NKHANI YAKUSAMBIRA 23
Ŵapapi Wovwirani Ŵana Ŵinu Kutemwa Yehova
“Utemwenge Yehova Chiuta wako na mtima wako wose na umoyo wako wose na maghanoghano ghako ghose.”—MAT. 22:37.
SUMU 134 Chiuta Wamuŵikizgani Ŵana
IVYO VILI MU NKHANI IYI *
1-2. Chifukwa wuli malemba ghanyake ghakuŵa ghakuzirwa chomene kwa ise para vinthu vyasintha pa umoyo withu?
PA ZUŴA la ukwati, kanandi mwanalume na mwanakazi wose ŵakutegherezga mwakupwelelera nkhani yakufuma mu Baibolo yakukhwaskana na nthengwa. Malemba agho ghakuyowoyeka mu nkhani iyi ghakuŵa ghachilendo yayi kwa iwo. Kweni panyengo iyi malemba agha ghakuŵa ghakuzirwa chomene kwa iwo. Chifukwa wuli? Chifukwa ŵambenge kughalondezga pakuŵa ŵanthu ŵakutorana.
2 Vikuyanaso waka para mbumba Yachikhristu yamba kuŵa na ŵana. Kwa vyaka vinandi, ŵangaŵa kuti ŵali kutegherezga kanandi waka nkhani zakuyowoya umo tingalelera ŵana. Kweni panyengo iyi, iyo ŵamba kuŵa na ŵana, nkhani izi zikuŵa za chandulo chomene kwa iwo. Sono ŵakuŵa kuti ŵali na mwana uyo ŵakukhumbikwira kuti ŵamulere makora. Uwu ni udindo ukuru chomene. Ntheura para vinthu vyasintha pa umoyo withu, malemba ghanyake ghakuŵa ghakuzirwa chomene kwa ise. Ichi ndicho ntchifukwa chimoza icho ŵasopi ŵa Yehova ŵakuŵazgira Malemba ndipo, nga umo ghakaphalilikira mathemba gha Israyeli, nawo ŵakughanaghanirapo pa malemba agha “mazuŵa ghose” gha umoyo wawo.—Doto. 17:19.
3. Kasi tidumbiskanenge vichi mu nkhani iyi?
3 Ŵapapi, muli na mulimo ukuru chomene wakusambizga ŵana ŵinu vyakukhwaskana na Yehova. Kweni mukwenera kuchita vinandi m’malo mwakuŵaphalira waka unenesko wakukhwaskana na Chiuta. Mukwenera kovwira ŵana ŵinu kuti ŵamutemwenge kufumira pasi pamtima. Kasi mungachita wuli kuti movwire ŵana ŵinu kwamba kumutemwa Yehova? Mu nkhani iyi, tidumbiskanenge fundo zinayi za mu Baibolo izo zingamovwirani imwe pakuŵa mupapi. (2 Tim. 3:16) Tiwonengeso umo ŵapapi Ŵachikhristu ŵasangira chandulo chifukwa cha kulondezga ulongozgi wa mu Baibolo.
FUNDO ZINAYI IZO ZINGAWOVWIRA ŴAPAPI
Kasi usange imwe nyengo zose mukupenja ulongozgi wa Yehova na kuŵa chiyelezgero chiwemi viwovwirenge wuli ŵana ŵinu? (Wonani ndime 4, 8)
4. Kasi ni fundo wuli yakwamba iyo yingawovwira ŵapapi kovwira ŵana ŵawo kwamba kutemwa Yehova? (Yakobe 1:5)
4 Fundo yakwamba: Penjani ulongozgi wa Yehova. Lombani Yehova kuti wamupani vinjeru ivyo mukukhumbikwira kuti movwire ŵana ŵinu kumutemwa. (Ŵazgani Yakobe 1:5.) Yehova ndiyo ngwakwenelera chomene kumupani ulongozgi kuluska waliyose. Pali vifukwa vinandi ivyo tayowoyera nthena. Tiyeni tiwonepo waka viŵiri. Chakwamba, pakuti Yehova nayo ni mupapi, ndikuti wakumanya vinandi chomene pa nkhani iyi. (Sal. 36:9) Ndipo chachiŵiri, ulongozgi wavinjeru uwo wakupeleka, nyengo zose tikwandura nawo.—Yes. 48:17.
5. (a) Kasi gulu la Yehova likuchita wuli kuti lovwire ŵapapi? (b) Nga umo vyalongolekera mu vidiyo, kasi mwasambirako vichi kwa Mubali na Mudumbu Amorim pa umo ŵakalelera ŵana ŵawo?
5 Kwizira mu Mazgu ghake na gulu lake, Yehova wakupeleka ulongozgi unandi wakufuma mu Baibolo uwo ungawovwira ŵapapi kusambizga ŵana ŵawo kutemwa Yehova. (Mat. 24:45) Mwachiyelezgero, mungasanga ulongozgi wakovwira mu nkhani izo zili pa chigaŵa chakuti “Vyakovwira Mabanja,” pa webusayiti yithu ya jw.org. Nkhani izi pakwamba zikafumanga mu Wukani! Kweniso mavidiyo ghanandi agho ghakuŵa pa jw.org ghangawovwira ŵapapi kulondezga ulongozgi wa Yehova apo ŵakulera ŵana ŵawo. *—Zinth. 2:4-6.
6. Kasi dada munyake wakujipulika wuli chifukwa cha ulongozgi uwo iyo na muwoli wake ŵakupokera kufuma ku gulu la Yehova?
6 Ŵapapi ŵanandi ŵakuyowoya kuti ŵakuwonga chomene wovwiri uwo Yehova wakupeleka kwizira mu gulu lake. Dada munyake zina lake Joe wakuti: “Kulera ŵana ŵatatu mu unenesko ni ntchito yamaseŵera yayi. Ine na muwoli wane nyengo zose tikulomba Yehova kuti watovwire. Ndipo kanandi tawonapo kuti mbwenu kukufuma nkhani panji vidiyo panyengo yake kuti yitovwire kumarana na suzgo ilo tasangana nalo. Nyengo zose tikuthemba ulongozgi wa Yehova.” Joe na muwoli wake ŵawona kuti vinthu ivyo gulu likupeleka vikovwira ŵana ŵawo kusendelera kwa Yehova.
7. Chifukwa wuli ŵapapi ŵakwenera kuyezgayezga kulongora chiyelezgero chiwemi ku ŵana ŵawo? (Ŵaroma 2:21)
7 Fundo yachiŵiri: Muŵe chiyelezgero chiwemi. Ŵana ŵakuwona chomene ivyo ŵapapi ŵakuchita ndipo kanandi ŵakutolera ivyo ŵapapi ŵakuchita. Mbunenesko kuti palije mupapi uyo ngwakufikapo. (Rom. 3:23) Nangauli vili nthena, ŵapapi ŵamahara ŵakuchita vyose ivyo ŵangakwaniska kuti ŵaŵe chiyelezgero chiwemi ku ŵana ŵawo. (Ŵazgani Ŵaroma 2:21.) Pakuyowoya za ŵana, dada munyake wakati: “Ŵali nga ni sipanji iyo yikonkha chilichose.” Wakasazgiraposo kuti: “Ŵana ŵakumanyaso usange ise tikuchita yayi vinthu ivyo tikuŵasambizga, ndipo nyengo zinyake ŵangatiphalira.” Ntheura usange tikukhumba kuti ŵana ŵithu ŵatemwenge nadi Yehova, nase chitemwa chithu pa Yehova chikwenera kuŵa chankhongono na chakuwoneka na maso.
8-9. Kasi mwasambirako vichi ku ivyo Andrew na Emma ŵakayowoya?
8 Pali nthowa zinandi izo ŵapapi ŵangasambizgira ŵana ŵawo kutemwa Yehova. Wonani ivyo mubali wa vyaka 17 zina lake Andrew wakayowoya. Iyo wakati: “Ŵapapi ŵane nyengo zose ŵakanisambizganga kuti ntchakuzirwa chomene kulomba. Usiku uliwose, Adada ŵakalombanga nane, nanga ningaŵa kuti nalomba kale panekha. Ŵapapi ŵithu nyengo zose ŵakatikumbuskanga kuti: ‘Mungayowoyeskana na Yehova kanandi waka umo mwakhumbira.’ Chifukwa cha ivi, lurombo lukazgoka chinthu chakuzirwa chomene kwa ine. Ndipo ntchipusu kulomba na kuwona Yehova kuŵa Dada uyo wakunitemwa.” Ŵapapi, nyengo zose mukumbukenge kuti chitemwa chinu pa Yehova chingawovwira ŵana ŵinu kuti nawo ŵamutemwenge.
9 Wonaniso ivyo vikachitikira Emma. Adada ŵake ŵati ŵayileka mbumba yose, ŵakalekera amama ŵake ngongole zinandi chomene. Emma wakuti: “Nyengo zinandi amama ŵakaŵavyanga ndalama, kweni nyengo zose ŵakayowoyanga umo Yehova wakovwilira ŵateŵeti ŵake. Umo ŵakakhaliranga pa umoyo wawo, nane nkhawonanga kuti ŵakayowoyanga waka pa mulomo yayi. Amama ŵakachitanga nadi ivyo ŵakasambizganga.” Kasi tikusambirapo vichi apa? Ŵapapi ŵakwenera kusambizga ŵana ŵawo kwizira mu vyakuchita nanga vinthu vingaŵa kuti ni vyakusuzga chomene pa umoyo wawo.—Gal. 6:9.
10. Kasi ŵapapi ŵanandi Ŵachiisrayeli ŵakaŵa na mwaŵi wuli wakuyowoyeskerana na ŵana ŵawo? (Dotoronome 6:6, 7)
10 Fundo yachitatu: Muyowoyeskanenge na ŵana ŵinu nyengo zose. Yehova wakaphalira Ŵaisrayeli kuti ŵasambizgenge ŵana ŵawo vyakukhwaskana na iyo nyengo zose. (Ŵazgani Dotoronome 6:6, 7.) Ŵapapi aŵa ŵakaŵanga na mwaŵi zuŵa lose kuyowoyeskana na ŵana ŵawo na kuŵasambizga kutemwa Yehova kufumira pasi pa mtima. Mwachiyelezgero, nyengo zinandi kamunyamata Kachiisrayeli kakamaliranga maora ghanandi kovwira adada ŵake kupanda mbuto panji kuyeya ivyo ŵavuna. Kadumbu kake kakamaliranga nyengo yinandi kovwira amama ŵake kusona, kuluka, na ntchito zinyake za pa nyumba. Panyengo zanthena izi, ŵapapi ŵakaŵanga na mwaŵi kuyowoyeskana na ŵana ŵawo nkhani zinandi zakuzirwa chomene. Mwachiyelezgero, ŵakayowoyeskananga za uwemi wa Yehova na umo wakovwilira mbumba yawo.
11. Kasi mphanyengo wuli apo ŵapapi Ŵachikhristu ŵangaŵa na mwaŵi wakuyowoyeskana na ŵana ŵawo?
11 Pasono umoyo ukupambana na umo ukaŵira kale. Mu vyaru vinandi ŵapapi na ŵana ŵangakhala yayi pamoza zuŵa lose. Ŵapapi ŵangaŵa kuti ŵali ku ntchito, ndipo ŵana ŵangaŵa kuti ŵali ku sukulu. Ntheura, ŵapapi ŵakwenera kuchita kusanga nyengo kuti ŵayowoyeskane na ŵana ŵawo. (Efe. 5:15, 16; Fil. 1:10) Kusopa kwa mbumba ni nyengo yiwemi yakuchitira nthena. Mubali wachiwukirano zina lake Alexander wakuti: “Adada nyengo zose ŵakuwoneseska kuti tiŵenge na nyengo ya kusopa kwa mbumba, ndipo ŵakuzomerezga yayi kuti chilichose chitimbanizge nyengo yakuŵira pamoza iyi. Para tamara sambiro ili, tikuchezga nga mbumba.”
12. Kasi mutu wa mbumba ukwenera kukumbuka vichi pa nyengo ya kusopa kwa mbumba?
12 Usange ndimwe mutu wa mbumba, kasi mungachita wuli kuti ŵana ŵinu ŵakondwenge pa nyengo ya kusopa kwa mbumba? Mwalekerachi kwamba kusambira na ŵana ŵinu buku liphya ilo lafuma sono la Mungakondwa na Umoyo Kwamuyirayira! Buku ili likovwira kuti chiŵe chipusu kudumbiskana makora na ŵana ŵinu. Usange mukukhumba kuti ŵana ŵinu ŵamufwatukiraninge na kumuphalirani umo ŵakujipulikira kweniso ivyo ŵakufipa navyo mtima, lekani kutora nyengo ya kusopa kwa mbumba kuŵa nyengo yakuŵachenyera panji kuŵaphalira maubudi yawo. Ndipo mungakwiyanga yayi para mwana winu wayowoya fundo iyo yikukolerana yayi na Malemba. M’malo mwake, muŵawongenge chifukwa chakuti ŵakuyowoya umo ŵakujipulikira ndipo ŵachiskani kuti ŵafwatukenge kuyowoya umo ŵakujipulikira. Mungaŵawovwira makora ŵana ŵinu pekha para mwamanya umo ŵakujipulikira nadi.
Kasi ŵapapi ŵangagwiliskira wuli ntchito chilengiwa kuti ŵasambizge ŵana ŵawo mikhaliro ya Yehova? (Wonani ndime 13)
13. Kasi mphanyengo wuli zinyake apo ŵapapi ŵangawovwira ŵana ŵawo kusendelera kwa Yehova?
13 Ŵapapi, penjerezgani mipata zuŵa lililose kuti movwire ŵana ŵinu kusendelera kwa Yehova. Mungalindiliranga kuti nyengo ya sambiro la Baibolo yifike dankha yayi kuti muŵasambizge vyakukhwaskana na Chiuta withu wachitemwa. Wonani ivyo mama munyake zina lake Lisa wakayowoya, wakati: “Tikawovwira ŵana ŵithu kuti ŵawonenge kukolerana uko kulipo pakati pa Yehova na chilengiwa. Mwachiyelezgero, para ntcheŵe yithu yachita chinthu chinyake chakusekeska, tikaphaliranga ŵana ŵithu kuti ivi vikulongora kuti Yehova ni Chiuta wakukondwa ndipo wakukhumba kuti ise nase tikondwenge.”
Ŵapapi, kasi mukuŵamanya ŵabwezi ŵa ŵana ŵinu? (Wonani ndime 14) *
14. Chifukwa wuli ntchakuzirwa kuti ŵapapi ŵawovwirenge ŵana ŵawo kusankha mwamahara ŵabwezi? (Zintharika 13:20)
14 Fundo yachinayi: Wovwirani ŵana ŵinu kuti ŵasankhenge ŵabwezi ŵawemi. Mazgu gha Chiuta ghakuyowoya mwakupulikikwa makora kuti ŵabwezi ŵithu ŵangapangiska kuti tiŵe na nkharo yiwemi panji yiheni. (Ŵazgani Zintharika 13:20.) Ŵapapi, kasi mukuŵamanya ŵabwezi ŵa ŵana ŵinu? Kasi muli kukumanapo nawo na kuchezgapo nawo? Kasi mungachita wuli kuti movwire ŵana ŵinu kuti ŵasankhenge ŵabwezi ŵawemi awo ŵakutemwa Yehova? (1 Kor. 15:33) Mungawovwira ŵana ŵinu kuti ŵasankhenge makora ŵabwezi, mwa kuchemerako ŵanthu awo ŵakuchita makora mwauzimu ku vyakuchitika vya pa mbumba.—Sal. 119:63.
15. Kasi ŵapapi ŵangachita wuli kuti ŵawovwire ŵana ŵawo kusankha ŵabwezi ŵawemi?
15 Wonani chiyelezgero cha dada munyake zina lake Tony. Wakulongosora ivyo iyo na muwoli wake ŵachita kuti ŵawovwire ŵana ŵawo kusanga ŵabwezi ŵawemi. Iyo wakuti: “Kwa vyaka vinandi, ine na muwoli wane tachemerako ŵabali na ŵadumbu ŵakupambanapambana, ŵachiwukirano na ŵachilara kunyumba kwithu. Tikulyera nawo lumoza chakurya na kuchitira lumoza kusopa kwa mbumba. Iyi ni nthowa yimoza yiwemi chomene yakumanyira awo ŵakutemwa na kuteŵetera Yehova mwakukondwa. Taŵaposo na mwaŵi wakupokelera ŵalaŵiliri ŵa dera, ŵamishonale na ŵanyake kunyumba kwithu. Ivyo vyaŵachitikirapo pa umoyo, kuyezgayezga kwawo na mzimu wawo wakujipeleka, vyawovwira chomene ŵana ŵithu kusendelera kwa Yehova.” Ŵapapi, ŵikanipo mtima kovwira ŵana ŵinu kuti ŵachezgenge na ŵanthu ŵakwenelera.
KUTAYA MTIMA YAYI
16. Kasi ŵapapi ŵakwenera kuchita wuli usange mwana wawo wakukhumba yayi kuteŵetera Yehova?
16 Wuli usange nangauli mwayezgayezga chomene, mbwe mwana winu wakuti wakukhumba yayi kuteŵetera Yehova? Lekani kughanaghana kuti mwatondeka pakuŵa mupapi. Yehova wali kupa waliyose wa ise wanangwa wakusankha, kusazgapo na ŵana ŵinu wuwo, kusankha kumuteŵetera panji yayi. Usange mwana winu wasankha kumuleka Yehova, mungatayanga yayi chigomezgo chakuti zuŵa limoza wazamuwelera. Kumbukani ntharika ya mwana wakuzgeŵa. (Luka 15:11-19, 22-24) Munyamata wa mu ntharika iyi wakachita vinthu viheni vinandi, kweni paumaliro wakawelera. Kweni ŵanyake ŵangati, “Iyi ni ntharika waka. Kasi vingachitika nadi ivi pa umoyo?” Vingachitika nadi. Nakuti ivi ndivyo vikachitikira munyamata munyake zina lake Elie.
17. Kasi ivyo vikachitikira Elie vyamukhozgani wuli?
17 Pakuyowoya za ŵapapi ŵake, Elie wakuti: “Ŵakachita vyose ivyo ŵangafiska kuti ŵanovwire kwamba kutemwa Yehova na Mazgu ghake, Baibolo. Kweni apo nkhaŵa na vyaka pafupifupi 15, nkhamba kugaluka.” Elie wakamba kukhala umoyo wapaŵiri, ŵapapi ŵake ŵakayezga kuti ŵamovwire kuti wasendelere pafupi na Yehova, kweni wakapulikanga yayi. Wati wafumapo panyumba, wakachita chinthu chiheni. Nangauli vikaŵa nthena, nyengo zinyake wakadumbiskananga nkhani zakukhwaskana na Baibolo na yumoza mwa ŵabwezi ŵake. Elie wakuti: “Para nkhuyowoya chomene vya Yehova na munyane uyu, ndipo nkhaghanaghanirangaso chomene vya Yehova. Pachoko na pachoko, mbuto ya unenesko wa mu Baibolo iyo ŵapapi ŵane ŵakalimbikira chomene kuyipanda, yikamba kukura.” Nyengo yati yajumphapo, Elie wakawelera mu unenesko. * Ghanaghanirani waka umo ŵapapi ŵake ŵakakondwera kuti ŵakayezeska kumusambizga kufuma pa wana uchoko kuti watemwenge Yehova.—2 Tim. 3:14, 15.
18. Kasi mukuti nawo wuli ŵapapi awo ŵakulimbikira chomene kusambizga ŵana ŵawo kutemwa Yehova?
18 Ŵapapi, Yehova wali kumupani mulimo uwemi chomene wakusambizga ŵana ŵinu kuti ŵamuteŵetere iyo. (Sal. 78:4-6) Uwu ni mulimo upusu yayi, ndipo tikuwonga chomene kuyezgayezga kwinu uko mukuchita kuti movwire ŵana ŵinu. Usange mulutilirenge kuŵikapo mtima kovwira ŵana ŵinu kutemwa Yehova na kuŵasambizga kuti ŵamupulikirenge, manyani kuti Adada ŵithu ŵachitemwa ŵakuchanya ŵakondwenge chomene.—Efe. 6:4.
SUMU 135 Yehova Wakuŵeyelera: “Mwana Wane, Uŵe Wavinjeru”
^ ndime 5 Ŵapapi Ŵachikhristu ŵakuŵatemwa chomene ŵana ŵawo. Ŵakulimbikira chomene kupenjera ŵana ŵawo vinthu vyakukhumbikwira pa umoyo kweniso kuwoneseska kuti mbakukondwa. Chakuzirwa chomene ntchakuti, ŵapapi aŵa ŵakuchita vyose ivyo ŵangafiska kuti ŵawovwire ŵana ŵawo kutemwa Yehova. Mu nkhani iyi tidumbiskanenge fundo zinayi za mu Baibolo izo zingawovwira ŵapapi kuti ŵafiske kovwira ŵana ŵawo kutemwa Yehova.
^ ndime 5 Wonani pa jw.org vidiyo ya mutu wakuti Yehova Wakatisambizga Umo Tingalelera Ŵana Ŵithu.
^ ndime 17 Wonani nkhani yakuti “Baibolo Likusintha Umoyo wa Ŵanthu” mu Gongwe la Mulinda la Epulero 1, 2012.
^ ndime 57 MAZGU GHAKULONGOSORA CHITHUZI: Kuti wamanye ŵabwezi ŵa mwana wake, dada wakuseŵera bola na mwana wake pamoza na mubwezi wa mwana wake.
