1-2. Kuyana na 1 Timote 6:20, kasi Timote wakapika vichi?

KANANDI tikusungiska vinthu vithu vyakuzirwa ku ŵanji. Mwachiyelezgero, tingasungiska ndalama zithu ku banki. Para tasungiska, tikukhazga kuti ndalama zithu zisungikenge makora ndipo zingasoŵa yayi panji kwibika. Nakuti tikumanya kuti ni udindo ukuru chomene kusungilira chinthu chakuzirwa cha munthu munyake.

² Ŵazgani 1 Timote 6:20. Mpositole Paulosi wakakumbuska Timote kuti wakapokera chithu chakuzirwa chomene. Chinthu ichi, nkhumanya makora khumbo ilo Chiuta wali nalo ku ŵanthu. Wakapikaso mulimo ‘wakupharazga mazgu,’ ndipo wakeneranga kufiska mulimo uwu. (2 Tim. 4:2, 5) Paulosi wakachiska Timote kuti wasungilire ivyo vikaŵikizgika kwa iyo. Nga Timote, nase taŵikizgika vinthu vyapadera. Kasi vinthu ivi ni vichi? Ndipo chifukwa wuli tikwenera kusungilira makora vinthu vyakuzirwa ivyo Yehova watipa?

3-4. Yowoyani vifukwa ivyo unenesko wa mu Baibolo uliri wakuzirwa.

³ Yehova watipa unenesko wakuzirwa uwo ukusangika mu Mazgu ghake Baibolo, kuti timumanye makora. Unenesko uwu ngwakuzirwa chomene chifukwa ukutisambizga umo tingaŵira paubwezi wakukhora na Yehova kweniso umo tingaŵira ŵakukondwa na umoyo. Para tazomera unenesko uwu na kulondezga ivyo tikusambira, tikufwatuka ku visambizgo vyautesi na ku nkharo zaukazuzi.—1 Kor. 6:9-11.

⁴ Chifukwa chinyake icho unenesko wa mu Baibolo uliri wakuzirwa ntchakuti Yehova wakuwuvumbura ku ŵanthu ŵakujiyuyura awo ŵali na “maghanoghano ghakwenelera.” (Mil. 13:48)  Ŵanthu ŵakujiyuyura aŵa, ŵakuzomerezga kuti muzga wakugomezgeka na wavinjeru ndiyo wakutisambizga unenesko wa mu Baibolo mazuŵa ghano. (Mat. 11:25; 24:45) Tingalipulikiska yayi Baibolo kwambura wovwiri, kweni palije chinthu chakuzirwa chomene kuluska kulipulikiska.—Zinth. 3:13, 15.

5. Kasi Yehova watipaso mwaŵi wuli?

⁵ Yehova watipaso mwaŵi wakusambizga ŵanthu unenesko wakukhwaskana na iyo kweniso khumbo lake. (Mat. 24:14) Uthenga wakukhwaskana na Yehova uwo tikupharazga ngwakuzirwa chomene chifukwa ukovwira ŵanthu kuŵa mu mbumba ya Yehova na kuŵa na mwaŵi wakuzakasanga umoyo wamuyirayira. (1 Tim. 4:16) Kwali tikupharazga chomene panji pachoko, nase tikukhozgera ntchito yakuzirwa chomene iyi, iyo yikuchitika sono. (1 Tim. 2:3, 4) Ni mwaŵi wapadera chomene kuŵa ŵantchito ŵanyake na Chiuta.—1 Kor. 3:9.

6. Kasi ntchivichi icho chikachitikira ŵanyake awo ŵakaleka kuŵa maso?

⁶ Mu nyengo ya Timote, Ŵakhristu ŵanyake ŵakazirwiskanga yayi mwaŵi uwo ŵakaŵa nawo wakuŵa ŵantchito ŵanyake na Chiuta. Chifukwa chakuti Dema wakatemwanga vinthu vya mu charu, wakataya mwaŵi wakuteŵetera lumoza na Paulosi. (2 Tim. 4:10) Vikulongora kuti Fugelo na Heremogene ŵakaleka uteŵeti chifukwa chakuti ŵakawopanga kuti ŵanthu ŵaŵatambuzgenge nga umo ŵakachitiranga na Paulosi. (2 Tim. 1:15) Himenayo, Alekizanda, na Fileto ŵakagaluka na kuleka kusopa Yehova. (1 Tim. 1:19, 20; 2 Tim. 2:16-18) Ŵanthu wose aŵa, pakwamba ŵakamutemwanga Yehova, kweni ŵakaleka kuzirwiska vinthu vyakuzirwa ivyo Yehova wakaŵapa.

7. Kasi ni nthowa wuli izo Satana wakugwiliskira ntchito kuti watipuluske?

⁷ Kasi Satana wakuchita wuli kuti watilekeske kuzirwiska vinthu ivyo Yehova watipa? Wonani nthowa zinyake izo Satana wakugwiliskira ntchito. Wakugwiliskira ntchito Intaneti, ivyo tikuwonera pa TV, mafilimu, manyuzipepara, mabuku na magazini kuti watimbanizge kaghanaghaniro na nkharo yithu mwakuti tileke kutemwa Yehova na kupulikira malango ghake. Iyo wakuyezga kutofya kwizira mu ivyo ŵanthu ŵakuyowoya vya ise kweniso kutitambuzga mwakuti tileke kupharazga. Ndipo wakutinyengelera kuti titegherezgenge ku ŵakugaluka mwakuti tileke unenesko.—1 Tim. 6:20, 21.

8. Kasi tikusambirako vichi kwa mubali munyake zina lake Daniyeli?

⁸ Usange tiŵenge maso yayi, pachoko na pachoko tingamba kuleka unenesko. Wonani ivyo vikachitikira Daniyeli, * uyo wakatemwanga  kuseŵera magemu gha pa kompyuta. Iyo wakuti: “Nkhamba kuseŵera magemu gha pa kompyuta apo nkhaŵa na vyaka 10. Pakwamba nkhaseŵeranga magemu ghawemi waka. Kweni mwa pachoko na pachoko nkhamba kuseŵera magemu agho mukaŵanga vya nkhaza kweniso vyamizimu.” Nakuti wakamba kuseŵera magemu agha kwa maora pafupifupi 15 pa zuŵa. Daniyeli wakuti: “Pasi pamtima nkhamanyanga kuti magemu agho nkhaseŵeranga kweniso unandi wa nyengo iyo nkhamaliranga pa magemu agha, vikatimbanizganga ubwezi wane na Yehova. Kweni nkhajipusikanga na fundo yakuti fundo za mu Baibolo zikunikhwaska yayi.” Ntheura para tili maso yayi, vyakusanguluska vingatipangiska kuti tileke kukoleska unenesko. Ndipo para ivi vingachitika, mbwenu titayenge vinthu vyakuzirwa ivyo Yehova wali kutipa.

9. Kuyana na 1 Timote 1:18, 19, kasi Paulosi wakayaniska Timote na njani?

⁹ Ŵazgani 1 Timote 1:18, 19. Paulosi wakayaniska Timote na msilikari, ndipo wakamuchiska kuti ‘walutilire kurwa nkhondo yiwemi.’ Nkhondo iyi yikaŵa yakuthupi yayi kweni yauzimu. Kasi Ŵakhristu ŵali ngati mbasilikari awo ŵali ku nkhondo munthowa wuli? Kasi tikwenera kuŵa na mikhaliro wuli pakuŵa ŵasilikari ŵa Khristu? Tiyeni tiwone vinthu 5 ivyo tingasambirako ku chiyelezgero icho Paulosi wakayowoya. Vinthu ivi vingatovwira kuti tikoleske unenesko.

10. Chifukwa wuli ntchakuzirwa kusopa Chiuta mwakujipeleka?

¹⁰ Musopenge Chiuta mwakujipeleka. Msilikari muwemi wakuŵa wakugomezgeka. Wakuŵikapo mtima kuvikilira munthu panji vinthu ivyo wakuviwona kuti ni vyakuzirwa. Paulosi wakachiska Timote kuti wajizoŵezge kusopa Chiuta mwakujipeleka kulongora kuti wakupulikira Chiuta. (1 Tim. 4:7) Para timutemwenge chomene Yehova, tiŵikengepo mtima kukoleska unenesko.—1 Tim. 4:8-10; 6:6.

11. Chifukwa wuli tikwenera kujisambizga kuchita icho ntchakwenelera?

¹¹ Sambirani kuchita icho ntchakwenelera. Msilikari wakwenera kujisambizgaso payekha kuti nyengo zose waŵenge wakunozgeka. Timote wakalutilira kuŵa wakukhora mwauzimu chifukwa wakapulikira ulongozgi wa Paulosi wakuti walutilire kuŵa na mikhaliro yiwemi, wachimbireko ku makhumbiro ghaheni, kweniso wachezgenge na Ŵakhristu ŵanyake. (2 Tim. 2:22) Kweni kuti wafiske ivi wakeneranga kujisambizga. Nase ndimo tikwenera kuchitira kuti titonde nkhondo yithu yakulimbana na makhumbiro ghaheni. (Rom. 7:21-25) Tikwenera kujisambizga kuchita icho ntchiwemi kuti tilutilire kuvura wunthu withu wakale na kuvwara wunthu uphya. (Efe. 4:22, 24) Ndipo nyengo zinyake tingakhumbikwira kuchita kujichichizga kuluta ku maungano usange pa zuŵa ilo tavuka na milimo yinyake.—Heb. 10:24, 25.

12. Kasi tingachita wuli kuti tigwiliskirenge ntchito mwaluso Baibolo?

¹² Msilikari wakwenera kusambira umo wangagwiliskira ntchito vilwero vyake. Ndipo para wakukhumba kuŵa waluso, wakwenera kuyezgelera pafupipafupi. Mwakuyana waka, nase tikwenera kuŵa ŵaluso para tikugwiliskira ntchito Baibolo. (2 Tim. 2:15) Ndipo tingasambira maluso agha pa maungano. Kweni para tikukhumba kovwira ŵanji kuti nawo ŵagomezge kuti Baibolo lingaŵawovwira, nase tikwenera kulisambira nyengo zose. Tikwenera kuŵazga Baibolo kuti tikhozge chipulikano chithu. Kweni tikwenera kuliŵazga waka yayi. Tikwenera kughanaghanirapo pa ivyo tikuŵazga na kuchita kafukufuku mu mabuku ghithu  kuti tipulikiske makora Malemba na kuchita ivyo ghakuyowoya. (1 Tim. 4:13-15) Para tachita nthena ndipo tingasambizga makora ŵanji Mazgu gha Chiuta. Ichi chikung’anamura kuti tikwenera kuŵaŵerengera waka Baibolo yayi ŵanthu. Tikwenera kovwira ŵategherezgi ŵithu kupulikiska ivyo Malemba ghakuyowoya kweniso umo ghangaŵawovwilira. Para tikusambira patekha Baibolo zuŵa lililose, tiŵenge ŵaluso pakusambizga ŵanthu Baibolo.—2 Tim. 3:16, 17.

13. Kuyana na Ŵahebere 5:14, chifukwa wuli tikwenera kuŵa ŵaumanyi?

¹³ Muŵe ŵaumanyi. Msilikari wakwenera kumanya vinthu ivyo vingamupweteka kweniso umo wangavigegera. Naseso tikwenera kumanya vinthu ivyo vingatipweteka, ndipo tikwenera kuchitapo kanthu kuti tileke kupwetekeka. (Zinth. 22:3; ŵazgani Ŵahebere 5:14.) Mwachiyelezgero, tikwenera kusankha mwamahara vyakusanguluska. Mafilimu na vinyake ivyo ŵakulongora pa TV, kanandi mukuŵa vya uzaghali. Vinthu ivi vikumukwiyiska Chiuta, ndipo vingatipweteka. Ntheura tikwenera kugega vyakusanguluska vyanthena ivi chifukwa mwapachokopachoko vingananga ubwezi withu na Chiuta.—Efe. 5:5, 6.

14. Kasi umanyi ukamovwira wuli Daniyeli?

¹⁴ Daniyeli uyo tamuzunura kale, wakamba kuwamo kuti kuseŵera magemu agho muli vyankhaza na vyamizimu ni suzgo. Ntheura wakachita kafukufuku mu Watchtower Library kuti wasange ivyo vingamovwira kumazga suzgo lake. Kasi ivi vikamovwira wuli? Wakaleka kuseŵera magemu ghaheni. Ndipo wakaleka kuchita vinthu na ŵanyake awo wakaseŵeleranga nawo lumoza magemu. Daniyeli wakuti: “M’malo mwakuti niseŵerenge magemu gha pa kompyuta, nkhamba kuchita vinthu vinyake kweniso kuchitira lumoza vinthu na ŵanyane ŵa ku mpingo.” Pasono Daniyeli ni mupayiniya kweniso mulara mu mpingo.

15. Chifukwa wuli nkhani zautesi ni zakofya?

¹⁵ Nga Timote, tikwenera kuchenjera na nkhani zautesi izo ŵakususka ŵakuthandazga. (1 Tim. 4:1, 7; 2 Tim. 2:16) Mwachiyelezgero, ŵangamba kuthandazga nkhani zautesi zakukhwaskana na ŵabali ŵithu panji kuyowoya vinthu ivyo vingapangiska kuti tambe kukayikira gulu la Yehova. Mautesi agha ghangalopweska chipulikano chithu. Tikwenera kugega kugomezga mautesi agha. Chifukwa wuli? Chifukwa mautesi agha ghakuthandazgika na “ŵanthu  awo maghanoghano ghawo ghali kunangika ndipo unenesko uli kuŵapamba.” Chilato chawo nkhwambiska ‘mphindano na kugazgana.’ (1 Tim. 6:4, 5) Ŵakukhumba kuti tigomezge mautesi ghawo na kuleka kugomezga ŵabali ŵithu.

16. Kasi tikwenera kugega kutimbanizgika na vichi?

¹⁶ Mungatimbanizgikanga yayi. Pakuŵa “msilikari muwemi wa Khristu,” Timote wakeneranga kuŵika maghanoghano ghake pa uteŵeti m’malo mwakughanaghanira chomene vinthu vyakuthupi. (2 Tim. 2:3, 4) Nga Timote, nase tingazomerezganga yayi kuti tiŵe na mtima wakukhumba chomene vinthu vyakuthupi. “Nkhongono yakupusika ya usambazi” yingapangiska kuti chitemwa chithu pa Yehova chichepe, tileke kuwongera Mazgu gha Chiuta, na kuleka kuphalirako ŵanji. (Mat. 13:22) Tikwenera yayi kukhumba vinandi pa umoyo, ndipo tikwenera kugwiliskira ntchito nyengo na nkhongono zithu ‘kulutilira kupenja dankha Ufumu.’—Mat. 6:22-25, 33.

17-18. Kasi tingachita wuli kuti tileke kupwetekeka mwauzimu?

¹⁷ Nozgekeranithu kuti muzakachitepo kanthu mwaluŵiro. Msilikari wakwenera kunozgekerathu umo wazamuchitira kuti wajivikilire. Nase kuti tivikilire vinthu ivyo Yehova watiŵikizga, tikwenera kuchitapo kanthu mwaluŵiro para tawona chilwani. Kasi ntchivichi chingatovwira kuchita nthena? Tikwenera kunozgekerathu umo tizamuchitira para ŵanthu ŵazakatofya.

¹⁸ Para kuwenge vula yikuru, ŵakumanya vya nyengo ŵakuchenjezgerathu. Chifukwa wuli? Kuti ŵanthu ŵanozgekerethu umo ŵazamuchitira pa nyengo iyo. Mwakuyana waka, nase tikwenera kunozgekerathu umo tizamuchitira para mwangozi waka tawona vya uzaghali, vyankhaza, panji vinthu vya ŵakugaluka pa intaneti panji pa TV. Para tanozgekerathu, tizamuchitapo kanthu mwaluŵiro kuti tileke kupwetekeka mwauzimu na kulutilira kuŵa ŵakutowa mu maso gha Yehova.—Sal. 101:3; 1 Tim. 4:12.

19. Kasi ni vitumbiko wuli ivyo tisangenge para tikusungilira vinthu vyakuzirwa ivyo Yehova watipa?

¹⁹ Tikwenera kusungilira makora vinthu vyakuzirwa ivyo Yehova watiŵikizga. Vinthu ivi ni unenesko wakuzirwa uwo tikuwusanga mu Baibolo, na mulimo wakusambizga ŵanji. Para tichitenge nthena, tiŵenge na njuŵi yituŵa, umoyo wanadi, kweniso tiŵenge ŵakukondwa chifukwa cha kovwira ŵanji kumanya Yehova. Na wovwiri wake, watovwirenge kuti tisungilire ivyo taŵikizgika.—1 Tim. 6:12, 19.