PARA MASOKA GHAMUWIRANI, KASI MULI KUJIFUMBAPO KUTI, ‘KASI CHIUTA WAKAŴA NKHU?’ MUKATI MWASANGANA NA SUZGO LIKURU, KASI MUKAMBA KUKAYIKA USANGE CHIUTA WAKUMUPWELELERANI IMWE PAMWEKHA?

Panyake namwe mukujipulika nga ni Sheila uyo wakukhala ku United States. Iyo wakakulira mu mbumba iyo yikatemwanga chomene kusopa. Ndipo wakati: “Kufuma waka pa wanichi nkhamanyanga kuti kuli Chiuta pakuti ndiyo Mlengi withu. Kweni nkhaŵa nayo paubwezi yayi. Nkhaghanaghananga kuti wakuniwona kweni wakuŵikako mahara yayi. Nkhajipulikanga kuti Chiuta wakunitinkha yayi, kweniso nkhagomezganga yayi kuti wakunitemwa.” Chifukwa wuli Sheila wakakayikanga usange Chiuta wakumutemwa? Iyo wakati: “Mbumba yakwithu yikakumana na masoka mwakulondezgana waka ndipo vikawonekanga kuti Chiuta wakutovwira yayi na pachoko.”

Nga ni Sheila panji namwe mukugomezga kuti Chiuta Wankhongonozose waliko. Kweni panji mungakayika kuti Chiuta wakumupwelelerani imwe. Munthu murunji Yobu uyo wakaŵa na chipulikano kuti Mlengi wali na nkhongono na vinjeru, nayo wakakayikapo. (Yobu 2:3; 9:4) Wati wakumana na masoka mwakulondezgana, wakafumba Chiuta kuti: “Chifukwa wuli mukubisa chisko chinu na kuniwona kuŵa mulwani winu?”—Yobu 13:24.

Kasi Baibolo likuti wuli? Kasi tikwenera kumupa mulandu Chiuta para kwachitika masoka? Kasi pali ukaboni uliwose wakuti Chiuta wakutipwelelera? Kasi waliyose wa ise wakumanya kuti Chiuta wakutiwona, wakutipulikiska, wakutilengera lusungu, panji kutovwira para tasangana na masuzgo?

Mu nkhani zakulondezgapo, tiwonenge umo Chilengiwa chikutisambizgira kuti Chiuta wakutipwelelera. (Ŵaroma 1:20) Pamanyuma, tiwonenge ivyo Baibolo likuyowoya pa umo Chiuta wakutipwelelera. Para “tamumanya” makora kwizira mu ivyo wali kulenga na mu Mazgu ghake, vitovwirenge kugomezga kuti ‘wakutipwelelera’.—1 Yohane 2:3; 1 Petrosi 5:7.