LUZIA WAKUGONTHA PAKWENDA. Apo wakaŵa muchoko wakatora matenda ya poliyo, nthenda yakwambukira iyo yikukora wongo na vigaŵa vinyake. Apo wakaŵa na vyaka 16, mwanakazi munyake uyo Luzia wakamugwiliranga ntchito wakamuphalira kuti: “Chiuta wakukulanga na nthenda yakukoma viŵaro iyi chifukwa ukapulikiranga yayi amama ŵako.” Vyaka vinandi vikati vyajumphapo, Luzia wakakumbukiranga umo vikamukhwaskira.

APO DAMARIS ŴAKAMUSANGA NA KANSA YA KU WONGO, adada ŵake ŵakamufumba kuti: “Kasi ni vichi ivyo uli kuchita kuti ivi vikuchitikire? Ukwenera kuti uli kuchita chinthu chinyake chiheni. Lekani Chiuta wakukulanga. Damaris wakasuzgika chomene maghanoghano chifukwa cha mazgu agha.

Kwa vyaka vinandi ŵanthu ŵakugomezga kuti para munthu walwara ndikuti Chiuta wakumulanga. Buku linyake likuyowoya kuti mu nyengo ya Yesu ŵanthu ŵanandi ŵakagomezganga kuti para munthu “walwara ndikuti iyo wakachita kwananga panji ŵabali ŵake, ndipo Chiuta wakumulanga chifukwa cha viheni ivyo wali kuchita.” (Manners and Customs of Bible) Buku linyakeso likuti Yesu wakati waluta kuchanya, “ŵanthu ŵanyake ŵakagomezganga kuti Chiuta wakapangiskanga masuzgo ghakupambanapambana kuti waŵalange chifukwa cha zakwananga zawo.” (Medieval Medicine and the Plague.) M’ma 1300 C.E., ku Europe ŵanthu mamiliyoni ghanandi ŵakafwa na nthenda yinyake yakofya. Kasi Chiuta wakapelekanga chilango pa ŵanthu ŵaheni? Panji kasi nthenda iyi yikabuka chifukwa cha mabakiteriya nga umo ŵavyaumoyo ŵakayowoyera? Kasi Chiuta wakugwiliskira ntchito matenda kuti walange ŵanthu chifukwa cha viheni ivyo ŵakachita? *

GHANAGHANIRANI FUNDO IYI: Usange Chiuta wakulanga ŵanthu kwizira mu ulwari na masuzgo, chifukwa wuli Mwana wake Yesu wakachizganga ŵalwari? Asi ndikuti kuchizga ŵalwari mphanyi vikapambana na urunji wa Chiuta? (Mateyu 4:23, 24) Yesu wangachita yayi vinthu vyakususkana na khumbo la Chiuta. Iyo wakati: “Nyengo zose nkhuchita vinthu vyakumukondweska,” “nkhuchita nga umo Adada ŵaniphalilira.”—Yohane 8:29; 14:31.

Baibolo likuyowoya mwakupulikikwa makora kuti, Yehova Chiuta ‘ngwambura ubendezi.’ (Dotoronome 32:4) Mwachiyelezgero, Chiuta wangachitiska yayi ngozi ya ndege kuti ŵanthu ŵanandi ŵambura mulandu ŵafwe chifukwa waka cha kukhumba kulanga munthu yumoza uyo wali na mulandu. Pakumanya kuti Chiuta ni murunji, Abrahamu muteŵeti wakugomezgeka wakayowoya kuti Chiuta ‘wangaparanya yayi ŵarunji pamoza na ŵaheni.’ (Genizesi 18:23, 25) Baibolo likuyowoyaso kuti: “Chiuta wangachita uheni chara,” iyo ‘wakuchita kwananga yayi.’—Yobu 34:10-12.

Masuzgo agho tikusangana nagho ntchilango chakufuma kwa Chiuta yayi. Yesu wakamanyanga makora apo iyo na ŵasambiri ŵake ŵakawona munthu uyo wakababika wachibulumutira. “Ŵasambiri ŵake ŵakamufumba kuti: ‘Rabi, ni njani wakananga, munthu uyu panji ŵapapi ŵake, kuti wababike wachibulumutira?’ Yesu wakazgora kuti: ‘Munthu uyu wakananga yayi nesi ŵapapi ŵake, kweni ichi chikachitika mwakuti milimo ya Chiuta yiwoneke mwa iyo.’”—Yohane 9:1-3.

Pakughanaghanira ivyo ŵanthu ŵakagomezganga, ŵasambiri ŵa Yesu ŵakwenera kuti ŵakazizwa apo Yesu wakaŵaphalira kuti munthu yura panji ŵapapi ŵake ŵakachita kwananga yayi kuti wababike wachibulumutira.  Yesu wakajura maso ya munthu wachibulumutira, kweniso wakawovwira kumazga maghanoghano ghakubudika kuti para munthu wakusuzgika ndikuti Chiuta wakumulanga. (Yohane 9:6, 7) Awo wakulwara matenda ghakuru ŵangapembuzgika kumanya kuti ni Chiuta yayi uyo wakwambiska masuzgo.

Malemba ghakutisimikizgira kuti

• “Chiuta wangayezgeka na vinthu viheni yayi, ndipo iyo wakuyezga munthu na vinthu viheni yayi.” (YAKOBE 1:13) Nadi, “vinthu viheni” ivyo vyasuzga ŵanthu kwa vyaka vinandi, kusazgapo ulwari, vyakuŵinya, na nyifwa sonosono apa vimalenge.

• Yesu Khristu “wakachizga wose awo ŵakaŵa ŵalwari.” (MATEYU 8:16) Pakuti Yesu wakachizga wose awo ŵakiza kwa iyo, iyo wakalongora kuti ndivyo Ufumu wa Chiuta uzamuchitira ŵanthu pa charu chose chapasi.

• “[Chiuta] wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—CHIVUMBUZI 21:3-5.