1. Kasi Adamu na Eva ŵakataya vichi, ndipo chikachitika ntchivichi?

KASI ninjani wakwenera kutiŵikira malango pa icho ntchiwemi na icho ntchiheni? Apo Adamu na Eva ŵakarya chipambi cha mu khuni la kumanyiska uwemi na uheni, ŵakalongora kuti ŵakamugomezganga yayi Yehova na fundo zake. Ŵakasankha kuti ŵajimanyirenge ŵekha icho ntchiwemi na chiheni. (Gen. 3:22) Kweni ghanaghanirani ivyo ŵakataya. Ŵakataya ubwezi wawo na Yehova. Kweniso ŵakataya mwaŵi wa kuŵa ŵamoyo kwamuyirayira, ndipo ŵakapirako ŵana ŵawo kwananga na nyifwa. (Rom. 5:12) Ivyo Adamu na Eva ŵakasankha vili kwambiska masuzgo ghakuru.

2-3. (a) Kasi nduna ya ku Etiyopiya yikachita wuli Filipu wati wayipharazgira? (b) Kasi tikusanga vitumbiko wuli para tabatizika, ndipo tiwonenge mafumbo wuli?

² Yaniskani umo Adamu na Eva ŵakachitira na umo nduna ya ku Etiyopiya yikachitira Filipu wati wayipharazgira. Nduna iyi yikawonga chomene ivyo Yehova na Yesu ŵakayichitira mwakuti nyengo yeneyiyo yikabatizika. (Mil. 8:34-38) Para nase tajipatulira kwa Chiuta na kubatizika nga umo nduna yikachitira, ndikuti tachita chinthu chakuzirwa chomene. Tikulongora kuti tikuwonga ivyo Yehova na Yesu ŵatichitira. Kweniso tikulongora kuti tikumugomezga Yehova na kumanya kuti ndiyo wakwenera kutipa malango pa icho ntchiwemi na icho ntchiheni.

³ Ghanaghanirani vitumbiko ivyo tikusanga para tikuteŵetera Yehova. Thumbiko limoza ndakuti Yehova wazamutipa vinthu vyose ivyo Adamu na Eva ŵakataya, kusazgapo umoyo wamuyirayira. Chifukwa chakuti tili na chipulikano mwa  Yesu Khristu, Yehova wakutigowokera zakwananga zithu ndiposo wakutipa njuŵi yituŵa. (Mat. 20:28; Mil. 10:43) Kweniso tikuŵa mu mbumba ya Yehova iyo yili na ŵateŵeti awo ŵakulindilira vinthu viwemi munthazi. (Yoh. 10:14-16; Rom. 8:20, 21) Nangauli pali vitumbiko ivi, kweni ŵanyake awo ŵamumanya Yehova ŵakuchedwa kuchita nga ni nduna ya ku Etiyopiya. Kasi ntchivichi chikuŵatondeska kubatizika? Kasi ŵangatonda wuli masuzgo agho ghakuŵatondeska kubatizika?

4-5. Kasi munyamata munyake zina lake Avery na msungwana munyake zina lake Hannah ŵakakumana na masuzgo wuli?

⁴ Kujikayikira. Ŵapapi ŵa Avery Mbakaboni ŵa Yehova. Adada ŵake mbawemi chomene. Mbachitemwa kweniso ni mulara wakulimbikira. Kweni Avery wakatondekanga kubatizika. Chifukwa wuli? Iyo wakuti: “Nkhaghanaghananga kuti ningaŵa muwemi nga mbadada ŵane yayi.” Kweniso Avery wakaghanaghananga kuti wangakwaniska yayi kuchita milimo iyo wangazakapika munthazi. Iyo wakutiso: “Nkhafipanga mtima kuti ŵangazakanipempha kulomba pawumba, kuyowoya nkhani, panji kudangilira gulu la uteŵeti.”

⁵ Hannah, uyo wali na vyaka 18 nayo wakajikayikiranga chomene. Wakalereka na ŵapapi awo ŵakuteŵetera Yehova. Nangauli vikaŵa nthena, kweni wakakayikiranga usange wangalutilira kulondezga fundo za Yehova. Chifukwa wuli? Hannah wakamba kujiwona kuti ngwakukhumbikwa viŵi yayi. Nyengo zinyake, wakasuzgikanga chomene maghanoghano mwakuti wakajipwetekeranga dala kuti waluweko masuzgo, ndipo ivi vikapangiskanga kuti vinthu vihenipe chomene. Iyo wakuti: “Nkhaphalirapo waliyose yayi ivyo nkhachitanga nanga mbapapi ŵane. Nkhawonanga kuti Yehova wangakhumba yayi kuti niŵe muteŵeti wake chifukwa cha ivyo nkhachitanga.”

6. Kasi ntchivichi chikamutondeskanga Vanessa kubatizika?

⁶ Ŵabwezi. Vanessa uyo wali na vyaka 22, wakuti: “Nkhaŵa na mubwezi muwemi chomene uyo tikamanyana nikale.” Kweni mubwezi wake wakamovwiranga yayi kuti wafiske chilato chake chakuti wabatizike. Ichi chikamukwenyerezganga chomene Vanessa. Iyo wakuti: “Vikanisuzganga kusanga ŵabwezi, ndipo nkhafipanga mtima kuti usange ningamazga ubwezi na iyo, mbwenu ningamusangaso yayi mubwezi munyake.”

7. Kasi msungwana munyake zina lake Makayla wakawopanga vichi, ndipo chifukwa wuli?

⁷ Kopa kwananga. Makayla wakaŵa na vyaka vinkhondi apo mudumbu wake wakasezgekanga. Apo wakakuranga wakawonanga umo ŵapapi ŵake ŵakaŵira na chitima chifukwa cha  ivyo mudumbu wake wakachita. Makayla wakuti: “Nkhawopanga kuti usange ningabatizika, ndipo pamanyuma nazakananga mbwe ŵazamunisezga, ndipo ŵapapi ŵane ŵangazakaŵa na chitima chomene.”

8. Kasi munyamata munyake zina lake Miles wakawopanga vichi?

⁸ Kopa kususkika. Adada ŵa Miles na amama ŵake ŵamsangapo ŵakuteŵetera Yehova, kweni amama ŵake ŵakumubaba Mbakaboni yayi. Miles wakuti: “Nkhakhala na amama vyaka 18, ndipo nkhawopanga kuŵaphalira kuti nkhukhumba kubatizika. Nkhawona umo ŵakachitira adada ŵakati ŵaŵa Ŵakaboni. Nkhawopanga kuti nane ŵanisuzgenge.”

9. Kasi chichitikenge ntchivichi para mwamanya kuti Yehova ngwakuzika na wachitemwa?

⁹ Adamu na Eva ŵakasankha kuleka kuteŵetera Yehova chifukwa chakuti ŵakatondeka kukuzga chitemwa chawo pa iyo. Nangauli vikaŵa nthena, Yehova wakaŵazomerezga kuti ŵakhale na umoyo nyengo yitaliko na kubaba ŵana, kweniso kusankha umo ŵalelerenge ŵana ŵawo. Ivyo vikachitika pamanyuma chifukwa chakuti Adamu na Eva ŵakajiyimira paŵekha, vikalongora kuti ŵakasankha mwambura mahara. Mwana wawo mulara wakakoma munung’una wake, ndipo nyengo yikati yajumphapo nkhaza zikamba kuchitika chomene pa charu chapasi kweniso ŵanthu ŵakamba kuŵa ŵakujighanaghanira ŵekha. (Gen. 4:8; 6:11-13) Kweni Yehova wakaŵa na nthowa yakuponoskera ŵana wose ŵa Adamu na Eva awo ŵakakhumbanga kumuteŵetera. (Yoh. 6:38-40, 57, 58) Apo mukusambira umo Yehova waliri wakuzika na wachitemwa, namwe mwambenge kumutemwa chomene. Mukanenge nthowa iyo Adamu na Eva ŵakasankha ndipo mujipatulirenge kwa Yehova.

10. Kasi kughanaghanirapo pa lemba la Salimo 19:7 kungamovwirani wuli kuti muteŵetere Yehova?

¹⁰ Lutilirani kusambira za Yehova. Para mulutilirenge kusambira vinandi vya Yehova, muwonenge kuti mungakwaniska kumuteŵetera. Avery, uyo tamuzunura mu nkhani iyi, wakuti: “Nkhaleka kujikayikira nati naŵazga na kughanaghanirapo layizgo ilo lili pa  Salimo 19:7.” (Ŵazgani.) Avery wakati wawona umo Yehova wakafiskira layizgo ili, wakamba kumutemwa chomene Chiuta. Chitemwa chikutovwira kumanya kuti tingakwaniska kumuteŵetera Chiuta, kweniso chikutovwira kuti tigege vinthu ivyo vikumukwiyiska na kutovwira kuti tiŵe na khumbo la kumuteŵetera. Hannah uyo tamuzunura kale mu nkhani iyi, wakuti: “Chifukwa cha kuŵazga Baibolo kweniso kusambira panekha, nkhamanya kuti usange nkhujipweteka nekha, nkhumukwenyerezga Yehova.” (1 Pet. 5:7) Hannah wakamba ‘kuchita ivyo mazgu gha Chiuta ghakuyowoya.’ (Yak. 1:22) Kasi pakaŵa uwemi wuli? Iyo wakuti: “Nkhati nawona umo nasangira chandulo chifukwa cha kupulikira Yehova, nkhamba kumutemwa chomene. Sono nkhugomezga kuti Yehova wanilongozgenge nyengo zose para nkhukhumba kuti wanovwire.” Hannah wakakwaniska kumazga suzgo ilo wakaŵa nalo la kujipweteka yekha. Wakajipatulira kwa Yehova na kubatizika.

11. Kasi Vanessa wakachita vichi kuti waŵe na ŵabwezi ŵawemi, ndipo tingasambirako vichi kwa iyo?

¹¹ Sankhani mwamahara ŵabwezi. Vanessa, uyo tamuzunura kale mu nkhani iyi, pamanyuma wakamanya kuti mubwezi wake wakamutondeskanga kuteŵetera Yehova. Ntheura wakamazga ubwezi. Kweni Vanessa wakachita vinandi. Wakalimbikira kusanga ŵabwezi ŵaphya mu mpingo. Wakati chiyelezgero cha Nowa na mbumba yake chikamovwira chomene. Iyo wakuti: “Nangauli Nowa na mbumba yake ŵakazingilizgika na ŵanthu awo ŵakamutemwanga yayi Yehova, kweni ŵakaŵa paubwezi uwemi mu mbumba yawo.” Vanessa wakati wabatizika wakamba upayiniya. Iyo wakuti: “Pakuti nili kubatizika vyanovwira kuti nisange ŵabwezi mu mpingo wane pera yayi, kweniso ku mipingo yinyake.” Namwe mungaŵa na ŵabwezi ŵawemi para mukutangwanika chomene na mulimo uwo Yehova wamupani.—Mat. 24:14.

12. Kasi ni wofi wuli uwo Adamu na Eva ŵakaŵavya, ndipo pamanyuma chikaŵachitikira ntchivichi?

¹² Ŵani na wofi wakwenelera. Wofi unyake nguwemi. Mwachiyelezgero, tikwenera kopa kukwiyiska Yehova. (Sal. 111:10) Adamu na Eva ŵaŵenge na wofi uwu, mphanyi ŵakamugalukira yayi Yehova. Kweni ŵakamugalukira. Ŵakati ŵamugalukira, maso ghawo ghakajulika ndipo  ŵakamanya kuti mbakwananga. Ŵakapirako ŵana ŵawo kwananga na nyifwa. Chifukwa chakuti maso ghawo ghakajulika, soni zikaŵakora pakuti ŵakamanya kuti ŵali nkhule, ndipo ŵakajivwalika mahamba.—Gen. 3:7, 21.

13-14. (a) Kuyana na lemba la 1 Petrosi 3:21, chifukwa wuli nyifwa tikwenera kuyiwopa mwakujumphizga yayi? (b) Kasi tili na vifukwa wuli vyakutemwera Yehova?

¹³ Nangauli tikwenera kopa kuti tingamukwiyiska Yehova, kweni nyifwa tikwenera kuyiwopa mwakujumphizga yayi. Yehova wanozga nthowa yakuti tizakasange umoyo wamuyirayira. Usange tachita kwananga kweni talapa zanadi, Yehova watigowokerenge zakwananga zithu. Watigowokerenge chifukwa tili na chipulikano mu sembe ya Mwana wake. Nthowa yimoza yakuzirwa chomene iyo tikulongolera kuti tili na chipulikano nkhupatulira umoyo withu kwa Chiuta na kubatizika.—Ŵazgani 1 Petrosi 3:21.

¹⁴ Tili na vifukwa vinandi vyakumutemwera Yehova. Wakutipa waka vinthu viwemi pera yayi ivyo tikusangwa navyo zuŵa lililose, kweni wakutisambizgaso unenesko wakukhwaskana na iyo ndiposo khumbo lake. (Yoh. 8:31, 32) Watipa mpingo waunenesko kuti utilongozgenge na kutikhozga. Wakutovwira kuzizipizga, ndipo watipa chigomezgo cha kuzakakhala kwamuyirayira munthazi. (Sal. 68:19; Chivu. 21:3, 4) Para tikughanaghanirapo vinthu ivyo Yehova wachita kale kulongora kuti wakutitemwa, timutemwenge chomene. Ndipo para tikumutemwa Yehova, tikuŵa na wofi wakwenelera. Tikopa kukwiyiska Uyo tikumutemwa chomene.

15. Kasi Makayla wakaleka wuli kopa kuti wangachita kwananga?

¹⁵  Makayla, uyo tamuzunura kale mu nkhani iyi, wakati wamanya kuti Yehova ngwakugowokera wakaleka kopa kuti wangachita kwananga. Iyo wakuti: “Nkhamanya kuti tose tili ŵambura kufikapo ndipo tikubudiska. Kweniso nkhamanya kuti Yehova wakutitemwa ndipo watigowokerenge kwizira mu sembe yakuwombora.” Chifukwa cha kumutemwa Yehova, wakajipatulira na kubatizika.

16. Kasi Miles wakawovwirika wuli kuti wamazge suzgo lake la kopa kususkika?

¹⁶ Miles, uyo wakawopanga kuti amama ŵake ŵangamususka usange wangabatizika, wakafumba ulongozgi kwa mulaŵiliri wa dera. Miles wakuti: “Mulaŵiliri wa dera uyu nayo wakakulira mu mbumba iyo mupapi yumoza ndiyo ni Kaboni. Wakanovwira kuti nighanaghanire ivyo ningakayowoya mwakuti amama ŵakapulikiske kuti nkhasankha nekha kuti nibatizike ndiposo kuti mbadada yayi ŵakanichichizganga kuti nibatizike.” Amama ŵake ŵakakondwa yayi na ivyo Miles wakasankha. Paumaliro wakawukapo pa nyumba, kweni wakasintha yayi ivyo wakasankha. Iyo wakuti: “Nkhakondwa chomene nati nasambira vinthu viwemi ivyo Yehova wanichitira. Nkhati naghanaghanirapo chomene za sembe yakuwombora ya Yesu, nkhamanya kuti Yehova wakunitemwa chomene.  Ivi vikanovwira kuti nijipatulire kwa Yehova na kubatizika.”

17. Kasi tose tili na mwaŵi wuli?

¹⁷ Apo Eva wakarya chipambi cha mu khuni la mu Edeni, wakaŵakana Awiske. Adamu nayo wakati walyako chipambi ichi, wakalongora kuti wakawonganga yayi vinthu viwemi ivyo Yehova wakamuchitira. Tose tili na mwaŵi wakulongora kuti tikukolerana navyo yayi ivyo Adamu na Eva ŵakasankha. Para tabatizika, tikulongora Yehova kuti tikugomezga kuti ndiyo wali na mazaza kutipa malango pa icho ntchiwemi na icho ntchiheni. Tikulongora kuti tikuŵatemwa Adada ŵithu na kuŵagomezga.

18. Kasi mungachita wuli kuti mulutilire kuteŵetera Yehova?

¹⁸ Para tabatizika, tikwenera kulutilira kuchita ivyo Yehova wakukhumba m’malo mwa ivyo ise tikukhumba. Ŵateŵeti ŵa Chiuta mamiliyoni ghanandi ndimo ŵakuchitira. Mungaŵa nga mbateŵeti aŵa usange mukulutilira kupulikiska Mazgu gha Chiuta, Baibolo; kuwungana nyengo zose na ŵabali na ŵadumbu; ndiposo kufwilirapo chomene kuphalira ŵanji ivyo mwasambira vyakukhwaskana na Adada ŵinu ŵachitemwa. (Heb. 10:24, 25) Para mukusankha chakuchita, pulikirani para Yehova wakumupani ulongozgi kwizira mu Mazgu ghake na gulu lake. (Yes. 30:21) Mbwenu vyose ivyo muchitenge vimwenderaninge makora.—Zinth. 16:3, 20.

19. Kasi mukwenera kulutilira kumanya vichi, ndipo chifukwa wuli?

¹⁹ Para mukulutilira kumanya vyandulo ivyo mukusanga chifukwa cha kulondezga ulongozgi wa Yehova, mumutemwenge chomene iyo kweniso fundo zake. Ntheura paŵavyenge icho Satana wangamukopani nacho kuti muleke kuteŵetera Yehova. Ghanaghanirani kuti pajumpha vyaka 1000 kufuma sono. Muzamuwona kuti chinthu chakuzirwa chomene icho mukachita nkhusankha kubatizika.