Sankhani Pakati pa Chiwemi na Chiheni
Fundo izo tasankha kwendera pa umoyo withu, zingatovwira kuŵa ŵakukondwa panji yayi. Yehova Chiuta wakumanya fundo iyi. Lekani wakukhumba kuti tenderenge fundo zake.
Yehova wakukhumba tikhalenge mwakukondwa kweniso mwamtende.
“Ine Yehova, ndine Chiuta winu, Uyo wakumusambizgani kuti musange chandulo, Uyo wakumulongozgani mu nthowa iyo mukwenera kwendamo. Muŵenge kuti mwapulikira malango ghane! Mphanyi mtende winu waŵa nga ni mlonga na urunji winu nga ni majigha gha nyanja.”—Yesaya 48:17, 18.
Pakuŵa Mlengi withu, Chiuta wakumanya umo tingakhalira makora. Iyo wakukhumba kuti tilondezgenge ulongozgi wake kuti vinthu vitiyendere makora. Para tikulondezga malango gha Chiuta, tifipenge mtima yayi usange ivyo tasankha viŵenge viwemi panji yayi. Kweni timanyenge kuti tasankha makora, ndipo tiŵenge ŵakukondwa na kuŵa pamtende.
Yehova wakutipempha yayi kuchita vinthu ivyo tingatondeka kukwaniska.
“Dango ilo nkhumupani muhanya uno ndinonono chara kwa imwe, ndipo lili kutali chomene yayi na imwe.”—Dotoronome 30:11.
Tingakhumbikwira kusintha umo tikughanaghanira kweniso umo tikuchitira vinthu kuti tilondezge malango gha Chiuta. Ndipouli, Yehova wakutipempha yayi vinthu ivyo wakuwona kuti tingatondeka kukwaniska. Pakuŵa Mlengi withu, wakumanya ivyo tingafiska. Apo tikulutilira kumumanya Yehova, tizamuwona kuti “malango ghake ngazito yayi.”—1 Yohane 5:3.
Yehova walayizga kuti wawovwirenge wose awo ŵasankha kwendera fundo zake.
“Ine Yehova Chiuta wako nkhukukora pa woko lako lamalyero, Ine nkhuyowoya nawe kuti: ‘Ungawopanga chara, ine nikovwirenge.’” —Yesaya 41:13.
Tingakwaniska kulondezga fundo za Chiuta chifukwa iyo watilayizga kuti watovwirenge. Wangatovwira kwizira mu Mazgu ghake Baibolo, agho ghakutikhozga na kutipa chigomezgo.
Ŵanthu ŵanandi pa charu chose chapasi, ŵasanga kuti ŵakukhala umoyo uwemi chifukwa cha kulondezga fundo za mu Baibolo. Tikumuchiskani kuti musambire ulongozgi uwemi uwo Baibolo likupeleka. Mungamba kusambira fundo zinyake za mu Baibolo, mu burosha lakuti Mungakondwa na Umoyo Kwamuyirayira! Burosha ili likusangika pa jw.org ndipo ndakuguliska yayi. Mu burosha ili muli masambiro agha:
-
Kasi Baibolo Lingamovwirani Wuli?
-
Baibolo Likutipa Chigomezgo
-
Kasi Mungaligomezga Baibolo?
Apo mukusambira Mazgu gha Chiuta, Baibolo, muwonenge kuti ngakovwira m’paka sono. Mazgu gha Chiuta “ngakugomezgeka, sono na muyirayira.” (Salimo 111:8) Kuti tikhale umoyo uwemi sono, ni pekha para tikulondezga fundo za Chiuta pa nkhani ya chiwemi na chiheni. Kweni, Chiuta watichichizgengepo yayi kuti tilondezge fundo zake. (Dotoronome 30:19, 20; Joshuwa 24:15) Waliyose wakwenera kusankha yekha kulondezga fundo za Chiuta panji yayi.
