1-2. (a) Kuyana na lemba la Zintharika 16:31, kasi tikwenera kuŵawona wuli ŵachekuru ŵakugomezgeka? (b) Kasi tizgorenge mafumbo wuli mu nkhani iyi?

KU UNITED STATES kuli malo ghanyake ghakuchezgerako, uko munthu wangawona dayamondi wali waka pasi. Kweni dayamondi uyu ngwambura kunozgeka makora kuti ŵangapangira majuda. Ntheura ŵanandi awo ŵakuwona dayamondi uyu ŵakumanya yayi kuti ni malibwe yamtengo wapatali ndipo ŵakuŵikako mahara yayi.

² Nga umo waliri dayamondi yura, ŵabali na ŵadumbu ŵithu ŵakugomezgeka awo mbachekuru nawo mbakuzirwa chomene. Mazgu gha Chiuta ghakuyaniska mbuha zawo na mphumphu. (Ŵazgani Zintharika 16:31; 20:29) Ndipouli, ntchipusu chomene kuleka kuŵikako mahara ku ŵanthu ŵakuzirwa aŵa. Ŵawukirano awo ŵakumanya kuti ŵachekuru mbakuzirwa chomene ŵangasambirako vinthu vyakuzirwa chomene kuluska usambazi wa kuthupi. Mu nkhani iyi, tizgorenge mafumbo agha: Chifukwa wuli Yehova wakuwona kuti ŵachekuru mbakuzirwa? Chifukwa wuli ŵabali na ŵadumbu ŵachekuru mbakuzirwa chomene mu gulu la Yehova? Kasi tingachita wuli kuti tisambireko kwa iwo?

3. Kuyana na Salimo 92:12-15, chifukwa wuli ŵachekuru mbakuzirwa kwa Yehova?

³ Ŵachekuru ŵakugomezgeka mbakuzirwa chomene kwa Yehova Chiuta. Iyo wakumanya makora wunthu wawo ndipo wakuzirwiska mikhaliro yawo yiwemi. Wakukondwa chomene para ŵachekuru ŵakugaŵirako ŵawukirano vinjeru ivyo ŵasanga kwa vyaka vinandi ivyo ŵateŵetera Yehova. (Yobu 12:12;  Zinth. 1:1-4) Yehova wakuzirwiskaso kuzizipizga kwawo. (Mal. 3:16) Nangauli ŵasanganapo na masuzgo ghanandi pa umoyo wawo, kweni ŵalutilira kukhozga chipulikano chawo mwa Yehova. Sono chigomezgo chawo cha munthazi ntchakukhora chomene kuluska apo ŵakasambiranga waka unenesko. Ndipo Yehova wakuŵatemwa chomene chifukwa ŵakulutilira kupharazga zina lake nangauli ‘mbachekuru.’​—Ŵazgani Salimo 92:12-15.

4. Kasi ntchivichi chingakhozga ŵabali na ŵadumbu ŵithu ŵachekuru?

⁴ Usange mwamba kuchekura, manyani kuti Yehova wakukumbuka milimo yose iyo mwachita kumanyuma uku. (Heb. 6:10) Mwakhozgera chomene mulimo wakupharazga, ndipo Adada ŵithu ŵakuchanya ŵakukondwa namwe chomene. Mwazizipizga masuzgo, ndipo ghanyake mwa igho ghakaŵa ghakuŵinya chomene. Mwapulikira na kuvikilira fundo zaurunji za mu Baibolo, kweniso mukufiska milimo yakuzirwa mu gulu la Yehova, ndipo mukusambizgakoso ŵanji. Mwachita vyose ivyo mungafiska kuti mwendere lumoza na gulu la Yehova. Mwawovwira na kuchiska ŵanji awo ŵakuchita uteŵeti wanyengozose. Yehova Chiuta wakumutemwani chomene chifukwa chakuti ndimwe ŵakugomezgeka. Ndipo wakulayizga kuti “waŵasidenge yayi ŵakugomezgeka ŵake.” (Sal. 37:28) Kweniso wakumulayizganiso kuti: “M’paka muŵe na mbuha, nimuyeghaninge nipera.” (Yes. 46:4) Ntheura lekani kughanaghana kuti ndimwe ŵambura kuzirwa mu gulu la Yehova chifukwa chakuti mwachekura. Ndimwe ŵakuzirwa chomene.

5. Kasi ŵachekuru ŵakwenera kukumbuka vichi?

⁵ Ŵachekuru mbakovwira chomene mu gulu la Yehova mu nthowa zinandi. Nangauli pasono ŵangaŵavya nkhongono izo ŵakaŵa nazo pakwamba, kweni ŵakumanya vinandi chifukwa cha ivyo ŵakumana navyo pa umoyo wawo kwa vyaka vinandi. Yehova wangalutilira kuŵagwiliskira ntchito munthowa zakupambanapambana, nga umo tiwonerenge mu viyelezgero vyakale na vyasono.

6-7. Pelekani viyelezgero kufuma mu Baibolo vya ŵachekuru awo Yehova wakaŵatumbika chifukwa cha kumuteŵetera mwakugomezgeka.

⁶ Mu Baibolo muli viyelezgero viwemi vya ŵanthu ŵakugomezgeka awo ŵakalutilira kuteŵetera Yehova apo ŵakaŵa ŵachekuru.  Mwachiyelezgero, Mozesi wakaŵa na vyaka pafupifupi 80 apo wakamba kuteŵetera nga ntchimi ya Yehova kweniso mulongozgi wa Israyeli. Daniyeli nayo, nanga ni apo wakaŵa na vyaka vyakujumpha 90, Yehova wakaŵa wachali kumugwiliskira ntchito kuŵa ntchimi yake. Ndiposo mpositole Yohane nayo wakwenera kuti wakaŵa na vyaka 90 apo wakalembanga buku la Chivumbuzi mwakovwirika na mzimu wa Chiuta.

⁷ Ŵanthu ŵanyake ŵanandi ŵakugomezgeka, ŵakaŵa ŵakumanyikwa yayi, kweni Yehova wakaŵamanyanga ndipo wakaŵatumbika chifukwa cha kugomezgeka kwawo. Mwachiyelezgero, Simiyoni uyo wakaŵa munthu “murunji na wakutemwa kusopa,” wakuzunulika chomene yayi mu Baibolo, kweni Yehova wakamumanyanga, ndipo wakamupa mwaŵi wapadera wakuwona Yesu apo wakaŵa bonda na kuchima vya mwana na amama ŵake. (Luka 2:22, 25-35) Ghanaghaniraniso za ntchimi yanakazi Ana iyo yikaŵa chokoro. Ana wakaŵa na vyaka 84 kweni “nyengo zose wakasangikanga pa tempile.” Yehova wakamutumbika chifukwa nyengo zose wakalutanga ku tempile ndipo wakamuzomerezga kuwona Yesu apo wakaŵa bonda. Wose Simiyoni na Ana ŵakaŵa ŵakuzirwa chomene kwa Yehova.​—Luka 2:36-38.

8-9. Kasi mudumbu munyake wakalutilira kuchita vichi mu gulu la Yehova wati waŵa chokoro?

⁸ Mazuŵa ghano napo, ŵachekuru ŵakugomezgeka ŵanandi ni viyelezgero viwemi ku ŵawukirano. Wonani ivyo vikachitikira Mudumbu Lois Didur. Wakaŵa na vyaka 21 pera apo wakambanga kuteŵetera nga mupayiniya wapadera ku Canada. Pamanyuma, iyo na mfumu wake, John, ŵakachita uteŵeti wakwendakwenda kwa vyaka vinandi. Kufuma apo ŵakateŵetera pa Beteli ya Canada kwa vyaka vyakujumpha 20. Apo Lois wakaŵa na vyaka 58, iyo na John ŵakaphalirika kuti ŵakateŵeterenge ku Ukraine. Kasi ŵakachita wuli? Kasi ŵakaghanaghana kuti mbachilara chomene kuti ŵasamire ku charu chinyake? Iwo ŵakazomera uteŵeti uwu, ndipo John wakimikika kuti wateŵeterenge mu Komiti ya Munthavi ku charu ichi. Pati pajumpha vyaka 7 kufuma apo John wakafwira, Lois wakasankha kuti walutilire kuchita uteŵeti wake. Pasono Lois wali na vyaka 81. Kweni wakulutilira kuteŵetera Yehova mwakugomezgeka na mbumba ya Beteli, ndipo wose ŵakumutemwa chomene.

⁹ Ŵanthu awo ni vyokoro nga ni Lois, ŵangamanyikwa viŵi yayi nga umo ŵakamanyikwiranga apo ŵafumu ŵawo ŵakaŵa ŵamoyo, kweni ŵachali ŵakuzirwa chomene. Yehova wakuŵazirwiska chomene ŵadumbu awo ŵakawovwira ŵafumu ŵawo kwa vyaka vinandi ndipo ŵakulutilira kumuteŵetera mwakugomezgeka. (1 Tim. 5:3) Ŵadumbu aŵa, ŵakukhozgaso chomene ŵawukirano.

10. Kasi ntchiyelezgero wuli chiwemi icho Tony walongora?

¹⁰ Ŵachekuru ŵanandi ŵakugomezgeka awo ŵakukhala ku malo agho ŵakusungirako ŵachekuru, nawo mbakuzirwa chomene. Mwachiyelezgero, mubali munyake zina lake Tony pasono wakukhala ku malo ghanthena agha. Wakabatizika ku Pennsylvania, U.S.A., mu  Ogasiti 1942 apo wakaŵa na vyaka 20. Wakati wabatizika waka, wakaphalirika kuti wanjire usilikari. Kweni chifukwa chakuti wakakana, wakajalirika mu jele kwa vyaka viŵiri na hafu. Iyo na muwoli wake, Hilda, ŵakalera ŵana ŵawo ŵaŵiri mu unenesko. Kwa vyaka, Tony wakateŵeterapo mu mipingo yitatu nga mulaŵiliri wakulongozga (uyo pasono tikuti mulaŵiliri wa milimo ya wupu wa ŵalara) kweniso mulaŵiliri wa ungano wa dera. Wakalutangaso ku jele kukapangiska masambiro gha Baibolo kweniso kukachitiska maungano. Nangauli wali na vyaka 98, Tony wakuleka yayi kuteŵetera Yehova. Wakulutilira kuchita vyose ivyo wangafiska kuteŵetera Yehova pamoza na ŵabali na ŵadumbu mu mpingo wake.

11. Kasi tingalongora wuli kuti tikuzirwiska ŵachekuru awo ŵakukhala ku malo uko ŵakusungirako ŵachekuru?

¹¹ Kasi tingalongora wuli kuti tikuŵaghanaghanira ŵachekuru awo ŵakukhala ku malo uko ŵakusungirako ŵachekuru? Usange ntchamachitiko, ŵalara ŵangaŵawovwira kuti ŵasangikenge pa maungano panji kupulikizga waka maungano kweniso kuti ŵapharazgenge. Tingalongoraso kuti tikuŵaghanaghanira para tingaŵayenderako panji kuŵayimbirako foni. Tikwenera kuŵaghanaghanira mwapadera ŵachekuru awo ŵakukhala ku malo uko ŵakusungirako ŵachekuru uko nkhutali na mpingo wawo. Para tingaleka kuŵa maso, tingaŵaluwa ŵachekuru aŵa. Para tikuyowoyeskana na ŵabali na ŵadumbu ŵachekuru, nyengo zinyake ŵanyake chingaŵaŵira chakusuzga kuti ŵalongosore umo ŵakujipulikira. Kweni tingakhozgeka chomene para tingapatura nyengo kuŵafumba mafumbo na kutegherezga apo ŵakutiphalira chimwemwe icho ŵasanga mu gulu la Yehova.

12. Kasi tingasanga vichi mu mpingo withu?

¹² Tingazizwa kusanga kuti mu mpingo withu muli ŵachekuru ŵa viyelezgero viwemi chomene. Mudumbu munyake zina lake Harriette wateŵetera Yehova mwakugomezgeka kwa vyaka vinandi mu mpingo wake ku New Jersey, U.S.A. Pamanyuma wakasama na kwamba kukakhala na mwana wake. Ŵabali ku mpingo uko wakasamira ŵakapatura nyengo kuti ŵamanyane nayo, ndipo ŵakawona kuti ngwakuzirwa chomene. Wakaŵakhozga na vyakuchitika vyakupambanapambana ivyo wakasangana navyo mu upharazgi wati wasambira waka unenesko m’ma 1920. Panyengo iyo, nyengo zose para wakunjira mu upharazgi wakanyamuranga muswachi kuchitira kuti nyengo zinyake wangakakika na kuŵikika mu jele. Nakuti mu 1933 kaŵiri kose wakakhalapo mu jele kwa sabata yimoza. Panyengo zanthena izi, mfumu wake uyo wakaŵa Kaboni yayi wakamovwiranga. Mwakuti apo wakaŵa mu jele, ndiyo wakapweleleranga ŵana ŵawo ŵatatu. Mbunenesko nadi kuti ŵachekuru nga ni Harriette ŵakwenera kuchindikika.

13. Kasi tasambira kuti ŵachekuru mbakuzirwa wuli mu gulu la Yehova?

¹³ Ŵabali na ŵadumbu ŵithu ŵachekuru mbakuzirwa chomene kwa Yehova na gulu lake. Iwo ŵawona umo Yehova watumbikira gulu lake munthowa zinandi kweniso umo watumbikira waliyose payekha. Ŵasambira vinthu vyakuzirwa pa vinthu vinyake ivyo ŵakanangiskanga. Muŵawonenge kuti ni “chisimi cha vinjeru,” ndipo musambirengeko kwa iwo. (Zinth. 18:4) Para mupaturenge nyengo kuti muŵamanye makora, chipulikano chinu chikhorenge ndipo musambirengeko vinandi.

14. Kasi lemba la Dotoronome 32:7, likuchiska ŵawukirano kuchita vichi?

¹⁴ Yambani ndimwe kuyowoya nawo ŵachekuru. (Ŵazgani Dotoronome 32:7.) Nyengo zinyake ŵangaŵa kuti ŵakuwona makora yayi, ŵakwenda pachokopachoko, kweniso panji  ŵakuyowoya mwakukhizga mazgu. Kweni nawo ŵachali kukhumba kuchita vinandi, ndipo ŵali kupanga “zina liwemi” kwa Yehova. (Muph. 7:1) Mukumbukenge chifukwa icho Yehova wakuŵazirwiskira. Ndipo lutilira kuŵachindika. Muŵe nga ni Elisha. Wakakhumbisiska kukhala pafupi na Eliya zuŵa laumaliro ilo ŵakaŵira lumoza. Katatu kose Elisha wakayowoya kuti “nimulekaninge chara.”​—2 Mathe. 2:2, 4, 6.

15. Kasi ni mafumbo wuli agho tingaŵafumba ŵachekuru?

¹⁵ Longorani kuti mukukondwa nawo ŵachekuru mwakuŵafumbako mafumbo. (Zinth. 1:5; 20:5; 1 Tim. 5:1, 2) Mungaŵafumba mafumbo nga agha: “Apo mukaŵa muwukirano, ntchivichi chikamukhorweskani kuti mwasanga unenesko?” “Kasi vinthu ivyo vyamuchitikiranipo pa umoyo vyamovwirani wuli kusendelera pafupi chomene na Yehova?” “Kasi ntchivichi chamovwirani kulutilira kuŵa ŵakukondwa pakuteŵetera Yehova?” (1 Tim. 6:6-8) Ndipo mutegherezgenge para ŵakumulongosolerani.

16. Kasi pakuŵa chandulo wuli para ŵachekuru na ŵawukirano ŵakuyowoyeskana?

¹⁶ Para ŵachekuru na ŵawukirano ŵakuyowoyeskana, wose ŵakukhozgeka. (Rom. 1:12) Ntheura imwe ŵawukirano para muchezgenge na ŵachekuru, chigomezgo chinu chakuti Yehova wakupwelelera ŵanthu ŵake chiŵenge chakukhora, ndipo ŵachekuru nawo ŵajipulikenge kuti ŵakutemweka. Kweniso ŵachekuru ŵakondwenge chomene kumuphalirani umo Yehova waŵatumbikira.

17. Chifukwa wuli tingayowoya kuti ŵachekuru ŵakuŵa ŵakutowa chomene apo vyaka vikujumphapo?

¹⁷ Kutowa kwakuthupi kukumara para munthu wakukura, kweni awo mbakugomezgeka kwa Yehova ŵakuŵa ŵakutowa chomene kwa iyo apo vyaka vikujumphapo. (1 Tes. 1:2, 3) Chifukwa wuli fundo iyi njaunenesko? Chifukwa kwa vyaka vinandi ŵakuzomerezga mzimu wa Chiuta kuti uŵawumbe na kuŵa na mikhaliro yiwemi. Para tikulutilira kuŵamanya makora ŵachekuru ŵithu, kuŵachindika na kusambirako kwa iwo, tilutilirenge kuŵawona kuti mbakuzirwa chomene.

18. Kasi tizamudumbiskana vichi mu nkhani yakulondezgapo?

¹⁸ Mpingo ukuŵa wakukhora chomene para ŵawukirano ŵakuzirwiska ŵachekuru kweniso para ŵachekuru ŵakuzirwiska ŵawukirano. Mu nkhani yakulondezgapo, tizamudumbiskana umo ŵachekuru ŵangalongolera kuti ŵakuchindika ŵawukirano mu mpingo.