Rongorani Mtima Wakulindirira!
Rongorani Mtima Wakulindirira!
“Ndilindirirenge Ciuta wa ciponosko cane; Ciuta wane wandipulike.”—MIKA 7:7.
1, 2. (a) Kasi ndi mwauli umo kaghanaghaniro kaheni kakatimbanizgira Ŵaisrayeli mu mapopa? (b) Ncici ico cingacitika kwa Mkristu uyo wakutondeka kukuliska kaghanaghaniro kaweme?
VINTU vinandi mu umoyo vingawoneka kuŵa viweme panji viheni, kuthemba pa kaghanaghaniro kithu kurazga ku ivyo. Peneapo Ŵaisrayeli ŵakaŵa mu mapopa, iwo ŵakapikanga manna mwakuzizwiska. Iwo ntena ŵakaraŵiska malo gha ciparamba agho ŵakendangamo ndipo ici ntena cikaŵapangiska kuwongera comene kwa Yehova cifukwa ca kuŵapa iwo cakurya. Ici ntena cikalongora kaghanaghaniro kaweme. Mu malo mwake, iwo ŵakakumbukira vyakurya vyakupambana-pambana vya ku Egupto ndipo ŵakanyunyuta kuti manna ghakanowanga cara. Mwee, nako nkaghanaghaniro kaheni ka kunyunyuta!—Maŵazgo 11:4-6.
2 Kaghanaghaniro ka Mkristu mazuŵa ghano nakoso kangapangiska vintu kuti viwoneke makora panji uheni. Kwambura kaghanaghaniro kaweme, Mkristu wangataya cimwemwe cake, ndipo ici cingaŵa cakofya cifukwa Nehemiya wakayowoya kuti: “Cimwemwe ca Yehova ndico nkongono [zithu].” (Nehemiya 8:10) Kaghanaghaniro kaweme ndiposo ka cimwemwe kakutovwira kuti tiŵe ŵakukhora ndiposo kakukuliska mtende na umoza mu mpingo.—Ŵaroma 15:13; Ŵafilipi 1:25.
3. Kasi ndi mwauli umo kaghanaghaniro kaweme kakovwilira Yeremiya mu nyengo zakusuzga?
3 Mwambura kupwererako kantu kuti wakakhalanga mu nyengo zakusuzga, Yeremiya wakarongora kaghanaghaniro kaweme. Nanga kungaŵa panyengo iyo iye wakawona na maso ghake kubwangandurika kwa citima kwa Yerusalemu mu 607 B.C.E., iye wakaŵa na kawonero kaweme ka vintu. Yehova kuti wakeneranga kusurako mtundu wa Israyeli cara, mtundu uwo wukeneranga kukhalirira. Mu buku la Citengero, Yeremiya wakalemba kuti: “Kukhwima kwa lusungu lwa Yehova nta kukureka swi, cisungusungu cake kuti cikumara cara; cikuwoneka cipya namacerocero zuŵa na zuŵa; ugomezgeka winu ngukuru.” (3:22, 23) Mu mdauko wose, ŵateŵeti ŵa Ciuta ŵayezgayezga kuti ŵasungilire kaghanaghaniro kaweme mu nyengo zakusuzga comene, kusazgirapo kaghanaghaniro ka cimwemwe.—2 Ŵakorinte 7:4; 1 Ŵatesalonika 1:6; Yakobe 1:2.
4. Kasi nkaghanaghaniro wuli ako Yesu wakaŵa nako, ndipo ndi mwauli umo iko kakamovwilira?
4 Virimika mahandiredi ghankondi na cimoza panyuma pa Yeremiya, Yesu wakawovwirika kuzizipizga cifukwa ca kaghanaghaniro kake kaweme. Tikuŵazga kuti: ‘Cifukwa ca cimwemwe ico cikaŵikika pa ntazi [za Yesu], iye wakazizipizga [khuni lakusuzgikirapo, NW], wakerura soni, ndipo wali kukhala ku maryero gha cizumbe ca Ciuta.’ (Ŵahebere 12:2) Kwali ndi suskano wuli panji ntambuzgo iyo Yesu wakeneranga kukumana nayo—nanga ungaŵa ulwilwi wa pa khuni lakusuzgikirapo—iye wakaŵika mtima wake pa ‘cimwemwe ico cikaŵikika pa ntazi zake.’ Cimwemwe ico cikaŵa mwaŵi wa kuthuwuska muwuso wa Yehova, kutuŵiska zina lake ndiposo cilindizga ca kwiziska vitumbiko vikuru ku ŵantu ŵamagomezgeko mu nyengo yakuntazi.
Iŵani na Mtima Wakulindirira
5. Kasi ndi mu ukhaliro wuli comene-comene uwo mtima wakulindirira wungatovwira kuti tiŵe na kawonero kaweme ka vintu?
5 Usange tingakuliska mtima wakuyana na Yesu, tingataya cara cimwemwe mwa Yehova nanga kungaŵa kwakuti mwa nyengo zose vintu vikucitika umo ise tikukhumbira cara kuti vicitike. Ncimi Mika yikayowoya kuti: “Ine, ndilaŵiskenge kwa Yehova, ndilindirirenge Ciuta wa ciponosko cane.” (Mika 7:7; 3:21) Ise nase tingalongora mtima wakulindirira. Mwauli? Mu ntowa zinandi. Mwaciyerezgero, tingawona kuti mbali yunji uyo wali na udindo wabuda, ndipo nkhwakukhumbikwa kunozga nkani iyo mwaluŵiro. Mtima wakulindirira wutovwirenge kughanaghanira kuti, ‘Kasi iye wali kubuda nadi, panji ine ndine nabuda? Usange iye ndiye wabuda nadi, kasi kungaŵa kwakuti Yehova wakuzomerezga kuti ukhaliro wanteura uwo wucitike cifukwa cakuti Iye wakuwona kuti muntu uyo wapangenge masintiro, ndipo kumuyowoyera musinjiro muntu uyo kungaŵa kwa waka?’
6. Ndi mwauli umo mtima wakulindirira wungawovwilira yunji uyo wakulimbana na cakumara-mahara?
6 Mtima wakulindirira ungakhumbikwiraso usange tikusuzgika na cakumara-mahara cithu panji usange tikulimbana na suzgo linyake. Mutepanji tapempa covwiro kwa Yehova kweni suzgo ilo likurutilira ndipera. Kasi tingacita wuli? Tikwenera kuyezgayezga cilicose ico tingakwaniska kuti timazge suzgo ilo ndiposo tikwenera kuŵa na cipulikano mu mazgu gha Yesu agha: “Rombani, ndipo kuti kupikenge kwa imwe; penjani, ndipo muti musangenge; khung’uskani, ndipo kuti kujurikirenge imwe.” (Luka 11:9) Limbikirani kuromba, na kulindizga Yehova. Pa nyengo yakwenelera ndiposo mwa ntowa yake, Yehova wazamuzgora malurombo ghinu.—1 Ŵatesalonika 5:17.
7. Ndi mwa ntowa wuli iyo mtima wakulindirira wungawovwilira kawonero kithu pa kusinta kwa kapulikiskiro ka Baibolo?
7 Peneapo maucimi gha Baibolo ghakufiskika, kapulikiskiro kithu ka Malemba nakoso kakulongosoreka makora. Ndipouli, nyengo zinyake tingaghanaghana kuti kalongosolero kanyake kacedwa kulongosoreka. Usange kalongosolero ako kacitika panyengo iyo ise takhumbiranga cara, kasi tili ŵakukhumbisiska kulindizga? Kumbukirani kuti, Yehova wakawona kuŵa cakwenelera kuti wavumbure “camucindindi ca Kristu” mwapacokopacoko kwa utali wa virimika 4,000. (Ŵaefeso 3:3-6) Anteura, kasi tili na cifukwa cilicose cakuŵira ŵapyumpu? Kasi tikukayika kuti “muzga wa magomezgeko na wa vinjeru” wimikika kuti wapereke ku ŵantu ŵa Yehova “vyakurya mu nyengo yakwenerera”? (Mateyu 24:45) Tacitiraci kuti tijinole cimwemwe cakuperekeka na Ciuta cekha cifukwa cakuti vintu vinyake vindapulikikwe makora? Kumbukirani kuti, Yehova ndiye wakumanya nyengo ndiposo umo wangavumbulira ‘vyakuubende vyake.’—Amosi 3:7.
8. Kasi ndi mwauli umo kuzikira kwa Yehova kwaŵira kwacandulo ku ŵantu ŵanandi?
8 Ŵanji ŵangagongowa cifukwa cakuti ŵangawona kuti panyuma pakuteŵetera mwamagomezgeko kwa virimika vinandi, iwo ŵaŵenge ŵamoyo cara kuti ŵawone “zuŵa likuru na lakofya la Yehova.” (Joel 2:30, 31) Kweni ndipera, iwo ŵangakhuŵirizgika para ŵangawona vyakufumapo vyake viweme. Petros wakanjirikizga kuti: “Ucivindwe wa Fumu yitu mupimenge kuti nciponosko.” (2 Petros 3:15) Kuzika kwa Yehova kwapangiska kuti ŵantu ŵanenesko mtima mamiliyoni ghanandi ŵasambire unenesko. Kasi ici ncakukondweska yayi? Mwakusazgirapo, peneapo Yehova wakurutirizga kuzikira, nyengo nayoso yikutiŵira yinandi yakuti ‘tifiske ciponosko ca taŵene na wofi na citente.’—Ŵafilipi 2:12; 2 Petros 3:11, 12.
9. Usange tikupereŵera mu uteŵeti wa Yehova, kasi ndi mwauli umo mtima wakulindirira ungatovwilira kuti tizizipizge ukhaliro uwo?
9 Mtima wakulindirira wukutovwira kuti tileke kugongoweskeka para suskano, urwari, ucekuru, panji vyakumara-mahara vinyake ivyo vikutiwezgera nyuma mu uteŵeti wa Ufumu. Yehova wakukhumba kuti ise timuteŵetere iye na mtima wose. (Ŵaroma 12:1) Ndipouli, Mwana wa Ciuta, mweneuyo “wakufwira lusungu ŵakutempenta,” kuti wakukhumba vinandi kwa ise kuruska ivyo tingakwaniska cara; Yehova nayeso wakukhumba vinandi cara. (Salmo 72:13) Anteura, tikukhuŵirizgika kucita ivyo tingakwaniska, uku tikulindirira mwakuzikira mupaka mikhaliro yisinte—mutepanji mu mgonezi uwu panji uwo ukwiza. Kumbukirani kuti: “Ciuta kuti ngwambura urunji cara, kuti waruwe mulimo winu na kutemwa uko mukarongora ku zina lake, apo mukaŵateŵetera ŵatuŵa, ndipo mucali kuŵateŵetera.”—Ŵahebere 6:10.
10. Kasi ndi ukhaliro wuli wambura kukoleranako na Ciuta uwo wungatceŵeka na yunji uyo wali na mtima wakulindirira? Longosorani.
10 Mtima wakulindirira wukutovwiraso kuti titceŵe ukhaliro wakujikuzga. Ŵanji awo ŵazgoka ŵacigaruka ŵakakhumbisiskanga cara kuti ŵalindirire danka. Mutepanji iwo ŵakawona kukhumbikwa kwa kusinta vintu vinyake, kwali kakaŵa kapulikiskiro ka Baibolo panji nkani za kendeskero ka gulu. Kweni iwo ŵakatondeka kuzomerezga kuti mzimu wa Yehova ndiwo wukovwira muzga wa magomezgeko na wa vinjeru kuti wapange masintiro panyengo Yake, kuti panyengo iyo ise tikukhumbira cara. Ndiposo kusinta kulikose kukwenera kukoleranako na khumbo la Yehova, kuti maghanoghano ghithu cara. Ŵacigaruka ŵakuzomerezga mtima wakujikuzga kuti wutimbanizge kaghanaghaniro kawo ndipo panyuma pake ŵakubuda. Kweni usange iwo ŵaŵenge na mtima wakuyana na wa Kristu, iwo ntena ŵacali ŵakusangwa ndiposo ntena ŵali pakati pa ŵantu ŵa Yehova.—Ŵafilipi 2:5-8.
11. Ndi mwauli umo tingagwiriskira ncito makora nyengo iyo tikulindirira, mwakurondezga ciyerezgero ca njani?
11 Mwanadi, kurutirizga kulindirira kuti cikung’anamura kuŵa mukata cara nesi kuŵa wakugotomara. Tili na vintu vinyake vyakuti ticite. Mwaciyerezgero, tikwenera kucita sambiro la taŵene la Baibolo ndipo mwanteura tikulongora kukhumbisiska kukuru mu vintu vyakumzimu vyeneivyo ncimi zamagomezgeko ndiposo ŵangelo ŵakalongora. Pakuyowoya za kukondweskeka kwanteura uko, Petros wakuyowoya kuti: “Ciponosko ceneici ndico Ŵaprofeti ŵakakhumbiskanga na kupenjiska . . . Vyeneivi ŵangelo ŵakunweka kulingizgamo.” (1 Petros1:10-12) Kuti cintu cakuzirwa comene ndi sambiro la wamwene pera cara, kweniso kufika pa maungano mwacikhazi ndiposo na lurombo. (Yakobe 4:8) Awo ŵakumanya kukhumbikwa kwa vintu vyakumzimu mwa kurya nyengo zose cakurya cakumzimu ndiposo mwa kwendezgana na Ŵakristu ŵanyawo, ŵakurongora kuti iwo ŵali na mtima wa Kristu.—Mateyu 5:3.
Iŵani na Kawonero Kaweme
12. (a) Kasi nkujiyimira wuli paŵekha uko Adamu na Heva ŵakakhumbanga? (b) Ncici ico caŵa cakufumapo cifukwa cakuti ŵantu ŵarondezga ntowa ya Adamu na Heva?
12 Peneapo Ciuta wakati walenga ŵantu ŵaŵiri ŵakutorana ŵakudanga, wenelero wakuŵika vipimo vya ciweme na ciheni wukaŵa mu mawoko ghake. (Genesis 2:16, 17) Adamu na Heva ŵakakhumbanga kujiyimira paŵekha mwakuleka urongozgi wa Ciuta, ndipo ici capangiska kuti caru ciŵe umo ciliri sono. Mpostole Paulos wakayowoya kuti: “Kwananga kukanjirira mu caru na muntu yumoza, ndipo mu kwananga mukizira nyifwa; ndipo nteura nyifwa yikambukira ku ŵantu ŵose, cifukwa ŵose ŵakananga.” (Ŵaroma 5:12) Virimika vikwi vinkondi na cimoza vya mdauko wa ŵantu kufuma ku nyengo ya Adamu, vyarongora unenesko wa mazgu gha Yeremiya ghakuti: “A Yehova, nkumanya kuti ntowa ya muntu kuti yiri mwa iye yeka cara, kuti nkwa muntu uyo wakwenda cara kurunjika mendero ghake.” (Yeremiya 10:23) Kuzomerezga kuti mazgu gha Yeremiya ngaunenesko kuti nkwambura candulo cara. Nkwaunenesko. Mdauko uwu ukurongosora unandi wa virimika mahandiredi ivyo “muntu wapweteka munyake pa kumuwusa” cifukwa cakuti ŵantu ŵawusa mwakujipatura kwa Ciuta.—Mupharazgi 8:9, NW.
13. Kasi nkaghanaghaniro wuli kaweme ako Ŵakaboni ŵa Yehova ŵali nako kakukhwaskana na ivyo ŵantu ŵangacita?
13 Pakulaŵiska ukhaliro wa ŵantu, Ŵakaboni ŵa Yehova ŵakumanya kuti ndi vintu vyose cara ivyo vingamazgika mu mgonezi uwu. Kaghanaghaniro kaweme kangatovwira kuti tilutilire kuŵa na cimwemwe, kweni iko kuti kangaŵa kakumazgira masuzgo ghose cara. Ca ku uyambiro kwa m’ma 1950, mliska wa ku America wakalemba buku ilo likugulika comene la mutu wakuti The Power of Positive Thinking. Buku ilo likasacizga kuti masuzgo ghanandi ghangamazgika usange tili na kaghanaghaniro kaweme peneapo tikuyezgayezga kughamazga. Kaghanaghaniro kaweme nkakudokereka comene. Kweni ndipera, kuruta kwa nyengo kwarongora kuti cimanyisko, luso, na usambazi ndiposo na vintu vinandi vinyakeso vikukhwaska ivyo ise tingacita waliyose payekha. Ndipo pakuyowoya za caru cose capasi, vyakumara-mahara ndi vinandi comene nkanira vyakuti vingamazgika cara na ŵantu makoraghene—nanga ŵangaŵa na kaghanaghaniro kaweme!
14. Kasi Ŵakaboni ŵa Yehova ŵali na kaghanaghaniro kaheni? Longosorani.
14 Cifukwa ca kawonero kawo kaweme pa nkani zanteura izo, Ŵakaboni ŵa Yehova nyengo zinyake ŵakuneneka kuti ŵali na kaghanaghaniro kaheni. Kweni unenesko ngwakuti, iwo mbakukhumbisiska kuti ŵaphalire ŵantu za Uyo wangamazga masuzgo ghose gha ŵantu. Mwanteura pera, iwo ŵakurondezga mtima wa Kristu. (Ŵaroma 15:2) Iwo mbakutangwanika comene kuwovwira ŵantu kuti ŵasange ubwezi uweme na Ciuta. Iwo ŵakumanya kuti paumaliro pake, ici cizamwiziska vintu viweme comene.—Mateyu 28:19, 20; 1 Timote 4:16.
15. Ndi mwauli umo ncito ya Ŵakaboni ŵa Yehova yikovwilira ŵantu?
15 Ŵakaboni ŵa Yehova kuti ŵakusurako cara vyakumara-mahara ivyo ŵantu ŵakukumana navyo—comene-comene maluso ghakususkana na malemba agho ghaliko. Pambere muntu wakukondweskeka wandaŵe yumoza wa Ŵakaboni ŵa Yehova, iye wakupanga masintiro, mwa nyengo zinandi wakwenera kumazga mikhaliro yiheni iyo yikukwiyiska Ciuta. (1 Ŵakorinte 6:9-11) Mwanteura, Ŵakaboni ŵa Yehova ŵawovwira ŵantu awo ŵakukhumba kupulika kuti ŵamazge uloŵevu, kugwiriskira ncito uheni munkhwara, ukhaliro uheni, ndiposo kutcova njuga. Ŵantu awo ŵasinta ŵanteura awo ŵasambira kupwererera mbumba zawo mwakwenelera. (1 Timote 5:8) Para ŵantu na mbumba ŵawovwirika mwa ntowa iyi, vyakumara-mahara mu cikaya vikuŵa vicoko—pakuŵa ŵantu ŵakugwiriskira ncito uheni munkhwara ŵacoko waka, pakuŵa mirandu yicoko waka ya mbembe za mu mbumba, ndiposo na vinyakeso. Cifukwa cakuti ndi ŵantu ŵakupulikira marango ndiposo cifukwa cakuti ŵakovwira ŵanji kuti ŵasinte maumoyo ghawo kuti ghaŵe ghaweme, Ŵakaboni ŵa Yehova ŵapangiska kuti paŵe mawupu ghacoko waka gheneagho ncito yawo njakumazga masuzgo gha ŵantu.
16. Kasi ncifukwa wuli Ŵakaboni ŵa Yehova ŵakunjizgikamo cara mu mawupu agho ghakusinta vintu?
16 Kasi Ŵakaboni ŵa Yehova ŵasinta ukhaliro wa pacaru capasi? Eya, mu virimika khumi ivyo vyajumpa, ciŵerengero ca Ŵakaboni ŵa Yehova ŵamwampu casazgikira kufuma pa cicoko waka ca 3,800,000 kufika pafupifupi 6,000,000. Uko nkusazgikira kwa ŵantu 2,200,000, ndipo ŵanandi mwa iwo ŵali kusinta maluso ghaheni panyengo iyo ŵakazgokera kuŵa Ŵakristu. Ŵantu ŵanandi ŵali kusinta! Ndipouli, nambala iyi njicoko comene para yayerezgereka na ciŵerengero cakusazgikira ca unandi wa ŵantu pa caru cose mu nyengo yimoza yakuyana waka—875,000,000! Ŵakaboni ŵa Yehova ŵaŵa na cimwemwe kuti ŵawovwira ŵantu awo ŵakukhumba kutegherezga kwa iwo, nangauli kuli kwakuti mbantu ŵacoko waka kufuma pa mtundu wa ŵantu awo ŵendenge pa ntowa yakuruta ku umoyo. (Mateyu 7:13, 14) Peneapo Ŵakaboni ŵakulindizga kuti Ciuta wasinte vintu pacaru cose kuti viŵe makora, iwo ŵakunjizgikamo cara mu mawupu ghakusinta vintu, gheneagho pakwambilira ghakwamba na vilato viweme kweni paumaliro pake ghakuŵavya vyakufumapo viweme ndipo ghakuŵaso gha ciwawa.—2 Petros 3:13.
17. Ncici ico Yesu wakacita kuti wovwire ŵantu ŵa mu nyengo yake, kweni ncici ico iye wakaleka kucita?
17 Mwakurondezga ntowa iyi, Ŵakaboni ŵa Yehova ŵakurongora cigomezgo mwa Yehova mwakuyana na umo Yesu wakacitira peneapo wakaŵa pano pa caru capasi. Mu handiredi lakudanga, Yesu wakacizga matenda mwamuntondwe. (Luka 6:17-19) Iye wakawukiska nanga ŵangaŵa ŵakufwa. (Luka 7:11-15; 8:49-56) Kweni iye kuti wakafumiskapo cakumara-mahara ca matenda cara nesi kumazga nyifwa. Iye wakamanya kuti nyengo yakuti Ciuta wafumiskepo ivi yikaŵa yindakwane. Cifukwa ca kuŵa na mikhaliro yapacanya ya muntu mukongorekwa, Yesu ntena wakacita vinandi kuti wamazge vyakumara-mahara vya ndyali na vya umoyo wa ŵantu. Cikuwoneka kuti ŵantu ŵanji ŵa mu nyengo yake ŵakakhumbanga kuti iye waŵe muwusi, kweni Yesu wakakana. Tikuŵazga kuti: “Para ŵantu, ŵakawona cimanyikwiro ico wakacita, ŵakati, ‘uyu nadi ndi Mprofeti mweneuyo wakwiza mu caru.’ Nteura Yesu, para wakamanya kuti ŵakakhumbanga kwiza na kumukoserezga kuti ŵamukore ufumu, wakagweŵeraso ku lupiri pa yeka.”—Yohane 6:14, 15.
18. (a) Ndi mwauli umo Yesu nyengo zose walongolera mtima wakulindirira? (b) Ndi mwauli umo mulimo wa Yesu wuli kusintira kuyambira mu 1914?
18 Yesu wakakana kunjizgikamo mu ndyali panji mu vyakucitika vya caru cifukwa cakuti wakamanya kuti nyengo yikaŵa yindakwane yakuti iye wayambe kuwusa na kucizga muntu waliyose ku malo ghaliwose. Nanga kungaŵa apo wakati wakwera kucanya uko wali na thupi lakumzimu lambura kufwa, iye wakaŵa wakukhumbisiska comene kulindirira nyengo yakuŵikika ya Yehova pambere wakaŵa wandayambe kucita cilicose. (Salmo 110:1; Milimo 2:34, 35) Ndipouli, kuyambira apo wakaŵikika pa cizumbe nga ndi Fumu ya Ufumu wa Ciuta mu 1914, iye wakwenda “wakutonda, na kuti watondenge.” (Civumbuzi 6:2; 12:10) Mwee, nako nkuwongera uko tili nako kuti tijirambike ku ufumu wake, peneapo ŵanji awo ŵakujithya kuti Mbakristu ŵasanka kuŵa ŵajira ku visambizgo vya Baibolo vyakuyowoya za Ufumu!
Kulindirira—Citopoko ca Cikhuŵazgo Panji Cimwemwe?
19. Mpauli apo kulindirira ‘kukurwariska mtima,’ ndipo mpauli apo kukuŵa citopoko ca cimwemwe?
19 Solomon wakamanya kuti kulindirira kungapereka cikhuŵazgo. Iye wakalemba kuti “Ico cagomezgeka kweni cacedwa kwiza cikurwariska mtima.” (Zintharika 13:12) Mwanadi, usange yunji wakulindirira vintu vyambura lufura lweneco, mtima wake ungarwariskika nadi cifukwa ca cikhuŵazgo. Ndipouli, kulindirira vintu vyakukondweska—vya nga ndi ukwati, kubabika kwa mwana, panji kukumanaso na ŵantu awo tikuŵatemwa—kungatipangiska kuti tiŵe na cilindizga ca cimwemwe nanga kungaŵa kwakuti zuŵa lakuti vintu ivyo vicitike lindakwane. Cimwemwe ico cikukura usange tikugwiriskira ncito mwamahara nyengo yakulindirira, mwakunozgekera cintu ico cikwiza.
20. (a) Kasi ndi vintu wuli vyakukondweska ivyo mwakusimikizga tikulindirira kuzakaviwona? (b) Ndi mwauli umo tingasangira cimwemwe peneapo tikulindirira Yehova kuti wakwaniriske vilato vyake?
20 Usange tili na cigomezgo cose cakuti vilindizga vithu vizamufiskika—nanga kungaŵa kwakuti tikumanya cara nyengo iyo vizamukwaniriskikira—nyengo iyo tikulindirira ‘yingarwariskanga mtima’ cara. Ŵasopi ŵamagomezgeko ŵa Ciuta ŵakumanya kuti Muwuso wa Virimika Cikwi wa Kristu waneng’enera. Iwo ŵali na cigomezgo cose kuti ŵazamuwona umaliro wa nyifwa na matenda. Mwakunwekera, iwo mwacimwemwe ŵakulindizga nyengo iyo ŵazamupokelera mabiliyoni ghanandi kufuma ku mararo, kusazgapo ŵakutemweka ŵawo ŵakufwa. (Civumbuzi 20:1-3, 6; 21:3, 4) Mu nyengo zamasuzgo izi, iwo mwa cisimikizgo cose ŵakulindizga kuzakawona Paradiso uyo wazamuŵa pacaru capasi. (Yesaya 35:1, 2, 7) Mwee, nako nkukhumbikwa kwa vinjeru kuti tigwiriskire ncito mwamahara nyengo yakulindirira, “ŵakufurwira mazuŵa ghose mu mulimo wa Fumu”! (1 Ŵakorinte 15:58) Lutirizgani kurya cakurya cakumzimu. Kuliskani ubwezi wathithithi na Yehova. Yendani na ŵanji awo ŵakutemwa kuteŵetera Yehova. Khuŵirizgani ŵanyinu ŵa cipulikano cimoza na cinu. Gwiriskirani ncito makora nyengo iyo Yehova wazomerezga kuti yiŵepo. Anteura, kulindizga Yehova kuzam’mupangiskani ‘kurwara mtima’ cara. Mu malo mwake, kuzam’mupangiskani imwe kuŵa ŵacimwemwe!
Kasi Mungalongosora?
• Kasi ndi mwauli umo Yesu wakarongorera mtima wakulindirira?
• Ndi mu mikhaliro wuli iyo Ŵakristu ŵakwenera kurongora mtima wakulindirira?
• Ncifukwa wuli Ŵakaboni ŵa Yehova mbakukhorweskeka kulindizga Yehova?
• Ndi mwauli umo kulindizga Yehova kungaŵira citopoko ca cimwemwe?
[Mafumbo]
[Vithuzithuzi pa peji 23]
Yesu wakazizipizga cifukwa ca cimwemwe ico cikaŵikika pa ntazi zake
[Cithuzithuzi pa peji 24]
Nanga kungaŵa kwakuti tateŵetera kwa virimika vinandi, tingarutirizga kuŵa na cimwemwe
[Vithuzithuzi pa peji 26]
Ŵantu mamiliyoni ŵasinta maumoyo ghawo cifukwa ca kuŵa Ŵakaboni ŵa Yehova