1. Kasi ntchinthu wuli chakuzirwa icho waliyose wakukhumbikwira kuti wasankhe?

 PALI chinthu chinyake chakuzirwa icho ŵanthu ŵakukhumbikwira kuti ŵasankhe mwamahara mazuŵa ghano. Kasi ŵasankhenge Yehova Chiuta kuŵa Muwusi wawo, panji ŵaŵenge ku chigaŵa cha Satana Dyabulosi? Waliyose wakwenera kusankha chigaŵa icho waŵenge, ndipo palije uyo wangayowoya kuti wali pakatikati. Ivyo waliyose wasankhenge ndivyo vilongorenge usange wakukhumba umoyo wamuyirayira panji yayi. (Mat. 25:31-33, 46) Pa “suzgo yikuru,” waliyose wazamuŵikika chimanyikwiro cha kupona panji cha pharanyiko.—Chivu. 7:14; 14:9-11; Ezek. 9:4, 6.

2. (a) Kasi lemba la Ŵahebere 10:35-39, likutichiska kuchitachi? (b) Kasi buku la Chivumbuzi lingatovwira wuli?

² Ŵazgani Ŵahebere 10:35-39. Usange mwasankha kukhozgera muwuso wa Yehova, mwasankha makora chomene. Kweniso ndikuti ndimwe ŵakukhumbisiska kovwira ŵanji kuti nawo ŵasankhe mwamahara. Ndipo mungagwiliskira ntchito ivyo vili mu buku la Chivumbuzi. Buku lapadera ili likuvumbura ivyo vizamuchitikira ŵanthu awo ŵakususka Yehova, kweni likuyowoyaso vitumbiko ivyo ŵanthu awo ŵakukhozgera muwuso wa Yehova mwakugomezgeka ŵazamusanga. Tingachita makora chomene kusambira unenesko wakuzirwa uwu. Para tachita nthena, vitovwirenge kuti tiŵikepo mtima kulutilira kuteŵetera Yehova. Kweniso, tingagwiliskira ntchito ivyo tasambira kovwilira ŵanji kuti ŵasankhe kuteŵetera Yehova na kulutilira kumuteŵetera.

3. Kasi tiwonenge vichi mu nkhani iyi?

³ Mu nkhani iyi, tiwonenge mafumbo agha: Kasi ntchivichi icho chizamuchitikira awo ŵakukhozgera muwuso wake? Ndipo kasi ntchivichi chizamuchitikira ŵanthu awo ŵakukhozgera chikoko  chiswesi icho chikuzunulika mu buku la Chivumbuzi?

4. Kasi ni gulu wuli la ŵanthu ilo Yohane wakawona kuti limilira pamoza na Yesu kuchanya?

⁴ Mu mboniwoni iyi, mpositole Yohane wakuwona magulu ghaŵiri gha ŵanthu awo ŵakukhozgera muwuso wa Yehova ndipo ŵakupokera vitumbiko vya umoyo wamuyirayira. Gulu lakwamba lili na ŵanthu 144,000. (Chivu. 7:4) Ŵali kutoleka pa charu chapasi kuti ŵapange boma panji kuti Ufumu, pamoza na Yesu kuchanya. Ndipo pamoza nayo ŵakuwusa charu chose chapasi. (Chivu. 5:9, 10; 14:3, 4) Mu mboniwoni iyi, Yohane wakuwona kuti ŵimilira pamoza na Yesu pa Phiri la Ziyoni kuchanya.—Chivu. 14:1.

5. Kasi ntchivichi chizamuchitikira ŵa 144,000 awo ŵachali ŵamoyo pa charu chapasi?

⁵ Kufuma mu nyengo ya ŵapositole kufika sono, ŵanthu masauzandi yanandi ŵasoleka kuŵa mu gulu la ŵa 144,000. (Luka 12:32; Rom. 8:17) Kweni Yohane wakaphalirika kuti ŵanthu ŵachoko waka pa ŵanthu aŵa ndiwo ŵazamuŵa kuti mbamoyo mu mazuŵa ghaumaliro. “Ŵakukhalapo” aŵa, ‘ŵazamudindika’ kaumaliro pambere suzgo yikuru yindambe. (Chivu. 7:2, 3; 12:17) Kufuma apo nyengo yinyake pa suzgo yikuru, ŵakukhalapo ŵachoko waka aŵa ŵazamutolekera kuchanya kuti ŵakaŵe pamoza na ŵa 144,000 ŵanyawo, awo ŵali kufwa kale mwakugomezgeka na kuluta kuchanya. Kuchanya ŵamuwusa pamoza na Yesu mu Ufumu wa Chiuta.—Mat. 24:31; Chivu. 5:9, 10.

6-7. (a) Kasi ni gulu wuli linyake ilo Yohane wakawona, ndipo tikumanya vichi vyakukhwaskana na ŵanthu ŵa mu gulu ili? (b) Chifukwa wuli buku la Chivumbuzi chaputara 7 ndakukhozga chomene ku ŵakuphakazgika awo ŵachali pa charu chapasi na ‘ŵamzinda ukuru’?

⁶ Wati wawona gulu lakuchanya, Yohane wakawona “mzinda ukuru.” Mwakupambanako na ŵa 144,000, gulu ili ndakuti lingapendeka yayi. (Chivu. 7:9, 10) Kasi tikumanyapo vichi za iwo? Yohane wakaphalirika kuti: “Aŵa ndiwo ŵafuma mu suzgo yikuru, ndipo ŵachapa minjilira yawo na kuyituŵiska mu ndopa za Mwana wa mberere.” (Chivu. 7:14) Para ŵazakajumpha pa suzgo yikuru, ŵa “mzinda ukuru” aŵa ŵazamukhala pano pa charu chapasi na kukondwa na vitumbiko vinandi.—Sal. 37:9-11, 27-29; Zinth. 2:21, 22; Chivu. 7:16, 17.

⁷ Kwali tili kusoleka kuti tikuluta kuchanya panji kukhala pa charu chapasi, kasi tikugomezga kuti tizamuwona na maso kuti ivyo vili kulembeka mu buku la Chivumbuzi chaputara 7 vikufiskika? Tikwenera kugomezga. Iyi yizamuŵa nyengo yakukondweska chomene ku magulu ghose ghaŵiri gha ŵateŵeti ŵa Chiuta. Tizamukondwa chomene kuti tikachita makora kusankha kukhozgera muwuso wa Yehova. Kasi ni vichi vinyake ivyo buku la Chivumbuzi likutiphalira vyakukhwaskana na suzgo yikuru?—Mat. 24:21.

8. Kasi suzgo yikuru yizamwamba wuli, ndipo ŵanthu ŵanandi ŵazamuchita wuli?

⁸ Nga umo tikasambilira mu nkhani iyo yajumpha, sonosono apa ŵandyali ŵa charu ichi, ŵawukirenge Babuloni Mukuru, uyo ntchinyina cha chisopa chautesi. (Chivu. 17:16, 17) Ivi vizamupangiska kwamba kwa suzgo yikuru. Kweni kasi ŵanthu ŵanandi ŵazamwamba kuteŵetera Yehova chifukwa chakuwona ivi? Yayi. M’malo mwake, Chivumbuzi chaputara 6 chikulongora kuti panyengo iyo, ŵanthu awo ŵakuteŵetera Yehova yayi ŵazamupenja chivikiliro kufuma ku ŵandyali na ŵamalonda ŵa mu charu ichi, awo ŵakuyelezgereka kuti ni mapiri. Pakuti ŵanthu aŵa ŵazamukhozgera Ufumu wa Chiuta yayi, Yehova wazamuŵawona kuŵa ŵakususka.—Luka 11:23; Chivu. 6:15-17.

9. Kasi ŵanthu ŵa Yehova ŵazamupambana wuli na ŵanthu ŵanyake pa suzgo yikuru, ndipo chizamuchitika ntchivichi?

 ⁹ Kuyowoya unenesko, ŵateŵeti ŵakugomezgeka ŵa Yehova, ŵazamuwoneka ŵakupambanako na ŵanji pa nyengo yakusuzga iyi. Ŵazamuŵa kuti mbanthu ŵekha pa charu chapasi awo ŵazamuŵa kuti ŵachali kuteŵetera Yehova Chiuta na kukana kukhozgera “chikoko.” (Chivu. 13:14-17) Chifukwa chakuti ŵazamulutilira kuŵa ŵakugomezgeka kwa Yehova, awo ŵakususka Yehova ŵazamukwiya chomene. Ntheura mitundu yizamukolerana na kuwukira ŵanthu ŵa Chiuta pa charu chose chapasi. Baibolo likuchema kuwukira uku kuti kuwukira kwa Gogi wa Magogi.—Ezek. 38:14-16.

10. Nga umo pakuyowoyera pa Chivumbuzi 19:19-21, kasi Yehova wazamuchita wuli para ŵanthu ŵake ŵazakawukilika?

¹⁰ Kasi Yehova wazamuchita wuli na kuwukira uku? Iyo wakutiphalira kuti: “Ukali wane ukuru uzamugolera.” (Ezek. 38:18, 21-23) Chivumbuzi chaputara 19 chikulongosora ivyo vizamuchitika kufuma apa. Yehova wazamutuma Mwana wake kuti wazakavikilire ŵanthu ŵake na kuthereska ŵalwani ŵawo. Panyengo iyi Yesu wazamwiza pamoza na gulu la “ŵankhondo ŵakuchanya,” lakupangika na ŵangelo kweniso ŵa 144,000 kuti ŵarwe na Gogi wa Magogi. (Chivu. 17:14; 19:11-15) Kasi nkhondo iyi yizamumara wuli? Ŵanthu wose awo ŵakwimikana na Yehova pamoza na magulu agho ghakususka Yehova, ŵazamuparanyikirathu tetete.—Ŵazgani Chivumbuzi 19:19-21.

11. Kasi ntchakuchitika wuli chakuzirwa chomene mu buku la Chivumbuzi?

¹¹ Ghanaghanirani waka umo ŵanthu ŵakugomezgeka ŵazamujipulikira para ŵapona pa pharanyiko likuru la ŵalwani ŵa Chiuta. Pa nyengo iyo, wose awo ŵazamukhala pa charu chapasi ŵazamukondwa chomene. Nangauli kuchanya kuzamuŵa kuchemerezga kukuru chifukwa cha kukondwa kuti Babuloni Mukuru waparanyika, kweni pali chinthu chinyake icho chizamwiza na chimwemwe chikuru. (Chivu. 19:1-3) Nakuti ichi ntchakuchitika chakuzirwa chomene mu buku la Chivumbuzi. Chakuchitika ichi ni “nthengwa ya Mwana wa mberere.”—Chivu. 19:6-9.

12. Nga umo pakulongolera pa Chivumbuzi 21:1, 2, kasi nthengwa ya Mwana wa mberere yizamuchitika pawuli?

¹² Kasi nthengwa iyi yizamuchitika pawuli? Ŵa mu gulu la 144,000 wose, ŵazamuŵa kuti ŵali kuchanya pambere nkhondo ya Aramagedoni yindambe. Ndipouli, iyi ndiyo yizamuŵa nyengo iyo nthengwa ya Mwana wa mberere yizamuchitikira yayi. (Ŵazgani Chivumbuzi 21:1, 2.) Nthengwa ya Mwana wa mberere yizamuchitika para nkhondo ya Aramagedoni yajumpha ndipo ŵalwani wose ŵa Chiuta ŵafumiskikapo.—Sal. 45:3, 4, 13-17.

13. Kasi nthengwa ya Mwana wa mberere yikung’anamurachi ku awo yikuŵakhwaska?

¹³ Kasi nthengwa iyi yikung’anamurachi ku awo yikuŵakhwaska? Nga umo nthengwa yikugumanizgira pamoza mwanalume na mwanakazi, nthengwa ya Mwana wa mberere iyi yizamugumanizga Fumu Yesu Khristu na “mwali” wake, awo mba 144,000. Chakuchitika chakuzirwa ichi, chizamovwiraso kuti papangike boma liphya ilo lizamuwusa charu chapasi kwa vyaka 1,000.—Chivu. 20:6.

14-15. Kasi Chivumbuzi chaputara 21 chikuyaniska ŵa 144,000 na vichi? (Wonani chithuzi cha pa chikopi.)

¹⁴ Kufuma apo, Chivumbuzi chaputara 21 chikuyaniska ŵa 144,000 na msumba wakutowa chomene wakuchemeka “Yerusalemu Muphya.” (Chivu. 21:2, 9) Msumba uwu uli na malibwe 12 gha fawundeshoni, agho pali kulembeka “mazina 12 gha ŵapositole ŵa Mwana wa mberere.”  Chifukwa wuli fundo iyi yikaŵa yakukondweska chomene kwa Yohane? Chifukwa wakawona zina lake lalembeka pa limoza mwa malibwe agha. Uwu ukaŵa mwaŵi wapadera chomene.—Chivu. 21:10-14; Efe. 2:20.

¹⁵ Msumba uwu ukapambananga chomene na misumba yinyake. Ukaŵa na msewu ukuru wa golide lanadi, vipata 12 vyangale, malinga na mafawundeshoni ghakatozgeka na malibwe ghakuzirwa, ndipo vyose ivi vikaŵa vyakupimika makora chomene. (Chivu. 21:15-21) Kweni Yohane wakawona kuti chinthu chinyake chikusoŵerwa. Wonani vinthu vyakulondezgapo ivyo Yohane wakayowoya, iyo wakati: “Nkhaliwonamo yayi tempile, chifukwa Yehova Chiuta Wankhongonozose ndiyo ni tempile lake, kweniso Mwana wa mberere. Msumba ukakhumbikwira dazi yayi nesi mwezi kuti uŵalirepo, pakuti uchindami wa Chiuta ukangweluska msumba, ndipo nyali yake wakaŵa Mwana wa mberere.” (Chivu. 21:22, 23) Awo ŵali mu chigaŵa cha Yerusalemu Muphya ŵamuŵa na Yehova. (Heb. 7:27; Chivu. 22:3, 4) Ntheura, Yehova na Yesu ndiwo ni tempile mu msumba uwu.

16. Kasi ntchivichi chizamuchitikira ŵanthu mu Muwuso wa Vyaka 1,000 wa Ufumu wa Chiuta?

¹⁶ Ŵakuphakazgika ŵakukondwa chomene para ŵakughanaghanira za msumba uwu. Kweni awo ŵakulindilira kuzakakhala pa charu chapasi nawo ŵali na chifukwa chakukondwera na nkhani iyi. Nyengo ya Muwuso wa Vyaka 1,000 wa Ufumu wa Chiuta, Yerusalemu Muphya wazamwiza na vitumbiko vinandi pa charu chapasi. Yohane wakawona vitumbiko ivi vikukhira nga ni “mlonga wa maji gha umoyo.” Ndipo ku sirya lililose la mlonga kukaŵa “makuni gha umoyo” agho mahamba ghake ghakaŵa “ghakuchizgira mitundu.” (Chivu. 22:1, 2) Ŵanthu wose panyengo iyi ŵazamuŵa na mwaŵi wakusanga chandulo na vinthu viwemi. Pachoko na pachoko, ŵanthu wose ŵakupulikira ŵazamuŵa ŵakufikapo. Kuzamuŵavya matenda, vyakuŵinya, kweniso kutengera panji kulira.—Chivu. 21:3-5.

17. Nga umo pakulongolera pa Chivumbuzi 20:11-13, kasi mbanjani awo ŵazamusanga chandulo mu Muwuso wa Vyaka 1,000?

¹⁷ Kasi mbanjani awo ŵazamusanga chandulo na vinthu viwemi ivi? Ŵakwamba mba mzinda ukuru awo ŵazamupona pa Aramagedoni na ŵana wose awo ŵazamubabika mu charu chiphya. Kweni Chivumbuzi chaputara 20 chikulayizgaso kuti ŵakufwa ŵazamuwuka. (Ŵazgani Chivumbuzi 20:11-13.) “Ŵarunji” awo ŵali kufwa kale na “ŵambura urunji,” awo ŵakaŵavya mwaŵi wakusambira vyakukhwaskana na  Yehova, wose ŵazamuwuka na kuŵaso na umoyo pa charu chapasi. (Mil. 24:15; Yoh. 5:28, 29) Kasi ichi chikung’anamura kuti waliyose wazamuwuskika na kuŵa na umoyo pa charu chapasi mu nyengo ya Muwuso wa Vyaka 1,000? Yayi. Awo ŵakakana kuteŵetera Yehova pambere ŵandafwe ŵazamuwuka yayi. Vili nthena, chifukwa chakuti ŵakaŵa nawo mwaŵi, kweni ŵakalongora kuti mbakwenelera yayi kukhala mu paradiso pa charu chapasi.—Mat. 25:46; 2 Tes. 1:9; Chivu. 17:8; 20:15.

18. Kasi vinthu vizamuŵa wuli pa charu chapasi paumaliro wa vyaka 1,000?

¹⁸ Para vyaka 1,000 vyazakamara, wose awo ŵakukhala pa charu chapasi ŵazamuŵa kuti sono mbakufikapo. Palije munthu uyo wazamukhala pa charu uyo wazamutimbanizgikaso na kwananga uko tikahara kufuma kwa Adamu. (Rom. 5:12) Thembo la kwananga kwa Adamu lizamuŵa kuti lafumiskikapo. Ntheura ichi chikung’anamura kuti wose pa charu chapasi ‘ŵazamuŵa ŵamoyo’ chifukwa ŵazamuŵa ŵanthu ŵakufikapo paumaliro wa vyaka 1,000.—Chivu. 20:5.

19. Chifukwa wuli chiyezgo chaumaliro ntchakukhumbikwa?

¹⁹ Tikumanya kuti Yesu wakalutilira kuŵa wakugomezgeka kwa Chiuta apo wakayezgeka na Satana. Kweni kasi ŵanthu wose ŵakufikapo nawo ŵazamufiska kuchita nthena para Satana wazakapika mwaŵi kuti waŵayezge? Waliyose wazamujizgolera yekha fumbo ili para Satana wazakafumiskika mu chizongwe paumaliro wa vyaka 1,000. (Chivu. 20:7) Awo ŵazamulutilira kugomezgeka pa chiyezgo chaumaliro ichi ŵazamupokera umoyo wamuyirayira, ndipo paumaliro ŵazamukondwa na mtende wenecho. (Rom. 8:21) Awo ŵazamugaluka, ŵazamuparanyika kwamuyirayira, pamoza na Dyabulosi na viŵanda vyake.—Chivu. 20:8-10.

20. Kasi mukujipulika wuli na mauchimi ghakukondweska agho ghali mu buku la Chivumbuzi?

²⁰ Kasi mukujipulika wuli sono tati tawona mwakudumura ivyo vili mu buku la Chivumbuzi? Kasi ntchakukondweska yayi kujiwona mu mauchimi ghakukondweska agha? Kasi vyamupangiskani kuŵa na khumbo lakuti movwire ŵanji kuti ŵaŵe nase lumoza pa kusopa kutuŵa uko Chiuta withu wakukhumba? (Chivu. 22:17) Sono pakuti tadumbiskana vinthu ivi, ivyo vizamuchitika munthazi, ndise ŵakukondwa chomene ndipo tikukhumba kuyowoya nga umo wakayowoyera mpositole Yohane kuti: “Ameni! Zaninge, Fumu Yesu.”—Chivu. 22:20.