NKHANI YAKUSAMBIRA 39
Para Uyo Tikumutemwa Waleka Kuteŵetera Yehova
“Kanandi waka . . . ŵakamuŵinyiska mtima.”—SAL. 78:40.
SUMU 102 ‘Wovwirani Awo Ŵakukhumbikwira Wovwiri’
IVYO VILI MU NKHANI IYI *
1. Kasi munthu wangajipulika wuli para munyake mu mbumba wasezgeka?
KASI munthu munyake uyo mukumutemwa wali kusezgeka mu mpingo? Para vili nthena, tikumanya kuti chikuŵa chakuŵinya chomene. Mudumbu munyake zina lake Hilda wakuti: “Mfumu wane wakugomezgeka wakati watayika tati takhala mu nthengwa vyaka 41, nkhaghanaghananga kuti likaŵa suzgo lakuŵinya chomene pa masuzgo ghose agho ningasangana nagho. * Kweni mwana wane munyamata wati waleka kuteŵetera Yehova, na kuleka muwoli wake na ŵana ŵake, ndipo nkhaŵa na chitima chikuru chomene.”
Yehova wakumanya umo vikuŵinyira para munyithu uyo tikumutemwa wasezgeka (Wonani ndime 2-3) *
2-3. Kuyana na Salimo 78:40, 41, kasi Yehova wakujipulika wuli para ŵateŵeti ŵake ŵanyake ŵaleka kumuteŵetera?
2 Ghanaghanirani umo Yehova wakajipulikira ŵangelo ŵanyake ŵakati ŵamugalukira. (Yuda 6) Ndipo ghanaghaniraniso umo wakaŵiranga na chitima apo Ŵaisrayeli awo wakaŵatemwanga chomene, ŵakamugalukiranga kanandi waka. (Ŵazgani Salimo 78:40, 41.) Manyani kuti Adada ŵithu ŵakuchanya nawo vikuŵaŵinya chomene para munyake uyo tikumutemwa waleka kuŵateŵetera. Ŵakumanya chitima icho mukuŵa nacho. Pakuti iwo mbalusungu, ŵamukhozganinge na kumupani wovwiri uwo mukukhumbikwira.
3 Mu nkhani iyi, tiwonenge ivyo tingachita kuti Yehova watovwire para munyake uyo tikumutemwa wasezgeka mu mpingo. Tiwonengeso umo tingawovwilira ŵanyithu mu mpingo para mubali wawo wasezgeka. Kweni chakwamba, tiyeni tiwone maghanoghano ghakubudika agho tikwenera kugega.
LEKANI KUJIYIMBA MULANDU
4. Kasi ŵapapi ŵanandi ŵakujipulika wuli para mwana wawo munyamata panji msungwana waleka kuteŵetera Yehova?
4 Para mwana munyamata panji msungwana waleka kuteŵetera Yehova, ntchakawiro ku ŵapapi kughanaghana kuti mphanyi ŵakachita vinandi kuti ŵawovwire mwana wawo kulutilira kuteŵetera Yehova. Mubali Luke mwana wake munyamata wati wasezgeka, wakayowoya kuti: “Nkhajiyimba mulandu. Nakuti para nagona usiku nkhalotanga na vinthu viheni wuwo. Nyengo zinyake nkhaliranga ndipo mtima ukaŵinyanga.” Elizabeth uyo nayo mwana wake munyake wakasezgeka, kanandi wakajifumbanga kuti: “Kasi nkhatondeka vichi pakuŵa mama? Nkhaghanaghananga kuti panji ndine nkhatondeka kuchita vinandi kuti nisambizge mwana wane kutemwa Yehova.”
5. Kasi ni njani wali na mulandu para munthu waleka kuteŵetera Yehova?
5 Tikwenera kukumbuka kuti Yehova wali kupeleka wanangwa wakusankha ku waliyose wa ise. Ichi chikung’anamura kuti waliyose wangasankha kumupulikira panji yayi. Ŵana ŵanyake ŵali kukulira mu mbumba izo ŵapapi ŵawo ŵakaŵa viyelezgero viwemi yayi, kweni ŵali kusankha kuteŵetera Yehova na kulutilira kuŵa ŵakugomezgeka. Kweni ŵanyake awo ŵapapi ŵawo ŵakaŵikapo mtima kuŵasambizga kutemwa Yehova, pamanyuma ŵati ŵakura ŵakaleka kuteŵetera Yehova. Ivi vikulongora kuti waliyose wakwenera kusankha yekha usange wateŵeterenge Yehova. (Josh. 24:15) Ntheura mwaŵapapi imwe muli na chitima chifukwa chakuti mwana winu wali kuleka kuteŵetera Yehova, lekani kughanaghana kuti suzgo ndimwe.
6. Kasi mwana wangakhwaskika wuli para mupapi waleka kuteŵetera Chiuta?
6 Nyengo zinyake, mupapi wangaleka kuteŵetera Yehova kweniso kuleka nanga ni mbumba yake. (Sal. 27:10) Ichi chingaŵa chakuŵinya chomene ku ŵana awo ŵalaŵiskanga kwa mupapi wawo kuŵa chakuwonerapo chawo. Esther, uyo adada ŵake ŵakasezgeka, wakuti: “Kanandi nkhaliranga chifukwa nkhamanya kuti adada ŵakapatukako waka kwa Yehova yayi, kweni ŵakaŵa kuti ŵadumura kuti ŵakukhumbaso yayi kuteŵetera Yehova. Nkhuŵatemwa chomene adada, ntheura ŵakati ŵasezgeka, kanandi nkhaŵafipiranga mtima chomene. Nyengo zinyake nkhasuzgikanga chomene maghanoghano.”
7. Kasi Yehova wakujipulika wuli na ŵana awo mupapi wawo wali kusezgeka?
7 Imwe ŵawukirano, para mupapi winu wali kusezgeka, nase vikutiŵinya. Kweniso manyani kuti Yehova nayo wakumanya umo mukujipulikira. Wakumutemwani ndipo ngwakukondwa kuwona kuti mukulutilira kumuteŵetera mwakugomezgeka. Ndipo nase taŵabali na ŵadumbu ŵinu mu mpingo ndise ŵakukondwa. Kumbukani kuti ndimwe yayi mwapangiska kuti ŵapapi ŵinu ŵasankhe kuleka kuteŵetera Yehova. Nga umo tanguyowoyerapo kale kukwambilira, Yehova wali kupeleka wanangwa wakusankha ku waliyose. Ndipo Mkhristu waliyose wakujipatulira na kubatizika “wayeghenge katundu wake.”—Gal. 6:5.
8. Kasi ŵamumbumba awo ŵachali ŵakugomezgeka ŵakwenera kuchita vichi apo ŵakulindilira mubali wawo wakutemweka kuti wawelere kwa Yehova? (Wonani bokosi lakuti “ Welerani kwa Yehova.”)
8 Para uyo mukumutemwa waleka kuteŵetera Yehova, ntchakawiro kulutilira kugomezga kuti zuŵa linyake wazamuwelera kwa Yehova. Kweni kasi imwe mukwenera kuchita vichi apo mukulindilira kuti wawelere kwa Yehova? Chitani vyose ivyo mungafiska kuti mulutilire kukhozga chipulikano chinu. Para muchitenge nthena, muŵenge chakuwonerapo chiwemi ku ŵamumbumba yinu kweniso nanga nkhwa uyo wasezgeka. Kweniso muŵengeso na nkhongono zakuzizipizgira chitima icho muli nacho. Ipo sono tiyeni tiwone vinyake ivyo mungachita kuti mulutilire kuŵa ŵakukhora mwauzimu.
IVYO MUNGACHITA KUTI MULUTILIRE KUŴA ŴAKUKHORA MWAUZIMU
9. Kasi mungachita wuli kuti mulutilire kuŵa na chipulikano chakukhora? (Wonaniso bokosi lakuti “ Malemba Agho Ghangamupembuzgani Para Uyo Mukumutemwa Waleka Yehova.”)
9 Chitani vyose ivyo mungafiska kuti mulutilire kuŵa na chipulikano chakukhora. Ntchakuzirwa chomene kuti mulutilire kujikhozga kweniso kukhozga ŵanji mu mbumba yinu. Kasi mungachita wuli nthena? Lutilirani kuŵazga Mazgu gha Chiuta na kughanaghanirapo, kweniso kuwungana na mpingo kuti Yehova wamupani nkhongono. Joanna, uyo adada ŵake na mukuru wake ŵakaleka unenesko, wakuti: “Mtima ukuŵa m’malo para nkhuŵazga vyakukhwaskana na ŵanthu ŵa mu Baibolo nga ni Abigelu, Esitere, Yobu, Yosefe, na Yesu. Ivyo ŵakachita vikunikhozga kweniso kunovwira kuti niwonenge mwakwenelera vinthu. Nawonaso kuti sumu zithu zikunikhozga chomene.”
10 Kasi lemba la Salimo 32:6-8 likutiphalira kuti tikwenera kuchita vichi para tikusuzgika maghanoghano?
10 Muphalirani Yehova vyose ivyo mukwenjerwa navyo. Para mukusuzgika maghanoghano, kuleka yayi kulomba. Lutilirani kumulomba Chiuta withu wachitemwa kuti wamovwirani kuwona suzgo mwakwenelera kweniso kuti ‘wamupani mahara na kumusambizgani nthowa iyo mukwenera kwendamo.’ (Ŵazgani Salimo 32:6-8.) Mbunenesko kuti nyengo zinyake chingaŵa chakusuzga kumuphalira Yehova umo mukujipulikira nadi. Kweni manyani kuti Yehova wakumanya makora umo mukujipulikira. Wakumutemwani chomene ndipo wakumupemphani kuti mupungulire mitima yinu kwa iyo.—Eks. 34:6; Sal. 62:7, 8.
11. Kuyana na Ŵahebere 12:11, chifukwa wuli tikwenera kugomezga kuti chilango cha Yehova chapelekeka mwachitemwa? (Wonaniso bokosi lakuti “ Ndondomeko ya Kusezga Munthu Yikulongora Kuti Yehova Wakutitemwa.”)
11 Koleranani na ivyo ŵalara ŵadumura. Kusezga munthu njimoza mwa ndondomeko za Yehova. Chilango chake ntchachitemwa, ndipo ni nthowa yiwemi chomene yakovwilira uyo wachita kwananga kweniso kwa waliyose mu mpingo. (Ŵazgani Ŵahebere 12:11.) Munyake mu mpingo wangayowoya kuti ŵalara ŵandadumure makora yayi nkhani pakusezga munthu. Ndipo munthu wanthena kanandi wakuyowoyapo yayi viheni ivyo munthu wakwananga uyo wali kuchita. Kweni kumbukani kuti tose tikuŵa kuti tikumanya vyose yayi. Ntheura ntchamahara chomene kugomezga kuti ŵalara awo ŵakaŵa mu komiti ya cheruzgo ŵakayezgayezga chomene kulondezga fundo za mu Malemba pakweruzga m’malo mwa “Yehova.”—2 Mid. 19:6.
12. Kasi ŵanyake ŵali kupindura wuli chifukwa chakuti ŵakakhozgera chilango cha Yehova?
12 Para mukukhozgera ivyo ŵalara ŵadumura pakusezga munthu uyo mukumutemwa, mungamovwira kuti wawelere kwa Yehova. Elizabeth uyo tamuzunura kale wakuti: “Chikaŵa chakusuzga chomene kuleka kuyowoyeskana na mwana withu mulara. Kweni wakati wawelera kwa Yehova, wakazomerezga kuti ŵakachita makora kumusezga. Pamanyuma, wakayowoya kuti wakasambirapo vinandi chomene chifukwa chakuti ŵakamusezga. Iyo wakayowoya kuti wakasambira kuti nyengo zose chilango cha Yehova chikuŵa chakunyoloka.” Mfumu wake, Mark, wakatiso: “Mwana wane wakaphaliraso ine kuti wakakhumba kuwelera kwa Yehova chifukwa chakuti tikayowoyeskananga nayo yayi napachoko. Ndine wakukondwa chomene kuti Yehova wakatovwira kuŵa ŵakupulikira.”
13. Kasi ntchivichi chingamovwirani kuti muzizipizge?
13 Yowoyani na ŵabwezi awo ŵangamupuliskani umo mukujipulikira. Muchezgenge na Ŵakhristu ŵakukhwima mwauzimu awo ŵangamovwirani kuti mulutilire kuŵa na chigomezgo. (Zinth. 12:25; 17:17) Joanna, uyo tamuzunura kale wakuti: “Nkhaŵa na phukwa chomene. Kweni kuchezga na ŵabwezi awo nkhuŵagomezga kukanovwira kuti nizizipizge.” Kweni kasi mungachita wuli usange ŵanyake mu mpingo ŵakuyowoya vinthu ivyo vikumupangiskani kuti muŵirethu na chitima chomene?
14. Chifukwa wuli tikwenera ‘kulutilira kuzizipizgirana na kugowokerana na mtima wose’?
14 Zikirani nawo ŵabali na ŵadumbu ŵinu. Unenesko ngwakuti ni waliyose yayi mu mpingo uyo wangayowoya mwakwenelera. (Yak. 3:2) Tose tili ŵambura kufikapo, ntheura mungazizwanga yayi usange ŵanyake ŵakusoŵa chakuyowoya panji para ŵayowoya vinthu ivyo vyamuŵinyani chomene. Kumbukani ulongozgi wa mpositole Paulosi wakuti: “Lutilirani kuzizipizgirana na kugowokerana na mtima wose usange munthu wali na chifukwa chakudandawulira na munyake.” (Kol. 3:13) Mudumbu munyake uyo mubali wake wakasezgeka wakalongosora kuti: “Yehova wanovwira kugowokera ŵabali awo ŵakanikhuŵazganga waka m’malo mwakunikhozga.” Kasi mpingo ungawovwira wuli mbumba iyo yumoza wa mu banja lawo wasezgeka?
UMO MPINGO UNGAWOVWILIRAPO
15. Kasi tingachita wuli kuti tovwire ŵamumbumba awo mubali wawo wasezgeka mwasonosono?
15 Muŵe ŵalusungu na ŵaubwezi ku ŵabali ŵa munthu uyo wasezgeka awo ŵachali ŵakugomezgeka. Mudumbu munyake zina lake Miriam, wakati wakaŵa na wofi kuluta ku maungano mudumbu wake wakati wakasezgeka. Iyo wakuti: “Nkhafipanga mtima na ivyo ŵanthu ŵayowoyenge. Kweni pakaŵa ŵabali na ŵadumbu ŵanandi awo nawo ŵakaŵa na chitima na ivyo vikachitika. Ndipo ŵakayowoyapo chiheni chilichose yayi chakukhwaskana na mudumbu wane. Nkhuŵawonga chomene chifukwa ŵakanovwira kuti nileke kuŵa na phukwa.” Mudumbu munyake nayo wakayowoyaso kuti: “Mwana withu munyamata wakati wasezgeka, ŵabwezi ŵithu ŵa pamtima ŵakiza kuzakatipembuzga. Ŵanyake ŵakatiphalira kuti ŵakumanya yayi chakuti ŵangayowoya. Ŵanyake ŵakalira nane ndipo ŵanyake ŵakanilembera makalata ghakunikhozga. Ivyo ŵakachita vikanovwira chomene!”
Ŵabali na ŵadumbu mu mpingo ŵangakhozga awo mubali wawo wasezgeka (Wonani ndime 17) *
16. Kasi mpingo ungachita wuli kuti ulutilire kupembuzga na kovwira awo mubali wawo wasezgeka?
16 Lutilirani kovwira ŵamumbumba ŵakugomezgeka ŵa munthu uyo wasezgeka. Sono ndipo ŵakukhumbikwira chomene chitemwa chinu na kukhozgeka. (Heb. 10:24, 25) Nyengo zinyake ŵamumbumba ya munthu uyo wasezgeka ŵangamba kuwona kuti ŵanyake mu mpingo ŵaleka kuchezga nawo nga umo ŵakachitiranga pambere mubali wawo wandasezgeke. Tingazomerezganga yayi kuti vyanthena ivi vichitike. Ŵawukirano awo ŵapapi ŵawo ŵali kuwuleka unenesko ndiwo ŵakukhumbikwira chomene kuŵakhozga na kuŵawonga pa ivyo ŵakuchita. Maria, uyo mfumu wake wakasezgeka na kuyileka mbumba yake, wakuti: “Ŵabwezi ŵane ŵanyake ŵakizanga kunyumba kwane na kuniphikira chakurya kweniso kunovwira kusambira Baibolo na ŵana ŵane. Nawo vikaŵaŵinya ndipo ŵakalira nane. Ŵakanivikiliranga para ŵanthu ŵakuthandazga nkhani zautesi zakukhwaskana na ine. Ŵakanikhozga chomene!”—Rom. 12:13, 15.
17. Kasi ŵalara ŵangapembuzga wuli awo ŵali na chitima?
17 Ŵalara gwiliskirani ntchito m’pata uliwose uwo mwasanga kuti mukhozge ŵamumbumba awo mubali wawo wasezgeka. Muli na mulimo wapadera wakupembuzga awo ŵakutemweka ŵawo ŵasezgeka. (1 Tes. 5:14) Kuti muŵakhozge, muyowoyenge nawo pambere maungano ghandambe na para ghamara. Muŵayenderenge na kulomba nawo lumoza. Mupharazgenge nawo ndipo nyengo zinyake mungaŵachema kuti muŵire lumoza pa kusopa kwa mbumba. Ŵalara ŵakwenera kupwelelera awo ŵali na chitima na kuŵalongora chitemwa na lusungu.—1 Tes. 2:7, 8.
KUTAYA MTIMA YAYI NDIPO LUTILIRANI KUGOMEZGA YEHOVA
18. Kuyana na 2 Petrosi 3:9, kasi Chiuta wakukhumba kuti awo ŵali kuleka kumuteŵetera ŵachite vichi?
18 Yehova “wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (Ŵazgani 2 Petrosi 3:9.) Nangauli munthu wangachita zakwananga zikuru, kweni umoyo wake ukuŵa kuti uchali wakuzirwa kwa Chiuta. Kumbukani kuti Yehova wakapeleka mtengo wakudura chomene, uwo mbumoyo wa Mwana wake wakutemweka, chifukwa cha ise. Mwachitemwa Yehova wakuyezgayezga kovwira awo ŵaleka kumuteŵetera kuti wawelere kwa iyo. Iyo wakukhazga kuti ŵawelerenge kwa iyo, nga umo tikuwonera mu ntharika ya Yesu ya mwana wakuzgeŵa. (Luka 15:11-32) Ŵanandi awo ŵakaleka unenesko pamanyuma ŵakawelera kwa Adada ŵawo ŵakuchanya. Ndipo mpingo nawo ukaŵapokelera na mawoko ghaŵiri. Elizabeth, uyo tamuzunura kale wakakondwa chomene mwana wake wakati wawezgekeramo mu mpingo. Iyo wakuti: “Nkhuŵawonga chomene wose awo ŵakatikhozga kuti tileke kuwelera nyuma.”
19. Chifukwa wuli tikwenera kulutilira kugomezga Yehova?
19 Nyengo zose tigomezgenge Yehova. Ulongozgi wake nyengo zose ngwakovwira. Iyo ni Dada wakupa na wachiwuravi uyo wakutemwa chomene wose awo ŵakumutemwa na kumusopa. Manyani kuti Yehova wazamumulekanipo yayi pa nyengo iyo muli mu suzgo. (Heb. 13:5, 6) Mark, uyo tamuzunura kale mu nkhani iyi wakuti: “Yehova wazamutilekapo yayi. Nyengo zose watovwirenge mu nyengo ya masuzgo.” Yehova walutilirenge kumupani “nkhongono zakuluska zakawiro.” (2 Kor. 4:7) Nadi, mungalutilira kugomezgeka nanga ni para uyo mukumutemwa waleka kuteŵetera Yehova.
SUMU 44 Lurombo lwa Munthu Wakusuzgika
^ ndime 5 Tikuŵa na chitima chomene para uyo tikumutemwa waleka kuteŵetera Yehova. Nkhani iyi yikulongosora umo Chiuta wakujipulikira para vyanthena ivi vyachitika. Yikulongosoraso ivyo ŵamumbumba ya munthu uyo wasezgeka ŵangachita, kuti ŵazizipizge na kulutilira kuŵa ŵakukhora mwauzimu. Kweniso yikulongosoraso umo mpingo ungapembuzgira na kovwira mbumba ya munthu uyo wasezgeka.
^ ndime 1 Mazina ghanyake ghasinthika mu nkhani iyi.
^ ndime 79 MAZGU GHAKULONGOSORA CHITHUZI: Para mubali waleka Yehova na mbumba yake, muwoli wake na ŵana ŵake ŵakusuzgika.
^ ndime 81 MAZGU GHAKULONGOSORA CHITHUZI: Ŵalara ŵakukhozga mbumba ya mu mpingo wawo.
