Rosie wakati: “Kanandi nkhenjerwanga na vinthu ivyo nkhaghanaghaniranga waka uku ndimo vikaŵira yayi.” Kasi Baibolo likamovwira wuli? Lemba la Mateyu 6:34 likuti: “Kwenjerwa napachoko chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake. Zuŵa lililose lili na masuzgo ghake.” Rosie wakuti ivyo Yesu wakayowoya pa mavesi agha sono vikumovwira kuti waleke kwenjerwa mwakujumphizga na ivyo vichitikenge machero. Iyo wakayowoyaso kuti: “Nkhaŵa kale na masuzgo ghanandi, ntheura pakaŵavya chifukwa chakuti nisazgireposo kwenjerwa na vinthu ivyo vindachitike nakuti panji vichitikengeso yayi.”

Yasmine nayo wakenjerwanga chomene na ivyo wakakumananga navyo. Iyo wakati: “Nyengo zinyake nkhaliranga mazuŵa ghanandi pa sabata, ndipo nkhatondekanga na kugona wuwo. Nkhasuzgikanga chomene maghanoghano ndipo nkhajiwonanga nga nafwa kale.” Kasi Baibolo likamovwira wuli? Iyo wakakumbuka lemba la 1 Petrosi 5:7 ilo likuti: “Muthulirani [Chiuta] vyose ivyo mukwenjerwa navyo, chifukwa wakumupwelelerani.” Yasmine wakati: “Pamasinda, nkhalutilira kulomba ndipo Chiuta wakazgora malurombo ghane. Nkhamba kujipulika nga kuti nathura katundu muzito. Nyengo zinyake maghanoghano ghaheni ghakwiza, kweni sono nkhumanya umo ningachitira.”

Mwanakazi munyake zina lake Isabella wakuti: “Nkhuwona kuti kuziwulika nili kuchita kubabika nako chifukwa adada nawo ŵakaŵa ŵachiziwulika. Nyengo zinyake nkhuchita yayi vyakuzirwa na kwamba waka kuwonelera TV. Chizingilika ntchiwemi yayi chifukwa chikupangiska munthu kuti wenjerwenge chomene na kutondeka kuchita makora mulimo unyake.” Lemba ilo likamovwira chomene nda 2 Timote 2:15, ilo likuti: “Yezga chomene kujilongora wakuzomerezgeka kwa Chiuta, wantchito wambura kukhozgeka soni na chilichose.” Isabella wakati, “Nkhakhumbanga yayi kuti Yehova wakhozgeke soni na mulimo wane chifukwa cha kuzingilika.” Nakuti sono vinthu vikumwendera makora.

Kelsey nayo wakuti: “Para nili na mulimo unyake, kanandi nkhawuchitanga mwakuchedwa chomene. Nkhaliranga, kusoŵa tulo, na kwenjerwa waka. Vinthu vikaŵa makora yayi.” Kelsey wakasanga wovwiri pa lemba la Zintharika 13:16. Lemba ili likuti: “Munthu wakuchenjera wakuchita vinthu mwamahara, kweni chindere chikuvumbura uchindere wake.” Iyo wakayowoya ivyo wakasambirapo pa lemba ili. Wakati: “Ntchiwemi kupanga pulani na kuchita vinthu pa nyengo yake. Sono nili na kabuku ako nkhulembamo ntchito izo nigwirenge, ndipo ivi vikunovwira kuti nigaŵenge makora nyengo na kuleka kuchita mulimo wane mwakuchedwa.”

Kirsten wakati: “Mfumu wane wali kunichimbira na kunilekera ŵana ŵanayi.” Kasi ni lemba wuli ilo likamovwira? Ni Zintharika 17:17 ilo likuti: “Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.” Kirsten wakapempha wovwiri kwa awo wakasoperanga nawo lumoza Yehova. Kasi vikamara wuli? Iyo wakati: “Ŵanyane ŵakanovwiranga chomene! Ŵanyake ŵakanipanga vinthu nga ni sopo, mchere, shuga na vinyake. Maulendo ghatatu, kagulu kanyake ka ŵanthu kakanovwira chomene pakusamuka kukanjira mu nyumba yinyake. Munyake wakanovwira kusanga ntchito. Nyengo zose ŵabwezi ŵane ŵakanovwiranga chomene.”

Delphine uyo tamuzunura kale, nayo wakasuzgikanga na phukwa. Iyo wakukumbuka umo wakajipulikiranga mwana wake wati wafwa kweniso banja lati lamara. Wakuti: “Nkhaŵa wakukondwa yayi kuwona kuti nili nekha apo ŵanyane ŵakukondwa na ŵabwezi ŵawo kweniso na umoyo. Nkhasuzgikanga chomene na phukwa.” Lemba ilo likamovwira chomene nda Salimo 68:6 ilo likuti: “Chiuta wakupeleka nyumba yakukhalamo ku awo ŵali ŵekha.” Iyo wakuti: “Nkhamanya kuti vesi ili likuyowoya waka za nyumba yakukhalamo pera yayi. M’malo mwake, nkhamanya kuti Chiuta wakutipaso nyumba yauzimu, iyo ni malo ghachivikiliro kweniso umo muli ŵabwezi ŵanadi awo ŵakutemwaso Yehova. Nkhamanyaso kuti pambere nindaŵe paubwezi na ŵanyane, chakwamba nkhwenera kuŵa paubwezi na Yehova. Ntheura lemba la Salimo 37:4 likanovwira chomene, ilo likuti: ‘Ukondwere chomene mwa Yehova, ndipo wakupenge ivyo mtima wako ukukhumba.’”

Delphine wakayowoyaso kuti: “Nkhamanya kuti nkhwenera kusendelera chomene kwa Yehova. Iyo ni muwemi kuluska waliyose. Kweniso nkhambaso kupatura nyengo yakuti nichezgenge na ŵabwezi ŵane awo nawo ŵakutemwa Yehova. Nkhasambiraso kuwona viwemi mwa ŵanyane na kusulako waka tumaubudi twawo.”

Ndipouli, ŵabwezi ŵithu awo nawo ŵakuteŵetera Chiuta mbakwananga. Ŵakaboni ŵa Yehova nawo ŵakusangana na masuzgo nga umo viliri na waliyose. Kweni ivyo ŵakusambira mu Baibolo ndivyo vikuŵachiska kuti ŵawovwirenge ŵanyawo. Ntheura mungachita makora kuŵa paubwezi na ŵanthu ŵanthena aŵa. Kweni fumbo ndakuti, kasi Baibolo lingatovwira kumanya umo tingachitira na masuzgo agho sono ghangamara yayi, nga ni nthenda zambura kukonda munkhwala kweniso chitima?