TIYELEZGERE kuti mukuwonelera filimu ya munthu wakwimba uyo wakumukondweskani ndipo ngwakutchuka. Filimu iyi yikwamba na kulongora ivyo munthu uyu wakachitanga apo wakaŵa mwana, apo wakasambiranga kwimba kweniso apo wakayelezgeranga kwimba. Ndipo pamanyuma mukumuwona wakwamba kwimba mu vyaru vyakupambanapambana na kumanyikwa pa charu chose. Nyengo yichoko waka, mukuwona kuti munthu uyu wakuchekura na kufwa, ndipo filimu yikumalira penepapo.

Chiyelezgero cha mu filimu iyi, ntcha vinthu ivyo vikachitika nadi. Munthu waliyose umaliro wake ukuyana waka na wa munthu uyo tayowoya mu filimu iyi. Kwali wangaŵa wakwimba, wasayansi, panji wakuchita maseŵero. Munthu wa mu filimu uyu walekenge kuchekura na kufwa, mphanyi wakachita vinthu vinandi chomene.

Nangauli nkhani iyi njachitima, kweni ndivyo vichitikilenge waliyose. (Mupharazgi 9:5) Nangauli taŵanthu tayezgayezga kweni tatondeka kumazga uchekuru na nyifwa. Padera pa uchekuru, taŵanthu tingafwa mwamabuchi chifukwa cha ngozi panji ulwari. Nga umo Baibolo likuyowoyera, umoyo withu uli nga ni nyakhuŵinda “uyo wakuwoneka nyengo yichoko waka na kuzgeŵelekera.”—Yakobe 4:14.

Ŵanthu ŵanyake ŵakuwona kuti ŵangafwa nyengo yiliyose ndipo ŵakuwona kuti umoyo ulije phindu. Ntheura ŵakukhalira waka fundo yakuti “tiyeni tirye na kumwa, chifukwa machero tifwenge.” (1 Ŵakorinte 15:32) Ŵanthu aŵa ŵakuchita ivi chifukwa chakuti ŵakumanya kuti munthu wangafwa nyengo yiliyose. Nyengo zinyake, chomenechomene para mwasangana na masuzgo, mungajifumba kuti, ‘Kasi taŵanthu tilutilirenge waka kusuzgika na kufwa?’ Kasi ni nkhu uko mungasanga zgoro la fumbo ili?

Ŵanthu ŵanandi ŵakuwona kuti ŵasayansi ndiwo ŵangazgora fumbo ili. Ŵasayansi na madokotala ŵawovwirako kuti umoyo withu uŵeko utali. Ndipo ŵasayansi ŵanyake ŵakuyezgayezga kusanga nthowa kuti umoyo wa ŵanthu uŵeko utali chomene. Kwali ŵasayansi ŵangasanga nthowa yakuti umoyo uŵeko utali panji yayi, kweni tikujifumba nipera kuti: Chifukwa wuli tikuchekura na kufwa? Kasi yizamuŵapo nyengo iyo mulwani withu nyifwa, kuzamuŵavya? Tidumbiskanenge mafumbo agha mu nkhani zakulondezgapo. Kweniso tisangenge zgoro la fumbo lakuti: Kasi taŵanthu tilutilirenge waka kufwa?