Kasi Ni Nkhu Uko Mungasanga Ulongozgi Wanadi Uwo Ungamovwirani Kuti Muzakasange Umoyo Uwemi Kunthazi?

JULANI

Nga umo tawonera mu nkhani izo zajumpha, ŵanthu ŵakuyezga kuthemba vinthu vyakupambanapambana nga nkhugomezga vyamizimu, masambiro, usambazi kweniso kuŵa munthu muwemi na chilato chakuti vinthu vizakaŵayendere makora munthazi. Kweni kuthemba nthowa izi vili nga nkhugwiliskira ntchito mapu yakubudika kuti yimulongozgani kuluta ku malo ghachilendo agho mukumanyako yayi. Kasi ichi chikung’anamura kuti palije ulongozgi wakugomezgeka uwo ungatovwira kuti vinthu vizakatiyendere makora munthazi? Yayi, ulongozgi ulipo.

UKO MUNGASANGA ULONGOZGI WANADI

Kanandi para tikupanga chakusankha, tikufumba vinjeru kwa munthu mulara uyo wali na vinjeru kuluska ise. Mwakuyana waka, nase tingasanga ulongozgi wakugomezgeka uwo ungatovwira kuti vinthu vizakatiyendere makora munthazi kufuma kwa munthu mulara chomene na wavinjeru kuluska ise. Iyo wakutipa ulongozgi uwu kwizira mu malemba ghakupatulika agho ghakamba kulembeka vyaka pafupifupi 3,500 ivyo vyajumpha. Malemba ghakupatulika agha ni buku lakuchemeka kuti Baibolo.

Chifukwa wuli mungaligomezga Baibolo? Chifukwa ndakufuma kwa munthu wakale chomene uyo ngwavinjeru kuluska munthu waliyose pa charu chapasi. Baibolo likumulongosora kuti “Mulara Wamwaka” uyo wakaŵako “kufuma muyirayira m’paka muyirayira.” (Daniyeli 7:9; Salimo 90:2) Iyo ni “Mlengi wa kuchanya, Chiuta waunenesko, mweneuyo wakawumba charu chapasi.” (Yesaya 45:18) Ndipo wakutiphalira zina lake kuti ni Yehova.—Salimo 83:18.

Pakuti Baibolo ndakufuma kwa Mlengi wa ŵanthu wose, likutemwera mtundu unyake kuluska unyake yayi. Ulongozgi wake ngwakovwira nyengo zose ndipo wawovwira ŵanthu ŵanandi chomene mu vyaru vyose. Likusangika mu viyowoyero vinandi chomene ndipo ni buku ilo lili kuthandazgika chomene kuluska buku linyake lililose. * Ichi chikung’anamura kuti kulikose uko ŵanthu ŵangaŵa ŵangalipulikiska kwambura kusuzga ndipo lingaŵalongozga. Fundo izi zikukolerana chomene na ivyo Baibolo ilolene likuyowoya apo likuti:

“Chiuta wakutemwera yayi. Kweni wakupokelera munthu wa mtundu uliwose uyo wakumopa na kuchita urunji.”—MILIMO 10:34, 35.

Nga umo dada wachitemwa wakulongozgera ŵana ŵake, Yehova Chiuta nayo ni Dada wachitemwa uyo wakutipa ulongozgi kwizira mu Mazgu ghake, Baibolo. (2 Timote 3:16) Namwe mungaghagomezga Mazgu ghake, nakuti iyo ndiyo wakatilenga ndipo wakumanya makora chomene ivyo vingatovwira paumoyo withu.

ULONGOZGI UWO NGWAKUGOMEZGEKA

Tingagomezga ivyo Baibolo likuyowoya vyakukhwaskana na munthazi chifukwa ivyo likayowoyerathu vyaka 2,000 ivyo vyajumpha, vikuchitika nadi mazuŵa ghano.

IVYO BAIBOLO LIKAYOWOYERATHU KUTI VIZAMUCHITIKA

“Mtundu uzamuwukirana na mtundu unyake, ufumu na ufumu unyake. Kuzamuŵa vindindindi vikuru, kweniso njara na nthenda zakwambukira mu malo na malo.”—LUKA 21:10, 11.

IVYO BAIBOLO LIKAYOWOYERATHU PA NKHANI YA NKHARO YA ŴANTHU

“Kweni umanye ichi, kuti mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, ŵakutemwa ndalama, ŵakujiŵikamo, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, ŵambura kugomezgeka, ŵambura chitemwa, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura na kunotha, ŵakutemwa vyakusanguluska m’malo mwa kutemwa Chiuta.”—2 TIMOTE 3:1-4.

Kasi imwe mungayowoyapo vichi pakuwona kuti ivyo Baibolo likayowoyerathu kale chomene vikuchitika nadi mazuŵa ghano? Tikukayika yayi kuti mungazomerezga ivyo Leung, wa ku Hong Kong wakayowoya. Iyo wakati: “Mauchimi agha ghakalembeka kale chomene. Vingachitika yayi kuti munthu wayowoyerethu ivi na kuchitika nkhanira ndendende. Baibolo likwenera kufuma nadi kwa munthu munyake wavinjeru chomene kuluska ise.”

Baibolo lili na mauchimi ghanandi agho ghali kufiskika. * Uwu mbukaboni wakuti Baibolo ni Mazgu gha Chiuta nadi. Yehova wakuti: “Ndine Chiuta, kulije munyake wakuyana na ine. Nkhuyowoyerathu kufuma pakwamba ivyo vizamuchitika.” (Yesaya 46:9, 10) Ntheura pali chifukwa chakukwana icho mungagomezgera ivyo Baibolo likuyowoya vyakukhwaskana na vyamunthazi.

ULONGOZGI UWO UNGAMOVWIRANI SONO KWENISO MUYIRAYIRA

Usange mukulondezga ulongozgi wa mu Malemba Ghakupatulika imwe ndimwe mukusanga chandulo. Wonani viyelezgero vichoko waka ivi.

KUWONA MWAKWENELERA NDALAMA NA NTCHITO

“Woko limoza lakuzura na chipumulo ndiwemi kuluska mawoko ghaŵiri ghakuzura na kuphyoka na kuchimbizga waka mphepo.”—MUPHARAZGI 4:6.

KUŴA NA BANJA LAKUKONDWA

“Kweni namwe waliyose payekha watemwenge muwoli wake umo wakujitemwera yekha. Ndipo muwoli nayo wachindikenge chomene mfumu wake.”—ŴAEFESO 5:33.

KUKHALA MAKORA NA ŴANYITHU

“Taya ukali, leka kutukutwa. Ungakwenyeleranga chara na kwamba kuchita uheni.”—SALIMO 37:8.

Usange mungalondezga ivyo Baibolo likuyowoya, vinthu vimwenderaninge makora sono kweniso vinthu vizamumwenderani makora munthazi. Mu Baibolo Chiuta wakutilayizga vinthu viwemi chomene. Vinyake mwa vinthu ivi ni

BATA NA MTENDE

“Kweni ŵakuzika ŵazamuhara charu chapasi, ŵazamukondwa chomene na mtende ukuru.”—SALIMO 37:11.

WALIYOSE WAZAMUŴA NA NYUMBA NA CHAKURYA CHAKUKWANA

“Ŵazamuzenga nyumba na kukhalamo, ndipo ŵazamupanda minda ya mpheska na kurya vipambi vyake.”—YESAYA 65:21.

KUZAMUŴAVYA ULWARI NA NYIFWA

“Nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—CHIVUMBUZI 21:4.

Kasi mukwenera kuchita vichi kuti muzakakondwe na umoyo uwu munthazi? Wonani nkhani yakulondezgapo.

^ ndime 6 Kuti mumanye vinandi pa nkhani ya umo Baibolo lili kung’anamulikira kweniso kuthandazgikira, lutani pa www.pr418.com na kuwona chigaŵa chakuti IVYO BAIBOLO LIKUSAMBIZGA > MBIRI NA BAIBOLO.

^ ndime 16 Kuti mumanye vinandi wonani chaputara 9 cha buku la mutu wakuti Baibulo—Kodi Ndilo Mawu a Mulungu Kapena a Munthu? lakupharazgika na ŵakaboni ŵa Yehova. Likusangika pa Intaneti pa www.pr418.com. Wonani apo ŵalemba kuti LAYIBULARE > MABUKU.