Nkhababika mu 1934, ndipo ŵapapi ŵane ŵakafuma ku Switzerland na kukhazikika mu Timmins, tawuni iyo muli migodi mu Ontario, Canada. Cha mu 1939, amama ŵakamba kuŵazga magazini gha Gongwe la Mulinda ndipo ŵakalutanga ku maungano gha Ŵakaboni ŵa Yehova. Nane ŵakamba kuluta nane pamoza na ŵana ŵakwithu ŵanyake 6. Nyengo yichoko waka yikati yajumphapo, nawo ŵakazgoka Kaboni wa Yehova.

Adada ŵakakondwa yayi, kweni Amama ŵakawutemwa unenesko ndipo ŵakaŵikapo mtima kuwulondezga. Ŵakachita nthena nanga nkhukwambilira kwa vyaka vya m’ma 1940 apo mulimo wa Ŵakaboni ŵa Yehova ukakanizgika mu Canada. Ndipo nyengo zose Amama ŵakachitanga nawo vinthu mwalusungu Adada kweniso kuŵachindika, nangauli iwo ŵakaŵachitiranga nkhaza. Chiyelezgero chawo chiwemi chikanovwira ine na ŵana ŵakwithu kuzomera unenesko. Chakukondweska ntchakuti pamanyuma Adada ŵakasintha ndipo ŵakamba kuchita nase vinthu mwalusungu chomene.

Mu nyengo ya chihanya mu 1950, nkhaluta ku ungano wa mutu wakuti, Kusazgirako Uteŵeti (Theocracy Increase) uwo ukachitikira mu msumba wa New York. Nkhakhukiskika chomene kuchita vinandi mu gulu la Yehova nati nakumana na ŵabali na ŵadumbu ŵakufuma ku vyaru vyakupambanapambana na kutegherezga viyelezgero vyakukhozga vya awo ŵakanjirapo Sukulu ya Giliyadi. Apa nkhaŵikapo mtima chomene kwamba uteŵeti wanyengozose kuluska kumasinda kose. Nati nawerako waka ku ungano uwu, nkhapempha upayiniya wanyengozose.  Ŵabali ku ofesi ya munthavi ya Canada ŵakanizgora, ndipo ŵakati chakwamba nibatizike dankha. Pa Okutobala 1, 1950 nkhabatizika nadi. Mwezi umoza ukati wajumphapo, nkhaŵa mupayiniya wanyengozose ndipo uteŵeti wane wakwamba kukaŵa ku Kapuskasing. Tawuni iyi yikaŵa patali chomene na uko nkhakhalanga.

Mu 1951, ofesi ya munthavi yikapempha Ŵakaboni awo ŵakayowoyanga Chifurenchi usange ŵangajipeleka kusamira mu chigaŵa cha Quebec uko ŵanthu ŵanandi ŵakayowoyanga chiyowoyero ichi. Kukakhumbikwanga ŵapharazgi ŵanandi. Pakuti Chifurenchi na Chingelezi vyose nkhuyowoya makora, nkhazomera ndipo nkhatumika ku Rouyn. Nkhamanyangako waliyose yayi uku. Nkhaŵa waka na adiresi yekha, nga umo nanguyowoyera pakwamba. Kweni vyose vikenda makora waka. Ine na Marcel tikaŵa waka paubwezi sono ndipo nkhakondwa chomene kuteŵetera mu Quebec kwa vyaka vinayi vyakulondezgapo, pamanyuma nga mupayiniya wapadera.

Apo nkhaŵa ku Quebec, nkhakondwa chomene apo nkhachemeka kuti nkhanjire Sukulu ya Giliyadi kilasi nambara 26 ku South Lansing, New York. Nkhamalizga masambiro agha pa Febuluwale 12, 1956, ndipo nkhatumika ku Ghana, b West Africa. Kweni pambere nindanyamuke, nkhenerangaso kuti niwelere dankha ku Canada kukalindilira m’paka apo vikalata vyakwendera viŵirenge vyakunozgeka. Nkhaghanaghananga kuti namulindilira kwa “masabata ghachoko waka.”

Nkhalindilira vikalata ivi kwa myezi 7 ku Toronto. Panyengo iyi, nkhakhalanga na mbumba ya Cripps, ndipo nkhamanyana na mwana wawo msungwana Sheila. Tikamba chibwezi. Apo nkhaŵa pafupi kuti nimufumbire nthengwa, mbwenu vikalata vyane vyakwendera vikafuma. Ine na Sheila tikayilombera nkhani iyi ndipo tikakolerana kuti ninyamuke kuluta ku uteŵeti wane. Kweni tikakoleranaso kuti tilutilirenge kulemberana makalata na kulindilira usange munthazi tingazakatorana. Chikaŵa chipusu yayi kupanga chakusankha ichi, kweni tikamanya kuti tasankha mwakwenelera.

Pamanyuma pakwenda kwa mwezi umoza mu sitima yapamtunda, yapamaji na mu ndege, nkhafika  ku Accra, Ghana. Nati nafika nkhamba kuteŵetera nga ni mulaŵiliri wa chigaŵa. Ntheura nkhenderanga vigaŵa vyose vya mu Ghana kweniso vyaru vyapafupi nacho vya Ivory Coast (icho pasono chikuchemeka kuti Côte d’Ivoire) kweniso Togoland (icho pasono chikuchemeka kuti Togo). Kanandi nkhendanga nekha pa galimoto ya ofesi ya munthavi. Nkhakondwanga chomene kwendera ŵabali!

Pa mazuŵa gha Chisulo na Sabata, nkhachitiskanga maungano gha dera. Tikaŵavya Malo Ghakuchitirapo Maungano Ghakuru. Ntheura ŵabali ŵakazenganga mtenje wa sungwi panji kuti mishombe mwakuti ŵanthu ŵavikilirike ku dazi. Chifukwa chakuti kukaŵavya mafuriji, ŵabali ŵakasunganga waka viŵeto vyamoyo pafupi waka na kuvikoma mwakuti ŵanthu ŵarye panyengo ya ungano.

Pakachitikanga vinthu vyakusekeska pa maungano agha. Zuŵa linyake Mubali Herb Jennings, c mishonale munyane, wakadumbanga nkhani apo ng’ombe yikakheska panji kuti yikafuma uko ŵakayisunga. Yikachimbira na kujumpha pakati pa pulatifomu na uko mzinda wa ŵanthu wose ukakhala. Mubali Herb wakalekezga dankha kudumba nkhani yake ndipo ng’ombe yikawoneka kuti yatimbanizgika chomene. Kweni ŵabali ŵanayi ŵankhongono ŵakakwaniska kuyikhwema na kuyijalira, uku wumba wose ukuseka.

Mukati mwa sabata, nkhalongoranga filimu yithu ya mutu wakuti The New World Society in Action mu vikaya vyapafupi. Pakuwoneska nkhatoranga salu yituŵa na kuŵika pakati pa mapolo ghaŵiri panji makuni ghaŵiri. Ŵanthu mu muzi ŵakayitemwa chomene filimu iyi. Ŵanandi kakaŵa kakwamba kuwonelera filimu pa umoyo wawo. Ŵakakuŵanga chomene mawoko para ŵakuwonelera vithuzi vya ŵanthu ŵakubatizika. Filimu iyi yikawovwira ŵanthu kumanya kuti tili gulu lakukolerana chomene pa charu chose.

Nati nakhala vyaka pafupifupi viŵiri ku Africa, nkhakondwa chomene kukaŵapo pa ungano wa mitundu yose wa mu 1958 uwo ukachitikira mu msumba wa New York. Nkhakondwa chomene kuwonana na Sheila, uyo wakafuma ku Quebec, uko wakateŵeteranga nga mupayiniya wapadera. Tikalemberananga waka makalata, kweni apa tikakumanaso maso na maso, nkhamufumbira kuti titorane, ndipo wakazomera. Nkhamulembera Mubali Knorr d na kumupempha usange nayo wangakanjira Sukulu ya Giliyadi kuti tikateŵetere lumoza ku Africa. Wakazomera pempho lane. Paumaliro Sheila wakafika ku Ghana. Tikatorana ku Accra, pa Okutobala 3, 1959. Tikawona kuti Yehova watitumbika nadi chifukwa cha kuŵika iyo pakwamba mu umoyo withu.

Mu 1961 tikamba kuteŵetera ku Cameroon. Nkhapempheka kuti tikakhazikiske ofesi yiphya ya munthavi, ntheura nkhatangwanikanga chomene. Pakuti nkhaŵa muteŵeti muphya wa munthavi, nkhakhumbikwiranga kusambira vinandi. Pamanyuma mu 1965, Sheila wakaŵa na nthumbo. Vikanitolera nyengo kuzomerezga kuti tiŵenge ŵapapi. Kweni apo tikaŵa mukati kunozgekera udindo wakuŵa ŵapapi, kweniso kuti tiwelere ku Canada, mbwenu pakachitika chinthu chinyake chakuchitiska chitima.

Sheila wakapita padera. Dokotala wakatiphalira kuti mwana uyo wakate wababikenge wakaŵa mwanalume. Ivi vikachitika vyaka 50 ivyo vyajumpha, kweni tikaluwa yayi. Nangauli tikaŵa na chitima chomene chifukwa cha ivyo vikachitika, kweni tikalutilira na uteŵeti withu mu charu ichi uwo tikawutemwanga chomene.

Ku Cameroon, kanandi ŵabali ŵakatambuzgikanga chifukwa cha kuleka kunjilirapo pa vya ndyali. Vinthu vikafika paheni pa nyengo ya visora vya pulezidenti. Kweni vinthu vikafika paheni chomene pa Meyi 13, 1970, apo Ŵakaboni ŵa Yehova ŵakakanizgika milimo yawo. Boma likapoka ofesi yithu ya munthavi yakutowa chomene iyo yikaŵa kuti yagwira waka ntchito kwa myezi yinkhondi pera. Mu sabata yimoza pera, ŵamishonale wose kusazgapo ine na Sheila, tikachimbizgika mu charu ichi. Chikaŵa chakusuzga kulekana na ŵabali na ŵadumbu chifukwa tikaŵatemwanga chomene kweniso tikaŵafipiranga mtima umo vinthu viŵirenge kwa iwo.

Tikakhala myezi 6 pa ofesi ya munthavi ya France. Uku nkhalutilira kuchita vyose ivyo ningafiska pakovwira ŵabali ŵithu ku Cameroon. Mu Disembala chaka ichi, tikatumika ku ofesi ya munthavi ya ku Nigeria, ndipo ofesi iyi ndiyo yikamba kulaŵilira ntchito yithu ku Cameroon. Ŵabali na ŵadumbu ŵakatipokelera makora chomene, ndipo tikakondwa chomene kuteŵetera uku kwa vyaka vinandi.

Mu 1973 tikakhumbikwiranga kupanga chakusankha chakusuzga chomene. Sheila wakaŵa kuti wakusuzgika na masuzgo ghanyake mu thupi. Apo tikaŵa ku ungano wa chigaŵa ku New York, uku wakulira wakaniphalira kuti: “Nkhuwona kuti ningafiska yayi kulutizga uteŵeti! Nilije nkhongono ndipo kanandi nkhulwaralwara.” Wakaŵa kuti wateŵetera nane ku West Africa kwa vyaka vyakujumpha 14. Nkhanothanga chifukwa cha kulimbikira kwake uteŵeti, kweni apa tikakhumbikwanga kusintha vinthu vinyake. Tikati tadumbiskana na kufwilirapo kulomba pa nkhani iyi, tikasankha kuti tiwelere ku Canada, uko wangakapokera makora wovwiri wa chipatala. Kuleka uteŵeti withu wa umishonale kweniso wanyengozose, chikaŵa chinthu chakusuzga chomene na chakuchitiska chitima icho tikakhumbikwiranga tisankhe.

Tikati tafika ku Canada, nkhasanga ntchito kwa mubwezi wane uyo wakachitanga bizinesi yakuguliska magalimoto cha kumpoto kwa Toronto. Tikachita lenti mu kanyumba kachoko waka, tikagura mipando ya sekondihandi, ndipo tikafiska kwambapo umoyo uphya kwambura kunjira mu ngongoli. Tikakhumbanga kulutilira kukhala umoyo wambura kukhumba vinandi, kulindilira kuti zuŵa linyake tingazakambiraso uteŵeti wanyengozose. Tikazizwa chomene kuti tikambiraso nadi mwaluŵiro kuluska umo tikakhazgiranga.

Nkhambapo kuchitako mulimo wa vyakuzenga pa zuŵa la Chisulo lililose pa Malo Ghaphya  Ghakuchitirapo Maungano ku Norval, Ontario. Pamanyuma nkhamba kuteŵetera nga mulaŵiliri wa Malo Ghakuchitirapo Ungano. Sheila nayo wakamba kuŵako makora, ndipo tikawona kuti nayo wangachita uteŵeti uphya uwu. Ntheura tikasamira mu kanyumba ako kakaŵa pa Malo Ghakuchitirapo Ungano mu Juni, 1974. Tikakondwa chomene kwambiraso uteŵeti wanyengozose!

Mwamwaŵi, Sheila wakalutilira kuŵa makora. Vyaka viŵiri vikati vyajumphapo, tikazomera uteŵeti wakwendera dera. Dera ilo tikenderanga likaŵa mu Manitoba, chigaŵa cha mu Canada icho chikazizimanga chomene. Ndipouli, tikakondwanga chomene chifukwa chakuti ŵabali na ŵadumbu ŵakaŵa ŵachitemwa. Tikamanya fundo yakuti vikuthemba pa malo agho wamuteŵetera yayi, chakuzirwa chomene nkhulutilira kuteŵetera Yehova kulikose uko ungatumika.

Tikati tateŵetera vyaka vinandi pa mulimo wakwendera dera, mu 1978 tikachemeka kuti tikambe kuteŵetera pa Beteli ya Canada. Na nyengo wuwo cha, nkhasambira sambiro lakuzirwa kweni munthowa yakuŵinya. Nkhapika nkhani ya ora limoza na hafu mu Chifurenchi pa ungano wapadera ku Montreal. Chachitima ntchakuti nkhani yane ŵanthu yikaŵafika pamtima yayi, ndipo mubali wa mu Dipatimenti ya Uteŵeti wakanipa ulongozgi. Unenesko ngwakuti panyengo iyo nkhamanyanga yayi kuti vikunisuzga kudumba nkhani mwaluso. Kweni vikanisuzga kuwupokelera ulongozgi. Tikalekana makora yayi na mubali uyu, ndipo nkhawonanga kuti ngwakukhwimiska waka vinthu, lekani wakatondeka na kuniwonga. Apa nkhabudiska chifukwa nkhatondeka kupulikira ulongozgi chifukwa cha umo ukapelekekera, kweniso umo nkhawoneranga munthu uyo wakanipa ulongozgi.

Pamanyuma pa mazuŵa ghachoko waka, mubali wa mu Komiti ya Munthavi wakadumbiskana nane vya nkhani iyi. Nkhazomerezga kuti nkhamuzgora makora yayi mubali uyo wakanipa ulongozgi ndipo nane nkhudandawura navyo na ivyo nkhayowoya. Kufuma apo nkhayowoyeskana na mubali uyo wakanipa ulongozgi. Ndipo mwalusungu nayo wakanigowokera. Apa nkhasambirapo uwemi wakuŵa wakujiyuyura, ndipo sambiro ili nizamuliluwapo yayi. (Zinth. 16:18) Nalombapo kwa Yehova kanandi waka pa nkhani iyi, ndipo naŵikapo mtima kuleka kupepuraso ulongozgi.

Sono nateŵetera pa Beteli ya Canada kwa vyaka vyakujumpha 40, ndipo kufuma mu 1985, naŵa na mwaŵi wakuteŵetera mu Komiti ya Ofesi ya Munthavi. Mu Febuluwale 2021, muwoli wane wakatayika. Padera pakuzizipizga chitima icho nili nacho, pasono nkhulwaralwara. Kweni nkhuŵa wakutangwanika chomene chifukwa cha uteŵeti ndipo nkhukondwa chifukwa chakuti ‘nkhuwona viŵi yayi umo mazuŵa gha umoyo wane ghakumalira.’ (Muph. 5:20) Nangauli nakumanapo na masuzgo ghakupambanapambana, kweni nasanganaso na vinthu viwemi vinandi ivyo vyanovwira kuŵa wakukondwa chomene. Kuŵika Yehova pa malo ghakwamba pa umoyo wane kweniso kuchita uteŵeti wanyengozose kwa vyaka 70, vyaŵa thumbiko nadi kwa ine. Nkhulomba kuti ŵabali na ŵadumbu ŵithu ŵachinyamata nawo mphanyi ŵalutilira kuŵika Yehova pa malo ghakwamba pa umoyo wawo, chifukwa nkhugomezga na mtima wose kuti nawo ŵatumbikikenge na kuŵa na umoyo wakukhorweska, ivyo vikuchitika pekha para tikuteŵetera Yehova.