NKHANI YAKUSAMBIRA 37
Gomezgani Yehova Nga Umo Wakachitira Samusoni
“Fumu Yikuru Yehova, nikumbukani, naŵeya, apa pera, na kunikhozga.”—ŴERU. 16:28.
SUMU 30 Dada Wane, Chiuta Wane na Mubwezi Wane
IVYO VILI MU NKHANI IYI a
1-2. Chifukwa wuli tikwenera kunweka na nkhani ya Samusoni?
KASI ntchivichi chikwiza mu maghanoghano ghinu para mwapulika zina lakuti Samusoni? Mukwenera kuti mukughanaghanira za munthu uyo wakaŵa na nkhongono chomene. Uwu mbunenesko. Kweni Samusoni wakasankha vinthu mwambura mahara ivyo vikapangiska kuti wanjire mu suzgo. Ndipouli, Yehova wakaŵika waka mtima pa vyose ivyo Samusoni wakachita pakumuteŵetera. Lekani Chiuta wakazomerezga kuti nkhani ya Samusoni yilembeke mu Baibolo kuti tisange nayo chandulo.
2 Yehova wakamugwiliskira ntchito Samusoni pakuchita vinthu vyakuzizwiska kuti wawovwire ŵanthu ŵake ŵakusoleka, Ŵaisrayeli. Vyaka vinandi vikati vyajumphapo Samusoni wati wafwa, Yehova wakakhuŵilizga mpositole Paulosi kumusazgapo Samusoni pa mazina gha ŵanthu awo ŵakaŵa na chipulikano chikuru. (Heb. 11:32-34) Chiyelezgero cha Samusoni chingatikhozga. Wakathemba Yehova, nanga mphanyengo yakusuzga chomene. Tiyeni sono tiwone ivyo tingasambirako kwa Samusoni, kweniso umo chiyelezgero chake chingatikhozgera.
SAMUSONI WAKAGOMEZGA YEHOVA
3. Kasi Samusoni wakapika uteŵeti wuli?
3 Apo Samusoni wakababikanga, Ŵafilisiti ndiwo ŵakawusanga Ŵaisrayeli ndipo ŵakaŵatambuzganga. (Ŵeru. 13:1) Ŵaisrayeli ŵakasuzgikanga chomene chifukwa chakuti Ŵafilisiti ŵakaŵawusanga mwankhaza. Yehova wakasankha Samusoni kuti ‘wadangilire pa kuponoska Israyeli mu woko la Ŵafilisiti.’ (Ŵeru. 13:5) Kweni uwu ukaŵa mulimo wakusuzga. Kuti wafiske mulimo uwu, Samusoni wakakhumbikwiranga kuthemba Yehova.
Samusoni wakagomezga Yehova ndipo wakaŵa wakunozgeka kusintha kuti wamuteŵetere munthowa yiwemi chomene. Wakagwiliskira ntchito ivyo vikaŵapo kuti wafiske khumbo la Chiuta (Wonani ndime 4-5)
4. Kasi Yehova wakamovwira wuli Samusoni kuti wapone ku Ŵafilisiti? (Ŵeruzgi 15:14-16)
4 Wonani chiyelezgero chimoza icho chikulongora kuti Samusoni wakagomezganga Yehova na wovwiri wake. Zuŵa linyake, ŵankhondo ŵa Ŵafilisiti ŵakiza kuti ŵazakakore Samusoni pa Lehi, uko kukwenera kuti kukaŵa ku Yuda. Ŵanalume ŵa mu Yuda ŵakawopa chomene, ntheura ŵakawona kuti ŵamupeleke waka Samusoni ku ŵalwani. Ŵakamukaka Samusoni na vingwe viphya viŵiri na kumupeleka ku Ŵafilisiti. (Ŵeru. 15:9-13) Ndipouli, “mzimu wa Yehova ukamupa nkhongono” Samusoni ndipo vingwe ivyo wakaŵa navyo mu mawoko vikalakatika. Pamanyuma “wakasanga chiwangwa chiphya cha miskati ya mbunda yanalume,” ndipo wakachitora na kukomera ŵanalume Ŵachifilisiti 1,000.—Ŵazgani Ŵeruzgi 15:14-16.
5. Kasi Samusoni pakugwiliskira ntchito chiwangwa cha miskati ya mbunda vikalongora wuli kuti wakuthemba Yehova?
5 Chifukwa wuli Samusoni wakagwiliskira ntchito chiwangwa cha miskati ya mbunda? Chikaŵa chilwero icho ŵanthu ŵakagwiliskiranga ntchito yayi pakurwa nkhondo. Tikukayika yayi kuti Samusoni wakamanyanga kuti vikuthemba pa wovwiri wa Yehova kuti watonde, pa chilwero icho wagwiliskirenge ntchito yayi. Nadi, munthu wakugomezgeka uyu wakagwiliskira ntchito vinthu ivyo vikaŵapo kuti wafiske khumbo la Yehova. Apa vikulongolerathu kuti Samusoni wakathereska ŵanalume wose ŵara chifukwa chakuti wakagomezganga Yehova.
6. Kasi tingasambirako vichi kwa Samusoni apo tikuchita milimo yithu mu gulu la Yehova?
6 Nase Yehova wangatipa nkhongono kuti tifiske uteŵeti withu, nanga ni mauteŵeti agho tikuwona nga kuti tingafiska yayi. Chiuta wangatovwira munthowa yakuti nase tingazizwa na kuzizwa wuwo. Ntheura gomezgani kuti Yehova uyo wakamupa nkhongono Samusoni, wamovwiraninge kuchita khumbo lake chikuru mukuthemba wovwiri wake.—Zinth. 16:3.
7. Kasi ntchiyelezgero wuli icho chikulongora kuti ntchakuzirwa chomene kuti tithembenge ulongozgi wa Yehova?
7 Ŵabali na ŵadumbu ŵanandi awo ŵakuchitako mulimo wakuzenga ŵalongora kuti ŵakuthemba Yehova. Kumanyuma uku, kanandi ŵabali ndiwo ŵakapanganga mapulani na kuzenga Nyumba ziphya zinandi za Ufumu na nyumba zinyake zakuchitiramo milimo yakusopa Yehova. Kweni chifukwa chakuti ŵanthu ŵanandi ŵakubatizika, gulu likakhumbikwiranga kuti lisinthe vinyake. Ŵabali awo ŵakudangilira ŵakalomba ulongozgi wa Yehova na kuyezga nthowa ziphya, nga nkhugura nyumba zakuzengeka kale na kuzinozga. Robert uyo mwasonosono apa wagwirapo ntchito zakuzenga mu vyaru vyakupambanapambana, wakuti: “Pakwamba, chikaŵa chakusuzga chomene ku ŵanji kuti ŵalondezge nthowa yiphya iyi.” Iyo wakutiso: “Yikaŵa yakupambana chomene na nthowa izo tikazichita kwa vyaka vinandi. Kweni ŵabali ŵakaŵa ŵakukhumbisiska kuzgoŵera nthowa iyi, ndipo vyalongora kuti Yehova wakutumbika kusintha uku.” Ichi ntchiyelezgero chimoza waka cha umo Yehova wakulongozgera ŵanthu ŵake kuti ŵafiske khumbo lake. Ntheura nyengo na nyengo, tose tingachita makora kujifumbanga kuti, ‘Kasi nkhupenja ulongozgi wa Yehova na kuŵa wakukhumbisiska kusintha kuti nimuteŵeterenge makora?’
SAMUSONI WAKAGWILISKIRANGA NTCHITO VYAWANANGWA VYA YEHOVA
8. Panyengo iyo Samusoni wakaŵa na nyota chomene, kasi wakachita wuli?
8 Panji muli kuŵazgapo vinthu vinyake vyakuzizwiska ivyo Samusoni wakachita. Yekha na yekha, wakalimbana na nkhalamu na kuyikoma kweniso pamanyuma wakakoma Ŵafilisiti 30 mu Ashikeloni. (Ŵeru. 14:5, 6, 19) Samusoni wakamanya kuti wakatenge wachitenge yayi vyose ivi kwambura wovwiri wa Yehova. Ivi vikawoneka makora chomene panyengo iyo nyota yikamukora chomene wati wakoma Ŵafilisiti 1,000. Kasi wakachita wuli? M’malo mwa kujithemba yekha kuti wasange maji ghakuti wamwe, wakalilira kwa Yehova kuti wamovwire.—Ŵeru. 15:18.
9. Kasi Yehova wakachita wuli Samusoni wati wamulomba wovwiri? (Ŵeruzgi 15:19 na mazgu ghamusi)
9 Yehova wakamuzgora Samusoni pakumupa maji mwamunthondwe. Samusoni wakati wamwa maji, “nkhongono zake zikaweleramo ndipo wakasisipuka.” (Ŵazgani Ŵeruzgi 15:19 na mazgu ghamusi.) Nakuti vikuwoneka kuti maji agha ghakaŵa kuti ghachalipo apo Samuyeli wakakhuŵilizgika na mzimu kulemba buku la Ŵeruzgi, nangauli pakajumpha vyaka vinandi. Ŵaisrayeli awo ŵakawonanga maji ghakufuma pa malo agha, ŵakakumbuskikanga kuti usange ŵathembenge Yehova, waŵawovwirenge para ŵakukhumba wovwiri.
Samusoni wakaŵaso na nkhongono wati wamwa maji agho Yehova wakamupa. Nase tingachita makora kugwiliskira ntchito ivyo Yehova watipa kuti tilutilire kuŵa ŵakukhora mwauzimu (Wonani ndime 10)
10. Kasi tikwenera kuchita vichi kuti Yehova watovwire? (Wonaniso chithuzi.)
10 Nase tikwenera kulaŵiska kwa Yehova kuti watovwire kwali tili na maluso wuli panji ivyo tili kukwaniska kuchita mu gulu lake. Tikwenera kujiyuyura na kuzomerezga kuti tingachita ivyo Yehova watipempha kuchita pekha para tingathemba iyo. Nga umo Samusoni nkhongono zikaweleramo wati wamwa maji agho Yehova wakamupa, nase tikhozgekenge mwauzimu para tikugwiliskira ntchito vyose ivyo Yehova wakutipa.—Mat. 11:28.
11. Kasi tingachita wuli kuti Yehova watovwirenge? Yowoyani chiyelezgero.
11 Wonani chiyelezgero cha Aleksey, yumoza wa ŵabali ŵithu ku Russia uyo wakutambuzgika chomene. Kasi ntchivichi chamovwira kuti walutilire kuŵa wakukhora nangauli wali mu nyengo yakusuzga chomene? Iyo na muwoli wake ŵakuchita vinthu vyauzimu mwakukhazikika. Iyo wakuti: “Nkhuyezgayezga kuti nyengo zose nichitenge sambiro la namwene na kuŵazga Baibolo zuŵa lililose. Mulenji uliwose, ine na muwoli wane tikudumbiskana lemba la zuŵa na kulombera pamoza kwa Yehova.” Kasi tingasambirako vichi? Tikwenera kuthemba Yehova m’malo mwa kujigomezga waka tekha. Mwawuli? Nyengo zose tichitenge vinthu ivyo vingakhozga chipulikano chithu, nga nkhusambira Baibolo, kulomba, kusangikapo pa maungano na kupharazga. Para tichitenge nthena Yehova watipenge wovwiri uwo tikukhumbikwira apo tikumuteŵetera. Wakamukhozga Samusoni, ntheura nase watikhozgenge.
SAMUSONI WAKAWELERA NYUMA YAYI
12. Kasi Samusoni wakasankha vichi mwambura mahara, ndipo kasi ubwezi uwo wakaŵa nawo na Delila ukaŵa wakupambana wuli na uwo wakaŵapo nawo na ŵanakazi ŵanyake kumasinda?
12 Samusoni wakaŵa wambura kufikapo nga ndise, ntheura nyengo zinyake wakasankhanga makora yayi vinthu. Chinthu chinyake icho wakasankha chikapangiska kuti wanjire mu suzgo yikuru. Samusoni wati wateŵetera nga ni mweruzgi kwakanyengo, “wakatemwa mwanakazi munyake mu Dambo la Soreki, zina lake Delila.” (Ŵeru. 16:4) Nyengo yinyake kumanyuma Samusoni wakakhumbanga kutora mwanakazi munyake Mufilisiti, kweni ni Yehova uyo wakamuphalira Samusoni kuti wachite nthena mwakuti wasange m’pata wakulimbana na Ŵafilisiti. Pamanyuma, Samusoni wakakhala mu nyumba ya mwanakazi muhule mu msumba wa Ŵafilisiti ku Gaza. Panyengo iyi, Chiuta wakamupa nkhongono Samusoni kuti wanyamure vijaro vya pa chipata cha msumba, ndipo ivi vikapangiska kuti msumba uŵe wambura kuvikilirika. (Ŵeru. 14:1-4; 16:1-3) Kweni pa nkhani ya Delila vikaŵa vyakupambanako, chifukwa Delila wakwenera kuti wakaŵa Muisrayeli.
13. Kasi Delila wakachita vichi ivyo vikanjizga Samusoni mu suzgo?
13 Delila wakazomera kupoka ndalama zinandi ku Ŵafilisiti mwakuti wamwendere mphiska Samusoni. Panji chifukwa chakuti wakamutemwanga chomene, lekani Samusoni wakamanya yayi ivyo Delila wakakhumbanga. Mulimose umo vikaŵira, Delila mwakuwerezgawerezga wakamukoserezganga Samusoni kuti wavumbure uko nkhongono zake zikafumanga, ndipo paumaliro wakamuvumbulira. Chachitima ntchakuti ivyo Samusoni wakachita vikapangiska kuti nkhongono zake zimare na kunanga ubwezi wake na Yehova kwakanyengo.—Ŵeru. 16:16-20.
14. Kasi Samusoni wakasangana na masuzgo wuli chifukwa cha kugomezga Delila?
14 Samusoni wakasangana na masuzgo ghakuru chifukwa cha kugomezga Delila m’malo mwa Yehova. Ŵafilisiti ŵakamukora Samusoni na kumudolora maso. Ŵanthu awo pakwamba wakaŵathereska, panyengo iyi ŵakamujalira mu jele ku Gaza, ndipo ŵakamuzgora muzga wakusira tirigu mu gadi. Pamanyuma ŵakamuyuyura panji kuti kumulengeska apo Ŵafilisiti ŵakaŵa na chiphikiro. Ŵakapeleka sembe yikuru kwa chiuta wawo Dagoni, chifukwa chakuti ŵakagomezganga kuti ndiyo waŵawovwira kuti ŵakore Samusoni. Ŵakamutora Samusoni mu jele na kwiza nayo pa chiphikiro kuti ‘waŵasekeskepo.’—Ŵeru. 16:21-25.
Yehova wakamupa nkhongono Samusoni kuti wapeleke cheruzgo chake pa Ŵafilisiti (Wonani ndime 15)
15. Kasi Samusoni wakalongora wuli kuti wambaso kugomezga Yehova? (Ŵeruzgi 16:28-30) (Wonani chithuzi cha pa chikopi.)
15 Nangauli Samusoni wakabudiska chomene, kweni wakawelera nyuma yayi. Wakapenjerezga m’pata kuti wafiske mulimo wake uwo Chiuta wakamupa wakuthereska Ŵafilisiti. (Ŵazgani Ŵeruzgi 16:28-30.) Samusoni wakaŵeyelera Yehova kuti: “Lekani niwezgere nduzga Ŵafilisiti.” Chiuta waunenesko wakazgora lurombo lwa Samusoni ndipo wakamupaso nkhongono zinandi. Ntheura Samusoni wakakoma Ŵafilisiti ŵanandi pa zuŵa ili kuluska kumasinda kose.
16. Kasi tingasambirapo vichi pa ivyo Samusoni wakabudiska?
16 Nangauli Samusoni wakasangana na masuzgo ghakuru chifukwa cha ivyo wakabudiska, kweni wakaleka yayi kuchita khumbo la Yehova. Nase para tabudiska vinthu vinyake ndipo tachenyeka panji taleka kuchita uteŵeti unyake, tingaweleranga nyuma yayi. Tikumbuke kuti Yehova ngwakunozgeka kutigowokera. (Sal. 103:8-10) Nangauli tingabudiska vinthu vinyake, Yehova wangatipa nkhongono zake kuti tichite khumbo lake, nga umo wakachitira kwa Samusoni.
Samusoni wakwenera kuti wakajiyimba mulandu pa ivyo wakabudiska kweni wakagongowa yayi (Wonani ndime 17-18)
17-18. Chifukwa wuli chiyelezgero cha Michael ntchakukhozga? (Wonaniso chithuzi.)
17 Wonani chiyelezgero cha muwukirano munyake zina lake Michael. Wakachitanga mauteŵeti ghakupambanapambana mu gulu la Yehova. Iyo wakaŵa muteŵeti wakovwira kweniso mupayiniya. Kweni chachitima ntchakuti wakabudiska vinthu vinyake ivyo vikapangiska kuti wapokeke mauteŵeti ghose agha. Iyo wakuti: “M’paka kufika panyengo iyi, nkhatangwanikanga chomene kuteŵetera Yehova. Kweni ivi vyati vyachitika nkhajipulika kuti palije chinyake icho ningachita pakuteŵetera Yehova. Nangauli nkhaghanaghanapo yayi vyakuti Yehova wanganisida, kweni nkhakayikanga usange ubwezi wane ungaweleraposo nga umo ukaŵira pakwamba kweniso kuti ningamuteŵeteraso mwakukwana mu mpingo.”
18 Chakukondweska ntchakuti, Michael wakagongowa yayi. Iyo wakutiso: “Nkhaŵika mtima pa kunozgaso ubwezi wane na Yehova mwa kumulomba nyengo zose na kumuphalira ivyo vili mu mtima wane, kusambira Mazgu gha Chiuta na kughanaghanirapo.” Pati pajumpha nyengo, Micheal wakapikaso mauteŵeti ghake mu mpingo. Pasono ni mulara kweniso mupayiniya wanyengozose. Iyo wakuti: “Wovwiri uwo nkhapokera, chomenechomene kufuma ku ŵalara, ukanovwira kumanya kuti Yehova wachali kunitemwa. Ningamuteŵeteraso na njuŵi yituŵa. Ivyo vyanichitikira vyanisambizga kuti Yehova wakugowokera waliyose uyo wapera zanadi.” Tili na chigomezgo chose kuti Yehova watigwiliskirenge ntchito na kutitumbika nanga vingaŵa kuti tabudiska vinthu vinyake, chikuru ise tikuchita vyose ivyo tingafiska kuti tinozge ivyo tikabudiska na kulutilira kumuthemba.—Sal. 86:5; Zinth. 28:13.
19. Kasi chiyelezgero cha Samusoni chamukhozgani wuli?
19 Mu nkhani iyi, tawona vinthu vichoko waka vyakukhwaskana na umoyo wa Samusoni. Nayo wakaŵa wambura kufikapo, kweni wakaleka yayi kuteŵetera Yehova, nanga mphamanyuma pakuti wabudiska vinthu na Delila. Ndipo Yehova wakalutilira kumugwiliskira ntchito. Chiuta wakamugwiliskiraso ntchito munthowa yapadera chomene. Yehova wakalutilira kumuwona kuti wali na chipulikano chikuru, lekani wakazomerezga kuti nayo waŵe pa ŵanthu ŵakugomezgeka awo ŵali mu buku la Ŵahebere chaputara 11. Ntchakukhozga chomene kumanya kuti tikuteŵetera Dada wakuchanya wachitemwa uyo wakutikhozga, chomenechomene para talopwa. Ntheura nga ni Samusoni, tiyeni timulombenge Yehova kuti: “Nikumbukani, naŵeya, apa pera, na kunikhozga.”—Ŵeru. 16:28.
SUMU 3 Nkhongono na Chigomezgo Chithu
a Samusoni—zina la munthu wa mu Baibolo uyu likumanyikwa na ŵanthu ŵanandi, nanga ni awo ŵakumanya vichoko waka vyakukhwaskana na Malemba. Mbiri yake yili kulembekapo mu mabuku, mu zisumu, kweniso mu mafilimu. Kweni mbiri ya umoyo wake njakukondweska waka yayi. Tingasambirako vinandi kwa munthu wachipulikano chikuru uyu.
