera Yehova?
KASI mukughanaghana kuti mphawuli apo chingaŵa chakusuzga chomene kuteŵetera Yehova? Kasi ni para muli na masuzgo ghanandi, panji ni para muli pa mtende? Para tasangana na masuzgo ntchipusu kugomezga Yehova. Kweni kasi tikuchita wuli para tili pa mtende? Kasi nyengo zinyake tikuluwa kuti kuteŵetera Chiuta ndiko nkhwakuzirwa? Yehova wakachenjezga Ŵaisrayeli kuti ivi vingaŵachitikira.—Doto. 6:10-12.
Themba Asa likaŵikapo mtima kumazga kusopa kwautesi (Wonani ndime 2) *
2. Kasi Themba Asa likalongora chiyelezgero wuli chiwemi?
2 Themba Asa ntchiyelezgero chiwemi chomene kwa ise. Likachita vinthu mwamahara chifukwa likagomezganga chomene Yehova. Likateŵeteranga Yehova panyengo yakusuzga na yamtende. “Mtima wa Asa ukaŵa wakufikapo pamaso pa Yehova” umoyo wake wose. (1 Mathe. 15:14) Nthowa yimoza iyo Asa wakalongolera kuti wakateŵetera Yehova na mtima wose njakuti wakamazga kusopa kwautesi mu Yuda. Baibolo likuti “wakawuskamo majotchero ghachilendo na malo ghapachanya, wakaswa vipilara vyakupatulika na kudumulira pasi vikhuni vyakupatulika.” (2 Mid. 14:3, 5) Kweniso wakafumiskapo Maka, buya wake, pa udindo wa ufumukazi. Chifukwa wuli? Chifukwa wakachiskanga ŵanthu kuti kusopa chikozgo.—1 Mathe. 15:11-13.
3. Kasi tiwonenge vichi mu nkhani iyi?
3 Asa wakamazga waka kusopa kwautesi pera yayi. Kweni wakawovwiraso ŵanthu ŵa ku Yuda kuti ŵambeso kusopa Yehova. Ndipo Yehova wakatumbika Asa na ŵanthu ŵa ku Yuda ndipo ŵakaŵa pa mtende. * Mu nyengo ya vyaka 10 vya muwuso wa Asa, “charu chikapumura.” (2 Mid. 14:1, 4, 6) Mu nkhani iyi, tidumbiskanenge umo Asa wakachitira vinthu pa nyengo yamtende iyi. Pamanyuma tiwonenge umo Ŵakhristu ŵakwambilira ŵakachitira nga ni Asa pa nyengo yamtende. Paumaliro, tizgorenge fumbo lakuti: Usange mukukhala mu charu icho mukusopa Yehova mwakufwatuka, kasi mungachita wuli vinthu mwamahara pa nyengo yamtende iyi?
UMO ASA WAKACHITIRA PANYENGO YAMTENDE
4. Kuyana na 2 Midauko 14:2, 6, 7, kasi Asa wakachita wuli vinthu pa nyengo yamtende?
4 Ŵazgani 2 Midauko 14:2, 6, 7. Asa wakaphalira ŵanthu kuti Yehova ndiyo ‘wakaŵapa chipumulo kosekose.’ Asa wakawonanga nyengo yamtende iyi kuti njakukondwera waka yayi. Kweni wakamba kuzenga misumba, viliŵa, vigongwe na vipata. Wakaphalira ŵanthu ŵa mu Yuda kuti: “Charu chichali chithu.” Kasi Asa wakang’anamurangachi? Wakang’anamuranga kuti mu charu mukaŵavya ŵalwani awo ŵangaŵatondeska kwenda na kuzenga. Ndipo wakachiska ŵanthu kuti ŵasangirepo mwaŵi pa nyengo yamtende iyi.
5. Chifukwa wuli Asa wakakhozga gulu la ŵankhondo ŵake?
5 Pa nyengo yamtende iyi, Asa wakakhozgaso gulu la ŵankhondo ŵake. (2 Mid. 14:8) Kasi apa ndikuti wakagomezganga yayi Yehova? Yayi. Asa wakamanyanga kuti ni udindo wake pakuŵa themba kunozgekera masuzgo agho ŵanthu ŵake ŵangasangana nagho munthazi. Kweniso wakamanyanga kuti nyengo yamtende iyo ŵakaŵamo yikhalilirenge yayi, nakuti uwu ukaŵa unenesko.
IVYO ŴAKHRISTU ŴAKWAMBILIRA ŴAKACHITA PA NYENGO YAMTENDE
6. Kasi Ŵakhristu ŵakwambilira ŵakachita wuli vinthu panyengo yamtende?
6 Nangauli Ŵakhristu ŵakwambilira kanandi ŵakatambuzgikanga, kweni nyengo yamtende yikaŵangapo. Kasi ŵakachitanga wuli pa nyengo iyi? Ŵanalume na ŵanakazi ŵakugomezgeka aŵa ŵakapharazganga makani ghawemi kwambura kuleka, ndipo ŵakaŵikapo mtima kuteŵetera Yehova. Ntheura ‘ŵakalutilira kwandana.’ Ivi vikulongora kuti Yehova wakatumbika mulimo wawo wa kupharazga panyengo yamtende iyi.—Mil. 9:26-31.
7-8. Kasi Paulosi na ŵanyake ŵakachita wuli apo ŵakaŵa na m’pata? Longosorani.
7 Ŵakhristu ŵakwambilira ŵakapharazganga pa mpata uliwose. Mwachiyelezgero, mpositole Paulosi wati wamanya kuti wangapharazgira ŵanthu ŵanandi mu Efeso, wakakhala mu msumba uwu na kupharazga.—1 Kor. 16:8, 9.
8 Paulosi na Ŵakhristu ŵanyake ŵakapharazgiraso ŵanthu ŵanandi mu 49 C.E., ŵapositole na ŵalara ku Yerusalemu ŵati ŵadumura nkhani ya ukotoli.. (Mil. 15:23-29) Paulosi na ŵanyake ŵati ŵaphalira mipingo umo nkhani ya ukotoli yikendera, wose ŵakalimbikira chomene “kupharazga makani ghawemi gha mazgu gha Yehova.” (Mil. 15:30-35) Kasi chikachitika ntchivichi? Baibolo likuti “mipingo yikalutilira kukhozgeka mu chipulikano ndipo zuŵa lililose ŵanthu ŵakasazgikiranga mu mpingo.”—Mil. 16:4, 5.
UMO TINGACHITIRA PANYENGO YAMTENDE MAZUŴA GHANO
9. Kasi vinthu vili wuli mu vyaru vinandi mazuŵa ghano, ndipo tikwenera kujifumba fumbo wuli?
9 Mu vyaru vinandi mazuŵa ghano tikupharazga mwawanangwa. Kasi ndimo vinthu viliri mu charu chinu? Para ndimo viliri, jifumbani kuti, ‘Kasi nkhuwugwiliskira wuli ntchito mwaŵi uwu?’ Mazuŵa ghaumaliro agha, ngakukondweska chomene ku ŵanthu ŵa Yehova. Vili nthena chifukwa chakuti ŵakutangwanika chomene na mulimo wa kupharazga na kusambizga, uwo ukuchitika chomene sono kuluska kumanyuma kose. (Mrk. 13:10) Ndipo pali vinandi ivyo tingachita pa mulimo uwu.
Ŵanandi ŵakukondwa chomene chifukwa ŵakupharazga ku vyaru uko kukukhumbikwa ŵapharazgi ŵanandi panji kupharazgira ŵanthu awo ŵakuyowoya chiyowoyero chinyake (Wonani ndime 10-12) *
10. Kasi lemba la 2 Timote 4:2 likutichiska kuchita vichi?
10 Kasi tingachita wuli vinthu mwamahara panyengo yamtende? (Ŵazgani 2 Timote 4:2.) Mungachita makora kughanaghanirapo usange imwe panji wamumbumba yinu mungasintha vinthu vinyake kuti muŵe na nyengo yinandi yakupharazgira panji kwamba upayiniya. Iyi ni nyengo yakuti tijiwunjikire chuma yayi, chifukwa tizamujumpha nacho yayi pa suzgo yikuru.—Zinth. 11:4; Mat. 6:31-33; 1 Yoh. 2:15-17.
11. Kasi ŵanyake ŵachita wuli kuti ŵasambizgenge ŵanthu ŵanandi vya Yehova?
11 Ŵapharazgi ŵanandi ŵasambira chiyowoyero chiphya kuti ŵasambizgenge makora ŵanji vya Yehova. Ndipo gulu la Yehova latipa vinthu vinandi kuti vitovwire kupharazga mu viyowoyero vinandi. Mwachiyelezgero, mu 2010 mabuku ghithu ghakasangikanga mu viyowoyero 500. Kweni pasono ghakusangika mu viyowoyero vyakujumpha 1,000.
12. Kasi pakuŵa uwemi wuli para ŵanthu ŵakupulika uthenga wa Ufumu mu chiyowoyero chawo? Pelekani chiyelezgero.
12 Kasi ŵanthu ŵakujipulika wuli para ŵapulika uthenga wakukhwaskana na Yehova mu chiyowoyero chawo? Wonani chiyelezgero cha mudumbu munyake uyo wakapindura chomene na ungano uwo ukachitikira ku Memphis, Tennessee, U.S.A. Ungano uwu ukachitikira mu chiyowoyero cha Chikinyarwanda icho chikuyowoyeka chomene ku Rwanda, Congo (Kinshasa), na Uganda. Ungano wati wamara, mudumbu uyu, uyo chiyowoyero chake Ntchikinyarwanda wakati: “Aka nkhakwamba kuti nipulikiske fundo zose za pa ungano, kufuma apo nkhafikira kuno ku United States vyaka 17 ivyo vyajumpha.” Apa ntchakuwonekerathu kuti mudumbu uyu wakapindura chomene chifukwa chakuti ungano ukachitika mu chiyowoyero chake. Usange vinthu vili makora pa umoyo winu, kasi mungasambira yayi chiyowoyero chinyake kuti movwire ŵanji mu chigaŵa chinu? Kasi mu chigaŵa cha mpingo winu muli ŵanyake awo ŵakufwatuka kuyowoya chiyowoyero chinyake mwakuti mungaŵawovwira makora para mungasambira chiyowoyero icho? Para muŵikengepo mtima muŵenge ŵakukondwa.
13. Kasi ŵabali ŵithu ku Russia ŵakachita wuli pa nyengo yamtende?
13 Mbabali wose yayi awo ŵakupharazga mwawanangwa. Mu vyaru vinyake, ŵabali ŵakupharazga mwakufwatuka yayi chifukwa chakuti boma lili kukanizga mulimo withu. Mwachiyelezgero, ghanaghanirani za ŵabali ŵithu ku Russia. Ŵati ŵatambuzgika kwa vyaka vinandi, mu Malichi 1991, boma likaŵazomerezga kuti ŵasopenge mwawanangwa. Pa nyengo iyo, ku Russia kukaŵa ŵapharazgi 16,000. Pati pajumpha vyaka 20, chiŵelengero chikakwera kujumpha pa 160,000. Apa ntchakuwonekerathu kuti ŵabali ŵithu ŵakagwiliskira ntchito mwamahara nyengo yamtende iyo ŵakaŵa nayo. Nyengo yamtende iyi yikakhalilira yayi. Nangauli vinthu vili kusintha mu charu ichi, kweni ŵakuŵikapo mtima chomene kuteŵetera Yehova. Ŵakuchita chilichose icho ŵangafiska kuti ŵamuteŵetere.
NYENGO YAMTENDE YIKHALILIRENGE YAYI
Themba Asa lati laromba kwa Yehova kufumira pasi pamtima, Yehova wakawovwira Yuda kuthereska ŵalwani ŵanandi (Wonani ndime 14-15)
14-15. Kasi Yehova wakalongora wuli nkhongono zake mu nyengo ya Asa?
14 Mu nyengo ya Asa, nyengo yamtende yikamara. Gulu la ŵasilikari lakujumpha 1 miliyoni likiza kufuma ku Etiyopiya. Mulongozgi wawo Zera, wakaŵa na chigomezgo chose kuti iyo na ŵankhondo ŵake ŵathereskenge Yuda. Kweni Themba Asa likagomezga Yehova. Asa wakalomba kuti: “Tovwirani, mwe Yehova Chiuta withu, pakuti tikuthemba imwe na zina linu pakwiza kwimikana na mzinda uwu.”—2 Mid. 14:11.
15 Nangauli ŵasilikari ŵa Asa ŵakanjirangamo kaŵiri mu ŵasilikari ŵa ku Etiyopiya, kweni Asa wakamanya kuti Yehova ngwankhongono ndipo wawovwirenge ŵanthu ŵake. Yehova wakawovwira nadi ŵanthu ŵake. Ŵasilikari ŵa Etiyopiya ŵakathereskeka.—2 Mid. 14:8-13.
16. Kasi tikumanya wuli kuti vinthu vilutilirenge kuhenipa?
16 Tikumanya yayi ivyo vizamuchitikira waliyose wa ise munthazi, kweni icho tikumanya ntchakuti nyengo yamtende iyo ŵanthu ŵa Chiuta ŵakusangwa nayo yikhalilirenge yayi. Kumbukani kuti Yesu wakayowoyerathu kuti mu mazuŵa ghaumaliro ŵasambiri ŵake ‘ŵazamutinkhika na mitundu yose.’ (Mat. 24:9) Mpositole Paulosi nayo wakayowoya kuti: “Wose awo ŵakukhumba kusopa Chiuta mwakujipeleka mwakulondezga Khristu Yesu, nawo ŵatambuzgikenge.” (2 Tim. 3:12) Satana wali na “ukali ukuru,” ndipo tingaŵa kuti tikujipusika usange tikughanaghana kuti ukali wake utikhwaskenge yayi na pachoko.—Chivu. 12:12.
17. Kasi chipulikano chithu chingayezgeka wuli?
17 Sonosono apa waliyose chipulikano chake chiyezgekenge. Kuŵenge “suzgo yikuru, iyo yindachitikepo kufuma ku uyambiliro wa charu m’paka sono.” (Mat. 24:21) Panyengo iyo, ŵamumbumba yithu ŵangazakatiwukira ndipo mulimo withu ungazakakanizgika. (Mat. 10:35, 36) Kasi muzamuŵa nga ni Asa na kugomezga kuti Yehova wamuvikiliraninge?
18. Kuyana na Ŵahebere 10:38, 39, kasi ntchivichi chizamutovwira para nyengo yamtende yamara?
18 Yehova wakutinozgekereska sono kuti panyengo iyo chipulikano chithu chizakaŵe chakukhora. Wakugwiliskira ntchito muzga wakugomezgeka na wavinjeru kutipa “chakurya pa nyengo yakwenelera,” kuti tilutilire kuŵa ŵakukhora. (Mat. 24:45) Kweni waliyose payekha wakwenera kulimbikira kuti waŵe na chipulikano chakukhora mwa Yehova.—Ŵazgani Ŵahebere 10:38, 39.
19-20. Kuyana na lemba la 1 Midauko 28:9, kasi tikwenera kujifumba mafumbo wuli, ndipo chifukwa wuli tikwenera kujifumba mafumbo agha?
19 Nga ni Themba Asa, nase tikwenera “kupenja Yehova.” (2 Mid. 14:4; 15:1, 2) Tingalongora kuti tamba kupenja Yehova, para tikusambira za iyo na kubatizika. Kweniso tikuchita chilichose icho tingafiska kuti tikhozge chitemwa chithu pa Yehova. Kuti timanye usange tikuchita makora, tingajifumba kuti: ‘Kasi nkhuwungana nyengo zose?’ Para tikusangikapo pa maungano, tikusanga nkhongono izo zikutovwira kuti tilutilire kuteŵetera Yehova ndipo tikukhozgeka na ŵabali na ŵadumbu ŵithu. (Mat. 11:28) Tingajifumbaso kuti: ‘Kasi nkhusambira Baibolo nyengo zose?’ Usange mukukhala na mbumba yinu, kasi mukuchita kusopa kwa mbumba sabata yiliyose? Panji usange mukukhala mwekha, kasi mukupatura nyengo yakusambilira pamwekha? Kasi mukuyezeska kupharazga na kusambizga ŵanji?
20 Chifukwa wuli tikwenera kujifumba mafumbo agha? Baibolo likutiphalira kuti Yehova wakumanya maghanoghano ghithu na ivyo vili mu mitima yithu. (Ŵazgani 1 Midauko 28:9.) Usange tawona kuti tikukhumbikwira kusintha vilato vithu panji kaghanaghaniro kithu, tikwenera kulomba Yehova kuti watovwire kusintha. Iyi ni nyengo yakunozgekera viyezgo ivyo tisanganenge navyo munthazi. Tingazomerezganga chilichose yayi kutitimbanizga kuchita vinthu mwamahara apo vinthu vichaliko makora.
SUMU 62 Sumu Yiphya
^ ndime 5 Kasi mukukhala mu charu icho mukusopa Yehova mwakufwatuka? Usange ni nthena, kasi mukuwugwiliskira wuli ntchito mwaŵi uwu? Nkhani iyi yimovwiraninge umo mungayezgera Asa, themba la Yuda, na Ŵakhristu ŵakwambilira. Iwo ŵakasangirapo mwaŵi panyengo iyo kukaŵa mtende ndipo ŵakachita vinthu mwamahara.
^ ndime 3 MAZGU GHALONGOSOREKA: Mazgu ghakuti “mtende” ghakung’anamura vinandi padera pa kuleka kuŵa waka pa nkhondo. Lizgu Lachihebere ilo lili kung’anamulika kuti mtende likusazgapo kuŵa na thupi lambura kulwaralwara, kuŵa wakuvikilirika, na kukhala umoyo uwemi.
^ ndime 57 MAZGU GHAKULONGOSORA CHITHUZI: Themba Asa likaŵawuskapo abuya ŵake pa udindo wa ufumukazi chifukwa ŵakakhozgeranga kusopa kwautesi. Ŵanthu ŵakugomezgeka awo ŵakakolerana na Asa ŵakamuyezga Asa, ndipo ŵakaparanya ŵachiuta ŵatesi.
^ ndime 59 MAZGU GHAKULONGOSORA CHITHUZI: Ŵakutorana ŵachepeska vyakukhumba pa umoyo kuti ŵakateŵetere uko kukukhumbikwa ŵapharazgi ŵanandi.
