Chifukwa Wuli Kutinkhana Kuli Palipose?
Chifukwa wuli pa charu chose ŵanthu ŵakutinkhana? Kuti tisange zgoro, tikwenera kumanya dankha kuti thinkho ni vichi, chifukwa icho ŵanthu ŵakutinkhira ŵanyawo, kweniso chifukwa icho kutinkhana kuliri palipose panji kuti kukuthandazgikira.
Kasi Thinkho Ni Vichi?
Thinkho nkhuleka kutemwa munthu munyake panji kuchitira nkhaza munthu munyake panji gulu linyake la ŵanthu. Likusazgaposo vinandi padera pakukwiyira waka munthu kwakanyengo.
CHIFUKWA ICHO ŴANTHU ŴAKWAMBIRA KUTINKHIRANA
Ŵanthu ŵakwamba kutinkhana pa vifukwa vyakupambanapambana. Kanandi ŵanthu ŵakutinkha ŵanyawo chifukwa chakuti ŵabudiska vinthu yayi, kweni chifukwa cha mtundu wawo. Ŵangaŵa kuti ŵakuŵatinkha ŵanthu aŵa chifukwa ŵakughanaghana kuti ŵanthu wose ŵa mtundu uwu mbaheni, mbakofya, ndipo ŵangasintha yayi. Kweniso ŵakuŵawona kuti mbapasi kweniso kuti ndiwo ŵakwambiska masuzgo ghanyake. Ŵanthu awo ŵakutinkha ŵanyawo ŵangaŵa kuti nawo ŵanthu ŵali kuŵachitirapo nkhaza, vinthu vyambura urunji, panji kuŵachitira vinthu vinyake ivyo vingapangiska kuti kutinkhana kulutilire.
UMO KUTINKHANA KUKUTHANDAZGIKIRA
Ŵanthu ŵanyake ŵakutinkha ŵanthu nanga ni awo ŵangaŵa kuti ŵandaŵawonepo. Mwachiyelezgero, ŵanthu ŵanyake ŵangatinkha gulu linyake la ŵanthu chifukwa chakuti ŵabali panji ŵabwezi ŵawo ŵakuŵatinkha ŵanthu awo. Lekani thinkho likuthandazgika chomene, chifukwa para munyake mu banja panji mu chigaŵa wakutinkha gulu linyake la ŵanthu, ŵanyake nawo ŵakwamba kutinkha gulu ilo.
Para tamanya umo kutinkhana kukuthandazgikira, ndipo tingapulikiska makora chifukwa icho ŵanthu ŵanandi ŵakutinkhira ŵanyawo. Ndipouli, kuti timazge thinkho ilo lili pa charu chose, tikwenera kumanya umo likambira. Ndipo Baibolo likutiphalira.
BAIBOLO LIKULONGOSORA UMO KUTINKHANA KUKAMBIRA
KUTINKHANA KUKAYAMBIKA NA ŴANTHU YAYI. Kutinkhana kukambika apo mungelo munyake kuchanya, uyo pamanyuma wakamba kuchemeka kuti Satana Dyabulosi, wakagalukira Chiuta. Dyabulosi wakamba kuŵa “wakukoma apo wakamba” kugalukira Chiuta. Pakuŵa “mutesi kweniso wiske wa utesi” wakalutilira kupangiska thinkho na kuwukirana kuthandazgika. (Yohane 8:44; 1 Yohane 3:11, 12) Baibolo likumulongosora kuti ni mutesi, mukali, kweniso wakuwukira.—Yobu 2:7; Chivumbuzi 12:9, 12, 17.
NTCHIPUSU CHOMENE ŴANTHU ŴAKWANANGA KWAMBA KUTINKHANA. Munthu wakwamba Adamu, wakalondezga kwananga uko Satana wakambiska. Pa chifukwa ichi ŵanthu wose ŵali kuhara kwananga ndipo mbambura kufikapo. (Ŵaroma 5:12) Mwana wakwamba wa Adamu wakakoma munung’una wake Abelu chifukwa cha thinkho. (1 Yohane 3:12) Mbunenesko kuti ŵanthu ŵanyake ŵakutemwana kweniso kuchitirana lusungu. Kweni chifukwa cha kwananga, ŵanthu ŵanandi mbakujitemwa, ŵabina na ŵakujitukumura, mikhaliro iyo yikupangiska kuti kutinkhana kulutilirenge.—2 Timote 3:1-5.
THINKHO LINGAMBIKA CHIFUKWA CHAKUTI ŴANTHU MBAKUPAMBANA. Charu icho tikukhala chikukhuŵilizga kutinkhana mwakukhozgera nkharo ziheni. Mwachiyelezgero, kutemwera, kayowoyero kaheni, kusuzga ŵanji, kweniso kunanga vinthu, vyazara chifukwa chakuti “charu chose chikugona mu nkhongono za muheni,” Satana Dyabulosi.—1 Yohane 5:19.
Ndipouli, Baibolo likutiphalira vinandi padera pakuyowoya waka ivyo vikwambiska thinkho. Likutiphaliraso nthowa za umo tingamazgira thinkho.
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Chiuta Ndiyo Wakalenga Satana?
Kasi Satana wali kufuma nkhu? Chifukwa wuli Yesu wakati Dyabulosi ‘wakima mu unenesko chara’?
MAFUMBO AGHO BAIBOLO LIKUZGORA
Kasi Kwananga Kwakwamba Kukaŵa Vichi?
Adamu na Eva ŵakaleka kumupulikira Chiuta ndipo ŵali kupirako ŵana ŵawo kwananga, nga umo vikuŵira na matenda ghakwambukira.
