NKHANI YAKUSAMBIRA 36
SUMU 89 Pulikirani Mutumbikike
“Muchitenge Ivyo Mazgu Ghakuyowoya”
“Muchitenge ivyo mazgu ghakuyowoya, ŵakupulika waka yayi.” —YAK. 1:22.
FUNDO YIKURU
Padera pa kutovwira kuti tikhumbisiskenge chomene kuŵazga Mazgu gha Chiuta zuŵa lililose, nkhani iyi yitovwirengeso kuti tighanaghanirengepo chomene pa ivyo tikusambira na kuvilondezga mwakukwana.
1-2. Kasi ntchivichi chikovwira ŵateŵeti ŵa Chiuta kuŵa ŵakukondwa? (Yakobe 1:22-25)
YEHOVA na Mwana wake wakutemweka ŵakukhumba kuti ise tiŵenge ŵakukondwa. Uyo wakalemba Salimo 119:2 wakati: “Mbakukondwa awo ŵakusunga vikumbusko vyake, awo ŵakumupenja na mtima wawo wose.” Yesu wakayowoyaso kuti: “Ŵakukondwa ni awo ŵakupulika mazgu gha Chiuta na kughasungilira!”—Luka 11:28.
2 Taŵateŵeti ŵa Yehova ndise ŵanthu ŵakukondwa. Chifukwa wuli? Tili na vifukwa vinandi, kweni chakuzirwa chomene ntchakuti tikuŵazga Mazgu gha Chiuta zuŵa lililose na kulondezga ivyo tasambira.—Ŵazgani Yakobe 1:22-25.
3. Kasi tikupindura wuli para tikulondezga Mazgu gha Chiuta?
3 Pali nthowa zinandi izo tikusangira chandulo para ‘tikuchita ivyo mazgu ghakuyowoya.’ Chimoza ntchakuti, tikumanya kuti kuchita nthena nkhwakukhumbikwa chomene kuti tikondweske Yehova. Ndipo nase tikuŵaso ŵakukondwa. (Muph. 12:13) Apo tikulondezga ivyo tikuŵazga mu Mazgu gha Chiuta, tikuŵa ŵakukondwa mu mbumba kweniso tikuŵa paubwezi wakukhora na Ŵakhristu ŵanyithu. Ndipo panji namwe mwajiwonera mwekha pa umoyo winu. Chinyakeso ntchakuti, tikugega masuzgo ghanandi agho ghakuwira ŵanthu awo ŵakuleka kulondezga fundo za Yehova. Nadi, nase tikukolerana na ivyo Themba Davide likayowoya. Mu sumu yake, pamanyuma pa kuzunura vya dango, malanguro, na vyeruzgo vya Yehova, likamalizga na mazgu ghakuti: “Para munthu wakuvisunga, wakusanga njombe yikuru.”—Sal. 19:7-11.
4. Chifukwa wuli ntchakusuzga kuchita ivyo Mazgu gha Chiuta ghakuyowoya?
4 Unenesko ngwakuti, ntchipusu yayi kuti nyengo zose tichitenge ivyo Mazgu gha Chiuta ghakuyowoya. Nangauli tikuŵa ŵakutangwanika, kweni tikwenera kupatura nyengo yakuti tiŵazgenge na kusambira Baibolo mwakuti timanye ivyo Yehova wakukhumba tichitenge. Ntheura tiyeni tiwone masachizgo agho ghangatovwira kuti tiŵazgenge Mazgu gha Chiuta zuŵa lililose. Tiwonengeso ivyo vingatovwira kuti tighanaghanirengepo pa ivyo tikuŵazga na kuwona umo tingalondezgera ivyo tikusambira pa umoyo withu.
MUPATURENGE NYENGO YAKUŴAZGIRA MAZGU GHA CHIUTA
5. Kasi ni milimo wuli iyo yikutilyera chomene nyengo?
5 Ŵateŵeti ŵa Yehova ŵanandi mbakutangwanika. Tikumalira nyengo yinandi pa milimo yakupambanapambana yakuzirwa. Mwachiyelezgero, ŵanandi ŵa ise tikugwira ntchito zakulembeka kuti tijipwelelere pamoza na mbumba zithu. (1 Tim. 5:8) Ŵakhristu ŵanandi ŵakupwelelera ŵabali ŵawo ŵalwari panji ŵachekuru. Kweniso tose tikukhumbikwira kupwelelera umoyo withu, ivyo navyo vingatilyera nyengo. Padera pa milimo iyi, tiliso na milimo yinyake ku mpingo. Nakuti mulimo unyake wakuzirwa ngwa kupharazga makani ghawemi mwamwamphu. Na milimo yose iyo muli nayo, kasi mungachita wuli kuti musange nyengo yakuŵazgira Baibolo zuŵa lililose, kughanaghanirapo pa ivyo mwaŵazga, na kulondezga ivyo mwasambira?
6. Kasi mungachita wuli kuti kuŵazga Baibolo ndiko kuŵenge pakwamba pa umoyo winu? (Wonaniso chithuzi.)
6 Kuŵazga Baibolo ntchimoza mwa “vinthu vyakuzirwa chomene” kwa ise Taŵakhristu, ntheura kukwenera kuŵa pakwamba. (Fil. 1:10) Pakuyowoya vya munthu uyo ngwakukondwa, salimo lakwamba likuyowoya kuti: “Wakukondwa na dango la Yehova, wakuŵazga dango ili na kughanaghanirapo muhanya na usiku.” (Sal. 1:1, 2) Apa ntchakuwonekerathu kuti tikwenera kupatura nyengo yakuŵazgira Baibolo. Ipo kasi nyengo yiwemi yakuŵazgira Baibolo ni nji? Waliyose wangasankha nyengo iyo njakwenelera kwa iyo. Kweni mwakudumura, yikwenera kuŵa nyengo iyo mukuwona kuti mungafiska kuŵazga Baibolo zuŵa lililose. Mubali munyake zina lake Victor wakuti: “Ine nkhutemwa kuŵazga Baibolo na mulenji. Nangauli nkhutemwa yayi kuwuka mulenji chomene, kweni na mulenji vyakutimbanizga vikuŵa vichoko. Maghanoghano ghakuŵa ghakukhazikika ndipo chikuŵa chipusu kuŵika maghanoghano pa ivyo nkhuŵazga.” Kasi namwe ndimo viliri kwa imwe? Para yayi, jifumbani kuti, ‘Kasi ni nyengo wuli yiwemi kwa ine yakuŵazgira Baibolo?’
Kasi ni nyengo wuli yiwemi yakuŵazgira Baibolo? Kasi ni nyengo wuli yiwemi kwa imwe iyo mukuwona kuti mungafiska kuŵazga Baibolo zuŵa lililose? (Wonani ndime 6)
MUGHANAGHANIRENGEPO IVYO MUKUŴAZGA
7-8. Kasi ntchivichi chingatitondeska kuti tipindurenge mwakukwana na ivyo tikuŵazga? Yowoyani chiyelezgero.
7 Unenesko ngwakuti, nyengo zinyake vingachitika kuti tikuŵazga vinthu vinandi nyengo zose kweni tikughanaghanirapo yayi. Kasi muli kuŵazgapo vinthu vinyake, kweni pati pajumpha nyengo yichoko waka na kuluwa ivyo mwanguŵazga panji mukukumbukapo vichoko waka? Tose vyanthena ivi vikwenera kuti vili kutichitikirapo. Chachitima ntchakuti vyanthena vingatichitikiraso pa kuŵazga Baibolo. Mwachiyelezgero, panji tingajiŵikira chilato chakuti tiŵazge machaputara ghanyake mu Baibolo zuŵa lililose. Kuchita nthena nkhuwemi waka. Tikwenera kujiŵikira vilato na kuyezgayezga kuti tivifiske. (1 Kor. 9:26) Ndipouli, kuŵazga Baibolo nkhwamba waka. Pali vinandi ivyo tikwenera kuchita kuti tisange chandulo chomene para tikuŵazga Mazgu gha Chiuta.
8 Ghanaghanirani chiyelezgero ichi: Kanandi vyakumera vikukhumbikwira vula kuti vilutilire kukura makora. Kweni para kungalokwa vula yikuru mu nyengo yichoko waka, mtika unganjira yayi pasi. Para vingaŵa nthena, vula iyi yingaŵa yambura kovwira. Dongo likukhumbikwira nyengo yakukwana kuti mtika wa vula iyo yalokwa unjire pasi na kuŵa wakovwira ku vyakumera. Mwakuyana waka, tikwenera yayi kuŵazga Baibolo mwakuchimbilira waka, na kutondeka kuŵa na nyengo yakuti tighanaghanirepo kweniso kutondeka kukumbuka ivyo taŵazga na kuvilondezga.—Yak. 1:24.
Nga umo vikuŵira kuti pakukhumbikwa nyengo kuti mtika unjire pasi usange vula yalokwa, nase tikukhumbikwira nyengo kuti tighanaghanirengepo na kulondezga ivyo tikuŵazga mu Mazgu gha Chiuta (Wonani ndime 8)
9. Kasi tikwenera kuchita wuli usange tili na kaluso kakuŵazga Baibolo mwakuchimbilira?
9 Kasi nyengo zinyake mukuwona kuti mukuŵazga Baibolo mwakuchimbilira waka? Para ni nthena, kasi mukwenera kuchita wuli? Yezgani kuŵazga mwakuzikira. Ŵikanipo mtima kughanaghanirapo ivyo mukuŵazga panji ivyo mwamara waka kuŵazga. Kuchita nthena nkhwakusuzga yayi. Usange mukuwona kuti nkhwakusuzga, yezgani kukumbuka ivyo mwaŵazga na kughanaghaniraposo. Nyengo zinyake mungasazgirako nyengo yakusambilira mwakuti muŵengeso na nyengo ya kughanaghanirapo panji kuti kulanguruka. Ndipo panji mungasankha kuŵazga mavesi ghachoko waka na kugwiliskira ntchito nyengo iyo yakhalako kughanaghanirapo ivyo mwaŵazga. Victor, uyo tamuzunura kukwambilira wakuti, “Nkhuŵazga Baibolo kwanyengo yichoko waka, panji chaputara waka chimoza. Chifukwa chakuti nkhuŵazga na mulenji chomene, vikunovwira kuti zuŵa lose nighanaghanirengepo pa ivyo naŵazga.” Vilije kanthu kuti mukuŵazga munthowa wuli, kweni chakuzirwa chomene ntchakuti muŵazgenge mwakuzikira mwakuti muŵe na nyengo ya kughanaghanirapo ivyo mukuŵazga.—Sal. 119:97; wonani bokosi lakuti “ Mafumbo Ghakuti Mughanaghanirepo.”
10. Longosorani chiyelezgero cha umo mungalondezgera ivyo mukusambira. (1 Ŵatesalonika 5:17, 18)
10 Kwali mukuŵazga munthowa wuli kweniso mukumalirapo nyengo yitali wuli, ŵikanipo mtima kuwona umo mungalondezgera ivyo mukuŵazga. Apo mukuŵazga Mazgu gha Chiuta, jifumbani kuti, ‘Kasi ningalondezga wuli fundo izi pasono panji munthazi umu?’ Tiyelezgere kuti pa sambiro linu mukuŵazga lemba la 1 Ŵatesalonika 5:17, 18 (Ŵazgani.) Pamanyuma pa kuŵazga mavesi ghaŵiri agha, mungachita makora kuyima dankha na kughanaghanira unandi wa nyengo izo mukulombera kweniso umo mukulombera. Kweniso mungaghanaghanira vinthu ivyo mungamuwongera chomene Yehova. Nyengo zinyake mungawona kuti mumuwonge Yehova pa vinthu vitatu vyakudunjika ivyo wamuchitirani. Nanga mungaŵa kuti mwaghanaghanirapo kwa maminiti ghachoko waka pa vinthu ivi, kweni vingamovwirani kuti mupulikiske Mazgu gha Chiuta na kuchita ivyo ghakuyowoya. Ghanaghanirani umo mungapindulira para zuŵa lililose mungachitanga nthena apo mukuŵazga Baibolo. Ivi vimovwiraninge kuti muchitenge nadi ivyo Mazgu gha Chiuta ghakuyowoya. Kweni wuli usange mukuwona kuti pali vinthu vinandi ivyo mukukhumbikwira kuti mugwilirepo ntchito?
MUJIŴIKIRENGE VILATO IVYO MUNGAFISKA
11. Chifukwa wuli nyengo zinyake mungagongowa? Yowoyani chiyelezgero.
11 Para mukuŵazga Baibolo na kuwona nthowa izo mungalondezgera ulongozgi wake, nyengo zinyake mungawona kuti mungakwaniska yayi. Ghanaghanirani chiyelezgero ichi: Mwahuno pa sambiro linu mukuŵazga nkhani yakukhwaskana na kuleka kutemwera. (Yak. 2:1-8) Mbwe mukuwona kuti pa chigaŵa ichi musinthe umo mukuchitira vinthu na ŵanji, ndipo mwaŵikapo mtima kuti musinthe. Apa mwachita makora! Mbwenu machero ghake mukuŵazga mavesi ghakukhwaskana na kayowoyero. (Yak. 3:1-12) Apa napo mukuwona kuti nyengo zinyake vikumusuzgani kujikora pa nkhani ya kayowoyero. Ntheura mwadumura kuti musinthenge pa nkhani iyi ndipo muyowoyenge vinthu ivyo vingakhozga ŵanji. Zuŵa lakulondezgapo mukuŵazga vyakukhwaskana na uheni wakuŵa paubwezi na charu. (Yak. 4:4-12) Apaso mukuwonaso kuti mukwenera kugwilirapo ntchito pa vyakusanguluska ivyo mukutemwa kusangwa navyo. Panji kufika pa zuŵa lakulondezgapo mungawona kuti pali vinthu vinandi ivyo mukwenera kugwilirapo ntchito ndipo mukuwona kuti mungakwaniska yayi kuti musinthe vyose ivi.
12. Chifukwa wuli mukwenera kugongowa yayi usange apo mukuŵazga Baibolo mukuwona kuti pali vinandi ivyo mukukhumbikwira kusintha? (Wonaniso mazgu ghamusi.)
12 Usange mukuwona kuti pali vinthu vinandi ivyo mukukhumbikwira kusintha, kugongowa yayi. Uwu mbukaboni wakuti muli na mtima uwemi. Munthu uyo ngwakujiyuyura kweniso wakujisanda mwaunenesko, wakuŵazga Malemba na chilato chakuti wamanye apo wakwenera kugwilirapo ntchito. a Kumbukaniso kuti ‘kuvwara wunthu uphya’ kukumara yayi. (Kol. 3:10) Kasi ntchivichi chingamovwirani kuti muchitenge ivyo Mazgu gha Chiuta ghakuyowoya?
13. Kasi mungajiŵikira wuli vilato vichokovichoko? (Wonaniso chithuzi.)
13 M’malo mwa kuyezga kuti mulondezge vyose ivyo mwaŵazga panyengo yimoza, jiŵikirani vilato vichokovichoko. (Zinth. 11:2) Yezgani nthowa iyi: Lembani vinthu ivyo mukukhumbikwira kugwilirapo ntchito, ndipo kufuma apo sankhani chimoza panji viŵiri ivyo mwambenge kugwilirapo ntchito, na kuvileka dankha vinyake ivyo mukuwona kuti mugwilirengepo ntchito pamanyuma. Kasi mukwenera kwambira mpha?
M’malo mwa kuyezga kuti mulondezgenge vyose ivyo mwaŵazga panyengo yimoza, mwalekerachi kujiŵikira vilato vichokovichoko? Panji mungaŵika dankha mtima pa chinthu chimoza panji viŵiri (Wonani ndime 13-14)
14. Kasi mungamba na vilato wuli?
14 Mungamba na chilato icho mukuwona kuti ntchipusu ndipo mungachifiska mwaluŵiro. Panji mungasankha chigaŵa icho mukuwona kuti mukukhumbikwira chomene kuti mugwilirepo ntchito. Para mwasankha, penjerezgani mu mabuku ghithu, panji mungagwiliskira ntchito Watch Tower Publications Index panji Buku Lakupenjera Nkhani la Ŵakaboni ŵa Yehova. Mulombani Yehova kuti ‘wamupani khumbo kweniso nkhongono kuti muchite vyose ivyo wakukhumba.’ (Fil. 2:13) Kufuma apo, londezgani ivyo mwasambira. Para mwafiska chilato chinu chakwamba, ntchakuwonekerathu kuti mungakhuka kuti mufiskeso chakulondezgapo. Nakuti para mwawona kuti mwasintha pa chigaŵa chinyake panji kuŵa na mukhaliro unyake Wachikhristu, muwonenge kuti ntchakusuzga yayi kuti mugwilirepo ntchito pa vigaŵa vinyake.
ZOMEREZGANI KUTI MAZGU GHA CHIUTA ‘GHAGWIRE NTCHITO MWA IMWE’
15. Kasi ŵateŵeti ŵa Yehova ŵakupambana wuli na ŵanthu ŵanandi awo ŵakuŵazga Baibolo? (1 Ŵatesalonika 2:13)
15 Ŵanthu ŵanyake ŵakuti ŵali kuŵazga Baibolo lose kanandi waka. Kweni kasi ŵakugomezga nadi ivyo Baibolo likuyowoya? Kasi ŵakulondezga panji kuzomerezga kuti liŵasinthe umo ŵakuchitira vinthu pa umoyo wawo? Yayi. Ŵanthu ŵanandi ŵakulondezga yayi ivyo Baibolo likuyowoya. Kweni ivi ni vyakupambana chomene na ŵateŵeti ŵa Yehova. Nga Mbakhristu ŵakwambilira, tikuzomerezga kuti Baibolo ‘ndaunenesko nadi, ni mazgu gha Chiuta.’ Kweniso, tikuyezgayezga kuti ghagwirenge ntchito mwa ise.—Ŵazgani 1 Ŵatesalonika 2:13.
16. Kasi ntchivichi chingatovwira kuti tichitenge ivyo Mazgu ghakuyowoya?
16 Nyengo zose ntchipusu yayi kuŵazga Mazgu gha Chiuta na kughalondezga. Nyengo zinyake vingatisuzga kusanga nyengo yakuŵazgira Baibolo. Panji tingaŵazganga waka mwakuchimbilira na kutondeka kughanaghanirapo pa ivyo taŵazga. Panjiso tingagongowa pakuwona unandi wa vinthu ivyo tikukhumbikwira kugwilirapo ntchito. Vilije kanthu kuti imwe suzgo linu ni vichi, kweni mungafiska kumarana nalo. Na wovwiri wa Yehova, mungatonda masuzgo ghose agho ghangamutondeskani kuŵazga Baibolo na kulondezga ivyo mwasambira. Mphanyi taŵikapo mtima kuzomera wovwiri wake na kuŵa ŵanthu ŵakupulika waka yayi, kweni ŵakuchita ivyo Mazgu ghakuyowoya. Mwambura kukayika, para tikutemwa chomene kuŵazga Mazgu gha Chiuta na kughalondezga pa umoyo withu, tiŵengeso ŵakukondwa chomene.—Yak. 1:25.
SUMU 94 Kuwonga Chifukwa cha Mazgu gha Chiuta
a Wonani pa jw.org vidiyo yakuti Ivyo Ŵanyinu Ŵakuyowoya—Kuŵerenga Baibolo.
