Para yayi, kweni panji muli kuwonapo kuti ŵanthu ŵanyake ŵakutinkha ŵanyawo. Kanandi tikupulika panji kuwona umo ŵanthu ŵakutinkhira ŵanyawo chifukwa chakupambana charu, mtundu, panji chifukwa chakuti mbanalume panji ŵanakazi. Pa chifukwa ichi maboma yanandi yakuŵika malango kuti ŵalangenge uyo wachitira nkhaza munthu chifukwa chakuti ngwa mtundu unyake.

Thinkho likupangiska kuti ŵanthu ŵatinkhanenge chomene. Ndipo kanandi awo ŵakutinkhika ŵakuwezgera, ndipo ivi vikupangiska kuti kutinkhana kulutilirenge waka.

Panyake namwe ŵanthu ŵali kumuchitiranipo vinthu vyambura urunji nga ni sankho, kumusekani, kumwavyani, kweniso kumofyani. Kweni thinkho likusazgapo vinandi padera pa ivi. Kanandi lingapangiska munthu kuŵa wankhaza panji mukali ndipo wangamba kusuzga ŵanyake, kunanga vinthu, kutimba ŵanji, kukolelera munthu munyake, kweniso kukoma ŵanji.

Magazini iyi yizgorenge mafumbo agho ghali musi umu, kweniso yilongosorenge umo kutinkhana kuzamumalira:

• Chifukwa wuli kutinkhana kuli palipose?

• Kasi kutinkhana kungamara wuli?

• Kasi yizamuŵapo nyengo apo kutinkhana kuzamuŵakoso yayi?