Nyengo zinyake tingasoŵa chakuchita para mubwezi withu wakusuzgika maghanoghano. Kweni tingalongora kuti tikumutemwa munthu uyo wakusuzgika maghanoghano para tikumovwira. Kasi tingamovwira wuli?

‘Mupulikenge luŵiro.’—YAKOBE 1:19.

Nthowa yimoza iyo mungawovwilira mubwezi winu nkhumutegherezga para wakuyowoya. Ni nyengo zose yayi apo mungakhumbikwira kuzgorapo pa chilichose icho wakuyowoya. Mutegherezgani mwakupwelelera ivyo wakuyowoya ndipo lutilirani kuchita nayo vinthu mwalusungu. Yezgani kumupulikiska umo wakujipulikira ndipo lekani kuchimbilira kumususka panji kumweruzga. Mukwenera kumanya kuti ivyo nyengo zinyake wangayowoya wangaŵa kuti ndivyo wakung’anamura nadi yayi ndipo paumaliro wangadandawura navyo.—Yobu 6:2, 3.

“Mupembuzge.”—1 ŴATESALONIKA 5:14.

Mubwezi winu wangaŵa kuti wakwenjerwa panji wakusuzgika na maghanoghano ghakuti ngwambura kwenelera. Para mungamusimikizgira kuti mukumutemwa, mungamupembuzga na kumukhozga nanga mungaŵa kuti mukumanya yayi icho mungayowoya.

“Mubwezi wanadi wakutemwa nyengo zose.”—ZINTHARIKA 17:17.

Pelekani wovwiri wakwenelera. M’malo mwakughanaghanira waka wovwiri uwo mungapeleka, fumbani ivyo mungawovwirapo. Usange mubwezi winu vikumusuzga kulongosora wovwiri uwo wakukhumba, yezgani kupenjerezga wovwiri  wakwenelera uwo mungapeleka, nga kuluta kukatembeya. Panji mungamovwira kukamugulira vinthu, kutozga pa malo panji ntchito zinyake.—Ŵagalatiya 6:2.

“Longorani kuzikira.”—1 ŴATESALONIKA 5:14.

Ni nyengo zose yayi apo mubwezi winu wangamuphalirani ivyo wakukhumba. Musimikizgirani mubwezi winu kuti muli ŵakunozgeka kumutegherezga para wakukhumba kuyowoya namwe. Chifukwa cha ulwari, nyengo zinyake mubwezi winu wangayowoya na kuchita vinthu ivyo mungakhuŵara navyo. Wangasintha vinthu ivyo mwakhumbanga kuchitira lumoza panji wangaŵa kuti wandawuke makora zuŵa ilo. Mukwenera kuzikira nayo na kumupulikiska apo mukumupempha kuti mumovwire.—Zintharika 18:24.

“Nyengo zose nkhuŵa wakunozgeka kuti nimovwire mubwezi wane. Nangauli nilije wovwiri weneko wakuti wangakhumbikwira, kweni nyengo zose nkhutegherezga ivyo wakuyowoya. Nyengo zinyake wakukhumba waka kuti munthu wamutegherezgenge ndipo wakujipulikako makora.”—Farrah, a uyo mubwezi wake wakulwara nthenda yakutondeka kurya, kwenjerwa mwakujumphizga na kusuzgika chomene maghanoghano.

“Mubwezi wane munyake ngwalusungu ndipo wakunikhozga chomene. Wakanichemerako ku nyumba kwawo kuti tikalyere lumoza chakurya. Pakuti wakanipokelera mwachitemwa, chikaŵa chipusu kuti nilongosore umo nkhujipulikira. Ivi vikanikhozga chomene!”—Ha-eun, uyo wakusuzgika chomene maghanoghano.

“Ntchakuzirwa chomene kuzikira. Para muwoli wane wachita chinthu chinyake icho chanikhuŵazga, nkhukumbuka kuti wachita nthena chifukwa cha ulwari, kuti ndimo waliri nadi yayi. Ivi vikunovwira kuti nileke kukwiya kweniso kuti nichitenge nayo vinthu mwalusungu.”—Jacob, uyo muwoli wake wakusuzgika chomene maghanoghano.

“Muwoli wane wakunovwira na kunipembuzga chomene. Para nenjerwa chomene, wakunichichizga yayi kuchita vinthu ivyo nindakhumbe kuchita. Nakuti nyengo zinyake wakuleka dankha kuchita vinthu vinyake ivyo wakutemwa. Ngwakuzirwa chomene kwa ine chifukwa wakujipata kweniso ngwakupa.”—Enrico, uyo wali na suzgo la kwenjerwa chomene.