1, 2. (a) Chifukwa wuli tikwenera yayi kuzizwa para tikwenjerwa nyengo zinyake? (Wonani chithuzi chakwamba.) (b) Kasi mu nkhani iyi tidumbiskanenge vichi?

MAZUŴA ghano ngakusuzga chomene. Satana Dyabulosi ni mukali chomene ndipo “wakuyingayinga nga ni nkhalamu yakuwuluma, wakupenja munthu wakuti wamumilimitizge.” (1 Pet. 5:8; Chivu. 12:17) Lekani nase ŵateŵeti ŵa Chiuta nyengo zinyake tikwenjerwa chomene. Kale napo ŵateŵeti ŵa Chiuta ŵanyake ‘ŵakenjerwanga.’ Yumoza wawo wakaŵa Themba Davide. (Sal. 13:2) Kweniso mpositole Paulosi nayo ‘wakenjerwanga chifukwa cha mipingo yose.’ (2 Kor. 11:28) Kweni kasi tingachita wuli para tikwenjerwa?

² Adada ŵithu ŵakuchanya, Yehova, ŵakawovwiranga ŵateŵeti ŵawo ŵakale. Mazuŵa ghano napo ŵakovwira awo ŵakusuzgika maghanoghano, panji ŵakwenjerwa. Baibolo likuti: “Muthulirani vyose ivyo mukwenjerwa navyo, chifukwa wakumupwelelerani.” (1 Pet. 5:7) Kasi ni vichi vingatovwira kuti tileke kwenjerwa chomene? Tiyeni tiwone nthowa zinayi izo zingatovwira. Yakwamba, kulomba kufumira pasi pa mtima. Yachiŵiri, kuŵerenga Mazgu gha  Chiuta na kughanaghanirapo. Yachitatu, umo mzimu utuŵa wa Yehova ungatovwilira. Ndipo yaumaliro, kuphalirako uyo mukumugomezga. Apo tikuwona nthowa izi, sanganipo nthowa izo mukuwona kuti zingamovwirani.

3. Kasi mungamuthwikiska wuli katundu winu Yehova?

³ Chinthu chakwamba icho tikwenera kuchita, nkhulomba kwa Yehova kufumira pasi pa mtima. Para muli na masuzgo, panji mukufipa mtima chomene na chinthu chinyake, ŵaphalirani chilichose Adada ŵinu ŵakuchanya. Wamasalimo Davide wakapempha Yehova kuti: “Tegherezgani lurombo lwane, A Chiuta.” Mu Salimo ili wakayowoyaso kuti: “Katundu wako umuthwikiske Yehova, ndipo wakovwirenge.” (Sal. 55:1, 22) Para mwayezga nthowa yiliyose kuti mumazge suzgo linu, lurombo lwakufumira pasi pa mtima lungamovwirani kuti muleke kwenjerwa chomene. Kweni kasi lurombo lungamovwirani wuli kuti muleke kwenjerwa chomene?—Sal. 94:18, 19, mazgu ghamusi.

4. Chifukwa wuli lurombo ndwakukhumbikwa chomene para mukwenjerwa?

⁴ Ŵerengani Ŵafilipi 4:6, 7. Yehova wakuzgora malurombo na maŵeyelero ghithu ghakufumira pasi pa mtima. Mwawuli? Wakutipa mtende mu mtima uwo ukuvikilira maghanoghano ghithu ghose. Ŵanandi ŵangazomerezga fundo iyi chifukwa cha ivyo vili kuŵachitikirapo. Apo ŵakasuzgikanga chomene maghanoghano panji kwenjerwa chifukwa cha masuzgo, Chiuta wakaŵawovwira kuti ŵaŵe na mtende mu mtima uwo ukuluska maghanoghano ghose. Namwe wangamovwirani. “Mtende wa Chiuta” ungamovwirani pa suzgo lililose ilo mungakumana nalo. Mugomezgenge chomene ivyo Yehova walayizga, wakuti: “Ungenjerwanga chara, pakuti ndine Chiuta wako. Nikukhozgenge, enya, nikovwirenge.”—Yes. 41:10.

5. Kasi Mazgu gha Chiuta ghangatovwira wuli kuti tiŵe na mtende wa mu mtima?

⁵ Nthowa yachiŵiri yakusangira mtende mu mtima, nkhuŵerenga Mazgu gha Chiuta na kughanaghanirapo. Chifukwa wuli ntchakuzirwa? Mu Baibolo muli ulongozgi uwemi chomene uwo ungamovwirani kuti muleke kwenjerwa, panji kulekerathu kwenjerwa. Fundo iyi njaunenesko, chifukwa mu Baibolo muli vinjeru vya Chiuta. Para nyengo zose mukughanaghanira Mazgu gha Chiuta, na kuwona umo mungalondezgera ulongozgi wa Mazgu ghake, mukhozgekenge chomene. Yehova wakumanya kuti para tikuŵerenga Mazgu ghake, tiŵenge ‘ŵakukhwima mtima na kuŵa ŵankhongono chomene’ na kuleka ‘kutenthema panji kopa.’—Josh. 1:7-9.

6. Kasi ivyo Yesu wakayowoya vingamovwirani wuli?

⁶ Mu Baibolo tikusangamo mazgu ghakupembuzga agho Yesu wakayowoya. Ŵanthu awo ŵakapulikizganga ivyo Yesu wakayowoyanga na kusambizga, ŵakapembuzgikanga chomene. Ŵanandi ŵakizanga kwa Yesu chifukwa chakuti wakawovwiranga ŵakuphyoka mtima, kukhozga ŵakulopwa, na kupembuzga ŵakusuzgika maghanoghano. (Ŵerengani Mateyu 11:28-30.) Yesu wakaghanaghaniranga ŵanthu na kuŵawovwira mwauzimu, kweniso mwakuthupi. (Mrk. 6:30-32) Ivyo Yesu wakayowoya vichali vyakovwira m’paka sono. Nase vingatovwira nga umo vikawovwilira ŵapositole awo ŵakendanga nayo. Nangauli pasono Yesu wali kutali na ise, kweni wangatovwira. Pakuŵa Fumu yakuchanya, wachali kovwira na kulengera lusungu ŵanthu. Lekani para mukwenjerwa, wangamovwirani pa nyengo yakwenelera. Ntheura, wamovwiraninge kuti muleke kwenjerwa chomene na kumupani chikanga.—Heb. 2:17, 18; 4:16.

7. Kasi Chiuta wakuchita wuli para tapempha mzimu utuŵa?

⁷ Yesu wakalayizga kuti Adada ŵithu ŵakuchanya ŵazamupeleka mzimu utuŵa kwa awo ŵakumulomba. (Luka 11:10-13) Chinthu chachitatu icho chingatovwira kuti tileke kwenjerwa chomene ni chipambi cha mzimu. Mikhaliro yapachanya iyo mzimu utuŵa wa Chiuta ukupeleka, yikulongora umo Chiuta wankhongonozose waliri. (Ŵerengani Ŵagalatiya 5:22, 23; Kol. 3:10) Apo mukuyezgayezga kuŵa na vipambi vya mzimu, muŵenge paubwezi uwemi na ŵanyinu. Lekani awo ŵali na vipambi vya mzimu vinthu vikuŵayendera makora. Sono tiyeni tiwone umo vipambi vya mzimu vingatovwilira.

8-12. Kasi vipambi vya mzimu vingatovwira wuli kuti tileke kwenjerwa panji kugega vinthu ivyo vingambiska kwenjerwa?

⁸ ‘Chitemwa, chimwemwe, mtende.’ Para mukukhala makora na ŵanyinu, chizamuŵa chipusu kumazga masuzgo ghinu. Vingachitika wuli? Para mukutemwa ŵabali na mtima wose nga umo ŵanthu ŵakutemwerana paubali, na kuŵalongora ntchindi, vimovwiraninge kuleka kuŵakhuŵazga.—Rom. 12:10.

⁹ “Kuzikira, lusungu, uwemi.” Usange tikulondezga ulongozgi wakuti: “Muchitiranenge lusungu, ndipo muŵe na mtima wa chiwuravi, mugowokeranenge na mtima wose,” vikovwira kuti tiŵe pamtende na ŵanyithu. (Efe. 4:32) Para tili ŵalusungu tilekenge kuchita vinthu ivyo vingambiska kuti tenjerwenge. Kweniso chikuŵa chipusu kumazga masuzgo agho ghakwiza chifukwa cha kwananga.

¹⁰ “Chipulikano.” Kanandi mazuŵa ghano tikwenjerwa chomene pa nkhani ya ndalama na vinthu vinyake vyakuthupi. (Zinth. 18:11) Kweni para tili na chipulikano chakukhora kuti Yehova watipwelelerenge, chitovwirenge kuti tileke kwenjerwa chomene. Kasi tingachita wuli? Mungaleka kwenjerwa chomene para mukulondezga ulongozgi wa Paulosi wakuti ‘mukhorwenge na vinthu ivyo vilipo.’ Wakayowoyaso kuti: “Pakuti iyo [Chiuta] wati: ‘Nikulekenge yayi napachoko nesi kukutaya munthowa yiliyose.’ Mwakuti tiŵenge ŵakukhwima mtima na kuyowoya kuti: ‘Yehova ni movwiri wane, nopenge chara. Kasi munthu wangachitachi kwa ine?’”—Heb. 13:5, 6.

¹¹ “Kuzika, na kujikora.” Ghanaghanirani uwemi wa kuŵa na mikhaliro iyi. Para ndimwe ŵakuzikira na kujikora, mulekenge kuchita vinthu ivyo vingamupangiskani kuti mwenjerwenge. Pamanyuma muzamuleka “thinkho, ukali, kutukutwa, kukolomoka, na kayowoyero kaheni.”—Efe. 4:31.

¹² Kuti muŵe na mikhaliro iyi, mukwenera ‘kujiyuyura pasi pa woko lankhongono la Chiuta’ na ‘kumuthulira vyose ivyo mukwenjerwa navyo.’ (1 Pet. 5:6, 7) Apo mukuyezgayezga kujiyuyura, Chiuta wamutemwaninge na kumovwirani. (Mika 6:8) Para mwamanya makora umo mukuchitira vinthu vyakuthupi na umo mukughanaghanira, mulekenge kwenjerwa chomene chifukwa mugomezgenge chomene Chiuta.

13. Kasi Yesu wakang’anamurangachi apo wakati: “Kwenjerwa napachoko chara”?

¹³ Pa Mateyu 6:34 (ŵerengani) pali ulongozgi wa Yesu, wakuti: “Kwenjerwa napachoko chara.” Nyengo zinyake chingaŵa chakusuzga kulondezga ulongozgi uwu. Kasi Yesu wakang’anamurangachi apo wakati: “Kwenjerwa napachoko chara”? Kasi wakang’anamuranga kuti muteŵeti wa Chiuta wangenjerwapo yayi na pachoko? Yayi. Tawona kale kuti nyengo zinyake Davide na Paulosi nawo ŵakenjerwanga.  Kweni Yesu wakawovwiranga ŵasambiri ŵake kuti ŵaleke kwenjerwa mwakujumphizga, chifukwa kwenjerwa kukumazga suzgo yayi. Zuŵa lililose lili na masuzgo ghake. Ntheura Ŵakhristu ŵakwenera yayi kwenjerwa na vinthu vyakumanyuma, panji vyakunthazi. Kasi pangaŵa uwemi wuli usange mungalondezga ulongozgi uwu?

14. Kasi mungachita wuli para mukwenjerwa na ivyo mukachita kumanyuma?

¹⁴ Nyengo zinyake munthu wangenjerwa na vinthu ivyo wakachita kumanyuma. Wangamba kujipa mulandu na vinthu ivyo wakachita kale chomene. Nyengo yinyake Themba Davide likajiyimba mulandu, ndipo likawonanga kuti ‘mphuvya zake zikabizga mutu wake.’ Iyo wakati: “Nkhutampha chifukwa mtima wane ukukweŵeka.” (Sal. 38:3, 4, 8, 18) Kasi pa nyengo iyi, Davide wakeneranga kuchitachi? Ndipo wakachita wuli? Iyo wakagomezga chomene Yehova uyo ngwalusungu na wakugowokera. Na chigomezgo chose wakati: “Ngwakukondwa uyo maubudi ghake ghagowokereka.”—Ŵerengani Salimo 32:1-3, 5.

15. (a) Chifukwa wuli mukwenera kwenjerwa yayi na ivyo vyamuchitikirani? (b) Kasi mungachita wuli kuti muchepeskeko kwenjerwa? (Wonani bokosi lakuti “Ivyo Mungachita Kuti Muchepeskeko Kwenjerwa.”)

¹⁵ Nyengo zinyake mungenjerwa na ivyo vyamuchitikirani. Mwachiyelezgero, apo Davide wakalembanga Salimo 55, wakafipiranga mtima umoyo wake. (Sal. 55, 2-5) Kweni wakazomerezga yayi kuti kwenjerwa kumutondeske kugomezga Yehova. Apo Davide wakakumana na masuzgo, wakaghazunuranga mu lurombo. Kweniso wakasanganga nthowa yakumazgira kwenjerwa. (2 Sam. 15:30-34) Kasi tingasambirako vichi kwa Davide? M’malo mwa kukhalira waka kwenjerwa na masuzgo agho mukusangana nagho, chingaŵa chiwemi kusanga nthowa yakumazgira masuzgo, na kuleka nkhani yose mu mawoko gha Yehova.

16. Kasi ng’anamuro la zina la Chiuta lingakhozga wuli chipulikano chinu?

¹⁶ Nyengo zinyake Mkhristu wangenjerwa na vinthu ivyo vingazakachitika munthazi. Kweni mukwenera yayi kwenjerwa panji kufipa mtima na vinthu ivyo mukuvimanya makora yayi. Chifukwa wuli? Chifukwa kanandi vinthu vikuchitika kuyana na umo ise tikughanaghanira yayi. Kweniso manyani kuti palije suzgo ilo imwe mungenjerwa nalo ilo lingamutonda Chiuta. Zina lake likung’anamura kuti “Niŵenge Icho Nasankha Kuŵa.” (Eks. 3:14) Ng’anamuro la zina la Chiuta likutovwira kumanya kuti wangafiska khumbo lake kwizira mu ŵateŵeti ŵake. Ntheura mukwenera kugomezga kuti Chiuta wangatumbika ŵateŵeti ŵake ŵakugomezgeka, na kuŵawovwira para ŵakwenjerwa na vinthu vyakumanyuma, vyasono, kweniso vyamunthazi.

17, 18. Kasi kuphalirako munthu ivyo mukwenjerwa vingamovwirani wuli?

¹⁷ Nthowa yachinayi iyo yingatovwira kuti  tileke kwenjerwa nkhuyowoyeskana makora, kweniso kuphalirako munthu uyo tikumugomezga. Mfumu panji muwoli winu, mubwezi winu wapamtima, panji mulara mu mpingo wangamovwirani umo mungachitira para mukwenjerwa. “Mtima wa munthu ukulopwa chifukwa cha kwenjerwa, kweni mazgu ghawemi ghakuwukondweska.” (Zinth. 12:25) Para mukuyowoya unenesko vingamovwirani kumanya makora ilo ni suzgo kweniso umo mungamazgira. Baibolo likutiphalira kuti: “Vinthu vikulongosoka yayi para palije kudumbiskana, kweni vinthu vikwenda makora para pali ŵakupeleka fundo ŵanandi.”—Zinth. 15:22.

¹⁸ Pa maungano, Yehova wakovwira ŵateŵeti ŵake umo ŵangachitira para ŵakwenjerwa. Ku maungano, mukusangana na ŵabali na ŵadumbu awo ŵakumughanaghanirani ndipo ŵakukhumba kumukhwimiskani. (Heb. 10:24, 25) Para ‘mukukhwimiskana, vikovwira kuti mwambeso kuchita makora mwauzimu, ndiposo chikuŵa chipusu kusanga nthowa yakumazgira kwenjerwa.—Rom. 1:12.

19. Chifukwa wuli mukwenera kuŵa paubwezi wakukhora na Chiuta?

¹⁹ Mubali munyake mulara, ku Canada wakuwona kuti ntchakuzirwa chomene kumuthulira Yehova ivyo wakwenjerwa navyo. Iyo wakugwira ntchito ya usambizgi. Pakwamba wakasuzgikanga maghanoghano chifukwa cha ntchito iyi, kweniso wakenjerwanga chomene. Kasi mubali uyu wakuchita wuli? Iyo wakuti, “Nkhulimbikira chomene kuti niŵe paubwezi wakukhora na Yehova. Ndipo iyo wakunovwira chomene kuti nileke kusuzgika maghanoghano. Para ukusuzgika maghanoghano, ŵabwezi ŵapamtima na ŵabali ŵauzimu, ŵakukovwira chomene. Muwoli wane nkhumubisira kanthu yayi, ndipo nyengo zose nkhumuphalira umo nkhujipulikira. Ŵabali ŵalara kweniso mulaŵiliri wa dera ŵanovwira chomene kuti niwonenge vinthu mwakwenelera. Nkhaluta ku chipatala kuti ŵanovwire ndipo nkhasintha vinyake kuti niŵe na nyengo yakupumulira, na yakuchitira maseŵero. Pachoko na pachoko nkhamba kujipulika makora. Vinthu ivyo nkhuwona kuti palije icho ningachitapo, nkhuvileka waka mu mawoko gha Yehova.”

20. (a) Kasi tingamuthulira wuli Chiuta ivyo tikwenjerwa navyo? (b) Kasi mu nkhani yakulondezgapo tizamusambira vichi?

²⁰ Mu nkhani iyi, tawona kuti ntchakuzirwa chomene kumuthulira Chiuta ivyo tikwenjerwa navyo. Tingamuthulira para tikulomba kufumira pasi pa mtima na kuŵerenga Mazgu ghake na kughanaghanirapo. Tasambiraso uwemi wa kuyezgayezga kuŵa na vipambi vya mzimu, kuphalirako munthu uyo tikumugomezga ivyo tikwenjerwa navyo, kweniso kuwungana na ŵabali na ŵadumbu. Mu nkhani yakulondezgapo, tizamusambira umo Yehova wakupelekera njombe ku ŵateŵeti ŵake ŵakugomezgeka.—Heb. 11:6.