Ŵanthu ŵanyake ŵakuwona chawanangwa kuŵa chakuzirwa usange chafuma kwa munthu wamazaza panji uyo ŵakumuchindika. Nangauli vyawanangwa vinyake vingaŵa vya ndalama zinandi yayi, kweni para vyafuma kwa mubwezi panji mubali withu, vikuŵa vyakuzirwa. Ndimo vikaŵira na Jordan uyo tamuzunura mu nkhani iyo yajumpha. Kasi fundo iyi yikukolerana wuli na sembe yakuwombora?

Chakwamba, Baibolo likuti “Chiuta wakatuma Mwana wake wapadera mu charu, mwakuti tisange umoyo kwizira mwa iyo.” (1 Yohane 4:9) Fundo iyi yikutovwira kuwona kuti sembe ya Yesu njakuzirwa chomene. Palije munthu wamazaza wakuyana na Chiuta. Pakuyowoya za Chiuta, wamasalimo wakati: “Imwe, mwaŵeneimwe zina linu ni Yehova, ndimwe mwekha Wapachanya Nkhanira pa charu chose chapasi.” (Salimo 83:18) Ni mwaŵi ukuru chomene kupokera chawanangwa kufuma kwa Yehova.

Chachiŵiri, Chiuta ni “Dada withu.” (Yesaya 63:16) Tikuyowoya nthena chifukwa ndiyo wali kutipa umoyo. Kweniso wakutipwelelera chomene nga umo dada wachitemwa wakutichitira na ŵana ŵake. Pakuyowoya za ŵateŵeti ŵanyake ŵakale, Chiuta wakati: “Asi Efurayimu ni mwana wakuzirwa kwa ine, mwana wakutemweka? . . . Lekani nkhumunwekera. Ndipo nimuchitirenge nadi chitima.” (Yeremiya 31:20) Ndimoso Chiuta wakuchitira na ŵanthu awo ŵakusopa mazuŵa ghano. Kweniso ni Dada na Mubwezi withu. Ntheura tikwenera kuwonga chomene chawanangwa icho wali kutipa.

Vyawanangwa vinyake vikuŵa vyakuzirwa chifukwa vikulongora kuti uyo wapeleka wakutitemwa. Nakuti munthu uyo wakupeleka na mtima wose wakupeleka na chilato chakuti wasangirepo phindu yayi.

Chiuta wakapeleka Mwana wake chifukwa chakuti wakutitemwa. Baibolo likuti: “Chitemwa cha Chiuta chikawoneka kwa ise mu nthowa iyi, Chiuta wakatuma Mwana wake wapadera mu charu.” Chifukwa wuli wakamutuma pa charu chapasi? Baibolo likuti: “Mwakuti tisange umoyo kwizira mwa iyo.” (1 Yohane 4:9) Chifukwa chakuti ŵanthu ŵakanangira Chiuta mwadala, pakaŵavya chifukwa chakuti iyo watumire Mwana wake Yesu kuzakatifwira. Kweni Chiuta wali ‘kupeleka Yesu Khristu kwa ise nga ntchawanangwa chifukwa cha lusungu lwake lukuru.’—Ŵaroma 3:24.

Chifukwa wuli tikuti Chiuta wali kutilongora “lusungu lwake lukuru” pakupeleka Yesu? Baibolo likuti: “Kweni Chiuta watilongora chitemwa chake, pakuti apo tikaŵa kuti tichali ŵakwananga, Khristu wakatifwira.” (Ŵaroma 5:8) Chiuta wakapeleka Mwana wake kwa ise ŵanthu ŵawakawaka na ŵakwananga chifukwa chakuti wakutitemwa chomene. Tikaŵa ŵakwenelera yayi kuti Yesu watifwire, ndipo palije uyo wangawezgerapo ivyo wali kutichitira. Kufuma kale chomene, palije uyo wali kulongorapo chitemwa chanthena ku ŵanthu.

Vyawanangwa vinyake vikuŵa vyakuzirwa usange uyo wapeleka wajinora vinthu vinyake. Nakuti usange munthu wajinora chinthu chinyake chakuzirwa na kutipa ise, tikukondwa chomene na chawanangwa ichi.

Chiuta “wakapeleka Mwana wake wapadera.” (Yohane 3:16) Wakhumbenge nthena wakapeleka yayi Mwana wake chifukwa wakamutemwanga chomene. Apo Chiuta wakalenganga kuchanya, Yesu wakaŵa pafupi nayo “nga ni misiri.” (Zintharika 8:30) Yesu ni ‘Mwana wakutemweka’ wa Chiuta, enya “ntchikozgo cha Chiuta wambura kuwoneka.” (Ŵakolose 1:13-15) Palije ŵanthu ŵanyake awo ŵali kukhala paubwezi wakukhora chomene kuluska Yehova na Yesu.

Ndipouli, Chiuta “wakakanilira yayi Mwana wake.” (Ŵaroma 8:32) Yehova wali kutipa Mwana wake wakutemweka chomene. Nadi, ichi ntchawanangwa chikuru chomene icho Chiuta wali kutipa.

Chawanangwa chingaŵaso chakuzirwa usange chapelekeka panyengo yake. Tiyelezgere kuti mwalwara nthenda yakofya chomene iyo para mwatondeka kugura munkhwala wake mbwenu mufwenge. Kweni munkhwala uwu ngwakudura chomene ndipo mungakwaniska yayi kugura. Kasi mungajipulika wuli usange munthu munyake wangamugulirani munkhwala uwu? Chawanangwa ichi chingaŵa cha panyengo yake, asi nthe?

Baibolo likuti: “Chifukwa nga umo mwa Adamu wose ŵakufwa, ntheuraso mwa Khristu wose ŵazamuzgoka ŵamoyo.” (1 Ŵakorinte 15:22) Pakuti ndise ŵana ŵa Adamu, lekani tose ‘tikufwa,’ ndipo tingagwentha yayi ulwari na nyifwa nesi kujiphemaniska na Chiuta na kufwatuka ku kwananga. Pakuti ndise ŵakwananga, palije icho tingachita kuti ise panji munthu munyake wakhalilire ‘wamoyo.’ Baibolo likuti: “Palije nanga njumoza wa iwo wangawombora mubali wake, panji kumupelekera chiwombolero kwa Chiuta. Mtengo wakuwombolera umoyo wawo . . . . ngwakuti ŵangawukwaniska yayi.” (Salimo 49:7, 8) Ntheura tikukhumbikwira nadi wovwiri pakuti tingakwaniska yayi mtengo wa sembe ya Yesu. Chiuta walekenge kupeleka Mwana wake, mphanyi tilije chilindizga chilichose.

Yehova wali kupeleka Mwana wake kuti watiwombore chifukwa wakutitemwa mwakuti kwizira mwa Yesu “wose ŵazamuzgoka ŵamoyo.” Kasi sembe ya Yesu yikufiska  wuli ivi? Baibolo likuti: “Ndopa za Mwana wake Yesu zikutitozga ku kwananga kose.” Nadi, ndopa za Yesu zikutovwira kuti zakwananga zithu zigowokereke na kuzakasanga umoyo wamuyirayira. (1 Yohane 1:7 ; 5:13) Kasi sembe ya Yesu yizamovwira wuli ŵabali ŵithu awo ŵali kufwa? Baibolo likuzgora kuti: “Pakuti nyifwa yikizira mwa munthu yumoza, chiwuka cha ŵakufwa nacho chikwizira mwa munthu yumoza [Yesu].”—1 Ŵakorinte 15:21. *

Sembe ya Yesu ntchawanangwa chapadera chomene kufuma kwa Yehova uyo ni Chiuta Wapachanya Nkhanira. Iyo wakutitemwa chomene, ndipo palije chawanangwa icho chikuyana na ichi. Chawanangwa ichi ntcha panyengo yake kwa ise chifukwa chikutovwira kuti tifwatuke ku kwananga na nyifwa. Enya, chawanangwa ichi ntchakuzirwa chomene ndipo chikuluska vyawanangwa vyose.