KASI PAKAŴA SUZGO WULI?: Ŵandyali na ŵaliska ŵanandi ŵakakhumbanga yayi kuti uthenga wa mu Baibolo umanyikwe. Chifukwa cha mazaza, kanandi ŵakakanizganga ŵanthu kuŵa na Baibolo, kupanga, panji kung’anamulira mu viyowoyero vinyake. Tiyeni tiwone viyelezgero viŵiri ivi:

• Cha mu 167 B.C.E.: Themba la Ŵasiriya zina lake Seleucid Antiochus Epiphanes, likakhumbanga kuti Ŵayuda ŵanjire mu chisopa cha Ŵagiriki. Ntheura likalangura nduna zake kuti zikelure panji kotcha mabuku ghose gha Baibolo gha mu Chihebere. Munthu munyake wakumanya mdauko zina lake Heinrich Graetz, wakalemba kuti nduna za Seleucid “zikakeluranga na kotcha mipukutu ya Dango para ŵayisanga waka. Wose awo ŵaŵasanga kuti ŵakuŵerenga mipukutu kuti ŵakhozgeke na kupembuzgika ŵakaŵakomanga.”

• Mu Vyaka Vyapakati pa 500 C.E. na 1500 C.E.: Ŵalongozgi ŵanyake ŵa tchalitchi la Katolika ŵakakwiyanga chomene para ŵasanga kuti ŵanthu ŵawo ŵakupharazga visambizgo vya mu Baibolo m’malo mwa visambizgo vya Chikatolika. Waliyose uyo wasangika na mabuku ghanyake gha mu Baibolo m’malo mwa Masalimo gha mu Chilatini, ŵakatenge ngwakugaluka. Pa nkhumano yinyake iyo tchalitchi ili yikaŵa nayo, ŵakakaka fundo yakuti ŵanalume ŵa mu tchalitchi lawo ‘ŵaŵikepo mtima kupenja ŵakugaluka aŵa mu nyumba zose, ndiposo kulikose uko ŵakaghanaghananga kuti ŵakusangika. Ŵawiske nyumba yiliyose iyo mwasangika wakugaluka.’

Ŵalwani ŵaŵenge kuti ŵakamara kotcha Mabaibolo ghose mphanyi pasono uthenga wake nawo kulije.

NTCHIVICHI CHIKAWOVWIRA KUTI BAIBOLO LISUNGIKE?: Themba Seleucid Antiochus likaŵikapo mtima kuti liwotche Mabaibolo ghose agho ghakaŵa mu Israyeli, kweni Ŵayuda ŵanyake ŵakakhalanga mu vyaru vinyake vinandi. Nkhwantha zinyake zikuti mu nyengo ya Ŵakhristu ŵakwambilira, pa Ŵayuda 100, Ŵayuda 60 ŵakakhalanga mu vyaru vinyake. Mu masunagoge ghawo, Ŵayuda ŵakaŵa na mabuku gha mu Baibolo. Mabuku agha ndigho miwiro yakunthazi yikagwiliskiranga ntchito kweniso Ŵakhristu.—Milimo 15:21.

Mu vyaka vyapakati pa 500 na 1500 C.E., ŵanthu awo ŵakatemwanga Baibolo ŵakachita chikanga ndipo ŵakalutilira kung’anamura na kukopera Malemba mu viyowoyero vinyake. Nanga ni apo mashini ghakupulintira ghakaŵa kuti ghandapangike mukatikati mwa vyaka vya m’ma 1400, vigaŵa vinyake vya Baibolo vikwenera kuti vikasangikanga mu viyowoyero pafupifupi 33. Kufuma apo, Baibolo likang’anamulika na kupangika mu viyowoyero vinandi chomene kuluska kumasinda.

NTCHIVICHI CHACHITIKA?: Nangauli mathemba na ŵaliska ŵakupuluka, ŵakayezgayezga kuti Baibolo lileke kuŵako, kweni ndilo ni buku ilo lathandazgika na kung’anamulika mu viyowoyero vinandi chomene pa charu chapasi. Nakuti lawovwira vyaru vinyake pakupanga malango, pa nkhani ya chiyowoyero, kweniso lawovwira ŵanthu ŵanandi chomene kusintha nkharo zawo ziheni.