IVYO TINGACHITA KUTI TIMAZGE THINKHO
1 | Kutemwera Yayi
Ivyo Baibolo Likuyowoya:
“Chiuta wakutemwera yayi, kweni wakupokelera munthu wa mtundu uliwose uyo wakumopa na kuchita urunji.”—MILIMO 10:34, 35.
Ivyo Lemba Ili Likung’anamura:
Yehova * wakuteruzga mwakutolera charu icho tikukhala yayi, nesi mtundu withu, mtundu wa thupi, panji mutheto withu. M’malo mwake iyo wakuwona chomene wunthu withu wamukati. Baibolo likuyowoyaso kuti, “munthu wakuwona kuwaro, kweni Yehova wakuwona mu mtima.”—1 Samuyeli 16:7.
Ivyo Mungachita:
Nangauli tingawona yayi ivyo vili mu mtima wa munthu nga umo wakuchitira Chiuta, kweni tingamuyezga Chiuta na kuchita vinthu mwambura kutemwera. Ŵikanipo mtima kuwona munthu waliyose payekha, m’malo mwa mtundu wake. Para mwawona kuti muli na maghanoghano ghakubudika ghakukhwaskana na mtundu unyake wa ŵanthu panji fuko linyake, lombani Chiuta kuti wamovwirani kuwuskamo maghanoghano ghaheni agho muli nagho. (Salimo 139:23, 24) Para mwamulomba Yehova kufumira pasi pamtima kuti wamovwirani kuti muleke kutemwera, manyani kuti wapulikenge lurombo lwinu na kumovwirani.—1 Petrosi 3:12.
^ ndime 6 Yehova ni zina la Chiuta.—Salimo 83:18.
“Nkhaŵa kuti nindakhalepo pasi lumoza na muzungu mwamtende . . . Pasono nili yumoza wa gulu la ŵabali ilo ndakukolerana pa charu chose.”—TITUS
Panji Mungatemwa Kuŵerengaso Nkhani Izi
GONGWE LA MULINDA
Yehova “Wakutemwera Cara”
Ciuta wakupulika malurombo gha awo ŵakumusopa kwambura kupwelerako za mtundu, fuko, panji kasangiro ka vinthu. Tikumanya wuli?
WUKANI!
Kasi Namwe Muli na Sankho?
Kasi ni vinthu wuli vinyake ivyo vingalongora kuti tili na sankho?
