“Para ukulomba, ungayowoyanga vinthu vimoza pera mwakuwerezgawerezga chara.”​—Mateyu 6:7.

Yehova wakukhumba yayi kuti tilombenge malurombo ghakuchita kusunga pamtima panji kuŵazga mu buku. Iyo wakukhumba kuti tilombenge kufuma mu mtima. Tiyelezgere kuti nyengo zose mubwezi winu wakumuphalirani vinthu vimozamoza zuŵa lililose, kasi imwe mungajipulika wuli? Panji mungakondwa navyo yayi. Nakuti ŵanthu awo ŵali paubwezi ŵakuyowoyeskana mwakufwatuka ivyo vili ku mtima. Para tikumuphalira Yehova ivyo vili mu mtima withu, tikulongora kuti Yehova ni mubwezi withu.

“Mukulomba, kweni mukupokera yayi, chifukwa mukulomba na khumbo liheni.”​—Yakobe 4:3.

Chiuta wangazgora yayi malurombo ghithu usange tikupempha vinthu ivyo iyo wakukhumba yayi kuti tiŵe navyo panji ivyo vikukolerana yayi na khumbo lake. Mwachiyelezgero, kasi Yehova wangazgora lurombo lwa munthu uyo wakuchita njuga na kupempha kuti wawine? Iyo wakutichenjezga mwakupulikwa makora kuti tileke kuŵa ŵaryezi kweniso tileke kugomezga vinthu ivyo ni vyanadi yayi panji kugomezga kuti kuli chiuta wa Mwaŵi. (Yesaya 65:11; Luka 12:15) Yehova wangazgora yayi malurombo gha nthena agha. Kuti Chiuta wazgore malurombo ghithu, tikwenera kuwoneseska kuti ivyo tikulomba vikukolerana na fundo izo wakutiphalira mu Baibolo.

 “Uyo wakukana kupulika dango—Lurombo lwake nalo mbukazuzi.”—Zintharika 28:9.

Mu nyengo yakale, Chiuta wakazgoranga yayi malurombo gha ŵanthu awo ŵakatondekanga kupulikira malango ghake ghaurunji. (Yesaya 1:15, 16) Chiuta wandasinthe. (Malaki 3:6) Usange tikukhumba kuti Chiuta wazgorenge malurombo ghithu, tikwenera kuyezgayezga kupulikira malango ghake. Kweni wuli usange kale tikachitapo vinthu vinyake viheni? Kasi ndikuti Yehova wazamupulikapo yayi malurombo ghithu? Yayi. Chiuta ngwachitemwa, ndipo ngwakunozgeka kutigowokera usange taleka nadi viheni ivyo tikachita na kuŵikapo mtima kuchita viwemi kuti timukondweske.​—Milimo 3:19.