Chiuta wali kulenga mathupi ghithu munthowa yakuti para tajipweteka, lijichizgenge lekha. Para mwangozi tajicheka, tajikwara, panji takhuŵara, “thupi likwamba kuchitapo kanthu kuti chilonda chipore kwali ntchikuru panji ntchichoko.” (Johns Hopkins Medicine) Thupi likuchitapo kanthu mwaluŵiro kuti ndopa zileke kufuma, kuti chilonda chipore kweniso kuwezgerapo maselo agho ghanangika.

GHANAGHANIRANI FUNDO IYI: Usange Mlengi wali kulenga mathupi ghithu munthowa yakuti ghajichizgenge ghekha para tajicheka, kasi tingagomezga yayi kuti wangatovwiraso para tikusuzgika maghanoghano? Baibolo likuti: “Wakuchizga ŵakusweka mtima, wakukaka vilonda vyawo.” (Salimo 147:3) Kweni usange mukusuzgika maghanoghano, kasi mungasimikizga wuli kuti Yehova wangamovwirani panji kuti wangakaka vilonda vinu sono kweniso munthazi?

Chiuta wakutilayizga kuti: “Ungawopanga yayi, pakuti nili nawe. Ungenjerwanga chara, pakuti ndine Chiuta wako. Nikukhozgenge, enya, nikovwirenge.” (Yesaya 41:10) Munthu uyo wakumanya kuti Yehova wakumupwelelera wakuŵa na mtende mu maghanoghano ndipo wakuŵa na nkhongono za kutondera viyezgo. Mpositole Paulosi wakachema mtende uwu kuti ni “mtende wa Chiuta uwo ukuluska maghanoghano ghose.” Paulosi wakatiso: “Mu vinthu vyose, nkhusanga nkhongono mwa uyo wakunipa nkhongono.”—Ŵafilipi 4:4-7, 9, 13.

Malemba ghakutovwira kukhozga chipulikano chithu pa ivyo Yehova wali kutilayizga. Mwachiyelezgero, lemba la Chivumbuzi 21:4, 5 (lemba ili lili pa peji lakulondezgapo) likutiphalira ivyo Chiuta wazamuchita na chifukwa icho tikugomezgera kuti wazamuchita nadi:

• “Wazamufyura masozi ghose” ku maso gha ŵanthu. Yehova wazamumazga masuzgo ghose na ivyo tikwenjerwa navyo nanga nthumasuzgo uto tungawoneka tuchoko ku ŵanthu ŵanyake.

• ‘Wakhala pa chitengo’ mu uchindami kuchanya. Fumu ya Nkhongonozose iyo yili kulenga vinthu vyose yili na nkhongono na mazaza ghakumazgira masuzgo na kutipa wovwiri uwo tikukhumbikwira nadi.

• Yehova wakuyowoya mwakusimikizga kuti ivyo wali kulayizga ni ‘vyakugomezgeka na vyaunenesko.’ Fundo iyi yikung’anamura kuti Yehova wafiskenge vyose ivyo walayizga nga umo wakuchitira nyengo zose kweniso kuyana na ivyo zina lake likung’anamura.

“‘Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.’ Uyo wakakhala pa chitengo wakati: ‘Wonani! Nkhupanga vinthu vyose kuŵa viphya.’ Kweniso wakati: ‘Lemba, chifukwa mazgu agha ngakugomezgeka na ghaunenesko.’”—Chivumbuzi 21:4, 5.

Ivyo Chiuta wali kulenga kweniso Baibolo vikuvumbura umo Adada ŵithu ŵakuchanya ŵaliri. Chilengiwa chikutovwira kuti timumanye Chiuta na kuŵa nayo paubwezi. Ndipo Baibolo ndilo likutovwira chomene chifukwa likutiphalira mwakudunjika kuti: “Sendelerani kwa Chiuta, ndipo iyo wasendelerenge kwa imwe.” (Yakobe 4:8) Lemba la Milimo 17:27 likuti: “Wali kutali yayi na waliyose wa ise.”

Para mwamumanya makora Chiuta, muŵenge na chigomezgo chose kuti “wakumupwelelerani.” (1 Petrosi 5:7) Kasi pali uwemi wuli para tikugomezga kuti Yehova wakutipwelelera?

Ghanaghanirani za Toru wa ku Japan. Wakalereka na amama ŵake awo ŵakaŵa Ŵakhristu, kweni wakanjira gulu la vigeŵenga la ku Japan lakuchemeka yakuza. Iyo wakalongosora kuti: “Nkhagomezganga kuti Chiuta wakunitinkha chifukwa ŵabwezi ŵane ŵapamtima ŵakafwa ndipo nkhawonanga kuti ntchilango chakufuma kwa Chiuta.” Toru wakalongosora kuti “nkhaŵa wankhaza chomene kweniso wambura lusungu” chifukwa cha vinthu viheni ivyo tikachitanga mu gulu la vigeŵenga ilo nkhaŵa. Iyo wakati: “Nati nakoma munthu munyake wakutchuka chomene kuluska ine na kujipangira zina, nkhakhumbanga kujikoma apo nkhaŵa nichali munyamata.”

Toru wakati wasambira Baibolo pamoza na muwoli wake Hannah, wakasintha chomene na kwamba kuwona vinthu mwakwenelera. Hannah wakati: “Nkhajiwonera nekha kuti mfumu wane wasintha nadi.” Pasono,  Toru wakuyowoya mwakusimikizga kuti: “Chiuta waliko nadi uyo wakupwelelera waliyose wa ise payekha. Wakukhumba yayi kuti waliyose wafwe, ndipo ngwakunozgeka kugowokera ŵanthu awo ŵalapa nadi pa ivyo ŵakachitanga. Wakupulika vinthu ivyo palije waliyose uyo tingamuphalira kweniso wakupulikiska vinthu ivyo munthu munyake wangavipulikiska yayi. Sonosono apa, Yehova wawuskengepo masuzgo na vyakuŵinya vyose. Nanga ni sono wakutovwira munthowa zakupambanapambana. Wakutipwelelera na kutovwira para tikusuzgika.”—Salimo 136:23.

Nga ivyo vikachitikira Toru, para tamanya kuti Chiuta wangatovwira kweniso kuti wawuskengepo masuzgo ghose sonosono na kufyura masozi ghose, vikutipa chigomezgo chiwemi cha munthazi. Kweniso vingatovwira sono kukhalako umoyo uwemi. Nangauli tikukhala mu charu icho ntchakuzura na masuzgo kweni tingakhala makora pakumanya kuti Chiuta wakutipwelelera.