ŴALARA pa charu chose chapasi ŵakuzirwiska chomene mauteŵeti agho ŵakuchita pakati pa ŵanthu ŵa Chiuta. Iwo ni thumbiko kwa tose. Kweni sonosono apa vinthu vinyake vili kusintha mu gulu la Yehova. Ŵalara awo mbachekuru ŵakapempheka kuti ŵalekere ŵalara ŵachiwukirano maudindo ghanyake ghakuru agho ŵakaŵa nagho. Chifukwa wuli?

Ndondomeko yiphya njakuti ŵalaŵiliri ŵa dera na ŵasambizgi ŵa masukulu gha gulu ŵalekenge uteŵeti wawo para ŵakwaniska vyaka 70. Kweniso ŵalara awo ŵali na vyaka 80 ŵakwenera kulekera ŵalara ŵachiwukirano maudindo ghanyake, nga nkhuŵa mulaŵiliri wa milimo ya wupu wa ŵalara panji mulaŵiliri wa milimo ya Komiti ya Munthavi. Kasi ŵalara ŵachekuru ŵachita wuli na kusintha uku? Iwo ŵalongora kuti mbakugomezgeka kwa Yehova na ku gulu lake.

Ken, uyo wakaŵa mulaŵiliri wa milimo ya Komiti ya Munthavi kwa vyaka 49 wakati: “Nkhakolerana nayo chomene ndondomeko yiphya iyi. Nakuti mulenji uwo nkhapulikiranga za kusintha uku, nkhaŵa kuti nalomba kwa Yehova kuti mphanyi mulara muwukirano ndiyo waŵa mulaŵiliri wa milimo ya Komiti ya Munthavi.” Umu ndimo ŵakawonera ŵalara ŵanandi ŵakugomezgeka  pa charu chose. Kweni ŵalara ŵanyake ŵakakhuŵara na kusintha uku chifukwa ŵakatemwanga kuteŵetera ŵabali ŵawo.

Esperandio, uyo wakaŵa mulaŵiliri wa milimo ya wupu wa ŵalara mu mpingo wake, wakati: “Pachoko waka nkhakhuŵara.” Kweni wakatiso: “Nkhakhumbikwiranga nyengo yakukwana kuti nijipwelelere chifukwa nkhamba kulwaralwara.” Esperandio wakulutilira kuteŵetera Yehova mwakugomezgeka ndipo ni thumbiko ku mpingo wake. Ivi ndivyo tikakhazganga kuti ndimo ŵalara wose ŵachitirenge.

Wuli pakuyowoya za ŵalaŵiliri ŵakwendakwenda awo ŵateŵetera nyengo yitali ndipo sono ŵali kupika mauteŵeti ghanyake? Allan, uyo wakaŵa mulaŵiliri wakwendakwenda kwa vyaka 38 wakati: “Zuŵa ilo nkhamanyira za ndondomeko iyi, nkhakhuŵara.” Kweni wakamanya vyandulo vya kusambizga milimo ŵalara ŵachiwukirano, ndipo wakulutilira kuteŵetera mwakugomezgeka.

Russell, uyo wakateŵetera nga mulaŵiliri wakwendakwenda kweniso msambizgi wa masukulu gha gulu kwa vyaka 40, wakuti pakwamba, iyo na muwoli wake ŵakakhuŵara. Iyo wakuti: “Tikawutemwanga chomene uteŵeti withu ndipo tikawonanga kuti tichali na nkhongono zakuchitira uteŵeti uwu.” Russell na muwoli wake ŵakugwiliskira ntchito maluso ghawo mu mpingo wawo, ndipo ŵapharazgi mu mpingo wawo ŵakukondwa chomene kuteŵetera nawo.

Nanga ni para mundajipulikepo nga mbabali na ŵadumbu awo tayowoya apa, kweni nkhani iyo yili pa 2 Samuyeli yingamovwirani kuŵapulikiska ŵanthu aŵa.

Kumbukani za nyengo iyo Abisalomu mwana wa Themba Davide wakagaluka. Davide wakachimbira kufuma ku Yerusalemu kuluta ku Mahanayimu, kumafumiro gha dazi kwa Mlonga wa Yorodani. Ŵakati ŵafika ku malo agha, Davide na awo wakaŵa nawo ŵakasoŵa vyakukhumbikwa pa umoyo. Kasi mukukumbuka ivyo vikachitika?

Ŵanalume ŵatatu ŵalusungu ŵa ku malo agha ŵakiza na vyakugonapo, vyakurya vyakupambanapambana, na viteŵetero vya ku khichini. Barazilayi wakaŵa yumoza wa ŵanalume aŵa. (2 Sam. 17:27-29) Ivyo Abisalomu wakakhumbanga vikati vyatondeka, Davide wakamba kuwelera ku Yerusalemu ndipo Barazilayi wakamuperekezga m’paka ku Yorodani. Davide wakapempha Barazilayi kuti walute nayo ku Yerusalemu. Themba likati lamumupa chakurya, nangauli Barazilayi wakaŵa kale “munthu musambazi chomene” ndipo wakakhumbikwira kumupa chakurya yayi. (2 Sam. 19:31-33) Kweni Davide wakwenera kuti wakakondwanga chomene na nkharo ya Barazilayi ndipo wakamanyanga kuti wangakamupa masachizgo ghawemi. Ukatenge uŵenge mwaŵi ukuru kukhala na kugwira ntchito mu nyumba yachifumu.

Pakuti Barazilayi wakaŵa wakujiyuyura ndiposo wamahara, wakayowoya kuti wakaŵa na vyaka 80. Pamanyuma wakati: “Kasi ningaŵanika pakati pa chiwemi na chiheni?” Kasi  wakang’anamurangachi? Barazilayi wakwenera kuti wakaŵa na vinjeru chifukwa wakaŵa na vyaka vinandi. Kweniso wakate wapelekenge ulongozgi uwemi, nga umo kunthazi “ŵanalume ŵalara” ŵakachitira kwa Themba Rehobowamu. (1 Mathe. 12:6, 7; Sal. 92:12-14; Zinth. 16:31) Ntheura apo Barazilayi wakayowoyanga vya kuŵanika pakati pa chiwemi na chiheni, wakwenera kuti wakang’anamuranga kuti wangakwaniska yayi kuchita vinyake chifukwa cha uchekuru. Wakazomerezga kuti wakapulikanga yayi kunowa kwa chakurya kweniso wakaŵa na suzgo la makutu chifukwa cha uchekuru. (Muph. 12:4, 5) Ntheura Barazilayi wakachiska Davide kuti watore Kimuhamu uyo wakwenera kuti wakaŵa mwana wake kweniso wakaŵa wachiwukirano, na kuluta nayo ku Yerusalemu.—2 Sam. 19:35-40.

Ndondomeko yiphya iyo yazunulika kukwambilira kwa nkhani iyi yikukolerana na ivyo Barazilayi wakachita. Ntchakupulikikwa kuti mazuŵa ghano, gulu likaghanaghanira waka munthu yumoza pera yayi nga umo vikaŵira na Barazilayi. Likaghanaghanira mwakupwelelera ŵateŵeti ŵanandi ŵakugomezgeka awo mbachekuru, pa charu chose.

Ŵabali ŵakujiyuyura aŵa ŵakawona kuti gulu la Yehova likurenge chomene para mauteŵeti agho ŵachita nyengo yitali ghangachitika na ŵabali ŵachiwukirano. Kanandi ŵabali ŵachekuru aŵa ndiwo ŵakasambizga ŵabali ŵachiwukirano, nga umo Barazilayi wakasambizgira mwana wake kweniso umo mpositole Paulosi wakasambizgira Timote. (1 Kor. 4:17; Fil. 2:20-22) Ŵabali ŵachiwukirano aŵa ŵalongora kuti ni “vyawanangwa mu ŵanthu,” ndipo ŵawovwira ‘kuzenga thupi la Khristu.’—Efe. 4:8-12; yaniskani na Maŵazgo 11:16, 17, 29.

Ŵanthu ŵanandi mu mpingo wa ŵanthu ŵa Chiuta pa charu chose awo ŵalekera ŵanyawo mauteŵeti ghawo ŵali na mwaŵi wakuchita mauteŵeti ghanyake mu gulu la Yehova.

Marco, uyo wakaŵa mulaŵiliri wakwendakwenda kwa vyaka 19, wakuti: “Pakuti sono nilije maudindo ghanandi, nkhuŵa na nyengo yakukwana ya kupharazgira ŵafumu ŵa ŵadumbu ŵa mpingo wane awo Mbakaboni yayi.”

Geraldo uyo wakaŵa mulaŵiliri wakwendakwenda kwa vyaka 28 wakuti: “Vinyake mwa vilato vithu viphya nkhovwira ŵakulopwa kweniso kuchitiska masambiro ghanandi gha Baibolo.” Iyo wakuti pasono, iyo na muwoli wake ŵakuchitiska masambiro gha Baibolo 15 ndipo ŵanthu ŵanandi ŵakulopwa ŵali kwamba kuwungana.

Allan uyo wazunulika kukwambilira wakuti: “Sono tili na nyengo yinandi yakunjilira mu uteŵeti. Tikukondwa kupharazga ku malo uko kukusangika ŵanthu ŵanandi, ku malo gha malonda, ndiposo kupharazgira ŵazengezgani ŵithu. Ŵaŵiri mwa ŵanthu awo tikuŵapharazgira, ŵakwiza ku Nyumba ya Ufumu.”

Para ndimwe mubali wakugomezgeka wankhongono zake ndipo mwapokera uteŵeti uphya mu gulu la Chiuta, mungawovwirapo mu nthowa yapadera. Mungawovwirapo pa mulimo wa Yehova para mungasambizga ŵabali ŵachiwukirano maluso ghinu mu mpingo winu. Russell, uyo wazunulika kukwambilira wakuti: “Yehova wakusambizga na kugwiliskira ntchito ŵabali ŵachinyamata. Ŵabali pa charu chose ŵakusanga chandulo chifukwa chakuti mbankhongono ndipo ŵakuliska na kusambizga makora.”—Wonani bokosi lakuti “ Wovwirani Ŵalara Ŵachinyamata Kuchita Makora Milimo Yawo.”

Usange muli kwamba uteŵeti unyake, lutilirani kuŵa ŵakukondwa. Mwawovwira kale ŵanthu ŵanandi apo mwachitanga uteŵeti winu na mtima wose, ndipo mungalutilira kuchita nthena. Ŵabali na ŵadumbu ŵakumutemwani ndipo ŵalutilirenge kumutemwani.

Chakuzirwa chomene ntchakuti ivyo muli kuchita vili kumukondweska chomene Yehova. Iyo ‘waluwenge yayi mulimo winu na chitemwa icho mukalongora ku zina lake pakuteŵetera ŵatuŵa ndipo mukulutilira kuŵateŵetera.’ (Heb. 6:10)  Vesi ili likumusimikizgirani mose imwe mwateŵetera nyengo yitali kuti Yehova wazamumutumbikani chomene. Muli ŵakuzirwa chomene kwa Yehova ndipo waluwenge yayi ivyo muli kumuchitira kale na ivyo mukulutilira kumuchitira kuti mumukondweske.

Mwakupambana na ŵanthu awo taŵazunura pachanya apa, wuli usange imwe uteŵeti winu undasinthe? Namwe nkhani iyi yingamovwirani. Yingamovwirani wuli?

Usange muli na mubali muchekuru uyo uteŵeti wake uli kusintha, mungasanga chandulo chifukwa ngwakukhwima mwauzimu kweniso wakumanya tunandi pakuti wateŵetera nyengo yitali. Pemphani ulongozgi wake. Mufumbani masachizgo ghake. Ndipo wonani umo wakugwiliskira ntchito maluso ghake pakuchita uteŵeti wake wasono.

Kwali ndimwe muchekuru uyo wakuchita uteŵeti uphya panji ndimwe mubali panji mudumbu uyo wakusanga chandulo na kusintha uku, kumbukani kuti Yehova wakuzirwiska awo ŵamuteŵetera mwakugomezgeka kwa nyengo yitali na awo ŵakulutilira kumuteŵetera.