Sembe za Marumbo Izo Zikukondweska Yehova
Sembe za Marumbo Izo Zikukondweska Yehova
“Mupereke matupi ghinu ghaŵe sembe yamoyo, yituŵa na yakukondweska Ciuta.”—ŴAROMA 12:1.
1. Kasi Baibolo likuphara vici pakuyowoya za kuzirwa kwa sembe za munyengo ya Dango la Moses?
“CIFUKWA Marango, pakuŵa mzgezge wa vintu vya mwenejuzi, cilinganizgo ceneco ca vintu cara, ghalive kumanya kuŵafiska na sembe za cirimika na cirimika aŵo ŵakuŵandika kwiza kapereka rutaruta.” (Ŵahebere 10:1) Apa fundo yikuru njakuti, mpostole Paulos wakuzomerezga kuti sembe zose izo zikaperekekanga mu nyengo ya Dango la Moses kuti zikaŵa na kuzirwa kwakukhalirira cara pakuyowoya za ciponosko ca ŵantu.—Ŵakolose 2:16, 17.
2. Cifukwa wuli ncakuzirwa kuti tiyezgeyezge kupulikiska cimanyisko ico calongosoreka mu Baibolo cakukhwaskana na vyakupereka na sembe za mu Dango?
2 Kasi ici cikung’anamura kuti cimanyisko ico cili mu Pentatuki cakukhwaskana na vyakupereka na sembe ciliso cakuzirwa cara ku Ŵakristu mazuŵa ghano? Mwaunenesko, kwa utali wakujumpa pa cirimika cimoza, ŵantu awo ŵalembeska mu Sukulu ya Uteŵeti wa Teokrase mu mipingo ya Ŵakaboni ŵa Yehova pacaru cose capasi, sono-sono apa ŵaŵazga mabuku ghankondi ghakwambilira gha mu Baibolo. Ŵanji ŵayezgayezga comene kuti ŵaŵazge na kupulikiska vyose vyakulembekamo. Kasi kuyezgayezga kwawo uku kwaŵa kwa waka? Mwaunenesko, umu ndimo vingaŵira cara, cifukwa “ivyo vyose vikalembeka kale, vikalembekera kusambizgika kwitu, mwakuti tiŵirenge na cigomezgo mu cizizipizgo na cisangulusko ivyo viri mu Malembo.” (Ŵaroma 15:4) Anteura, fumbo ndakuti, Kasi ndi ‘cisambizgo’ wuli na “cisangulusko” ivyo tingasanga kufuma mu cimanyisko ico cikusangika mu Dango, cakuyowoya za vyakupereka na sembe?
Cifukwa ca Cisambizgo Cithu na Cisangulusko
3. Ncintu wuli cakuzirwa ico tikukhumbikwira?
3 Nangauli tikukhumbikwira cara kupereka sembe zeneko mwakulingana na umo Dango likalongosolera, kweni ndipera, ise nase ticali mu ukhaliro wakukhumbikwira sembe, nga ndi umo Ŵaisrayeli ŵakaŵira, ise nase tikukhumbikwira kuti zakwananga zithu zigowokereke ndiposo kuti tisangwe na ucizi wa Ciuta. Pakuti sono tikuperekaso cara sembe, kasi ndi mwauli umo tingasangira vitumbiko ivyo? Panyuma pakuyowoya za kupereŵera kwa sembe za viŵeto, Paulos wakuyowoya kuti: “Para [Yesu] wakwiza mu caru, wakuti, ‘Sembe na zithiro kuti mukavikhumba cara, kweni mukandirongosorera thupi; Zithiro zamburuma zakoca na zisembe za zakwananga kuti mukaca navyo cara:’ penepapo nkanena, ‘Ehena, ndiza (Mu cizinga ca buku muli kulembeka na Ine) kucita khumbo linu, Ciuta ’mwe.’”—Ŵahebere 10:5-7.
4. Ndi mwauli umo Paulos wakugwiriskilira ncito Salmo 40:6-8 pakuyowoya za Yesu Kristu?
4 Mwakukora mazgu gha pa Salmo 40:6-8, Paulos wakuphara kuti Yesu kuti wakiza kuzakarutirizga ndondomeko ya “sembe na zithiro,” panji “zithiro zamburuma zakoca na zisembe” cara, panyengo iyo Paulos wakalemberanga mazgu agha, vyose ivi vikaŵa kuti vyaleka kale kuŵa vyamazomerezgeko kwa Ciuta. Mu malo mwake, Yesu wakiza na thupi ilo likanozgeka na Ŵawiske ŵakucanya, thupi ilo likaŵa lakuyana ndendende na ilo Ciuta wakapereka panyengo iyo Iye wakalengera Adamu. (Genesis 2:7; Luka 1:35; 1 Ŵakorinte 15:22, 45) Nga ndi Mwana mukongorekwa wa Ciuta, Yesu wakaŵa na ncito yakuti wayikwaniriske yakukhwaskana na “mpapu” ya mwanakazi, nga ndi umo kukaroskekera pa Genesis 3:15. Iye wakeneranga ‘kubwanya mutu wa Satana,’ nangauli Yesu iyemwene wakeneranga ‘kurumika ku citende cake.’ Kwizira mu ntowa iyi, Yesu wakaŵa ntowa yakuperekeka na Yehova yakuti ŵantu ŵasange ciponosko, ntowa yeneiyo ŵantu ŵa cipulikano ŵakalindizganga kuyambira mu nyengo ya Abelu.
5, 6. Kasi ndi lufura wuli lwa pacanya ulo Ŵakristu ŵali nalo lwakumufikira Ciuta?
5 Mwakuyowoyapo za ncito yapadera iyo Yesu wakagwira, Paulos wakuyowoya kuti: “Cifukwa ca ise [Ciuta] wakamuzgora uheni uyo wakawura kumanya uheni; mwakuti ise tizgoke urunji wa Ciuta mwa Iyo.” (2 Ŵakorinte 5:21) Mazgu ghakuti “wakamuzgora uheni” ghangang’anamurikaso ‘kuŵa nga ndi sembe ya kwananga.’ Mpostole Yohane wakuyowoya kuti: “Mweneuyo ndi mpepeska ya zakwananga zitu: ndipo ya zitu pera cara, kweniso ya za caru cose.” (1 Yohane 2:2) Anteura, peneapo Ŵaisrayeli ŵakaŵa na ntowa yambura cikhazi yakumufikira Ciuta kwizira mu sembe zawo, Ŵakristu ŵali na lufura lwapacanya comene lwakumufikira Ciuta—sembe ya Yesu Kristu. (Yohane 14:6; 1 Petros 3:18) Usange tili na cipulikano mu sembe ya ciwombolero iyo Ciuta wali kupereka ndiposo para tikumupulikira Iye, ise nase zakwananga zithu zingagowokereka ndipo tingasangwa na ucizi wa Ciuta na thumbiko lake. (Yohane 3:17, 18) Kasi ici ncisangulusko cara? Ndipouli, kasi ndi mwauli umo tingalongolera kuti tili na cipulikano mu sembe ya ciwombolero?
6 Panyuma pakulongosora kuti Ŵakristu ŵali na lufura lwa pacanya comene lwakumufikira Ciuta, mpostole Paulos wakulongosora ntowa zitatu za umo tingalongolera cipulikano na kuwongera kwithu pa cakugaŵira cacitemwa ici ca Ciuta, nga ndi umo tikuŵazgira pa Ŵahebere 10:22-25. Nangauli ncenjezgo ya Paulos yikaŵa ya awo ŵali na “cikanga kunjira mu malo ghatuŵa,”—ŵeneawo ndi Ŵakristu ŵakuphakazgika pera, awo ŵali na cilindizga ca kukhala kucanya,—ndipouli, ŵantu wose ŵakwenera kuŵikapo pwererero pa mazgu ghakufunyilirika gha Paulos usange ŵakukhumba kuti ŵasange candulo kufuma ku sembe ya mpepeska ya Yesu.—Ŵahebere 10:19.
Perekani Sembe Ziweme Ndiposo Zambura Cirema
7. (a) Ndi mwauli umo Ŵahebere 10:22 ŵakurongolera ico cikacitikanga panyengo yakupereka sembe? (b) Kasi ncici ico cikeneranga kucitika kuti sembe yizomerezgeke na Ciuta?
7 Cakudanga, Paulos wakuciska Ŵakristu kuti: “Tisenderere kufupi na mtima weneco na uzali wa cipulikano, tiŵenge na mitima yitu yakulapulika ku njuŵi ziheni, na thupi lakusingika na maji ghaweme.” (Ŵahebere 10:22) Mazgu agha ghayowoyeka apa mwapakweru ghakurongora ico cikacitikanga pakupereka sembe mu nyengo ya Dango. Ici ncakwenelera cifukwa cakuti sembe kuti yizomerezgeke, iyo yikeneranga kuperekeka na mtima uweme ndiposo yikeneranga kuŵa yiweme ndiposo yambura cirema. Ciŵeto ico cikaperekekanga sembe cikaŵanga ng’ombe panji mberere, panjiso mbuzi yiweme “yambura cirema.” Usange sembe yikaŵa ya viyuni, iyo yikeneranga kuŵa nkhunda panji viwunda. Usange vyakwenereska vyose ivi vikaŵapo, iyo ‘[yikeneranga] kupokerereka mu malo ghake, kuti ŵamupepeskere.’ (Leviticus 1:2-4, 10, 14; 22:19-25) Sembe ya vyamuminda yikaŵavyanga ntukumusi, iyo yikwimira uheni; yikenerangaso cara kuŵa na uci, comene-comene kung’anamura mafira gha cipambi, agho kanandi ghakupangiska vintu kusasa. Peneapo sembe izi—za viŵeto panji vyamuminda—zikaperekekanga pa jocero, ŵakathirangako mcere, uwo wuli na nkongono yakulekeska vintu kuvunda.—Leviticus 2:11-13.
8. (a) Kasi ncici ico cikaŵa cakukhumbikwira kwa muntu uyo wakaperekanga sembe? (b) Ndi mwauli umo tingacitira kuti kusopa kwithu kuŵe kwakuzomerezgeka kwa Yehova?
8 Wuli pakuyowoya za muntu uyo wakaperekanga sembe? Dango likaphara kuti waliyose uyo wakwiza pa maso pa Yehova wakeneranga kuŵa mutuŵa ndiposo wambura kufipirwa. Muntu waliyose uyo wakafipirwa na cintu cinyake cilicose, cakudanga wakeneranga kupereka sembe ya kwananga panji ya majuvyo kuti watozge ukhaliro wake pa maso pa Yehova mwakuti sembe yake yakoca panji ya cimango yizomerezgeke kwa Iye. (Leviticus 5:1-6, 15, 17) Anteura, kasi ise tikumanya kuzirwa kwa kusungilira ukhaliro uweme nyengo zose pa maso pa Yehova? Usange tikukhumba kuti kusopa kwithu kuzomerezgeke kwa Ciuta, tikwenera kunozga mwaluŵiro maubudi ghose agho tanangira marango gha Ciuta. Tikweneraso kufikira mwaluŵiro awo Ciuta wapereka kuti ŵatovwire—“ŵarara ŵa Ekleziya” na “mpepeska ya zakwananga zitu,” Yesu Kristu.—Yakobe 5:14; 1 Yohane 2:1, 2.
9. Kasi mpambano yikuru ndi njini pakati pa sembe zakuperekeka kwa Yehova na sembe zakuperekeka ku ŵaciuta ŵautesi?
9 Kupereka sembe zambura kufipirwa ndiyo yikaŵa mpambano yikuru pakati pa sembe zakuperekeka kwa Yehova na zakuperekeka ku ŵaciuta ŵautesi na ŵantu ŵamitundu awo ŵakazingirizga Ŵaisrayeli. Pakuyowoyapo za kupambana kwa sembe za mu Dango la Moses, buku linyake likuphara kuti: “Pakaŵavya kukoleranako kulikose na kulota vyamuntazi panji kuwukwa, pakaŵavya kutoreka maghanoghano mwakujumpizga pakusopa, kujidumura viŵaro, panji uhule, mitheto yakukhwaskana na kugonana yikakanizgika comene nkanira; pakaŵavya kupereka muntu kuti waŵe sembe; pakaŵavya kupereka sembe ku ŵantu ŵakufwa.” Ivi vyose vikutifiska pa fundo yimoza: Yehova ndi mutuŵa, ndipo iye wakuzomerezga cara kwananga panji uheni wuliwose. (Habakuk 1:13) Kusopa ndiposo sembe zakuperekeka kwa iye zikwenera kuŵa ziweme ndiposo zambura cirema—ku thupi, mwamakhaliro, ndiposo kumzimu.—Leviticus 19:2; 1 Petros 1:14-16.
10. Mwakukoleranako na mazgu ghakuciska gha Paulos ghakulembeka pa Ŵaroma 12:1, 2, kasi nkujisanda wuli uko tikwenera kupanga ise taŵene?
10 Anteura, tikwenera kujisanda ise taŵene mu vigaŵa vyose vya umoyo withu kuti tisimikizgire kuti uteŵeti withu kwa Yehova ngwakuzomerezgeka kwa iye. Tileke kughanaghana kuti mwakutoramo cigaŵa mu maungano gha Cikristu na mu uteŵeti kukupangiska kuti viheni ivyo tikucita ku udesi vilije ncito. Tikweneraso kuleka kughanaghana kuti kutoramo cigaŵa mu ncito za Cikristu kukutipangiska kuti tileke kurondezga marango gha Ciuta ghakukhwaska vigaŵa vinyake vya umoyo withu. (Ŵaroma 2:21, 22) Tileke kughanaghana kuti tingapokera thumbiko la Ciuta na ucizi wake usange tikuzomerezga cintu cilicose ciheni panji cakufipirwa mu maso ghake kuti citimbanizge kaghanaghaniro na vyakucita vithu. Kumbukirani mazgu gha Paulos agha: “Mwaŵabali, nkumuŵeyerani mu lusungu lwa Ciuta, kuti mupereke matupi ghinu ghaŵe sembe yamoyo, yituŵa na yakukondweska Ciuta, kwenekuko nkuteŵeta kwinu kwa vinjeru. Ndipo mungalinganizgikanga na caru cino, kweni musanduke mu kuwereramo kupya kwa mano ghinu, mwakuti mupimiske ico ndi khumbo la Ciuta, ciweme na cakukondweska, na cakufikapo.”—Ŵaroma 12:1, 2.
Perekani Sembe za Marumbo na Mtima Wose
11. Kasi ncici ico cikusazgikamo mu mazgu ghakuti “cipharazgo cithu ca pakweru,” agho ghayowoyeka pa Ŵahebere 10:23, NW ?
11 Pakulembera Ŵahebere, Paulos wakuzunura fundo yinyake yakuzirwa ya kusopa kwaunenesko: “Tikoreske [cipharazgo cithu ca pakweru, NW] kwambura kupungwa: pakuti ngwa magomezgeko uyo wakalayizgana nase.” (Ŵahebere 10:23) Mazgu ghakuti “cipharazgo cithu ca pakweru” ghakung’anamura “cizomerezgo,” mwakusazgirapo, Paulos wakuyowoyaso za “sembe ya marumbo.” (Ŵahebere 13:15) Ici cikutikumbuska mtundu wa sembe uwo ŵanarumi ŵa nga ndi Abelu, Nowa, na Abrahamu ŵakaperekanga.
12, 13. Kasi Muisrayeli wakazomerezganga vici peneapo wakaperekanga sembe yakoca, ndipo ncici ico ise tikwenera kucita kuti tilongore mtima wakuyana na uwu?
12 Peneapo Muisrayeli wakaperekanga sembe yakoca, iye “wakaperekanga kwa Yehova mwakukhumba iyemwene.” (Leviticus 1:3, NW) Mwakupereka sembe mwakujikhumbira iyemwene, iye wakapharazganga pakweru, panji kuzomerezga vitumbiko vinandi vyakufuma kwa Yehova pamoza na wezi wake kurazga ku ŵantu ŵake. Kumbukirani kuti, cintu capadera na sembe yakoca cikaŵa cakuti sembe yose yikawotcekanga pa jocero—cirongolero ceneko ca kujipereka na kujipatulira. Mwakuyana waka, tikulongora cipulikano cithu na kuwongera kwithu mu sembe ya ciwombolero para mwakunwekera ndiposo na mtima wose tikupereka kwa Yehova ‘sembe ya marumbo, uko ndiko kuti cipambi ca milomo.’
13 Pakuti Ŵakristu lero ŵakupereka sembe zeneko cara—za viŵeto panji vyamuminda—iwo ŵali na ncito yakucitira ukaboni makani ghaweme gha Ufumu na kupanga ŵasambiri ŵa Yesu Kristu. (Mateyu 24:14; 28:19, 20) Kasi imwe mukugwiriskira ncito mipata iyo muli nayo kuti mutoremo cigaŵa pakupharazga pakweru makani ghaweme gha Ufumu wa Ciuta, mwakuti ŵantu ŵanandi ŵamanye vintu viweme ivyo Ciuta wasungira ŵantu ŵamagomezgeko? Kasi mwakunwekera mukugwiriskira ncito nyengo na nkongono zinu mwakusambizga ŵakukondweskeka na kuŵawovwira kuti ŵaŵe ŵasambiri ŵa Yesu Kristu? Kutoramo kwithu cigaŵa mwa pampu mu uteŵeti, nga ndi umo kukaŵira na sungu liweme la sembe yakoca, nkwakukondweska kwa Ciuta.—1 Ŵakorinte 15:58.
Kondwerani Mwakwendezgana na Ciuta na Ŵantu
14. Ndi mwauli umo mazgu gha Paulos ghakulembeka pa Ŵahebere 10:24, 25 ghaliri ghakuyana na ng’anamuro la sembe ya cimango?
14 Paumaliro, Paulos wakutikumbuska za ubwezi withu na Ŵakristu ŵanyithu peneapo tikusopa Ciuta. “Tighanaghanirane na kukhuŵirizgirana ku kutemwa na ku milimo yiweme; Kureka kongana cara, nga ndi umo kariri kaluso ka ŵanji, kweni kuciskana; ndipo comene comene apo mukuwona zuŵa likuneng’enera.” (Ŵahebere 10:24, 25) Mazgu ghakuti “kukhuŵirizgirana ku kutemwa na ku milimo yiweme,” “kongana,” ndiposo “kuciskana,” ghose agha ghakutikumbuska ico sembe ya cimango yikacitiranga ŵantu ŵa Yehova mu Israyeli.
15. Kasi nkuyana wuli uko kulipo pakati pa sembe ya cimango na maungano gha Cikristu?
15 Lizgu lakuti “sembe za cimango” nyengo zinyake likung’anamurika “sembe za mtende.” Lizgu la Cihebere ilo lang’anamurika “mtende” pano liri mu puluro, mutepanji likurongora kuti kupereka sembe zanteura izo kukupangiska kuti yunji waŵe pa mtende na Ciuta ndiposo na ŵasopi ŵanyake. Pakuyowoya za sembe ya cimango, musambiri yunji wakuphara kuti: “Iyi nadi yikaŵa nyengo yakukondweska yakuwungana na Ciuta wa Pangano, nyengo iyo Iye wakajiyuyuranga comene na kuzgoka Mulendo wa Israyeli pa cakurya cakuperekeka sembe, nangauli kuli kwakuti iye nyengo zose ndiye wakaŵanga Mupokeleri wawo.” Ici cikutikumbuska layizgano la Yesu: “Apo pali ŵaŵiri panji ŵatatu ŵakuwungana mu zina lane, penepapo nane ndiri mukati mwa iŵo.” (Mateyu 18:20) Nyengo zose para tikuwungana pa ungano wa Cikristu, tikwandula mwakusanga cikhuŵirizgo cifukwa ca mendezgano agho ghakuŵapo, unjirikizgi wa cikhuŵirizgo, ndiposo kumanya kuti Fumu Yesu Kristu yili nase lumoza. Ici cikupangiska kuti ungano wa Cikristu uŵe wakukondweska nadi ndiposo yikuŵa nyengo yakukhozgera cipulikano.
16. Mwakuŵa na ghanoghano la sembe ya cimango mu mtima, kasi ncici ico cikupangiska maungano gha Cikristu kuŵa ghakukondweska mwapadera?
16 Mu sembe ya cimango, mafuta ghose—ghakubenekerera matumbo, ziso, mafuta ghakubenekerera ciŵindi, pamoza na ciwuno, ndiposo na mcira wa mafuta ghanandi wa mberere—vikaperekekanga kwa Yehova mwakuviwotca, ndipo ivyo vikafumiskanga josi pa jocero. (Leviticus 3:3-16) Mafuta ŵakaghawonanga kuŵa ghakuzirwa comene ndiposo ghakaŵa cigaŵa ciweme comene ca ciŵeto. Kughapereka igho pa jocero cikalongoranga kuti ukumupa Yehova cintu ciweme comene. Cintu capadera ico cikupangiska maungano gha Cikristu kuŵa ghakukondweska kuti ndi cifukwa cakuti tikupokera unjirikizgi pera cara, kweniso tikupereka marumbo kwa Yehova. Tikucita mwanteura mwakutoramo cigaŵa—mwakuyezgayezga kwithu mwakujicefya—mwakwimba kwakufumira pasi pa mtima, mwakutegherezga comene, ndiposo mwakuperekapo mazgoro para ncamacitiko. “Rumbani Yehova!” wakapharazga mwanteura wamasalmo. “Mwimbirani Yehova sumu yipya, kumurumba mu wungano wa ŵatuŵa!”—Salmo 149:1.
Vitumbiko Vinandi Vyakufuma kwa Yehova Vikutirindizga
17, 18. (a) Kasi mbunandi wuli wa sembe uwo Solomon wakapereka panyengo yakupatulira tempele mu Yerusalemu? (b) Kasi ndi vitumbiko wuli ivyo ŵantu ŵakapokera pa ciphikiro ca kupatulira tempele?
17 Panyengo yakupatulira tempele mu Yerusalemu, mu mwezi wa cinkondi na ciŵiri mu cirimika ca 1026 B.C.E., Themba Solomon likapereka “sembe [zinandi, NW] pa maso pa Yehova,” izo zikasazgapo “sembe zakoca na sembe za vyakurya na mafuta gha sembe za cimango.” Mwakusazgirapo pa ivyo vikaperekeka pa sembe za vyakurya, ng’ombe zakukwana 22,000 na mberere zakukwana 120,000 zikaperekeka sembe pa cakucitika ico.—1 Mathemba 8:62-65.
18 Kasi mungaghanaghanira za ukuru wa mtengo ndiposo unandi wa ncito izo zikanjizgikamo mu ciphikiro cikuru canteura ico? Ndipouli, vitumbiko ivyo Ŵaisrayeli ŵakapokera vikaruska comene nkanira ukuru wa mtengo wa ivyo ŵakagwiriskira ncito. Paumaliro wa ciphikiro ico, Solomon “wakaŵatuma ŵantu kuti ŵarutenge; ndipo ŵakatumbika themba, ŵakaruta ku kwaŵo ŵakukondwa na kusekerera ku mtima cifukwa ca uweme wose uwo Yehova wakacitira David muteŵeti wake na Ŵaisrael ŵantu ŵake.” (1 Mathemba 8:66) Mwanadi, nga ndi umo Solomon wakayowoyera, “Tumbiko la Yehova likusambazga, ndipo kuti wakusazgako citima cara.”—Zintharika 10:22.
19. Kasi ncici ico tikwenera kucita kuti tipokere vitumbiko vikuru kufuma kwa Yehova sono na muntazi mose?
19 Tikukhala mu nyengo peneapo “mzezge wa vintu vya mwenejuzi” vyaharirika na “cilinganizgo ceneco ca vintu.” (Ŵahebere 10:1) Yesu Kristu, mweneuyo ndi Msofi Mukuru wakuyerezgera, wali kunjira kale kucanya ndiposo wali kupereka kale mtengo wa ndopa zake kuti ziŵe mpepeska ya ŵantu wose awo ŵali na cipulikano mu sembe yake. (Ŵahebere 9:10, 11, 24-26) Kwizira mu lufura lwa sembe yikuru iyo, ndiposo mwakupereka na mtima wose kwa Ciuta sembe zithu za marumbo izo ndi ziweme ndiposo zambura cirema, naseso tingenda uku ‘tikukondwa na kusekerera mu mtima,’ uku tikulaŵiska kuntazi ku vitumbiko vinandi vyakufuma kwa Yehova.—Malaki 3:10.
Kasi Mungazgora Wuli?
• Kasi ncisambizgo wuli na cisangulusko ivyo tingavisanga kufuma mu cimanyisko ico cikusangika mu Dango cakuyowoya za sembe na vyakupereka?
• Kasi cakukhumbikwira cakudanga ncivici kuti sembe yizomerezgeke, ndipo ici cili na ng’anamuro wuli kwa ise?
• Ncici ico tingapereka cakuti cingayana na sembe yakoca yawanangwa?
• Ndi mwa ntowa wuli izo maungano gha Cikristu ghangayerezgereka na sembe ya cimango?
[Mafumbo]
[Cithuzithuzi pa peji 14]
Kuti uteŵeti withu uŵe wakuzomerezgeka kwa Yehova, tikwenera kutceŵa maukazuzi ghalighose
[Cithuzithuzi pa peji 15]
Tikuzomerezga uweme wa Yehova pakweru para tikutoramo cigaŵa mu uteŵeti
[Cithuzithuzi pa peji 16]
Sembe ya ciwombolero ya Yesu yikaperekeka na Yehova kuti ŵantu ŵasange ciponosko