Kasi Ndimwe Mkristu ‘Wakukhoma’?

“PARA nkaŵa mwanici, nkayowoya nga ndi mwanici, nkapulika nga ndi mwanici, nkaranguruka nga ndi mwanici.” Wakalemba nteura mpostole Paulos. Mbunenesko kuti ise tose nyengo yinyake tikaŵa ŵanici. Ndipouli, kuti tikakhalirira mwanteura kwamuyirayira cara. Wakakonkoska nteura Paulos: “Sono ndaŵa mrara ndapata vya mwanici.”—1 Ŵakorinte 13:11.

Mu ntowa yakuyana waka, Ŵakristu wose ŵakamba nga mbanici ŵakumzimu. Kweni mukuruta kwa nyengo, wose ‘ŵangafikira ku umoza wa cipulikano, na wa kamanyiro ka Mwana wa Ciuta, ku muntu wakukhoma, ku ciyezgero ca msinku wa uzali wa Kristu.’ (Ŵaefeso 4:13) Tikuciskika pa 1 Ŵakorinte 14:20 kuti: “Mwa ŵabali, mungaŵanga ŵanici mu mahara . . . Kweni mu mahara muŵenge ŵakukhoma.”

Kuŵapo kwa Ŵakristu ŵakukhoma ni thumbiko ku ŵantu ŵa Ciuta lero, comene-comene cifukwa pali ŵacasono ŵanandi. Ŵakristu ŵakukhoma ŵakukhozga mpingo. Iwo ŵakovwira mpingo wuliwose uwo ŵakuwunganamo kuti uŵe na mzimu uweme.

Peneapo kukura kwa kuthupi kukucitika kwekha, kukura kumzimu kukukhumbikwira nyengo na kuyezgayezga. Ncakuzizwiska cara kuti kale mu nyengo ya Paulos, Ŵakristu ŵanji ŵakatondeka kuti ‘ŵarutirire ku urara,’ nangauli ŵakateŵetera Ciuta kwa virimika vinandi. (Ŵahebere 5:12; 6:1) Wuli pakuyowoya za imwe? Nangauli mwateŵetera Ciuta kwa virimika vinandi panji kwa nyengo yicoko, cingaŵa cakwenelera kujisanda mwaŵene mwakupwererera. (2 Ŵakorinte 13:5) Kasi ndimwe yumoza wa awo ŵangacemeka nadi kuŵa Ŵakristu ŵakukhoma? Usange ni nteura cara, kasi ni mwauli umo mungaŵira ŵakukhoma?

“Mu Mahara Muŵenge Ŵakukhoma”

Ncipusu kwa mwanici wakumzimu ‘kuyungwa-yungwa, kupungwa-pungwa mu mpepo yose ya cisambizgo, na vibizi vya ŵantu, mu ucenjezi, kwakuyana na uryarya wa usovyi.’ Anteura Paulos wakuciska kuti: “Tikulire kosekose kwa iyo, mweneuyo ndi mutu, ndiyo Kristu.” (Ŵaefeso 4:14, 15) Kasi ni mwauli umo yunji wangacitira? Pa Ŵahebere 5:14 pakuyowoya kuti: “Cakurya cakukhoma nca aŵo ŵali kufikapo pa urara, aŵo ŵakumanya kupatula uweme na uheni, cifukwa mamanyiro ghaŵo ghali kuzgoŵerera.”

Manyani kuti ŵantu ŵakukhoma mamanyiro ghawo ghali kuzgoŵerera, panji ŵakumanya kugwiriskira ncito marango gha Baibolo. Ncakuwonekerathu kuti muntu wangaŵa ŵakukhoma kwa zuŵa limoza pera cara; kukura kumzimu kukutora nyengo. Nanga ni ntena, mungacita vinandi kuti mukuzge kuruta kwinu pantazi kumzimu mwakuŵa na sambiro la wamwene—comene-comene la vintu vya ndimba vya Mazgu gha Ciuta. Kunyuma uku Gongwe la Mulinda lakonkoskanga nkani zinandi za ndimba. Ŵantu ŵakukhoma ŵakutceŵa cara nkani za nga ndi izi cifukwa cakuti ‘vinyake nvinonono kuvipulikiska.’ (2 Petros 3:16) Mu malo mwake iwo ŵakurya cakurya cakukhoma ca nga ndi ici!

Ŵapharazgi na Ŵasambizgi Ŵamwampu

Yesu wakarangura ŵasambiri ŵake kuti: “Rutaninge mukasambizge mitundu yose, mukaŵabapatize mu zina la Ŵawiske na la Mwana na la mzimu mutuŵa: muŵasambizge kukoreska vyose ivyo ndamulangulirani.” (Mateyu 28:19, 20) Kutoramo cigaŵa mwamwampu mu ncito yakupharazga nakoso kungakhozga kukura kwinu kwa kumzimu. Kasi mwalekeraci kuyezgayezga kuti mutorengemo cigaŵa mwakukwanira mu uteŵeti usange mikhaliro yinu yikumuzomerezgani?—Mateyu 13:23.

Nyengo zinyake, masuzgo gha umoyo ghangapangiska kuti nyengo yakupharazga yiŵe yakusuzga. Kweni, ‘mwakulimbikira’ nga ndi mupharazgi, mukurongora kuti “ivangeli” ndakuzirwa comene kwa imwe. (Luka 13:24; Ŵaroma 1:16) Mwanteura mungaŵa “cirongorero kwa aŵo ŵakupulikana.”—1 Timote 4:12.

Ŵakusunga Ukongorekwa

Kuŵa murara kukusazgamoso kuyezgayezga kuti musunge ukongorekwa. Nga ndi umo pali kulembekera pa Salmo 26:1, Davide wakayowoya kuti:  “Muŵe nkoswe yane, A Yehova, cifukwa nkendanga mu ukongorekwa wane na kumugomezga Yehova kwambura kusunkunika.” Ukongorekwa ni ukhaliro uweme, wakufikapo. Ndipouli, uwo kuti ukung’anamura kuŵavya zakwananga cara. Davide iyemwene wakacita maubudi ghakuru ghakupambana-pambana. Kweni cifukwa cakuti wakazomerezga kucenyeka na kunyorolera kacitiro kake, iye wakarongora kuti mtima wake ukaŵa wucali na citemwa ceneco pa Yehova Ciuta. (Salmo 26:2, 3, 6, 8, 11) Ukongorekwa ukung’anamura umusuma panji kujipereka mwakufikapo, na mtima wose. Davide wakaphalira mwana wake Solomon kuti: “Mumanye Ciuta wa ŵauso, umuteŵetere na mtima wakufikapo.”—1 Midauko 28:9.

Kusunga ukongorekwa kukunjizgamo kuŵa “wa caru cara,” kuleka kutoramo cigaŵa mu ndyali za mitundu na zinkondo. (Yohane 17:16) Mukweneraso kutceŵa maluso ghaheni, gha nga ndi uzaghali, ureŵi, na kugwiriskira ncito munkwara wakutimbanizga wongo. (Ŵagalatiya 5:19-21) Kusunga ukongorekwa kukung’anamura vinandi, kuruska kutceŵa waka vintu ivyo vyayowoyeka. Solomon wakacenjezga kuti: “Membe zakufwa zikununkiska uheni mafuta gha ng’anga; nteura ndimo undere ucoko ukucitira vinjeru na ncindi.” (Mupharazgi 10:1) Inya, nanga uwe “undere ucoko,” wa nga ndi myati panji kucita maseŵero ghambura kwenelera na ŵakupambana nawo viŵaro, kungananga lumbiri lwa muntu lwa “vinjeru na ncindi.” (Job 31:1) Mwanteura longorani kukhoma kwinu mwakuŵa na ciyerezgero ciweme ca mikhaliro yinu, kutceŵa nanga ndi “kawonekero ka uheni.”—1 Ŵatesalonika 5:22, King James version.

Ŵakugomezgeka

Mkristu wakukhoma wakuŵaso wakugomezgeka. Nga ndi umo tikuŵazgira pa Ŵaefeso 4:24, mpostole Paulos wakuciska Ŵakristu kuti: ‘Ŵavware wuntu upya, weneuwo wuli kulengeka umo wariri Ciuta mu urunji na mu utuŵa wa unenesko.’ Mu Malemba gha Cigriki, lizgu lakuti “kugomezgeka” liri na ghanoghano la utuŵa, urunji, na ncindi. Muntu wakugomezgeka ngwakujipereka, ngwancindi, ndipo wakufiska milimo yake yose kwa Ciuta.

Kasi ndi ntowa wuli izo mungakuzgira kugomezgeka uku? Yakwamba yingaŵa ya kukolerana na ŵarara ŵa mpingo winu. (Ŵahebere 13:17) Kumanya kuti Kristu ni Mutu wakwimikika wa mpingo wa Cikristu, Ŵakristu ŵakukhoma mbakugomezgeka ku awo ŵali kwimikika kuti ‘ŵaliskenge Ekleziya la Ciuta.’ (Milimo 20:28) Mwee, naco ncambura kwenelera kulimbana na mazaza gha ŵarara ŵakwimikika! Mukweneraso kuŵa ŵakugomezgeka ku “muzga wa magomezgeko na wa vinjeru” na ku mawupu agho ghakugwiriskirika ncito pakupereka ‘vyakurya vyakumzimu mu nyengo yakwenerera.’ (Mateyu 24:45) Iŵani na mwampu pakuŵazga na kugwiriskira ncito cimanyisko ico cikusangika mu Gongwe la Mulinda na vyakupharazga vinyake.

Kurongora Citemwa Kwizira mu Milimo Yinu

Paulos wakaŵalembera Ŵakristu ŵa ku Tesalonika kuti: “Kutemwa kwinu uko mukutemwana mose uyu na uyu kukwandana.” (2 Ŵatesalonika 1:3) Kukura mu citemwa ncigaŵa cakuzirwa comene ca kukura kumzimu. Nga ndi umo pali kulembekera pa Yohane 13:35, Yesu wakayowoya kuti “Na ceneici ndico ŵantu ŵose ŵati ŵamanyirenge kuti muli ŵasambiri ŵane, para mukutemwana.” Kutemwa ŵabali kwa nteura uko kuti kukumanyikwa na kutoreka mtima pera cara. Vine’s Expository Dictionary of Old and New Testament Words likuyowoya kuti: “Citemwa cikumanyikwa kwekha kwizira mu milimo iyo cikuciska.” Inya, mukukhoma mu ntowa yeneiyiyi mwakurongora citemwa kwizira mu mlimo!

Mwaciyerezgero, pa Ŵaroma 15:7, tikuŵazga kuti: “Mupokereranenge.” Ntowa yimoza yakurongolera citemwa ndiyo kutauzga ŵasopi ŵanyithu na ŵacasono pa maungano gha mpingo—mwaubwezi ndiposo mwacimwemwe! Ŵamanyani iwo waliyose payekha. ‘Pwerererani’ za ŵanji. (Ŵafilipi 2:4) Mutepanji mungalongora kupokerera kwinu ŵalendo mwa kucemera ŵanji ku nyumba yinu. (Milimo 16:14, 15) Zakwananga za ŵanji nyengo zinyake zingayezga citemwa cinu, kweni para mwasambira ‘kuzizipizga mu kutemwa,’ mukurongora kuti mukuŵa ŵakukhoma.—Ŵaefeso 4:2.

Kugwiriskira Ncito Vyuma Vithu Kurutiska Pantazi Kusopa Kwaunenesko

Mu nyengo zakale, kuti ni ŵantu wose cara ŵa Ciuta ŵakafiskanga ncito yawo yakovwira tempele la Yehova. Mwanteura Ciuta wakatuma ncimi, za  nga ndi Hagai na Malaki, kuti ŵaciske ŵantu Ŵake pa nkani iyi. (Hagai 1:2-6; Malaki 3:10) Ŵakristu ŵakukhoma lero ŵakugwiriskira ncito vyuma vyawo mwacimwemwe mwakukhozgera kusopa Yehova. Rondezgani ŵantu ŵa nga ndi aŵa ndiposo kupulikira languro ilo likusangika pa 1 Ŵakorinte 16:1, 2, nyengo zose ‘jiŵikirani’ vyakupereka ku mpingo ndiposo ku ncito ya pacaru cose ya Ŵakaboni ŵa Yehova. Mazgu gha Ciuta ghakulayizga kuti: “Uyo wakumija vinandi, wati wavunengeso vinandi.”—2 Ŵakorinte 9:6.

Mukwenera kupwererera vyuma vinyake ivyo muli navyo, vya nga ndi nyengo na nkongono. Yezgayezgani ‘kuwombora nyengo’ ku vyakucitika vyambura kuzirwa. (Ŵaefeso 5:15, 16; Ŵafilipi 1:10) Sambirani kugwiriskira ncito nyengo yinu mwamahara. Kucita nteura kungacitiska kuti kuŵe kwamacitiko kwa imwe kutoramo cigaŵa mu ncito yakunozga Nyumba za Ufumu na milimo yinyake yeneiyo yikurutiska pantazi kusopa Yehova. Kugwiriskira ncito vyuma vinu mu ntowa iyi mbukaboni wakusazgikira wakuti mukuŵa Mkristu wakukhoma.

Tirutirire ku Urara!

Ŵanarumi na ŵanakazi awo ŵakutemwa kusambira ndiposo mbacimanyisko, ŵeneawo mbapharazgi ŵa mwampu, ŵeneawo mbakusunga ukongorekwa wawo, mbakugomezgeka kweniso mbacitemwa, ndipo ŵakukhumbisiska kuwovwira mwakugwira ncito na kupereka cuma kukhozgera ncito ya Ufumu, ni thumbiko likuru nadi. Mwanteura, ndico cifukwa cake mpostole Paulos wakaciska kuti: “Tireke kuyowoya na mitendeko ya Kristu, ndipo tirutirire ku urara”!—Ŵahebere 6:1.

Kasi ndimwe muntu wakufikapo, Mkristu wakukhoma? Panji mucali nga ndi mwanici muntowa zinyake? (Ŵahebere 5:13) Mulimose umo vingaŵira, jiperekani pakucita sambiro la mwaŵene, pakupharazga, ndiposo pakurongora citemwa ku ŵabali ŵinu. Gwiriskirani ncito urongozgi na visambizgo vilivyose ivyo vikupika kwa imwe na ŵantu ŵakukhoma. (Zintharika 8:33) Fiskani ncito yinu ya Cikristu. Mukuruta kwa nyengo na kuyezgayezga, imwe namwe ‘mungafika ku umoza wa cipulikano, na wa kamanyiro ka Mwana wa Ciuta, ku muntu wakufikapo, ku ciyezgero ca msinku wa uzali wa Kristu.’—Ŵaefeso 4:13.

[Vithuzithuzi pa peji 5]

Ŵakristu ŵakukhoma ŵakovwira mpingo kuŵa wapampu mwa kutemwa ŵanji