NKHANI YAKUSAMBIRA 39
Kasi Zina Linu Lilimo mu “Buku la Umoyo”?
“Buku la chikumbusko la awo ŵakopa Yehova likalembeka pamaso pake.”—MAL. 3:16.
SUMU 61 Koleskani, Imwe Ŵakaboni!
IVYO VILI MU NKHANI IYI a
Yehova wasazgiramo mazina ghanandi mu “buku la umoyo,” kwambira waka mu nyengo ya Abelu (Wonani ndime 1-2)
1. Kuyana na Malaki 3:16, kasi Yehova wakulemba buku wuli kwamba kale, ndipo mu buku ili muli vichi?
KWA vyaka masauzandi ghanandi, Yehova wakulemba buku lapadera. Buku ili lili na mazina, ndipo munthu wakwamba kulembeka mu buku ili, ni muteŵeti wakwamba wakugomezgeka Abelu. b (Luka 11:50, 51) Kwambira waka panyengo iyi, Yehova wasazgiramo mazina ghanandi mu buku ili, ndipo mazuŵa ghano lili na mazina mamiliyoni ghanandi. Mu Baibolo, buku ili likuchemeka kuti “buku la chikumbusko,” “buku la umoyo,” kweniso “m’pukutu wa umoyo.” Mu nkhani iyi titenge waka “buku la umoyo.”—Ŵazgani Malaki 3:16; Chivu. 3:5; 17:8.
2. Kasi mbanjani awo mazina ghawo ghali mu buku la umoyo, ndipo tingachita wuli kuti zina lithu lilembeke mu buku ili?
2 Buku lapadera ili lili na mazina gha ŵanthu wose awo ŵakusopa Yehova na ntchindi zikuru kweniso kutemwa zina lake. Ŵanthu aŵa ŵali na mwaŵi wakuzakasanga umoyo wamuyirayira. Mazuŵa ghano nase zina lithu lingalembeka mu buku ili, para tili paubwezi wakukhora na Yehova pasi pa sembe yakuwombora ya mwana wake Yesu Khristu. (Yoh. 3:16, 36) Tose tikukhumba kuti zina lithu lilembeke mu buku ili, kwali tili na chigomezgo chakuluta kuchanya panji kukhala pa charu chapasi.
3-4. (a) Kasi para zina lithu lalembeka mu buku la umoyo mbwenu ndikuti tizamusanga umoyo wamuyirayira? Longosorani. (b) Kasi tidumbiskanenge vichi mu nkhani iyi na yakulondezgapo?
3 Kasi ichi chikung’anamura kuti wose awo mazina ghawo ghali kulembeka mu buku ili ndikuti mbwenu ŵasanga kale umoyo wamuyirayira? Zgoro la fumbo ili tikulisanga mu mazgu agho Yehova wakayowoya kwa Mozesi agho ghali pa Ekisodo 32:33. Yehova wakati: “Waliyose uyo waninangira ndiyo nimusisitenge mu buku lane.” Ntheura mazina agho pasono ghali mu buku ili, ghangasisitika panji kuwuskikamo. Vili nga kuti Yehova wali kulemba dankha na phesulu. (Chivu. 3:5, mazgu ghamusi) Ntheura tikwenera kuwoneseska kuti zina lithu likukhalilira mu buku ili m’paka apo lizamulembekera kwamuyirayira na inki.
4 Fundo iyi yingawuskaso mafumbo ghanyake. Mwachiyelezgero, kasi Baibolo likuyowoya vichi vyakukhwaskana na awo mazina ghawo ghali kulembeka mu buku la umoyo kweniso gha awo ŵandalembeke? Kasi mphawuli apo awo mazina ghawo ghakhalilirenge mu buku ili ŵazamupokera umoyo wamuyirayira? Wuli pakuyowoya za awo ŵali kufwa awo ŵakaŵavya mwaŵi wakumumanya Yehova? Kasi ntchamachitiko kuti mazina ghawo ghalembeke mu buku ili? Mafumbo agha ghakuzgoreka mu nkhani iyi na yakulondezgapo.
KASI MBANJANI AWO MAZINA GHAWO GHALI MU BUKU?
5-6. (a) Kuyana na Ŵafilipi 4:3, mbanjani awo ŵali pa gulu la ŵanthu awo mazina ghawo ghali kulembeka mu buku la umoyo? (b) Kasi mphawuli apo mazina ghawo ghazamulembeka kwamuyirayira mu buku la umoyo?
5 Kasi mbanjani awo mazina ghawo ghali kulembeka mu buku la umoyo? Kuti tizgore fumbo ili, tiwonenge magulu ghankhondi gha ŵanthu. Pa magulu agha, ŵanyake mazina ghawo ghali kulembeka mu buku la umoyo, ŵanyake yayi.
6 Gulu lakwamba nda ŵanthu awo ŵali kusoleka kukawusa na Yesu kuchanya. Kasi mazina ghawo ghali kulembeka mu buku la umoyo? Enya. Kuyana na mazgu gha mpositole Paulosi agho wakalembera ‘ŵantchito ŵanyake’ ku Filipi, mazina gha ŵanthu ŵakuphakazgika awo ŵali kuchemeka kukawusa na Yesu pasono ghali kulembeka mu buku la umoyo. (Ŵazgani Ŵafilipi 4:3.) Kweni kuti mazina ghawo ghalutilire kuŵamo mu buku ili, ŵakwenera kulutilira kugomezgeka. Para ŵazakadindika kaumaliro, mazina ghawo ndipo ghazamulembeka kwamuyirayira mu buku ili. Ivi vikuchitika pambere ŵandafwe panji vizamuchitika pambere suzgo yikuru yindambe.—Chivu. 7:3.
7. Kuyana na Chivumbuzi 7:16, 17, kasi mphawuli apo mzinda ukuru wa mberere zinyake mazina ghawo ghazamulembeka kwamuyirayira mu buku la umoyo?
7 Gulu lachiŵiri nda ŵamzinda ukuru wa mberere zinyake. Kasi pasono mazina ghawo ghali kulembeka mu buku la umoyo? Enya. Kasi mazina ghawo ghazamuŵa ghachalimo mu buku ili pamanyuma pakupona pa Aramagedoni? Enya. (Chivu. 7:14) Yesu wakati ŵanthu ŵa nga mberere aŵa, ŵazamupokera “umoyo wamuyirayira.” (Mat. 25:46) Nangauli vili nthena, kweni awo ŵazamupona pa Aramagedoni, ŵazamupokera nyengo yeneyiyo yayi umoyo wamuyirayira. Mazina ghawo ghazamukhalilira kuŵamo mu buku la umoyo, kweni ghazamuŵa kuti ghachali ghakulembeka na phesulu nga umo vikaŵira pakwamba. Mu nyengo ya Muwuso wa Vyaka 1,000, Yesu “wazamuŵaliska na kuŵalongozgera ku visimi vya maji gha umoyo.” Awo ŵazamupulikira Khristu, ndipo paumaliro na kweruzgika kuti mbarunji kwa Yehova, mazina ghawo ghazamulembeka mu buku la umoyo kwamuyirayira.—Ŵazgani Chivumbuzi 7:16, 17.
8. Kasi mbanjani awo mazina ghawo ghandalembeke mu buku la umoyo, ndipo chizamuŵachitikira ntchivichi?
8 Gulu lachitatu nda mbuzi, ŵanthu awo ŵazamuparanyika pa Aramagedoni. Mazina ghawo ghandalembeke yayi mu buku la umoyo. Yesu wakati “ŵazamupokera chilango cha nyifwa yamuyirayira.” (Mat. 25:46) Mwakovwirika na mzimu, Paulosi wakati “ŵanthu aŵa ŵazamupokera chilango cha pharanyiko lamuyirayira.” (2 Tes. 1:9; 2 Pet. 2:9) Kweniso awo kwanyengo yitali ŵakanangiranga dala mzimu utuŵa wa Chiuta, ŵazamukhala yayi kwamuyirayira kweni ŵazamuparanyika muyirayira. Apa ntchakuwonekerathu kuti ŵanthu aŵa ŵazamuwuskika yayi. (Mat. 12:32; Mrk. 3:28, 29; Heb. 6:4-6) Ntheura pasono tiyeni tiwone mwakupwelelera magulu ghaŵiri gha ŵanthu awo ŵazamuwuskika pa charu chapasi.
AWO ŴAZAMUWUSKIKA
9. Kuyana na Milimo 24:15, kasi ni magulu ngani ghaŵiri agho ghazamuwuskika pa charu chapasi, ndipo ghakupambana wuli magulu agha?
9 Baibolo likuyowoya magulu ghaŵiri gha ŵanthu awo ŵazamuwuskika na kuŵa na chilindizga chakuzakakhala na umoyo kwamuyirayira pa charu chapasi. Gulu linyake nda ŵanthu “ŵarunji” apo linyake nda ŵanthu “ŵambura urunji.” (Ŵazgani Milimo 24:15.) “Ŵarunji” ni ŵanthu awo ŵakateŵetera Yehova mwakugomezgeka apo ŵakaŵa ŵachali ŵamoyo. Kweni “ŵambura urunji” ni ŵanthu awo ŵakateŵeteranga Yehova yayi. Nakuti kanandi nkharo ya ŵanthu aŵa yikaŵa yiwemi yayi. Chifukwa chakuti magulu ghose agha ghazamuwuskika, kasi tingati mazina ghawo ghali mu buku la umoyo? Kuti tizgore fumbo ili, tiyeni tiwone gulu lililose palekha.
10. Chifukwa wuli “ŵarunji” ŵazamuwuskika, ndipo ŵanyake ŵazamuŵa na mwaŵi wuli? (Mu magazini iyi, wonaniso “Mafumbo Ghakufuma ku Ŵaŵazgi” kuti mumanye fundo zinyake pa nkhani ya chiwuka cha pa charu chapasi.)
10 Gulu lachinayi nda ŵanthu “ŵarunji.” Pambere ŵandafwe mazina ghawo ghakaŵa kuti ghalembeka mu buku la umoyo. Kasi mazina ghawo ghakawuskikamo mu buku ŵakati ŵafwa? Yayi, chifukwa kwa Yehova “ŵachali ŵamoyo.” Yehova ni “Chiuta wa ŵakufwa yayi, kweni wa ŵamoyo, pakuti wose mbamoyo kwa iyo.” (Luka 20:38) Ichi chikung’anamura kuti para ŵarunji ŵazakawuskika pa charu chapasi, mazina ghawo ghazamusangika mu buku la umoyo, nangauli ghazamuŵa nga ngakulembeka dankha na phesulu. (Luka 14:14) Tikukayika yayi kuti ŵanyake awo ŵazamuwuskika, ŵazamuŵa na mwaŵi wakuteŵetera nga mba “karonga mu charu chose chapasi.”—Sal. 45:16.
11. Kasi ŵanthu “ŵambura urunji” ŵazamukhumbikwira kusambira vichi pambere mazina ghawo ghandalembeke mu buku la umoyo?
11 Paumaliro, tiyeni tiwone gulu lachinkhondi. Gulu ili nda ŵanthu “ŵambura urunji.” Panji chifukwa chakuti ŵakamanyanga yayi malango gha Yehova, ŵakachitanga urunji yayi pambere ŵandafwe. Ntheura mazina ghawo ghakalembeka yayi mu buku la umoyo. Kweni Chiuta wazamuŵawuska mwakuti ŵaŵe na mwaŵi wakuti mazina ghawo ghalembeke mu buku ili. Ŵanthu “ŵambura urunji” aŵa ŵazamukhumbikwira wovwiri ukuru chomene. Pambere ŵandafwe, ŵanyake ŵakachitanga vinthu viheni chomene. Ntheura ŵazamukhumbikwira kusambizgika umo ŵangachitira kuti ŵakhalenge mwakuyana na fundo zaurunji za Yehova. Kuti tifiske kuŵawovwira, Ufumu wa Chiuta uzamulongozga pa ntchito yikuru yakusambizga iyo yindachitikepo kufuma kale lose.
12. (a) Kasi mbanjani ŵazamusambizga ŵanthu ŵambura urunji? (b) Kasi ntchivichi chizamuchitikira awo ŵakana kulondezga ivyo ŵazamusambizgika?
12 Kasi mbanjani ŵazamusambizga ŵanthu ŵambura urunji? Mba mzinda ukuru kweniso ŵanthu ŵarunji awo ŵazamuwuskika. Ŵanthu ŵambura urunji kuti mazina ghawo ghalembeke mu buku la umoyo, ŵazamukhumbikwira dankha kuti ŵaŵe paubwezi na Yehova, na kujipatulira kwa iyo. Yesu Khristu na ŵakuphakazgika, ŵazamuŵa maso kuwona kufuma kuchanya umo ŵanthu ŵambura urunji aŵa ŵazamuchitira na ivyo ŵazamusambizgika. (Chivu. 20:4) Waliyose uyo wazamukana kulondezga ivyo wazamusambizgika, wazamuwuskikamo mu charu nanga wangaŵa kuti wali na vyaka 100. (Yes. 65:20) Yehova na Yesu ŵakusanda mitima, ndipo ŵazamuzomerezga waliyose yayi kunanga charu chiphya.—Yes. 11:9; 60:18; 65:25; Yoh. 2:25.
KUWUSKIKIRA KU UMOYO KWENISO KU CHERUZGO
13-14. (a) Kasi kale tikaghapulikiskanga wuli mazgu gha Yesu agho ghali pa Yohane 5:29? (b) Kasi tikukhumbikwira kumanya vichi vyakukhwaskana na mazgu agha?
13 Yesu wakayowoyaso vya ŵanthu awo ŵazamuwuskikira pa charu chapasi. Mwachiyelezgero, wakati: “Ora likwiza ilo wose awo ŵali mu madindi ŵazamupulika mazgu ghake na kufumira kuwaro, awo ŵakachitanga vinthu viwemi ŵazamuwukira ku umoyo, awo ŵakachitanga vinthu viheni ŵazamuwukira ku cheruzgo.” (Yoh. 5:28, 29) Kasi Yesu wakang’anamurangachi apa?
14 Kumanyuma uku tikatenge mazgu gha Yesu ghakung’anamura milimo iyo ŵazamuchita ŵanthu awo ŵawuskika pamanyuma pa chiwuka. Kung’anamura kuti ŵanthu ŵanyake ŵazamuwukira ku umoyo na kuchita vinthu viwemi, apo ŵanyake ŵazamuwukira ku umoyo na kuchita vinthu viheni. Ndipouli, wonani kuti Yesu wakayowoya munthowa yakuti awo ŵawuskika waka mu madindi ghachikumbusko ŵazamuchita vinthu viwemi panji vinthu viheni yayi. Iyo wakagwiliskira ntchito mazgu ghakulongora nga kuti vinthu ivi vyachitika kale. Wakayowoya za ŵanthu awo “ŵakachitanga vinthu viwemi” na awo “ŵakachitanga vinthu viheni.” Ichi chikulongora kuti ŵakachita vinthu ivi pambere ŵandafwe. Nakuti fundo iyi njakupulikikwa asi nthe? Chifukwa palije uyo wazamuzomerezgeka kuchita vinthu viheni mu charu chiphya. Ŵanthu ŵambura urunji ŵakachita vinthu viheni ivi pambere ŵandafwe. Ipo kasi mazgu gha Yesu ghakuti awo ŵakuwukira ku umoyo na awo ŵakuwukira ku cheruzgo ghakung’anamurachi?
15. Kasi mbanjani awo “ŵazamuwukira ku umoyo,” ndipo chifukwa wuli?
15 Ŵanthu ŵarunji awo ŵakachitanga vinthu viwemi pambere ŵandafwe, “ŵazamuwukira ku umoyo” chifukwa mazina ghawo ghazamuŵa kuti ghali kulembeka kale mu buku la umoyo. Ichi chikung’anamura kuti chiwuka cha ŵanthu “awo ŵakachitanga viwemi” icho chikuyowoyeka pa Yohane 5:29, chikuyana waka na chiwuka cha “ŵarunji” icho chikuyowoyeka pa Milimo 24:15. Kapulikiskiro aka kakukolerana na fundo iyo yili pa Ŵaroma 6:7, iyo yikuti: “Uyo wafwa wafwatuka ku kwananga kwake.” Zakwananga za ŵanthu ŵarunji zikusisitika para ŵafwa. Kweni viwemi ivyo ŵakachita vikusisitika yayi, Yehova wazamukumbukira viwemi vyose ivyo ŵakachitanga apo ŵakaŵa ŵachali ŵamoyo. (Heb. 6:10) Ndipouli, ŵarunji awo ŵazamuwuskika aŵa, ŵazamukhumbikwira kulutilira kuŵa ŵakugomezgeka mwakuti mazina ghawo ghalutilire kuŵamo mu buku la umoyo.
16. Kasi mazgu ghakuti kuwukira ku “cheruzgo” ghakung’anamurachi?
16 Wuli pakuyowoya za awo ŵakachitanga vinthu viheni pambere ŵandafwe? Nangauli zakwananga zawo zikusisitika para ŵafwa, kweni ŵakateŵeteranga Yehova mwakugomezgeka yayi apo ŵakaŵa ŵachali ŵamoyo. Mazina ghawo ghandalembeke mu buku la umoyo. Ntheura chiwuka cha “awo ŵakachitanga viheni” icho chikuyowoyeka pa Yohane 5:28, 29, chikuyana waka na chiwuka cha “ŵambura urunji” icho chikuyowoyeka pa Milimo 24:15. Ŵanthu aŵa ŵazamuwukira ku “cheruzgo.” c Ŵanthu ŵambura urunji aŵa ŵazamweruzgika munthowa yakuti nyengo na nyengo ŵazamusandikanga usange ŵambapo kuchita urunji. (Luka 22:30) Para nyengo yajumphapo, Yesu wazamumanya usange ŵanthu aŵa mbakwenelera kuti mazina ghawo ghalembeke mu buku la umoyo. Pekha para ŵanthu ŵambura urunji aŵa ŵaleka nkharo zawo ziheni na kujipeleka kwa Yehova, ndipo mazina ghawo ghazamulembeka mu buku la umoyo.
17-18. Kasi wose awo ŵazamuwuskikira ku umoyo pa charu chapasi ŵazamukhumbikwira kuti ŵachite vichi, ndipo ni “milimo” wuli iyo yikuyowoyeka pa Chivumbuzi 20:12, 13?
17 Kwali kale ŵakaŵa ŵarunji panji ŵambura urunji, kweni ŵanthu awo ŵazamuwuskika ŵazamukhumbikwira kuti ŵapulikire malango agho ghazamuŵa mu mipukutu yiphya iyo yizamujulika mu nyengo ya vyaka 1,000. Mpositole Yohane wakalongosora ivyo wakawona mu mboniwoni, wakati: “Nkhawona ŵakufwa, ŵakuru na ŵachoko ŵimilira panthazi pa chitengo ichi, ndipo mipukutu yikajulika. Kweni mupukutu unyake ukajulika, uwu ni mupukutu wa umoyo. Ndipo ŵakufwa ŵakeruzgika kuyana na milimo yawo iyo yikalembeka mu mipukutu.”—Chivu. 20:12, 13.
18 Kasi awo ŵazamuwuskika ŵazamweruzgika pa “milimo” nji? Kasi yizamuŵa milimo iyo ŵakachitanga pambere ŵandafwe? Yayi. Kumbukani kuti zakwananga zawo zikusisitika panji kugowokereka para ŵafwa. Ntheura “milimo iyo” ŵazamweruzgikirapo yingaŵa iyo ŵakachitanga pambere ŵandafwe yayi. M’malo mwake yikwenera kuŵa milimo iyo ŵazamuchita para ŵasambizgika mu charu chiphya. Nanga ni ŵanalume nga ni Nowa, Samuyeli, Davide, na Daniyeli ŵazamukhumbikwira kusambira vyakukhwaskana na Yesu Khristu na kuŵa na chipulikano mu sembe yake. Usange ŵanalume aŵa ndiwo ŵazamuŵa na vinthu vinandi vyakuti ŵasambire, ipo ŵanthu ŵambura urunji ndiwo ŵazamuŵa na vinthu vinandi chomene vyakuti ŵasambire!
19. Kasi ntchivichi chizamuchitikira awo ŵazamukana mwaŵi wapadera uwu wakusambira vya Yehova?
19 Kasi ntchivichi chizamuchitikira awo ŵazamukana mwaŵi uwu? Lemba la Chivumbuzi 20:15 likutiphalira kuti: “Waliyose uyo wakasangika kuti wandalembeke mu buku la umoyo wakaponyeka mu nyanja ya moto.” Nadi, ŵanthu aŵa ŵazamuparanyika kwamuyirayira. Ntheura ntchakuzirwa chomene kuzakawoneseska kuti zina lithu lalembeka na kukhalilira mu buku ili la umoyo!
Mubali wakuchitako mulimo ukuru wakusambizga ŵanthu uwo uzamuchitika mu Vyaka 1,000 vya Muwuso wa Khristu (Wonani ndime 20)
20. Kasi ni ntchito wuli yakukondweska iyo yizamuchitika mu vyaka 1,000 vya Muwuso wa Khristu? (Wonani chithuzi cha pa chikopi.)
20 Yizamuŵa nyengo yakukondweska chomene ya vyaka 1,000 ya Muwuso wa Yesu. Mu nyengo iyi muzamuchitikaso ntchito yikuru chomene yakusambizga iyo yizamuŵa kuti yindachitikepo nakale. Kweniso yizamuŵaso nyengo iyo nkharo ya ŵanthu ŵarunji na ŵambura urunji yizamusandikangaso. (Yes. 26:9; Mil. 17:31) Kasi ntchito yakusambizga iyi yizamuchitika wuli? Nkhani yakulondezgapo yizamutovwira kupulikiska na kumanya umo ntchito yakukondweska iyi yizamuchitikira.
SUMU 147 Umoyo Wamuyirayira Walayizgika
a Mu nkhani iyi, talongosoraso makora umo tikapulikiskiranga mazgu gha Yesu agho ghali pa Yohane 5:28, 29, ghakukhwaskana na ŵanthu awo “ŵazamuwukira ku umoyo,” kweniso awo “ŵazamuwukira ku cheruzgo.” Tisambirenge ivyo viwuka viŵiri ivi vikung’anamura kweniso awo ŵali mu gulu la viwuka ivi.
b Buku ili likamba kulembeka apo charu chikambira, kung’anamura kuti apo ŵanthu awo ŵali na mwaŵi wakuwomboleka ku kwananga ŵakambira kusangika pa charu chapasi. (Mat. 25:34; Chivu. 17:8) Ntheura vikuwoneka kuti Abelu munthu wakugomezgeka ndiyo ngwakwamba kulembeka mu buku la umoyo.
c Kumanyuma uku tikalongosora kuti lizgu lakuti “cheruzgo” ilo lili kugwiliskirika ntchito apa likung’anamura cheruzgo chakofya panji kugamura munthu kuti wakomeke. Nyengo zinyake lizgu lakuti cheruzgo ili lingang’anamuraso nadi nthena. Kweni mu nkhani iyi, vikuwoneka kuti Yesu wakagwiliskira ntchito lizgu lakuti “cheruzgo” mwachisanisani, icho chikulongora kuti lingang’anamuraso kuti kulaŵisiska munthu mwakupwelelera kuwona umo wakuchitira vinthu panji kumuyezga, panji nga umo dikishonare yinyake ya Chigiriki yikuyowoyera kuti “kusanda nkharo ya munthu.”
