NKHANI YAKUSAMBIRA 39
SUMU 125 “Mbakukondwa Awo Mbalusungu”
Muŵenge Ŵakukondwa Para Mukupeleka
“Uyo wakupeleka wakukondwa chomene kuluska uyo wakupokera.”—MIL. 20:35.
FUNDO YIKURU
Nkhani iyi yitovwirenge kuwona nthowa izo zingatovwira kulutilira kuŵa ŵakukondwa chifukwa cha kupeleka.
1-2. Kasi tikupindura wuli chifukwa chakuti tili kulengeka munthowa yakuti para tikupa ndipo tikuŵa ŵakukondwa chomene?
YEHOVA pakulenga ŵanthu, wakaŵalenga munthowa yakuti ŵaŵe na mtima wakupeleka kuti ŵaŵe ŵakukondwa chomene kuluska para ŵakupokera. (Mil. 20:35) Kasi ichi chikung’anamura kuti tikuŵa ŵakukondwa yayi usange munthu munyake watipa chawanangwa? Ndimo viliri yayi. Tose tikukondwa para tapokera chawanangwa. Ndipouli, tikuŵa ŵakukondwa chomene para tili na mtima wakupeleka. Nakuti ntchakukondweska chomene kuti Yehova wakatilenga munthowa iyi. Chifukwa wuli?
2 Chifukwa chakuti Yehova wakatilenga mu nthowa iyi, vyawovwira kuti tiŵe na wanangwa wakuti tisazgireko chimwemwe chithu. Tingasazgirako chimwemwe chithu usange tikupenjerezga mipata yakuti tipirengeko ŵanji vinthu. Kasi ntchakukondweska yayi kuti Yehova wakatilenga munthowa iyi?—Sal. 139:14.
3. Chifukwa wuli Yehova wakulongosoreka kuti ni “Chiuta wakukondwa”?
3 Malemba ghakutisimikizgira kuti munthu wakuŵa wakukondwa para wakupeleka, lekani ntchakuzizika yayi kuti Baibolo likumulongosora Yehova kuti ni “Chiuta wakukondwa.” (1 Tim. 1:11) Iyo ndiyo ni Mupi mukuru chomene kuluska waliyose. Lekani mpositole Paulosi wakati chifukwa cha iyo “tili ŵamoyo, tikwenda ndipo tiliko.” (Mil. 17:28) Nadi, “chawanangwa chilichose chiwemi na chawanangwa chilichose chakufikapo” chikufuma kwa Yehova.—Yak. 1:17.
4. Kasi ntchivichi chitovwirenge kuti tiŵenge ŵakukondwa chomene?
4 Tose tikwenera kuti tikukhumba tiŵenge ŵakukondwa chomene chifukwa cha kuŵa na mtima wakupeleka. Tingachita nthena para tikuyezga Yehova pa nkhani ya kupeleka. (Efe. 5:1) Apo tikudumbiskana fundo iyi, tiwonengeso ivyo tingachita usange tikuwona kuti ŵanji ŵakuwonga yayi ivyo taŵachitira. Ivi vitovwirenge kuti tilutilire kuŵa ŵakukondwa chifukwa cha kupeleka.
YEZGANI YEHOVA PA NKHANI YA KUPELEKA
5. Kasi ni vinthu wuli vyakuthupi ivyo Yehova wakutipa?
5 Kasi ni nthowa wuli izo Yehova wakulongolera kuti ngwakupa? Wonani viyelezgero vichoko waka. Yehova wakutipa vyakukhumbikwa vyakuthupi. Nanga vingaŵa kuti ndise ŵasambazi yayi, kweni Yehova wakuwoneseska kuti tili na vinthu vyakukhumbikwa pa umoyo. Mwachiyelezgero, wakuwoneseska kuti tili na chakurya, vyakuvwara, na malo ghakukhala. (Sal. 4:8; Mat. 6:31-33; 1 Tim. 6:6-8) Kasi Yehova wakutipa ivyo tikukhumbikwira mwakuthupi chifukwa chakuti waka ndivyo wakwenera kuchita? Yayi! Ipo chifukwa wuli Yehova wakutichitira vyose ivi?
6. Kasi tikusambirapo vichi pa Mateyu 6:25, 26?
6 Zgoro lipusu ndakuti, Yehova wakutipa ivyo tikukhumbikwira mwakuthupi chifukwa wakutitemwa. Ghanaghanirani mazgu gha Yesu agho ghali pa Mateyu 6:25, 26. (Ŵazgani.) Yesu wakagwiliskira ntchito vinthu vya mu chilengiwa kuti walongosore fundo yakuzirwa. Pakuyowoya za viyuni, Yesu wakati: “Vikuseŵa mbuto chara panji kuvuna nesi kulonga mu nthamba.” Ndipouli, wonani ivyo wakayowoya pamanyuma, wakati: “Awiskemwe ŵakuchanya ŵakuvilyeska.” Kufuma apo Yesu wakafumba kuti: “Asi imwe muli ŵakuzirwa kuluska ivyo?” Sambiro likaŵa lakuti wuli? Yehova wakuwona ŵasopi ŵake kuti mbakuzirwa chomene kuluska vinyama. Ntheura usange Yehova wakupwelelera vinyama, tikwenera kukayikira yayi kuti watipenge ivyo tikukhumbikwira. Nga umo vikuŵira na dada wachitemwa uyo wakupwelelera mbumba yake, Yehova wakupwelelera ŵanthu ŵake chifukwa chakuti wakuŵatemwa.—Sal. 145:16; Mat. 6:32.
7. Kasi ni nthowa wuli yimoza iyo tingayezgera Yehova pa nkhani ya kupa? (Wonaniso chithuzi.)
7 Nga ni Yehova, nase tingapeleka ku ŵanji vinthu vyakuthupi chifukwa chakuti tikuŵatemwa. Mwachiyelezgero, kasi mukumanyapo mubali panji mudumbu uyo wakukhumbikwira wovwiri wa chakurya panji vyakuvwara? Yehova wangagwiliskira ntchito imwe kuti mumupe ivyo wakukhumbikwira. Ŵanthu ŵa Yehova ŵakutemwa chomene kovwira ŵanyawo para kwachitika masoka. Mwachiyelezgero, mu nyengo ya COVID-19, ŵabali na ŵadumbu ŵakapelekanga chakurya, vyakuvwara, na vinthu vinyake vyakukhumbikwa ku ŵanyawo awo ŵakaŵavya. Ŵanandi ŵakapelekangaso vyawanangwa vyakovwira pa ntchito ya pa charu chose. Ivi vikawovwira kuti paŵe ndalama zakukhumbikwa kuti ntchito yakovwira para kwachitika soka yende makora pa charu chose. Ŵabali na ŵadumbu aŵa ŵakalondezga ulongozgi wa pa Ŵahebere 13:16, uwo ukuti: “Mungaluwanga yayi kuchita uwemi na kugaŵirako ŵanyinu vinthu ivyo muli navyo, chifukwa Chiuta wakukondwa chomene na sembe zanthena.”
Tose tingamuyezga Yehova pa nkhani ya kupeleka (Wonani ndime 7)
8. Kasi tikupindura wuli na nkhongono za Yehova? (Ŵafilipi 2:13)
8 Yehova wakupeleka nkhongono. Yehova wali na nkhongono zambura chigoti, ndipo wakukondwa kugaŵirako ŵateŵeti ŵake ŵakugomezgeka nkhongono zake izi. (Ŵazgani Ŵafilipi 2:13.) Kasi muli kulombapo kuti Yehova wamupani nkhongono zakutondera chiyezgo panji nkhongono zakuzizipizgira chiyezgo chikuru? Panji kasi muli kulombapo kuti Yehova wamupani nkhongono zakuti mufiske kuchita ivyo mukukhumba zuŵa ilo? Para lurombo lwinu lukazgoreka, namwe mungakolerana na mpositole Paulosi uyo wakalemba kuti: “Mu vinthu vyose, nkhusanga nkhongono mwa uyo wakunipa nkhongono.”—Fil. 4:13.
9. Kasi tingamuyezga wuli Yehova pa nkhani ya umo tingagwiliskilira ntchito nkhongono zithu? (Wonaniso chithuzi.)
9 Nangauli ndise ŵambura kufikapo, kweni tingamuyezga Yehova pa nkhani ya umo tingagwiliskira ntchito nkhongono zithu. Mbunenesko kuti tingaŵagaŵirako yayi ŵanji nkhongono zithu. Kweni tingaŵawovwira na nkhongono zithu. Mwachiyelezgero, tingaluta kukaŵagulira vyakukhumbikwa panji kuŵawovwirako ntchito za panyumba Ŵakhristu ŵanyithu awo mbachekuru panji ŵakunyotwa. Usange tingafiska, tingajipeleka kovwirapo pa kutozga na kupwelelera Nyumba ya Ufumu. Para tikugwiliskira ntchito nkhongono zithu munthowa iyi, vingawovwiraso ŵanji awo ŵakusopa Yehova.
Tingagwiliskira ntchito nkhongono zithu kovwilira ŵanji (Wonani ndime 9)
10. Kasi tingakhozga wuli ŵanji na ivyo tikuyowoya?
10 Kweniso kuluwa yayi kuti mazgu ghali na nkhongono. Kasi mukumanyapo munyake uyo wangakhozgeka para mungamulumba pa ivyo wakuchita? Kasi walipo uyo wakukhumba kukhozgeka? Para ni nthena, chitanipo kanthu kuti nayo wamanye kuti mukumughanaghanira. Mungaluta kukamuwona, kumwimbira foni, panji kumutumira kadi, imelu, panji meseji. Kufipa mtima chomene yayi kuti mwamuyowoya vichi. Nyengo zinyake mubali panji mudumbu wakukhumbikwira mazgu ghapusu waka ghakufumira pasi pa mtima kuti walutilire kugomezgeka panji kuti wajipulikeko makora.—Zinth. 12:25; Efe. 4:29.
11. Kasi Yehova wakugwiliskira wuli ntchito vinjeru vyake?
11 Yehova wakupeleka vinjeru. Msambiri Yakobe wakalemba kuti: “Usange yumoza wa imwe wakupeleŵera vinjeru, walombenge Chiuta, pakuti iyo wakupeleka mwawanangwa ku wose, nakuti wakutombozga yayi.” (Yak. 1:5) Nga umo lemba ili likulongolera, Yehova wakukanilira yayi vinjeru vyake. Iyo wakugaŵirako ŵanji mwawanangwa. Chinyake ntchakuti, para Yehova wakugaŵirako ŵanji vinjeru “wakutombozga yayi” panji ‘kukonthora.’ Wakutilengeska yayi para tamupempha kuti watilongozge. Nakuti wakutichiska kuti timulombenge.—Zinth. 2:1-6.
12. Kasi tili na mipata wuli iyo tingagaŵirako ŵanji vinjeru vithu?
12 Wuli pakuyowoya za ise? Kasi tingamuyezga wuli Yehova pa nkhani ya kugaŵirako ŵanji vinjeru vithu? (Sal. 32:8) Ŵanthu ŵa Yehova ŵali na mipata yinandi ya kuphalirako ŵanji ivyo ŵasambira. Mwachiyelezgero, kanandi tikusambizga ŵaphya mu uteŵeti. Ŵalara ŵakovwira mwakuzikira ŵateŵeti ŵakovwira na ŵabali ŵakubatizika umo ŵangachitira makora milimo yawo mu mpingo. Ndipo awo ŵakumanya makora ntchito zakuzenga ŵakovwira pakusambizga ŵanji awo ŵakumanya vichoko kuti ŵachitenge makora ntchito izi.
13. Para tikusambizga ŵanji, kasi tingamuyezga wuli Yehova?
13 Awo ŵakusambizga ŵanyawo milimo yakupambanapambana ŵakwenera kuyezga Yehova pa nkhani iyi. Kumbukani kuti Yehova wakupeleka vinjeru vyake mwawanangwa. Mwakuyana waka, nase tikugaŵirako ŵanji mwawanangwa vinjeru vithu kweniso ivyo tikumanya. Tikwenera kubisako yayi vinyake ivyo tikumanya chifukwa cha kopa kuti uyo tikumusambizga wangazakatipoka malo ghithu. Tikwenera yayi kuŵa na maghanoghano ghakuti: ‘Palije uyo wakanisambizga ine! Nayo wasambire yekha.’ Ŵanthu ŵa Yehova ŵakwenera yayi kuŵa na maghanoghano ghanthena. M’malo mwake, tikwenera kukondwa kuphalirako ŵanji ivyo tikumanya ndipo tikwenera kuchita nthena na “umoyo withu” wose. (1 Tes. 2:8) Tikukhumba kuti nawo “ŵaŵengeso ŵakwenelera kusambizga ŵanyawo.” (2 Tim. 2:1, 2) Usange tose tikugaŵirako ŵanji vinjeru vithu, mbwenu tose tiŵenge ŵavinjeru kweniso ŵakukondwa.
USANGE ŴANJI ŴAKUWONGA YAYI
14. Kasi ŵanthu ŵanandi ŵakuchita wuli para taŵachitira viwemi?
14 Para ndise ŵakupa, chomenechomene ku ŵabali na ŵadumbu ŵithu, kanandi ŵakuwonga. Nyengo zinyake ŵangatilembera kadi, meseji, panji ŵangatiwonga munthowa yinyake. (Kol. 3:15) Tikukondwa chomene para ŵanji ŵatiwonga.
15. Kasi tikwenera kukumbuka vichi para ŵanji ŵakuwonga yayi?
15 Kweni unenesko ngwakuti ni nyengo zose yayi apo ŵanji ŵangatiwonga. Nyengo zinyake tingajipeleka kovwira ŵanji na nyengo yithu, nkhongono, panji vinthu vithu, kweni pamanyuma tingamba kujifumba usange ŵakhwaskika na ivyo taŵachitira. Usange vyanthena vyachitika, kasi tingachita wuli kuti tileke kukhuŵara na kuleka kukondwa? Kumbukani mazgu gha pa Milimo 20:35 apo pajintha mutu wa nkhani iyi. Kuti tiŵe ŵakukondwa vikuthemba pa umo munthu wachitira yayi. Tingaŵa ŵakukondwa chifukwa cha kupeleka nanga ni para ŵanji ŵakuwoneka kuti ŵakuwonga yayi. Kasi ntchivichi chingatovwira? Wonani nthowa zichoko waka izi.
16. Kasi tikwenera kuŵika mtima pa vichi para tikupeleka?
16 Ŵikani mtima pa kuyezga Yehova. Iyo wakupeleka vinthu viwemi ku ŵanthu nanga ŵangaŵa kuti ŵakuwonga panji yayi. (Mat. 5:43-48) Yehova wakulayizga kuti para nase tikupeleka ‘kwambura kulindilira kanthu kalikose, njombe yithu yizamuŵa yikuru.’ (Luka 6:35) “Kanthu kalikose” kangasazgapo mazgu ghakuwonga. Kwali ŵatiwonga panji yayi, nyengo zose Yehova wawezgerengepo pa viwemi ivyo tachitira ŵanji, chifukwa cha ‘kupeleka mwakukondwa.’—Zinth. 19:17; 2 Kor. 9:7.
17. Kasi tingachita wuli kuti tilutilire kuŵa na maghanoghano ghakwenelera pa nkhani ya kupeleka? (Luka 14:12-14)
17 Kuti tilutilire kuŵa na maghanoghano ghakwenelera pa nkhani ya kupeleka, tikusanga fundo yiwemi iyo yingatovwira pa Luka 14:12-14. (Ŵazgani.) Ntchiheni yayi kulongora mtima wa kupokelera ŵalendo panji wakupa ku ŵanthu awo nawo ŵangatichitira nthena. Kweni wuli usange tamanya kuti kanandi tikupeleka ku ŵanji na chilato chakuti nawo ŵatiwezgerepo? Tingachita makora kuyezga kulondezga ivyo Yesu wakayowoya. Tingapeleka kwa munthu uyo tikumanya kuti wangafiska yayi kutiwezgerapo. Para tachita nthena tiŵenge ŵakukondwa chifukwa tiŵenge kuti tikuyezga Yehova. Ndipo para tikukhazga kalikose yayi pa ivyo tachita, vitovwirenge kuti tilutilire kuŵa ŵakukondwa nanga ŵanji ŵangaleka kutiwonga.
18. Kasi tikwenera kuwoneseska kuleka kuchita vichi, ndipo chifukwa wuli?
18 Gegani kughanaghanira waka kuti ŵanji mbambura kuwonga. (1 Kor. 13:7) Usange ŵanji ŵandatiwonge, tingajifumba kuti: ‘Kasi mbambura kuwonga nadi, panji ŵaluwa waka kuwonga?’ Nyengo zinyake pangaŵa vifukwa vinyake ivyo vingapangiska kuti ŵaleke kuwonga umo ise takhazgiranga. Ŵanji ŵangaŵa kuti ŵawonga chomene mu mtima kweni ŵatondeka waka kutiphalira. Nyengo zinyake ŵangaŵa kuti soni zaŵakora kuti ŵapokera wovwiri, chomenechomene para kumasinda ndiwo ŵakawovwiranga ŵanji. Mulimose umo vingaŵira, usange tikuŵatemwa nadi ŵabali na ŵadumbu ŵithu, tiŵaghanaghanirenge viheni yayi ndipo tilutilirenge kukondwa chifukwa cha kupeleka.—Efe. 4:2.
19-20. Chifukwa wuli kuzikira nkhwakovwira pa nkhani ya kupeleka? (Wonaniso chithuzi.)
19 Muzikirenge. Pa nkhani ya kuŵa wakupa, themba lavinjeru Solomoni likalemba kuti: “Ponya chingwa chako pa maji, pakuti uzamuchisangaso para pajumpha mazuŵa ghanandi.” (Muph. 11:1) Nga umo mazgu agha ghakulongolera, ŵanji ŵangalongora kuwonga pa ivyo tikaŵachitira “para pajumpha mazuŵa ghanandi.” Ivi ndivyo vikachitikira mudumbu munyake.
20 Vyaka vinandi kumasinda, muwoli wa mulaŵiliri wadera wakalembera kalata mudumbu munyake uyo wakaŵa kuti wabatizika waka, kumuchiska kuti walutilire kugomezgeka. Pati pajumpha vyaka 8, mudumbu uyu wakazgora kalata iyi, wakati: “Nangauli mwaŵeneko mukumanya yayi, kweni nkhukhumba kumumanyiskani kuti mwanovwira chomene mu vyaka vyose ivyo vyajumpha.” Wakalutizga kuti: “[Kalata yinu] yikaŵa yaubwezi, kweni chomene lemba ilo mukaŵikamo ndilo likanifika pa mtima, ndipo nkhaliluwapo yayi.” a Wati walongosora masuzgo ghanyake agho wakasangana nagho, mudumbu uyu wakati: “Nyengo zinyake nkhawonanga nga ningaleka waka unenesko. Kweni lemba ilo mukanilembera mu kalata likanipanga nkhongono kuti nilutilire kuzizipizga.” Wakatiso: “Mu vyaka vyose 8, palije icho chikanikhozga chomene kuluska kalata yinu na lemba ilo mukaniŵikiramo.” Ghanaghanirani waka umo muwoli wa mulaŵiliri wadera wakakondwera wati wapokera kalata iyi pati “pajumpha mazuŵa ghanandi”! Nase nyengo zinyake pangatora nyengo yitali kuti munthu uyo tikamuchitira vinyake watiwonge.
Nyengo zinyake munyake wangazakatiwonga para pajumpha nyengo yitali kufuma apo tikamovwilira (Wonani ndime 20) b
21. Chifukwa wuli mwaŵikapo mtima kulutilira kuyezga Yehova pa nkhani ya kupa?
21 Nga umo tayowoyera kale, Yehova wakatilenga mwapadera chomene. Nangauli tikukondwa para ŵanyithu ŵatipa chinthu, kweni tikukondwa chomene para tikupeleka. Tikujipulika makora chomene para tikufiska kovwira Ŵakhristu ŵanyithu. Ndipo tikukondwa para ŵatiwonga pa ivyo taŵachitira. Ndipouli, kwali uyo tamupa watiwonga panji yayi, tikukondwa chifukwa cha kumanya kuti tachita chinthu chiwemi chomene. Kuluwa yayi kuti chilichose icho mwapeleka, ‘Yehova wali na nthowa yakumupirani vinandi’ kuluska ivyo mwapeleka. (2 Mid. 25:9) Manyani kuti mungamuluska yayi Yehova pa nkhani yakupeleka. Nakuti palije chinthu chiwemi chakuluska kupika njombe na Yehova iyomwenecho. Ipo tiyeni tiŵikepo mtima kulutilira kuyezga Adada ŵithu ŵakuchanya awo mbakupa.
SUMU 17 “Nkhukhumba”
a Lemba ilo muwoli wa mulaŵiliri wadera wakaŵikamo mu kalata iyo wakalembera mudumbu munyake nda 2 Yohane 8 ilo likuti: “Muŵe maso kuti muleke kutaya vinthu ivyo tatokatoka kuvisanga, kweni kuti mupokere njombe yakukwana.”
b MAZGU GHAKULONGOSORA CHITHUZI: Pa chithuzi, muwoli wa mulaŵiliri wadera wakulembera mudumbu kalata yakukhozga. Vyaka vyati vyajumphapo, wakupokera kalata ya kumuwonga.
