1. Kasi ntchinthu wuli chimoza chakukondweska chomene chakukhwaskana na Yesu? Longosorani.

CHINTHU chimoza chakukondweska chomene chakukhwaskana na Yesu ntchakuti wakumanya masuzgo agho taŵanthu ŵambura kufikapo tikukumana nagho. Apo Yesu wakaŵa pa charu chapasi, ‘wakasekeleranga na ŵanthu awo ŵakusekelera ndiposo wakaliranga na ŵanthu awo ŵakulira.’ (Rom. 12:15) Mwachiyelezgero, apo ŵasambiri 70 ŵakawerako na chimwemwe ku upharazgi, Yesu “wakakondwa chomene.” (Luka 10:17-21) Kweni nyengo yinyake wati wawona umo ŵanthu ŵakaŵira na chitima chifukwa cha nyifwa ya Lazaro, Yesu “wakatampha mu mtima wake na kukweŵeka.”—Yoh. 11:33.

2. Kasi ntchivichi chikawovwira Yesu kuti walengerenge chitima ŵanthu?

² Nangauli Yesu wakaŵa wakufikapo, kweni wakaŵa walusungu na wachiwuravi ku ŵanthu ŵambura kufikapo. Kasi ntchivichi chikamovwira? Chinthu chakuzirwa chomene icho chikamovwira ntchakuti wakatemwanga ŵanthu. Nga umo yikayowoyera nkhani iyo yajumpha, Yesu ‘wakakondwanga chomene na ŵana ŵa ŵanthu.’ (Zinth. 8:31) Chifukwa chakuti wakatemwanga chomene ŵanthu, vikamovwira kuti wamanye makora umo ŵakughanaghanira. Mpositole Yohane wakalongosora kuti: “Wakamanyanga ivyo vikaŵa mwa munthu.” (Yoh. 2:25) Yesu wakaŵatemwanga chomene ŵanthu. Ŵanthu ŵakamanya kuti wakaŵatemwanga, lekani ŵakategherezganga uthenga wa Ufumu. Para nase tikuŵatemwa ŵanthu na kuŵalengera chitima, ŵanandi ŵategherezgenge para tikuŵapharazgira.—2 Tim. 4:5.

3-4. (a) Usange tikuŵalengera chitima ŵanthu, kasi tiwuwonenge wuli mulimo withu wakupharazga? (b) Kasi tisambirenge vichi mu nkhani iyi?

³ Mpositole Paulosi wakamanyanga kuti wakwenera kupharazga, ndipo nase tikumanya kuti tikwenera kupharazga. (1 Kor. 9:16) Ndipouli, usange tikuŵalengera chitima ŵanthu, tipharazgenge mwadango waka yayi. Kweni tipharazgirenge ŵanthu chifukwa chakuti  tikuŵalengera chitima ndipo tikukhumba chomene kuŵawovwira. Tikumanya kuti “uyo wakupeleka wakukondwa chomene kuluska uyo wakupokera.” (Mil. 20:35) Para tikupharazga chifukwa chakuti tikukhumba kovwira ŵanthu, tiwutemwenge chomene mulimo wa kupharazga.

⁴ Mu nkhani iyi, tisambirenge chifukwa icho tikwenera kulengera chitima ŵanthu mu uteŵeti. Chakwamba tiwonenge ivyo tikusambirako kwa Yesu pa nkhani ya kulengera chitima ŵanthu. Pamanyuma, tiwonenge nthowa zinayi izo tingamuyezgera.—1 Pet. 2:21.

5-6. (a) Kasi Yesu wakalengeranga chitima anjani? (b) Nga umo lemba la Yesaya 61:1, 2 likayowoyerathu, chifukwa wuli Yesu wakaŵalengeranga chitima ŵanthu awo wakaŵapharazgiranga?

⁵ Wonani umo Yesu wakalongolera kuti wakuŵalengera chitima ŵanthu. Nyengo yinyake, iyo na ŵasambiri ŵake ŵakapharazga makani ghawemi nyengo yitali. Ŵakaŵavya “nyengo . . . nanga njakulyera.” Ntheura Yesu wakatolera ŵasambiri “ku malo ghamayiyi na kupumulapo pachoko.” Kweni, mzinda ukuru ukachimbilira uko Yesu na ŵasambiri ŵake ŵakalutanga. Yesu wakati wafika na kuwona mzinda wa ŵanthu, kasi wakajipulika wuli ndipo wakachita vichi? Iyo “wakawulengera chitima, * chifukwa ŵakaŵa nga ni mberere zambura muliska. Ndipo wakamba kuŵasambizga vinthu vinandi.”—Mrk. 6:30-34.

⁶ Wonani chifukwa icho Yesu wakaŵalengera chitima ŵanthu aŵa. Iyo wakawona kuti ŵanthu aŵa “ŵakaŵa nga ni mberere zambura muliska.” Panyake Yesu wakawona kuti ŵanyake mwa ŵanthu aŵa ŵakaŵa ŵakavu, ndipo ŵakagwiranga ntchito maora ghanandi kuti ŵasangire vyakukhumbikwa mbumba zawo. Panji ŵanyake ŵakaŵa na chitima chomene chifukwa cha nyifwa ya ŵakutemweka ŵawo. Usange ni nthena, Yesu wakwenera kuti wakapulikiskanga masuzgo ghawo. Nga umo tikasambilira mu nkhani iyo yajumpha, Yesu wakwenera kuti wakakumanapo nagho masuzgo ghanthena agha. Yesu wakaŵalengeranga chitima ŵanthu, ndipo wakakhumbanga kuŵapembuzga.—Ŵazgani Yesaya 61:1, 2.

7. Kasi tingamuyezga wuli Yesu?

 ⁷ Kasi tikusambirako vichi kwa Yesu? Nga ni Yesu, nase tazingilizgika na ŵanthu awo ŵali “nga ni mberere zambura muliska.” Ŵakutambura na masuzgo ghanandi. Ise tili nacho icho iwo ŵakukhumbikwira, icho mbuthenga wa Ufumu. (Chivu. 14:6) Ntheura pakuyezga Fumu yithu, tikupharazga makani ghawemi chifukwa chakuti ‘tikuchitira chitima ŵakuyuyuka na ŵakavu.’ (Sal. 72:13) Tikuŵalengera chitima ŵanthu, ndipo tikukhumba kuchitapo kanthu kuti tiŵawovwire.

8. Kasi ni nthowa wuli yimoza iyo tingalongolera kuti tikulengera chitima ŵanthu awo tikuŵapharazgira? Yowoyani chiyelezgero.

⁸ Kasi ntchivichi chingatovwira kuti tilengerenge chitima ŵanthu awo tikuŵapharazgira? Tikwenera kughanaghanira umo ŵanthu awo tikukumana nawo mu uteŵeti ŵakujipulikira na kuyezgayezga kumanya umo ŵakughanaghanira. Pamanyuma tichite nawo nga umo ise tatenge tikhumbirenge kuti ŵanji ndimo ŵachitire nase. * (Mat. 7:12) Tiyeni tiwone nthowa zinayi izo zingatovwira kuti tichite nthena. Yakwamba, ghanaghanirani ivyo waliyose payekha wakukhumbikwira. Tingayaniska ivyo tikuchita para tikupharazga na ivyo dokotala wakuchita para wakovwira mulwari. Dokotala muwemi wakughanaghanira ivyo mulwari waliyose wakukhumbikwira. Wakumufumba na kutegherezga makora para mulwari wakulongosora umo wakujipulikira. M’malo mwa kuchimbilira kumupa mulwari munkhwala, dokotala wakutora dankha nyengo kuti wawone vimanyikwiro vya mulwari ndipo pamanyuma wakumupa wovwiri wakwenelera. Mwakuyana waka, nase tikwenera kugwiliskira ntchito nthowa yimoza pera yayi pakwambiska chidumbirano na waliyose uyo takumana nayo mu uteŵeti. M’malo mwake, tikwenera kuyezgayezga kumanya masuzgo na maghanoghano gha munthu uyo tikumupharazgira.

9. Kasi tileke kughanaghana vichi? Longosorani.

⁹ Para mwakumana na munthu mu upharazgi, lekani kughanaghana kuti mukumanya kale masuzgo ghake, panji ivyo wakugomezga na chifukwa icho wakugomezgera. (Zinth. 18:13) Kweni mufumbani mwaluso kuti mumanye chinthu chinyake chakukhwaskana na iyo ndiposo ivyo wakugomezga. (Zinth. 20:5) Usange ntchakwenelera uko mukukhala, mufumbani vyakukhwaskana na ntchito yake, mbumba, ivyo wali kukumanapo navyo, ndiposo umo wakuwonera vinthu. Para tikuŵafumba mafumbo, ŵatiphalirenge chifukwa icho ŵakukhumbira makani ghawemi. Usange tamanya, tingaŵapa wovwiri uwo ŵakukhumbikwira, nga umo Yesu wakachitira.—Yaniskani na 1 Ŵakorinte 9:19-23.

10-11. Kuyana na lemba la 2 Ŵakorinte 4:7, 8, kasi ni nthowa wuli yachiŵiri iyo tingalongolera kuti tikulengera chitima ŵanji? Yowoyani chiyelezgero.

¹⁰ Chachiŵiri, ghanaghanirani umo umoyo wawo uliri. Nyengo zinyake tingamanya suzgo  lawo. Nakuti nase tikukumana na masuzgo chifukwa chakuti tili ŵambura kufikapo. (1 Kor. 10:13) Tikumanya kuti umoyo ngwakusuzga mazuŵa ghano. Tikuzizipizga chifukwa chakuti Yehova wakutovwira. (Ŵazgani 2 Ŵakorinte 4:7, 8.) Kweni ghanaghanirani awo ŵakusuzgika mu charu ichi awo ŵali paubwezi yayi na Yehova. Nga ni Yesu, tikuŵalengera chitima, ndipo tikukhumba kuŵapharazgira “makani ghawemi gha vinthu viwemi.”—Yes. 52:7.

¹¹ Wonani chiyelezgero cha mubali munyake zina lake Sergey. Pambere wandasambire unenesko, Sergey wakaŵa wasoni chomene. Iyo wakatemwanga yayi kuyowoya na ŵanji. Nyengo yikati yajumphapo, wakazomera kusambira Baibolo. Sergey wakuti: “Apo nkhasambiranga Baibolo, nkhamanya kuti Ŵakhristu ŵakwenera kuphalirako ŵanji ivyo ŵakugomezga. Kweni ine nkhawonanga kuti ningakwaniska yayi.” Ndipouli, wakaghanaghanira awo ŵachali ŵandapulikepo unenesko, ndipo wakamanya kuti umoyo wawo ukwenera kuti ngwakusuzga chifukwa ŵakumumanya yayi Yehova. Iyo wakuti: “Vinthu ivyo nkhasambiranga vikanovwira kuti niŵe wachimwemwe chomene, ndiposo kuti niŵe na mtende wamumtima. Nkhamanya kuti ŵanji nawo ŵakwenera kusambira unenesko uwu.” Apo Sergey wakalengeranga chomene chitima ŵanthu, wakawona kuti ndipo wakaŵanga na chikanga chomene kupharazga. Sergey wakuti: “Nkhazizwa chomene kuti kuphalira ŵanthu uthenga wa mu Baibolo kukanovwira kuti niŵe na chikanga. Chipulikano chane chikakhozgekanga apo nkhaphalirangako ŵanji ivyo nkhugomezga.” *

12-13. Chifukwa wuli tikwenera kuzikira nawo awo tikuŵasambizga mu uteŵeti? Longosorani.

¹² Chachitatu, zikirani nawo ŵanthu awo mukuŵasambizga. Kumbukani kuti ŵangaŵa kuti ŵandapulikepo unenesko wa mu Baibolo uwo ise tikuwumanya makora. Ndipo ŵanandi ŵakuvitemwa chomene vigomezgo vyawo. Ŵakuwona kuti chisopa chawo ntchakuzirwa chomene chifukwa chikuŵawovwira kuti ŵaŵe ŵakukolerana mu mbumba yawo, mu chigaŵa chawo, kweniso chikukolerana na mitheto yawo. Kasi tingaŵawovwira wuli?

¹³ Ghanaghanirani ichi: Kasi chikuchitika ntchivichi usange buliji lakale ndakuwayawaya panji  kuti ndakuleghalegha ndipo pakukhumbikwa kuzenga linyake? Kanandi para buliji liphya likuzengeka, buliji lakale likuŵa kuti lichali kugwira ntchito. Buliji lakale likuwiskika para buliji liphya lamara kuzengeka. Mwakuyana waka, pambere ŵanthu tindaŵaphalire kuti ŵavileke vigomezgo vyawo “vyakale” ivyo ŵakuviwona kuti ni vyakuzirwa, chakwamba tikwenera kuŵawovwira kumanya na kutemwa unenesko “uphya,” uwo ŵakawumanyanga yayi pambere tindambe kusambira nawo. Para tachita ivi ndipo ŵangaŵa ŵakunozgeka kuleka vigomezgo vyawo vyakale. Pangatora nyengo kuti tovwire munthu kuti wasinthe.—Rom. 12:2.

14-15. Kasi tingawovwira wuli ŵanthu awo ŵakumanya vichoko panji ŵakumanyapo chilichose yayi kuti umoyo wamuyirayira uzamuŵa mu paradiso pa charu chapasi? Yowoyani chiyelezgero.

¹⁴ Usange tikuzikira mu uteŵeti, tikhazgenge kuti ŵanthu ŵapulikiskenge panji kuzomera unenesko wa mu Baibolo nyengo yeneyiyo yayi. Kweni tikwenera kuŵalengera chitima na kuŵawovwira kuti ŵaghanaghanirengepo chomene pa ivyo Baibolo likuyowoya, nangauli ivi vingatora nyengo yitali. Mwachiyelezgero, ghanaghanirani umo tingawovwilira munthu kuti wapulikiske kuti umoyo wamuyirayira uzamuŵa mu paradiso pa charu chapasi. Ŵanandi ŵakumanya vichoko panji ŵakumanyapo chilichose yayi za chisambizgo ichi. Ŵangaŵa kuti ŵakugomezga kuti nyifwa mbumaliro wa vyose. Panji ŵakugomezga kuti ŵanthu ŵawemi wose ŵakuluta kuchanya. Kasi tingaŵawovwira wuli?

¹⁵ Wonani umo mubali munyake wakovwilira ŵanthu kupulikiska kuti umoyo wamuyirayira uzamuŵa pa charu chapasi. Chakwamba, wakuŵazga lemba la Genizesi 1:28. Pamanyuma, wakumufumba mweneko nyumba uko Chiuta wakakhumbanga kuti ŵanthu ŵakhalenge, ndiposo umoyo uwo wakakhumbanga kuti ŵaŵe nawo. Ŵanandi ŵakuzgora kuti, “Wakakhumbanga kuti ŵanthu ŵakhale pa charu chapasi, kweni ŵaŵe na umoyo uwemi.” Pamanyuma, mubali uyu wakuŵazga lemba la Yesaya 55:11 na kumufumba mweneko nyumba usange khumbo la Chiuta lili kusintha. Kanandi wakuzgora kuti lindasinthe. Paumaliro, mubali uyu wakuŵazga lemba la Salimo 37:10, 11 na kumufumba mweneko nyumba umo umoyo uzamuŵira kunthazi. Chifukwa chakuti wakugwiliskira ntchito Baibolo mu nthowa iyi, wawovwira ŵanthu ŵanandi kumanya kuti Chiuta wachali kukhumba kuti ŵanthu ŵawemi ŵazakakhale kwamuyirayira mu Paradiso pa charu chapasi.

16-17. Kuyana na fundo ya pa Zintharika 3:27, kasi tingachita vichi kuti tilongore kuti tikuŵalengera chitima ŵanthu? Yowoyani chiyelezgero.

¹⁶ Chachinayi, ghanaghanirani ivyo mungachita kulongora kuti mukuŵaghanaghanira ŵanthu awo mukuŵapharazgira. Mwachiyelezgero, kasi tili kufikapo pa nyumba ya munthu uyo tikukhumba kumupharazgira pa nyengo yambura kwenelera? Tingamuphepiska na kumupempha kuti tize pa nyengo yiwemi. Wuli usange wakukhumba kuti timovwireko kamulimo kanyake kapusu? Panji wuli usange munthu munyake uyo wakukhala waka pa nyumba chifukwa chakuti ni mulwari panji muchekuru, wakukhumba kuti munthu wamovwireko tumilimo tunyake?  Para vyaŵa nthena, tingamovwira munthu uyo.—Ŵazgani Zintharika 3:27.

¹⁷ Mudumbu munyake vinthu vikamwendera makora chomene wati walongora lusungu nangauli wakawonanga nga kuti ivyo wakachita vikaŵa vyakuzirwa viŵi yayi. Chifukwa chakuti wakaŵalengeranga chitima, wakalembera kalata mbumba yinyake iyo mwana wawo wakafwa wati wababika waka. Mu kalata wakalembamo fundo zakupembuzga zakufuma mu Malemba. Kasi mbumba iyi yikakhwaskika wuli na kalata iyi? Mama uyo mwana wake wakatayika wakalemba kuti: “Mayiro vinthu vikaŵa makora yayi. Kalata yinu yatovwira chomene. Nkhuwonga chomene chifukwa kalata yinu yatipembuzga chomene. Mayiro nkhaŵazga kalata yinu kujumpha ka 20. Namanyanga yayi kuti mungatipembuzga nthena. Tikuwonga kufumira pasi pa mtima.” Tikukayika yayi kuti vinthu vingenda makora chomene mu uteŵeti para tikuyezgayezga kumanya masuzgo agho ŵanthu ŵakutambura nagho, na kuchitapo kanthu kuti tiŵawovwire.

18. Kuyana na lemba 1 Ŵakorinte 3:6, 7, kasi tikwenera kukumbuka vichi pa nkhani yakukhwaskana na uteŵeti withu, ndipo chifukwa wuli?

¹⁸ Tikwenera kukumbuka fundo yinyake yakukhwaskana na ivyo tikuchita mu uteŵeti. Nangauli nase tikovwirapo kuti ŵanji ŵamanye unenesko, kweni ise ndise tikuchita chigaŵa chakuzirwa chomene yayi. (Ŵazgani 1 Ŵakorinte 3:6, 7.) Yehova ndiyo wakuguza ŵanthu. (Yoh. 6:44) Kwali munthu wazomerenge panji wakanenge makani ghawemi, vyose vikuthemba pa umo mtima wake uliri. (Mat. 13:4-8) Kumbukani kuti ŵanthu ŵanandi ŵakakana uthenga wa Yesu, kweni Yesu wakaŵa Msambizgi mukuru kuluska waliyose uyo wali kuŵako. Ntheura tingagongowanga yayi usange ŵanthu ŵanandi ŵakutegherezga yayi uthenga withu.

19. Kasi tisangenge vyandulo wuli para tikuŵalengera chitima ŵanthu mu uteŵeti?

¹⁹ Tisangenge vyandulo para tikuŵalengera chitima ŵanthu mu uteŵeti. Titemwenge chomene kupharazgira ŵanthu. Tisangenge chimwemwe chikuru icho chikwiza chifukwa cha kupeleka. Ndipo tovwirenge awo ŵali na “maghanoghano ghakwenelera umoyo wamuyirayira” kuzomera makani ghawemi. Ntheura “chikuru tili na mwaŵi wa kuchitira ichi, tiyeni tichite icho ntchiwemi kwa wose.” (Gal. 6:10) Para tichitenge nthena, tiŵenge ŵakukondwa chifukwa cha kupeleka uchindami kwa Adada ŵithu ŵakuchanya.—Mat. 5:16.