Apo tikunozgekera kuti tisambire, tingachita makora kujifumba kuti, ‘Kasi nkhukhazga kuti nisambirengepo vichi pa sambiro ili?’ Ndipouli, tikwenera kuŵaso maso kuti ivyo tikukhazga kuti tisambirenge vileke kutijara maso na kutitondeska kuwona ivyo Yehova wakukhumba kutisambizga nadi. Kasi tingachita wuli kuti tijure maghanoghano ghithu apo tikusambira?

Lombani vinjeru. Mulombani Yehova kuti wamovwirani kupulikiska ivyo iyo wakukhumba kuti musambire sono. (Yak. 1:5) Kukhorwa waka yayi na ivyo mukumanya kale.—Zinth. 3:​5, 6.

Zomerezgani kuti nkhongono ya Mazgu gha Chiuta yigwirenge ntchito pa umoyo winu. “Mazgu gha Chiuta ngamoyo.” (Heb. 4:12) “Mazgu” gha Chiuta agho ngamoyo ghangatovwira pa vinandi nyengo yiliyose iyo taŵazgira Baibolo, kweni ivi vingachitika pekha para tikujura maghanoghano ghithu pa ivyo tisambirenge panji ivyo tiŵazgenge.

Muwongenge pa vyose ivyo Yehova wakumupani kuti wamusambizgani. Chakurya chauzimu icho Yehova wakutipa chili nga ‘ntchiphikiro cha vyakurya vyakunowa.’ (Yes. 25:6) Lekani kugega ‘chakurya’ icho mukuwona kuti mungakondwa nacho yayi. Padera pa kupindura na chakurya ichi, musangwengeso chomene na vyose ivyo Chiuta wakumupani.