FUNDO YA MU BAIBOLO: “Lekani kwenjerwa na umoyo winu.”​—Mateyu 6:25.

Kasi fundo njakuti wuli? Yesu ndiyo wakayowoya mazgu agha pa Upharazgi wa pa Phiri. Buku linyake lakulongosora mazgu gha mu Baibolo likuti verebu Lachigiriki ilo lili kung’anamulika kuti “kwenjerwa,” likuyowoya vya “umo munthu wakujipulikira para ni mukavu, wali na njara, panji wakukumana na masuzgo ghanyake.” Kanandi munthu uyo wakwenjerwa wakufipa mtima chomene na umo vinthu viŵirenge pa umoyo wake. Ntchiheni yayi kufipa mtima para tikusuzgikira kusanga vinthu vyakukhumbikwa pa umoyo panji kufipira mtima ŵabali ŵithu. (Ŵafilipi 2:20) Kweni pakuyowoya kuti, “lekani kwenjerwa,” Yesu wakaphaliranga ŵasambiri ŵake kuti ŵangafipanga mtima chomene yayi. Para munthu wakufipira mtima chomene vya zuŵa la machero, wangakondwa yayi mu zuŵa ilo walimo.​—Mateyu 6:31, 34.

Kasi fundo iyi njakovwira lero? Tingachita makora kupulikira ivyo Yesu wakayowoya. Chifukwa wuli? Ŵadokotala ŵanyake ŵakuti para ŵanthu ŵakufipa mtima chomene, ŵakusuzgika maghanoghano ndipo kanandi ŵakwamba ‘kulwara vilonda vya munthumbo, nthenda ya mtima, na asima.’

Yesu wakayowoya chifukwa chakupulikikwa icho tikwenera kulekera kwenjerwa chomene. Chifukwa ntchakuti tingajisuzga waka. Iyo wakafumba kuti: “Ni njani wa imwe uyo chifukwa cha kwenjerwa wangasazgirako ora limoza ku umoyo wake?” (Mateyu 6:27) Nanga munthu wangafipa mtima chomene, wangasazgirako yayi umoyo wake nanga mphachoko waka. Nakuti kanandi vinthu ivyo tikopa vikuchitika yayi. Munthu munyake wakati: ‘Para munthu wakwenjerwa chomene na vyamunthazi, wakujisuzga waka. Chifukwa kanandi vinthu vikuŵako makora munthazi kuluska umo ise tikaghanaghaniranga.’

Kasi tingachita wuli kuti tileke kwenjerwa? Chakwamba, tikwenera kugomezga Chiuta. Chiuta wakovwira viyuni kusanga vyakurya na kutoweska maluŵa. Kasi wangatondeka kovwira ŵanthu awo ŵakumusopa na mtima wose? (Mateyu 6:25, 26, 28-30) Chachiŵiri, tikwenera kughanaghanira waka vya zuŵa ilo tafikako. Yesu wakati: “Kwenjerwa napachoko chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake.” Kasi mukuzomerezga yayi kuti “zuŵa lililose lili na masuzgo ghake”?​—Mateyu 6:34.

Para tikupulikira ivyo Yesu wakayowoya, mbwenu tijisuzgenge yayi. Kweniso tiŵenge na mtende mu mtima, uwo Baibolo likuti “mtende wa Chiuta.”​—Ŵafilipi 4:6, 7.