NKHANI YAKUSAMBIRA 37
“Ungapumuzganga Chara Woko Lako”
“Seŵa mbuto yako mulenji, ndipo ungapumuzganga chara woko lako m’paka mise.”—MUPH. 11:6.
SUMU 68 Kuseŵa Mbuto za Ufumu
CHILATO CHA NKHANI IYI *
1-2. Kasi lemba la Mupharazgi 11:6 likukolerana wuli na mulimo wa kupharazga makani ghawemi gha Ufumu?
MU VYARU vinyake ŵanthu para ŵapulika makani ghawemi ŵakukhumba kumanya vinandi. Vili nthena chifukwa chakuti ndivyo ŵalindiliranga. Kweni mu vyaru vinyake ŵanthu ŵakunweka yayi kupulika vya Chiuta panji Baibolo. Kasi uko mukukhala, ŵanthu ŵakuchita wuli na makani ghawemi? Mulimose umo vingaŵira, Yehova wakukhumba kuti tilutilire kupharazga m’paka apo wazamuyowoyera kuti mbwenu.
2 Yehova wali kuŵika kale nyengo, apo mulimo wakupharazga uzamumalira. Kufuma apo ‘umaliro uzamwiza.’ (Mat. 24:14, 36) Kweni pasono, kasi tingachita wuli kuti tipulikire mazgu ghakuti “ungapumuzganga chara woko lako”? *—Ŵazgani Mupharazgi 11:6.
3. Kasi tiwonenge vichi mu nkhani iyi?
3 Nkhani iyo yajumpha yikalongosora vinthu vinayi ivyo tikwenera kuchita kuti tiŵe “ŵalovi ŵa ŵanthu” ŵaluso. (Mat. 4:19) Nkhani iyi, yilongosorenge nthowa zitatu izo zingatovwira kuti tilutilire kupharazga, nanga tingasangana na masuzgo wuli. Tisambirenge chifukwa icho ntchakuzirwa chomene (1) kuŵa maso, (2) kuzikira, na (3) kulutilira kuŵa na chipulikano chakukhora.
ŴANI MASO
4. Chifukwa wuli tikwenera kuŵa maso pa mulimo uwo Yehova watipa?
4 Yesu wakaphalira ŵasambiri ŵake vimanyikwiro vya mu mazuŵa ghaumaliro. Wakamanya kuti vinthu ivi vingazakatimbanizga ŵasambiri ŵake, kuleka kuŵika pakwamba mulimo wa kupharazga. Wakaŵachenjezga ŵasambiri ŵake kuti “muŵenge maso.” (Mat. 24:42) Mu nyengo ya Nowa, kukaŵa vinthu vinandi ivyo vikatimbanizga ŵanthu kuleka kuŵikako mahara ku machenjezgo agho Chiuta wakapeleka. Mazuŵa ghano napo vinthu ivi vingatitimbanizga. (Mat. 24:37-39; 2 Pet. 2:5) Lekani tikwenera kuŵa maso pa mulimo uwo Yehova watipa.
5. Kasi lemba la Milimo 1:6-8 likulongosora wuli vya mulimo wa kupharazga?
5 Mazuŵa ghano tikwenera kuŵikapo mtima chomene kupharazga makani ghawemi gha Ufumu. Yesu wakayowoyerathu kuti ŵalondezgi ŵake ŵazamulutilira kupharazga para iyo wafwa, ndipo ŵazamuchita vinandi pa mulimo uwu kuluska umo iyo wakachitira. (Yoh. 14:12) Yesu wati wafwa, ŵasambiri ŵanyake ŵakawelera ku ulovi. Yesu wati wawuskika, wakachita munthondwe ndipo ŵasambiri ŵake ŵanyake ŵakakora somba zinandi. Wati wachita munthondwe uwu, Yesu wakadidimizga kuti mulimo wakupharazga na kuzgora ŵanthu kuŵa ŵasambiri ndiwo ngwakuzirwa chomene kuluska mulimo uliwose. (Yoh. 21:15-17) Yesu wati wakhala pachoko waka kuluta kuchanya, wakaphalira ŵasambiri ŵake kuti mulimo wakupharazga uwo wambiska, uzamuthandazgika kujumpha mphaka za Israyeli. (Ŵazgani Milimo 1:6-8.) Vyaka vichoko waka vyati vyajumphapo, Yesu wakalongora mboniwoni mpositole Yohane ya vinthu ivyo vizamuchitika “mu zuŵa la Fumu.” * Chimoza mwa vinthu ivyo Yohane wakawona, yikaŵa mboniwoni yakukondweska ya mungelo uyo ‘wakaŵa na makani ghawemi ghamuyirayira kuti wapharazge ku mtundu uliwose, fuko lililose, lulimi lulilose, na ŵanthu wose.’ (Chivu. 1:10; 14:6) Apa vikulongolerathu kuti khumbo la Yehova mazuŵa ghano ndakuti tipharazge makani ghawemi m’paka paumaliro.
6. Kasi tingachita wuli kuti tilutilire kuŵika pakwamba mulimo wa kupharazga?
6 Tingalutilira kuŵika pakwamba mulimo wa kupharazga usange tikughanaghanira vyose ivyo Yehova wakuchita kuti watovwire. Mwachiyelezgero, wakutipa chakurya chinandi chauzimu nga ni mabuku ghakupulintika na gha pa Intaneti, vyakupulikizga waka, mavidiyo na JW Broadicasting. Ghanaghanirani fundo iyi: Webusayiti yithu yili mu viyowoyero vyakujumpha 1,000. (Mat. 24:45-47) Ŵanthu mu charu ichi mbakugaŵikana chifukwa cha ndyali, visopa, kweniso chifukwa chakuti ŵanyake mbasambazi ŵanyake mbakavu. Kweni ŵateŵeti ŵa Chiuta ŵakujumpha 8 miliyoni mbakukolerana pa charu chose. Mwachiyelezgero, pa Chinkhondi, Epulero 19, 2019, Ŵakaboni pa charu chose ŵakawonelera vidiyo ya lemba la zuŵa. Ichi chikalongora kuti mbakukolerana. Mise yake pa zuŵa ili, ŵanthu 20,919,041 ŵakiza pa Chikumbusko cha nyifwa ya Yesu. Titangwanikenge chomene na mulimo wa kupharazga Ufumu para tikughanaghanira mwaŵi uwo tili nawo wakuwona vinthu viwemi ivyo vikuchitika mazuŵa ghano.
Yesu wakazomerezga chilichose yayi kumutimbanizga kupharazga unenesko (Wonani ndime 7)
7. Kasi kuyezga Yesu kungatovwira wuli kuŵika pakwamba mulimo wa kupharazga?
7 Nthowa yinyake iyo yingatovwira kuti tiŵikenge pakwamba mulimo wa kupharazga, nkhuyezga Yesu. Wakazomerezga chilichose yayi kuti chimutimbanizge kupharazga. (Yoh. 18:37) Wakakopeka yayi apo Satana wakakhumbanga kumupa “maufumu ghose gha pa charu na uchindami wawo.” Kweniso wakakopeka yayi apo ŵanji ŵakakhumbanga kuti waŵe fumu. (Mat. 4:8, 9; Yoh. 6:15) Wakazomerezga yayi kutimbanizgika na usambazi, nesi kofyeka na ŵakususka. (Luka 9:58; Yoh. 8:59) Para chipulikano chithu chayezgeka, tingalutilira kuŵika pakwamba mulimo wa kupharazga para tingakumbuka ulongozgi wa mpositole Paulosi. Wakachiska Ŵakhristu kuyezga Yesu mwakuti ‘ŵaleke kuvuka na kugongowa.’—Heb. 12:3.
ZIKIRANI
8. Kasi kuzikira ni vichi, ndipo chifukwa wuli nkhwakukhumbikwa chomene sono?
8 Ŵanthu ŵakuzika ŵakulindilira m’paka apo vinthu visinthirenge. Tikwenera kuŵa ŵakuzikira pa vinthu vyakupambanapambana. Nyengo zinyake tingakhumba kuti suzgo ilo lilipo limare, panji nyengo zinyake talindilira chinthu chinyake chiwemi kwa nyengo yitali. Ntchimi Habakuku yikakhumbanga chomene kuti vinthu viheni ivyo vikachitikanga mu Yuda vimare. (Hab. 1:2) Ŵasambiri ŵa Yesu ŵakaghanaghananga kuti Ufumu “uwonekenge nyengo yeneyiyo” na kuŵafwatura ku muwuso wankhaza wa Romu. (Luka 19:11) Nase tikukhumba chomene kuti Ufumu wa Chiuta uwuskepo viheni ndipo charu chizure na ŵanthu ŵakupulikira Chiuta. (2 Pet. 3:13) Ndipouli, tikwenera kuzikira na kulindilira nyengo iyo Yehova wali kusankha. Wonani nthowa zinyake izo Yehova wakutisambizgira kuti tiŵe ŵakuzikira.
9. Yowoyani viyelezgero ivyo vikulongora kuti Yehova ngwakuzikira.
9 Yehova ntchiyelezgero chiwemi pa nkhani ya kuzikira. Wakamupa Nowa nyengo yakukwana kuzenga chingalaŵa kweniso kupharazga. (2 Pet. 2:5; 1 Pet. 3:20) Yehova wakategherezga apo Abrahamu wakamufumbanga mafumbo mwakuwerezgawerezga pa nkhani ya kuparanya ŵanthu ŵaheni mu Sodomu na Gomora. (Gen. 18:20-33) Kwa vyaka vinandi, Yehova wakazikira chomene na mtundu wambura kugomezgeka wa Israyeli. (Neh. 9:30, 31) Tikuwonaso kuti Yehova ngwakuzikira chifukwa wapeleka nyengo yakukwana ku ŵanthu wose kuti “ŵang’anamuke mtima.” (2 Pet. 3:9; Yoh. 6:44; 1 Tim. 2:3, 4) Chiyelezgero cha Yehova chikutovwira kuti nase tikwenera kuzikira apo tikulutilira kupharazga na kusambizga. Kweniso wakutisambizga kwizira mu viyelezgero ivyo vikusangika mu Mazgu ghake.
Nga ni mulimi wakulimbikira kweniso wakuzikira, nase tikulindilira vitumbiko chifukwa cha kulimbikira kwithu (Wonani ndime 10-11)
10. Kasi chiyelezgero cha mulimi icho chili pa Yakobe 5:7, 8 chikutisambizga vichi?
10 Ŵazgani Yakobe 5:7, 8. Chiyelezgero cha mulimi chikutisambizga umo tingaŵira ŵakuzikira. Unenesko ngwakuti mbuto zinyake zikukura luŵiro chomene. Ndipouli, mbuto zinandi izo zikupambika vipambi, zikutora nyengo kuti ziche. Nyengo yakupandira mu Israyeli yikaŵanga pafupifupi myezi 6. Mulimi wakapandanga mbuto yake para vula yakwamba yalokwa ndipo wakavunanga para chifuku chili kuumaliro. (Mrk. 4:28) Nase mphanyi tayezga mulimi pa nkhani ya kuzikira. Kweni ichi ntchipusu yayi.
11. Kasi kuzikira kungatovwira wuli mu uteŵeti?
11 Kanandi ŵanthu ŵambura kufikapo para ŵachita chinthu, ŵakukhumba kuti uwemi wake ŵawuwone nyengo yeneyiyo. Kweni para tikukhumba kuti munda withu upambike, tikwenera kuŵikapo mtima chomene. Tikwenera kulima, kupanda, kulimilira, na kuthilira. Mulimo wakupharazga nawo ukukhumba kuŵikapo mtima. Pakutora nyengo kuti tovwire munthu uyo tikusambira nayo Baibolo kuti waleke sankho. Kuzikira kutovwirenge kuti tileke kugongowa para ŵanthu ŵakutitegherezga yayi. Tikweneraso kuzikira nanga ni para ŵanthu ŵakutegherezga. Tingamuchichizga yayi munthu uyo tikusambira nayo Baibolo kuti waŵe na chipulikano. Nyengo zinyake nanga mbasambiri ŵa Yesu, ŵakapulikiskanga luŵiro yayi ng’anamuro la ivyo Yesu wakasambizganga. (Yoh. 14:9) Tikumbuke kuti ise tikupanda waka na kuthilira, kweni Chiuta ndiyo wakukuzga.—1 Kor. 3:6.
12. Kasi tingalongora wuli kuzikira para tikupharazgira ŵabali ŵithu?
12 Nyengo zinyake vingatisuzga chomene kuzikira para tikupharazgira ŵamumbumba yithu awo Mbakaboni yayi. Fundo ya pa Mupharazgi 3:1, 7 yingatovwira. Yikuti: Pali “nyengo ya kukhala chete na nyengo ya kuyowoya.” Nkharo yithu yiwemi yingawovwira ŵabali ŵithu kuti ŵategherezge uthenga withu. Nangauli vili nthena, kweni nyengo zose tikwenera kuŵa ŵakunozgeka kuŵaphalira vya Yehova. (1 Pet. 3:1, 2) Apo tikupharazga na kusambizga, tikwenera kuŵa ŵakuzikira ku ŵanthu wose kusazgapo na ŵamumbumba yithu wuwo.
13-14. Kasi ni viyelezgero wuli vinyake ivyo tikwenera kuyezga pa nkhani ya kuzikira?
13 Tingasambiraso kuzikira ku ŵanthu ŵakugomezgeka awo ŵakuyowoyeka mu Baibolo kweniso ŵamazuŵa ghano. Habakuku wakakhumbanga kuti viheni vimare, kweni wakalongora kuzikira apo wakati: “Nilutilirenge kwimilira pa malo ghane gha ulinda.” (Hab. 2:1) Mpositole Paulosi wakakhumbanga chomene ‘kumalizga’ uteŵeti wake. Kweni wakazikira, ndipo wakalutilira ‘kuchitira ukaboni mwakukwana makani ghawemi.’—Mil. 20:24.
14 Wonani chiyelezgero cha ŵakutorana ŵanyake awo ŵakasambira Sukulu ya Giliyadi, na kutumizgika ku charu icho kukaŵa Ŵakaboni ŵachoko waka kweniso uko ŵanthu ŵanandi ŵakaŵa Ŵakhristu yayi. Ku charu ichi, ŵanthu ŵachoko waka ndiwo ŵakakhumbanga kusambira Baibolo. Kweni ndimo vikaŵira yayi na ŵanyawo awo ŵakaŵira lumoza ku Giliyadi, awo ŵakatumika mu vyaru vinyake. Ŵanyawo aŵa, ŵakaŵaphalira kuti ku vyaru ivyo ŵakuteŵetera, ŵakusambira Baibolo na ŵanthu ŵanandi awo ŵakukura mwauzimu. Nangauli ŵanthu ŵanandi ŵakakhumbanga yayi kutegherezga, kweni ŵakutorana aŵa ŵakalutilira kupharazga. Ŵati ŵapharazga vyaka 8 ku chigaŵa icho chikawonekanga kuti ŵanthu ŵakutegherezga viŵi yayi, ŵakakondwa kuwona kuti yumoza mwa ŵanthu awo ŵakasambiranga nawo Baibolo wakubatizika. Kasi viyelezgero vya ŵanthu ŵa mu nyengo yakale na mu nyengo yithu yino vikutisambizga vichi? Ŵanthu ŵakugomezgeka aŵa ŵakapumuzga yayi mawoko ghawo panji kuti kuleka kuŵa ŵamwamphu, ndipo Yehova wakaŵatumbika chifukwa cha kuzikira kwawo. Mphanyi nase ‘tayezga awo ŵakuhara malayizgo chifukwa ŵali na chipulikano ndiposo mbakuzikira.’—Heb. 6:10-12.
LUTILIRANI KUŴA NA CHIPULIKANO CHAKUKHORA
15. Kasi chipulikano chikutovwira wuli kuti tiŵikepo mtima kupharazga?
15 Pakuti tili na chipulikano mu uthenga uwo tikupharazga, tikukhumba chomene kuphalirako ŵanthu ŵanandi. Tikugomezga malayizgo agho ghali mu Mazgu gha Chiuta. (Sal. 119:42; Yes. 40:8) Tawona mauchimi gha mu Baibolo ghakufiskika mu nyengo yithu. Kweniso tawona ŵanthu ŵakusintha umoyo wawo chifukwa cha kulondezga ulongozgi wa mu Baibolo. Ukaboni uwu ukutisimikizgira kuti makani ghawemi gha Ufumu ghakwenera kupharazgika ku munthu waliyose.
16. Kuyana na Salimo 46:1-3, kasi kuŵa na chipulikano mwa Yehova na Yesu vikutovwira wuli kuti tiŵikepo mtima kupharazga?
16 Tiliso na chipulikano mwa Yehova, uyo ni mwenecho wa uthenga uwo tikupharazga. Kweniso tili na chipulikano mwa Yesu, uyo ni Themba la Ufumu. (Yoh. 14:1) Kwali tisangane na masuzgo wuli, nyengo zose Yehova waŵenge chiphokwero chithu na nkhongono zithu. (Ŵazgani Salimo 46:1-3.) Kweniso tikugomezga kuti Yesu wakulongozga mulimo wakupharazga kufuma kuchanya, wakugwiliskira ntchito nkhongono na mazaza agho Yehova wali kumupa.—Mat. 28:18-20.
17. Yowoyani chiyelezgero icho chikulongora chifukwa icho tikwenera kulutilira kupharazga.
17 Chipulikano chikutovwira chomene kugomezga kuti Yehova watumbikenge ivyo tikuchita, nyengo zinyake munthowa iyo takhazganga yayi. (Muph. 11:6) Mwachiyelezgero, zuŵa lililose ŵanthu ŵakuwona kuti taŵika mabuku pa tumashelufu twamatayala. Kasi iyi ni nthowa yiwemi yakupharazgira? Enya. Uteŵeti Withu wa Ufumu wa Novembala 2014 ukayowoya vya mwana munyake wa pa yunivesite uyo wakakhumbanga kulemba nkhani yakukhwaskana na Ŵakaboni ŵa Yehova. Wakayisanganga yayi Nyumba ya Ufumu, kweni wakasanga waka kashelufu kithu ako ŵakaŵikapo mabuku pa sukulu yake, ndipo wakalisanga buku ilo mukaŵa nkhani yakukolerana na ivyo wakakhumbanga kulemba. Nyengo yikati yajumphapo, wakabatizika ndipo sono ni mupayiniya wanyengo zose. Vyakuchitika vyanthena vikutipa nkhongono kuti tilutilire kupharazga chifukwa vikulongora kuti pachali ŵanthu awo ŵakukhumba uthenga wa Ufumu.
ŴIKANIPO MTIMA KUTI MULEKE KUPUMUZGA MAWOKO GHINU
18. Chifukwa wuli tikugomezga kuti mulimo wakupharazga Ufumu ufiskikenge nga umo Yehova wakukhumbira?
18 Tili na chigomezgo chose kuti mulimo wakupharazga makani ghawemi gha Ufumu uzamumara pa nyengo yakwenelera. Ghanaghanirani ivyo vikachitika mu mazuŵa gha Nowa. Yehova wakalongora kuti wakuchita nadi vinthu pa nyengo yake para walayizga. Vyaka 120 pambere Chigumula chindachitike, Yehova wakaŵikirathu nyengo iyo chizamuchitikira. Vyaka vinandi vikati vyajumphapo, Yehova wakatuma Nowa kuti wazenge chingalaŵa. Kwa vyaka 40 panji 50 pambere Chigumula chindize, Nowa wakalutilira kugwira ntchito mwakulimbikira. Nangauli ŵanthu ŵakamupulikiranga yayi, kweni wakalutilira kuŵachenjezga m’paka apo Yehova wakamuphalira kuti wambe kunjizga vinyama mu chingalaŵa. Ndipo nyengo yikati yakwana, “Yehova wakajarapo pa mulyango.”—Gen. 6:3; 7:1, 2, 16.
19. Kasi ni vinthu wuli viwemi ivyo tikulindilira para tipumuzgenge yayi mawoko ghithu?
19 Sonosono apa, Yehova wazamutiphalira kuti tamalizga mulimo wakupharazga makani ghawemi gha Ufumu. Kufuma apo, wazamuparanya charu cha Satana ichi na kuzgora charu kuŵa paradiso umo muzamuŵa ŵanthu ŵakupulikira Chiuta. Tiyeni tilutilire kuyezga Nowa, Habakuku, na ŵanyake awo ŵakapumuzga yayi mawoko ghawo. Mphanyi taŵikapo mtima kuchita mulimo wakupharazga, kuŵa ŵakuzikira, na kukhozga chipulikano chithu mwa Yehova kweniso mu malayizgo ghake.
SUMU 75 “Ndine Pano, Nitumani!”
^ ndime 5 Nkhani iyo yajumpha, yikachiska chomene awo ŵakusambira Baibolo kuti ŵazomere ntchemo ya Yesu yakuti ŵaŵe ŵalovi ŵa ŵanthu. Nkhani iyi, yilongosorenge nthowa zitatu izo zingawovwira ŵapharazgi wose, kwali ŵakamba ni kale kupharazga panji yayi, kuti ŵalutilire kupharazga makani ghawemi gha Ufumu m’paka apo Yehova wazamuyowoyera kuti mbwenu.
^ ndime 2 MAZGU GHALONGOSOREKA: Mu nkhani iyi, mazgu ghakuti “ungapumuzganga chara woko lako,” ghakung’anamura kuti tikwenera kuŵikapo mtima kuti tilutilire kupharazga makani ghawemi m’paka apo Yehova wazamuyowoyera kuti mbwenu.
^ ndime 5 “Zuŵa la Fumu” likamba Yesu wati waŵa Themba mu 1914, ndipo lizamumara para vyaka 1,000 vya muwuso wake vyamara.
