Chifukwa Wuli Tikukhumbikwira Ufumu wa Chiuta?
Kufuma waka apo ŵanthu ŵakwamba ŵakalengekera, Chiuta uyo zina lake ni Yehova ndiyo yekha uyo wakalamuliranga. Iyo wakalamuliranga mwachitemwa. Wakapanga chikaya chakutowa, uwo ukaŵa munda wa Edeni kuti ŵanthu ŵakhalengemo, ndipo mukaŵa vyakurya vinandi. Kweniso ŵanthu wakaŵapa ntchito yiwemi. (Genizesi 1:28, 29; 2:8, 15) Ŵanthu ŵalutilirenge kupulikira Chiuta mphanyi wakukhala mwamtende m’paka sono.
Ŵanthu ŵakwamba ŵakakana kuti Chiuta ndiyo waŵalamulirenge
Baibolo likulongora kuti mungelo wakugaluka, uyo pamanyuma wakachemeka kuti Satana Dyabulosi, wakasuska muwuso wa Chiuta. Wakati ŵanthu ŵangaŵa ŵakukondwa kwambura kulongozgeka na Chiuta. Chachitima ntchakuti ŵapapi ŵithu ŵakwamba, Adamu na Eva, nawo ŵakagalukira Chiuta na muwuso wake.—Genizesi 3:1-6; Chivumbuzi 12:9.
Pakuti ŵakakana kuti Chiuta ndiyo waŵe Muwusi wawo, Adamu na Eva ŵakataya chikaya chawo cha Paradiso kweniso chigomezgo cha kukhala na umoyo wamuyirayira. (Genizesi 3:17-19) Ivyo ŵakasankha vikakhwaskaso ŵana awo ŵakababa. Baibolo likuti Adamu wakananga. Ntheura “kwananga kukanjira mu charu . . . ndipo nyifwa yikiza chifukwa cha kwananga.” (Ŵaroma 5:12) Paliso masuzgo ghanyake agho ghiza chifukwa cha kwananga. Baibolo likuti: “Munthu wakuwusa munyake na kumupweteka.” (Mupharazgi 8:9) Apa fundo njakuti, pakuŵa masuzgo ghanandi para munthu wakuwusa ŵanyake.
ŴANTHU ŴAKAMBA KUWUSA ŴANYAWO
Nimurodi wakagalukira Yehova
Baibolo likuti munthu wakwamba kulamulira ŵanthu wakaŵa Nimurodi. Iyo wakagalukira muwuso wa Yehova. Kufuma waka nyengo yira, ŵanthu ŵamazaza ŵakugwiliskira ntchito uheni mazaza ghawo. Vyaka 3,000 ivyo vyajumpha, Themba lavinjeru Solomoni likati: “Nkhawona masozi gha ŵakuyuzgika, ndipo ŵakaŵavya wakuŵasanguluska. Awo ŵakaŵayuzganga ŵakaŵa na nkhongono.”—Mupharazgi 4:1.
Nase mazuŵa ghano tili na suzgo lakuyana waka. Mu 2009 buku linyake la United Nations likati: “Masuzgo ghanandi agho ghakuchitika mu charu, ntchifukwa cha ŵanthu awo ŵakuwusa uheni.”
CHIUTA WACHITENGEPO KANTHU!
Ŵanthu pa charu chose ŵakukhumba boma liwemi ilo lingaŵawusa makora. Ivi ndivyo Mlengi withu walayizga kuti wachitenge.
Nanga ni maboma ghawemi gha ŵanthu ghatondeka kumazga masuzgo gha ŵanthu
Chiuta wali kukhazikiska boma panji kuti Ufumu wake uwo uzamuwuskapo maboma ghose gha ŵanthu, ndipo “iwo wekha ndiwo uzamuŵako kwamuyirayira.” (Daniyeli 2:44) Ufumu uwu ndiwo ŵanthu ŵanandi ŵakulomba. (Mateyu 6:9, 10) Kweni Chiuta iyomwene ndiyo wazamuwusa yayi mu Ufumu uwu. M’malo mwake iyo wali kusankha munyake kuti ndiyo wazakalamulire. Kasi wali kusankha njani?
Panji Mungatemwa Kuŵerengaso Nkhani Izi
MAFUMBO AGHO BAIBOLO LIKUZGORA
Kasi Ufumu wa Chiuta Uzamuchita Vichi Kuti pa Charu Chapasi Paŵe Mtende?
Manyani ivyo boma la Chiuta lizamuchita kuti pa charu chapasi paŵe mtende.
MAFUMBO AGHO BAIBOLO LIKUZGORA
Kasi Ufumu wa Chiuta Wuli mu Mtima Winu?
Kasi Baibolo likung’anamurachi para likuti “Ufumu wa Chiuta wuli mukati mwinu”?
