1. Chifukwa wuli tikuzizwa yayi para tikuwona kuti ŵanthu ŵanandi ŵakugomezgana yayi?

 ŴANTHU mu charu cha Satana ichi, ŵakumanya yayi uyo ŵangamugomezga. Vili nthena chifukwa chakuti nyengo na nyengo ŵakukhuŵazgika na ŵamalonda, ŵandyali kweniso ŵalongozgi ŵa visopa. Ivi vyapangiska kuti ŵaleke kugomezgaso ŵabwezi ŵawo, ŵazengezgani ŵawo, kweniso nanga ni ŵanthu ŵamumbumba yawo. Kweni ise tikuzizwa navyo yayi ivi. Baibolo likayowoyerathu kuti: “Mu mazuŵa ghaumaliro . . . , ŵanthu ŵazamuŵa . . . ŵambura kugomezgeka, . . . ŵakusesa, . . . ŵakwendera mphiska.” Tingayowoyaso kuti ŵanthu ŵazamutolera makhaliro gha chiuta wa charu ichi, uyo nayo ngwambura kugomezgeka.—2 Tim. 3:1-4; 2 Kor. 4:4.

2. (a) Kasi ni njani uyo tikwenera kumugomezga chomene? (b) Kasi ŵanyake ŵangafumba vichi?

² Kweni ise pakuŵa Ŵakhristu, tikumanya kuti tikwenera kugomezga chomene Yehova. (Yer. 17:7, 8) Tili kukhorwa kuti wakutitemwa ndipo ‘wazamuŵasidapo yayi’ ŵabwezi ŵake. (Sal. 9:10) Kweniso tikwenera kugomezga Khristu Yesu chifukwa wakapeleka umoyo wake chifukwa cha ise. (1 Pet. 3:18) Ndipo tili kusambirapo pa ivyo vikatichitikirapo pa umoyo withu kuti ulongozgi wa mu Baibolo ngwakugomezgeka. (2 Tim. 3:16, 17) Tili na chigomezgo chose kuti tikwenera kugomezga Yehova, Yesu, kweniso tikwenera kugomezga Baibolo. Kweni ŵanyake ŵangafumba usange nyengo zose tikwenera kuŵagomezga ŵabali na ŵadumbu ŵithu mu mpingo. Usange zgoro ndakuti enya, chifukwa wuli tikwenera kuŵagomezga?

3. Kasi tili na mwaŵi wuli wapadera chomene? (Mariko 10:29, 30)

³ Yehova wali kutisankha kuŵa chigaŵa cha mbumba ya ŵasopi ŵake ya pa charu chose chapasi. Uwu ni mwaŵi wapadera chomene uwo ukutovwira kusanga vitumbiko vinandi. (Ŵazgani Mariko 10: 29, 30.) Pa charu chose chapasi, tili na ŵabali na ŵadumbu awo ŵakutemwa Yehova, kweniso ŵakuyezgayezga kulondezga fundo zake pa umoyo wawo. Nangauli nyengo zinyake tikupambana chiyowoyero, mitheto, kavwaliro, kweni tikuŵatemwa, nanga tingaŵa kuti takumana kakwamba. Chomenechomene tikukondwa kuŵa nawo pamoza kuti tilumbe na kusopa Adada ŵithu ŵakuchanya.—Sal. 133:1.

4. Chifukwa wuli tikukhumbikwira ŵabali na ŵadumbu ŵithu?

⁴ Kuluska kumanyuma kose, sono ndipo tikwenera kukolerana chomene na ŵabali na ŵadumbu ŵithu. Nyengo zinyake ŵakutovwira kuti tinyamure katundu withu. (Rom. 15:1; Gal. 6:2) Kweniso ŵakutikhozga kuti tilutilire kuteŵetera Yehova na kuŵa nayo paubwezi wakukhora. (1 Tes. 5:11; Heb. 10:23-25) Ghanaghanirani waka umo mphanyi vinthu viliri kwa ise, usange mpingo ulekenge kutovwira kuti timilire nganganga apo tikulimbana na ŵalwani ŵithu, awo ni Dyabulosi na charu chake chiheni ichi. Sonosono apa, Satana na charu chake chiheni ichi, ŵawukirenge ŵateŵeti ŵa Chiuta. Kweni pa nyengo iyi tizamuwonga chomene chifukwa ŵabali na ŵadumbu ŵithu ŵazamutovwira!

5. Chifukwa wuli ŵanyake vingaŵasuzga kuti ŵaŵagomezgenge ŵabali na ŵadumbu?

⁵ Ndipouli, ŵanyake ŵakutondeka kugomezga ŵabali na ŵadumbu chifukwa chakuti panji ŵakatondeka kuŵasungira chisisi pa nkhani yinyake iyo ŵakaŵaphalirapo, panji ŵakatondeka kufiska ivyo ŵakalayizga. Panji munyake mu mpingo wakayowoya, panji kuchita chinthu icho chikaŵakhuŵazga chomene. Para vyanthena vyatichitikira, vingatisuzga kuti tiŵagomezgenge ŵanji. Ipo kasi ntchivichi chingatovwira kuti tiŵagomezgenge ŵabali na ŵadumbu ŵithu?

6. Kasi chitemwa chingatovwira wuli kuti tigomezgenge ŵanji? (1 Ŵakorinte 13:4-8)

⁶ Chitemwa ndicho chomene chingatovwira kuti tiŵagomezgenge ŵanji. Lemba la 1 Ŵakorinte chaputara 13 likulongosora vinthu vinandi vyakukhwaskana na chitemwa, ivyo vingatovwira  kuti tigomezgenge ŵanji panji kwambiraso kuŵagomezga. (Ŵazgani 1 Ŵakorinte 13:4-8.) Mwachiyelezgero, vesi 4 likuyowoya kuti “chitemwa chikuzikira ndipo ntchalusungu.” Yehova wakuzikira nase nanga tingaŵa kuti tamunangira. Ntheura nase tikwenera kuzikira nawo ŵabali na ŵadumbu para ŵayowoya panji kuchita vinthu vinyake ivyo vyatiŵinya panji kutikhuŵazga. Vesi 5 likusazgirapo kuti: “Chitemwa chikukwiya luŵiro yayi. Ndipo chikusunga vyakusingo yayi.” Nase tikwenera yayi “kusunga vyakusingo” panji kuti kuchita kulemba mu maghanoghano ghithu ivyo ŵabali ŵatibudira, mwakuti para ŵazakatibudiraso, tizakaŵakumbuske ivyo ŵakachita pakwamba. Lemba la Mupharazgi 7:9 likuyowoya kuti ‘tingakwiyanga luŵiro chara.’ Ntheura ntchakuzirwa chomene kulondezga mazgu agho ghali pa Ŵaefeso 4:26 ghakuti: “Dazi lileke kunjira uku muchali na ukali”!

7. Kasi fundo ya pa Mateyu 7:1-5 yingatovwira wuli kuti tigomezgenge ŵanji?

⁷ Chinthu chinyake icho chingatovwira kuti tiŵagomezgenge ŵabali na ŵadumbu, nkhuŵawona umo Yehova wakuŵawonera. Chiuta wakuŵatemwa ndipo wakuŵanika maubudi ghawo yayi panji kuti kulaŵisiska pa ivyo ŵakubudiska. Ntheura nase tikwenera kulaŵisiska maubudi ghawo yayi. (Sal. 130:3) M’malo mwakuŵika mtima pa maubudi ghawo, tikwenera kuyezgayezga kuwona mikhaliro yawo yiwemi, na kughanaghanira vinthu viwemi ivyo ŵangachita. (Ŵazgani Mateyu 7:1-5.) Tikugomezga kuti nawo ŵakukhumba kuchita vinthu viwemi, ndipo ŵakukhumba yayi kuchita vinthu ivyo vingatikhuŵazga chifukwa chitemwa “chikupulikana vinthu vyose.” (1 Kor. 13:7) Kweni fundo iyi yikung’anamura kuti Yehova wakukhumba kuti tigomezgenge ŵanji mwachibulumutira waka yayi. M’malo mwake, wakukhumba kuti tiŵagomezgenge chifukwa chakuti ŵalongora kuti mbakugomezgeka. b

8. Kasi mungachita wuli kuti mwambe kuŵagomezga ŵabali na ŵadumbu ŵinu?

⁸ Nga umo vikuŵira na kuchindikana, kugomezgana nako kungaŵapo kwizira mu vyakuchita ndipo pakutola nyengo kuti tambe kugomezgana. Kasi mungachita wuli kuti mwambe kuŵagomezga ŵabali na ŵadumbu ŵinu? Mukwenera kuŵamanya makora. Muchezgenge nawo para muli ku maungano. Mupharazgirenge nawo lumoza. Muzikire nawo na kuŵapa mwaŵi kuti ŵalongore kuti mbakugomezgeka. Pakwamba mungamuphalira vyose yayi vyakukhwaskana na imwe munthu uyo mwamba waka kumanyana. Kweni apo ubwezi winu ukukura, mungamba kumuphalira vinandi vyakukhwaskana na imwe. (Luka 16:10) Kweni kasi mungachita wuli usange mubali watondeka kumusungirani chisisi? Mungachimbiliranga yayi kumazga ubwezi, kweni mupani nyengo. Ndipo kuzomerezga yayi kuti vyakuchita vya ŵanji vipangiske kuti muleke kugomezga ŵabali na ŵadumbu ŵanyake. Pa nkhani iyi, tiwonenge viyelezgero vya ŵateŵeti ŵanyake ŵakugomezgeka ŵa Yehova awo nangauli ŵanji ŵakaŵakhuŵazga, kweni ŵakalutilira kugomezga ŵanji.

9. (a) Kasi Hana wakalutilira wuli kukhozgera ndondomeko ya Yehova nangauli ŵanyake awo ŵakaŵa na maudindo ŵakachitanga vinthu viheni? (b) Kasi ivyo vikachitikira Hana vikutisambizgachi pa nkhani ya kugomezga, panji kuti kukhozgera ndondomeko ya Yehova? (Wonani chithuzi.)

⁹ Kasi mubali waudindo wali kumukhuŵazganipo? Usange ni nthena, sambiraniko kwa Hana. Panyengo iyo Wasembe Mukuru Eli ndiyo wakadangiliranga pakusopa Yehova mu Israyeli. Kweni mbumba yake yikaŵa chiyelezgero chiwemi yayi. Ŵana ŵake awo ŵakateŵeteranga mu maudindo ghakuru, nyengo na nyengo ŵakachitanga vinthu vyaunyankhasi pa tempile, kweni iyo pakuŵa dada wawo wakaŵalanganga waka pachanyapachanya. Kweni Yehova wakamulekeska nyengo yeneyiyo yayi Eli kuŵa Wasembe Mukuru. Nangauli vikaŵa nthena, Hana wakayuyura yayi ndondomeko ya Chiuta, mwakukana kukasopa pa chihema apo  Eli wakateŵeteranga nga Wasembe Mukuru. Apo Hana wakalombanga uku wali na chitima chikuru, Eli wakati waloŵera. Kwambura kusanga dankha uwo mbunenesko, wakamuyowoyera mazgu ghaheni mwanakazi uyu, uyo wakaŵa na chitima chomene panyengo iyi. (1 Sam. 1:12-16) Nangauli vikaŵa nthena, Hana wakalapizga kuti para wangaŵa na mwana musepuka wamupelekenge kukateŵetera pa chihema uko wamupwelelereka na Eli. (1 Sam. 1:11) Kasi ivyo ŵakachitanga ŵana ŵa Eli vikakhumbikwanga kunozgeka? Enya. Ndipo panyengo yakwenelera Yehova wakachitapo kanthu. (1 Sam. 4:17) Nyengo yikati yajumphapo, Chiuta wakamutumbika Hana ndipo wakaŵa na mwana musepuka, zina lake Samuyeli.—1 Sam. 1:17-20.

10. Kasi Davide wakalongora wuli kuti wakalutilira kugomezga ŵanji nangauli ŵanthu ŵanyake ŵakamwendera mphiska?

¹⁰ Kasi mubwezi winu wapamtima wali kumwenderanipo mphiska? Usange ni nthena, ghanaghanirani ivyo vikachitikira Themba Davide. Ahitofeli wakaŵa yumoza wa ŵabwezi ŵake. Kweni apo mwana wa Davide Abisalomu wakagaluka na kukhumba kupoka awiske ufumu, Ahitofeli wakakolerana na Abisalomu. Ivi vikwenera kuti vikamuŵinya chomene Davide, kuti mwana wake na munthu uyo wakamuwonanga kuti ni mubwezi wake, ŵakamwendera mphiska. Kweni Davide wakaleka yayi kugomezga ŵanji chifukwa cha ivi. Wakalutilira kumugomezga mubwezi wake munyake wakugomezgeka Hushayi, uyo wakakana kukolerana nawo pa chigaluka ichi. Davide wakaŵa na vifukwa vyakupulikikwa vyakugomezgera Hushayi. Hushayi wakalongora kuti ni mubwezi muwemi, ndipo wakaŵika umoyo wake pangozi kuti wawovwire Davide.—2 Sam. 17:1-16.

11. Kasi muteŵeti wa Nabala wakalongora wuli kuti wakaŵagomezganga ŵanji?

¹¹ Wonaniso chiyelezgero chinyake cha muteŵeti munyake wa Nabala. Davide na ŵanalume ŵake ŵakalongora lusungu pakuvikilira ŵateŵeti ŵa mu Israyeli munyake zina lake Nabala. Nyengo yichoko waka yati yajumphapo, Davide wakalomba munthu musambazi uyu Nabala kuti wamupeko chakurya pamoza na ŵanalume ŵake, panji chilichose icho wangaŵa nacho. Kweni Nabala wakakana, ndipo Davide wakakwiya chomene mwakuti wakaghanaghana vyakukoma mwanalume waliyose wa munyumba ya Nabala. Ivi vyati vyachitika waka, muteŵeti uyu wakaphalira Abigelu, muwoli wa Nabala, umo vinthu viliri. Pakuti muteŵeti uyu wakaŵa yumoza wamumbumba ya Nabala, wakamanya kuti umoyo wake uli m’mawoko gha muwoli wa Nabala kuti ndiyo wangamuponoska.  M’malo mwakuchimbira, iyo wakagomezga Abigelu kuti wachitengepo kanthu kuti wanozge vinthu. Wakamugomezga chomene Abigelu chifukwa wakamanyikwanga kuti wakaŵa mwanakazi waumanyi, panji kuti mwanakazi wavinjeru. Ivyo vikachitika pamanyuma, vikalongora kuti muteŵeti uyu wakaŵa nadi na chifukwa cha kugomezgera Abigelu. Abigelu wakachita vinthu mwachikanga ndipo wakatondeska Davide kuchita ivyo wakakhumbanga. (1 Sam. 25:2-35) Abigelu wakagomezga kuti Davide wachitenge vinthu mwamahara.

12. Kasi Yesu wakalongora wuli kuti wakaŵagomezganga ŵasambiri ŵake nangauli ŵakabudiskanga vinthu vinyake?

¹² Yesu wakaŵagomezganga ŵasambiri ŵake nangauli ŵakabudiskanga vinthu vinyake. (Yoh. 15:15, 16) Apo Yakobe na Yohane ŵakapempha Yesu kuti wazakaŵape malo ghapachanya mu Ufumu, Yesu wakakayikira yayi vilato vyawo vyakuteŵetera Yehova panji kuŵalekeska kuŵa ŵapositole ŵake. (Mrk. 10:35-40) Pamanyuma, Yesu ŵasambiri ŵake wose ŵakamuchimbira pa usiku uwo wakakakikira. (Mat. 26:56) Ndipouli, Yesu wakaleka yayi kuŵagomezga ŵasambiri ŵake. Nangauli wakamanyanga makora maubudi ghawo, kweni “wakalutilira kuŵatemwa m’paka kuumaliro.” (Yoh. 13:1) Yesu wati wawuskika, wakaŵapa ŵapositole ŵake 11 ŵakugomezgeka aŵa, mulimo wakuzirwa chomene, wakulongozga ntchito yakupharazga kweniso kupwelelera mberere zake zakuzirwa. (Mat. 28:19, 20; Yoh. 21:15-17) Wakaŵa na vifukwa vyakupulikikwa vyakugomezgera ŵanalume ŵambura kufikapo aŵa. Wose ŵakateŵetera mwakugomezgeka m’paka paumaliro wa uteŵeti wawo wa pa charu chapasi. Ntchakuwonekerathu kuti Hana, Davide, muteŵeti wa Nabala, Abigelu kweniso Yesu ni viyelezgero viwemi chomene ivyo tingasambirako pa nkhani yakugomezga ŵanthu ŵanyithu awo nawo mbambura kufikapo.

13. Kasi ntchivichi chingapangiska kutondeka kugomezga ŵanji?

¹³ Kasi muli kumuphalirapo mubali munyake uyo mukumugomezga chomene nkhani ya chisisi, mbwenu pamanyuma na kuzakasanga kuti watondeka kumusungirani chisisi? Para vyanthena vyachitika, vikuŵinya chomene. Mudumbu munyake wakaphalira mulara nkhani yake yachisisi, ndipo wakagomezganga kuti wamusungirenge chisisi. Zuŵa lakulondezgapo, mbwenu muwoli wa mubali mulara uyu wakamwimbira foni mudumbu uyu kuti wamukhozge, ivyo vikulongora kuti wakamanya ivyo mudumbu uyu wakaphalira mulara kwaŵekha. Ntchakupulikikwa mudumbu uyu kuti vikwenera vikaŵa vyakusuzga chomene kuti wambeso kugomezga mulara uyu. Kweni mudumbu uyu wakachita vinthu mwamahara, ndipo wakapempha wovwiri. Wakamufikira mulara munyake ndipo mulara uyu wakamovwira mudumbu uyu kuti wambireso kugomezga ŵalara.

14. Kasi ntchivichi chikawovwira mubali munyake kwambiraso kugomezga ŵanji?

¹⁴ Kwanyengo yitali, mubali munyake wakapambana maghanoghano na ŵabali ŵanyake ŵaŵiri ŵalara awo wakaŵagomezgangaso yayi. Ndipouli, wakamba kughanaghanira fundo yinyake yakuzirwa iyo wakayowoya mubali munyake uyo wakumuchindika chomene. Fundo iyi yikaŵa yakuti: “Satana ndiyo ni mulwani withu, ŵabali ŵithu yayi.” Mubali wakaghanaghanirapo chomene fundo iyi ndiposo ivyo wakwenera kuchita. Wati walomba wovwiri kwa Yehova, wakaphemanaso na ŵalara aŵa ndipo ŵakaŵaso pa mtende.

15. Chifukwa wuli vingatora nyengo kuti tambireso kuŵagomezga ŵanji? Yowoyani chiyelezgero.

¹⁵ Kasi muli kulekeskekapo uteŵeti mu gulu la Yehova? Usange ni nthena, vikuŵinya chomene. Grete na amama ŵake ŵakaŵa Ŵakaboni ŵakugomezgeka mu nyengo ya chipani cha Nazi ku Germany mu vyaka vya m’ma 1930 apo mulimo withu ukaŵa wakukanizgika. Grete wakakondwanga na uteŵeti wakutayipa magazini gha Gongwe la Mulinda gha Ŵakhristu ŵanyake. Kweni ŵabali ŵakati ŵamanya kuti adada ŵake ŵakaŵa ŵakususka, ŵakamulekeska uteŵeti uwu chifukwa ŵakawopanga kuti adada ŵake ŵangaphalira ŵakususka ŵanyawo vyakukhwaskana na mpingo. Grete wakakumana na chiyezgo ichi pera yayi. Mu nyengo  yose ya Nkhondo Yachiŵiri ya pa Charu Chose, ŵabali ŵakamupanga yayi Grete pamoza na amama ŵake magazini ndipo ŵakayowoyeskananga nayo yayi para ŵasangana pa nthowa. Ivi vikamupweteka chomene Grete mwakuti vikamutolera nyengo yitali kuti waŵagowokere ŵabali aŵa kweniso kwambiraso kuŵagomezga. Ndipouli, nyengo yikati yajumphapo, wakamanya kuti Yehova wakwenera kuti waŵagowokera ŵabali aŵa, ntheura nayoso wakwenera kuŵagowokera. c

16. Chifukwa wuli tikwenera kuŵikapo mtima kwambiraso kuŵagomezga ŵabali na ŵadumbu ŵithu?

¹⁶ Usange namwe muli kusanganapo na vyakugongoweska vyanthena ivi, ŵikanipo mtima kuti mwambireso kuŵagomezga ŵanji. Nangauli mungakhumbikwira nyengo, kweni ivyo muyezgeyezgenge kuchita viwenge pawaka yayi. Tiyelezgere kuti tili kuryapo chakurya chakuti ŵakaŵikako poyizoni, ndikuti sono tiŵenge maso chomene na ivyo tiryenge. Ndipouli, chakurya chimoza chiheni chingatipangiska yayi kuti tileke kurya. Mwakuyana waka, tingazomerezganga yayi kuti vinthu ivyo vikatichitikirapo kamoza pera, vititondeske kugomezga ŵabali na ŵadumbu wose, awo nawo mbambura kufikapo. Para tambirengeso kuŵagomezga ŵabali na ŵadumbu, tiŵenge ŵakukondwa chomene, ndipo tiŵikengepo mtima pa ivyo tingachita kuti nase tovwirepo kuti mu mpingo ŵabali na ŵadumbu ŵagomezganenge.

17. Chifukwa wuli ntchakuzirwa chomene kuŵagomezga ŵanji, ndipo mu nkhani yakulondezgapo tizamudumbiskana vichi?

¹⁷ Mu charu cha Satana ichi, ŵanthu ŵakugomezgana yayi. Kweni tingaŵagomezga ŵabali na ŵadumbu ŵithu chifukwa tikuŵatemwa kweniso nawo ŵakutitemwa. Para tingachita nthena, tiŵenge ŵakukondwa na ŵakukolerana. Kweniso vizamutovwira para tasangana na masuzgo kunthazi. Kweni kasi mukwenera kuchita wuli usange munyake wamukhuŵazgani ndipo mukumugomezgaso yayi? Yezgani kuwona vinthu nga umo Yehova wakuviwonera. Londezgani fundo za mu Baibolo, kuzgani chitemwa chinu pa ŵabali na ŵadumbu, ndipo sambiraniko ku ŵanthu awo ŵakuzunulika mu Baibolo. Tingamazga maghanoghano ghithu ghaheni para munthu watikwiyiska na kwambiraso kuŵagomezga ŵanji. Para tichitenge nthena, tisangenge vitumbiko vinandi chifukwa chakuŵa na ŵabwezi ŵanandi ‘awo ŵakudemelera kuluska mubali withu.’ (Zinth. 18:24) Ndipouli, ntchakukwana yayi kuŵagomezga waka ŵanji, kweni nawo ŵakwenera kutigomezga. Mu nkhani yakulondezgapo, tizamudumbiskana umo tingachitira kuti ŵabali na ŵadumbu ŵithu ŵatigomezgenge.