“Ora Lake Likaŵa Lindize”

“Pakaŵavye muntu wakaŵika woko lake pa iyo, cifukwa ora lake likaŵa lindize.”—YOHANE 7:30.

1. Kasi ni vintu viŵiri vini ivyo vikarongozga ncito ya Yesu?

 “MWANA wa muntu wakawura kwizira kuteŵetereka, kweni kuteŵetera, na kupereka umoyo wake thumba la kuwombola ŵanandi,” Yesu Kristu wakaŵaphalira nteura ŵapostole ŵake. (Mateyu 20:28) Kwa Kazembe wa Roma Pontiyo Pilato, iye wakati: “Ceneici ndico nkababikira, ndipo ndico nkizira mu caru, mwakuti ndipanikizge na unenesko.” (Yohane 18:37) Yesu wakamanya nkanira cifukwa ico wakenera kufwira ndiposo na ncito iyo wakenera kucita pambere wakaŵa wandafwe. Ndipo wakamanyaso utali wa nyengo iyo wakenera kukwaniriskira uteŵeti wake. Uteŵeti wake wa pa caru capasi nga ni Mesiya ukenera kuŵa wa virimika vitatu na nusu. Uwo ukayamba apo wakabapatizika mu maji mu Mronga wa Yordani (mu 29 C.E.) pakwambilira pa sabata yakuyerezgera ya 70 iyo yikayowoyekerathu, ndipo ukamara pa nyifwa yake ya pa khuni lakusuzgikirapo mukatikati mwa sabata iyo (mu 33 C.E.). (Daniel 9:24-27; Mateyu 3:16, 17; 20:17-19) Mwanteura ncito yose ya Yesu pa caru capasi yikarongozgeka na vintu viŵiri: cilato ca kwiza kwake ndiposo kurondezga nyengo mwakupwererera.

2. Ni mwauli umo Yesu Kristu wakulongosorekera mu Makani ghaweme, ndipo ni mwauli umo wakarongolera kuti wakumanya ncito yake?

² Makani ghaweme ghakumulongosora Yesu Kristu kuŵa muntu wa milimo uyo wakenda uku na uku mu caru ca Palestina, kupharazga makani ghaweme gha Ufumu wa Ciuta na kucita vyakuziziswa vinandi. Mukati mwa uteŵeti wamwampu wa Yesu mu nyengo yakwambilira, kukuyowoyeka kuti: “Ora lake likaŵa lindize.” Yesu iye yekha wakayowoya kuti: “Nyengo yane yindafiskike.” Kufupi na umaliro wa uteŵeti wake, iye wakagwiriskira ncito mazgu ghakuti “ora liza.” (Yohane 7:8, 30; 12:23) Kumanya kwa Yesu za ora, panji nyengo yakucitira ncito yake, kusazgapo nyifwa yake ya sembe, kukwenera kuti kukakhwaska ivyo wakayowoyanga na ivyo wakacitanga. Kumanya za ici kungatipa cimanyisko ca ukhaliro wake ndiposo na ciyerezgero ca kaghanaghaniro kake, na kutovwira kuti ‘tirondezge marwayo ghake’ ndendende.—1 Petros 2:21.

Wakasimikizga Kucita Khumbo la Ciuta

3, 4. (a) Kasi mpa cakucitika wuli ico Kristu wakurongolera kusimikizga mtima kuti wacite khumbo la Ŵadada ŵake? (b) Ncifukwa wuli Mwana wa Ciuta wakususka sacizgo la Mariya lakuti wacitepo kantu kanyake apo vinyo lati lamara, ndipo ise tingasambirapo vici pa ici?

³ Ncirimika ca 29 C.E. Pajumpa mazuŵa ghacoko waka kufumira apo Yesu wakajisankira yekha ŵasambiri ŵake. Wose ŵiza ku cikaya ca Kana mu cigaŵa ca Galileya kukaŵapo pa ciphikiro ca ukwati. Mariya, ŵamama ŵa Yesu nawo ŵalipo. Vinyo laŵamalira. Pakughanaghana kuti wacitengepo kantu kanyake, Mariya wakuphalira mwana wake kuti: “Ŵalive vinyo.” Kweni Yesu wakuzgora kuti: ‘Wa mwanakazi, kuli vici na ine na imwe? Nyengo yane yindize.’—Yohane 1:35-51; 2:1-4.

⁴ Zgoro la Yesu lakuti ‘Wa mwanakazi, kuli vici na ine na imwe?’ ni fumbo ilo ndakayowoyero kakale ako kakulongora kususka ico casacizgika panji kuyowoyeka. Ncifukwa wuli Yesu wakususka mazgu gha Mariya? Eya, panyengo iyi, iye sono wali na virimika 30. Masabata ghacoko waka ghajumpapo kufumira apo iye wakabapatizika, kuphakazgika na mzimu utuŵa, ndipo wakamanyikwiskika na Yohane Mbapatizi kuŵa “Mwana-mberere wa Ciuta, uyo wakuwuskako kwananga kwa caru!” (Yohane 1:29-34; Luka 3:21-23) Panyengo iyi sono wakwenera kupokera urongozgi kufuma kwa Wamazaza Ghose mweneuyo wakamutuma. (1 Ŵakorinte 11:3) Palije na yumoza, nanga nciŵaro ca pa mbumba yake, uyo wangajandizga ncito ya Yesu iyo wakizira pa caru capasi. Mwee, nako nkusimikizga mtima kucita khumbo la Ŵadada ŵake umo kwalongorekera mu zgoro la Yesu kwa Mariya! Mpanyi nase ndimo tasimikizgilira ntena kuti tikwaniriske “mlimo wose” wa Ciuta.—Mupharazgi 12:13.

5. Ncakuziziswa wuli ico Yesu Kristu wakucita mu Kana, ndipo cili na cakufumapo wuli pa ŵantu ŵanji?

 ⁵ Wati wamanya apo pali fundo ya mwana wake, Mariya mwaluŵiro wakusezgekapo ndipo wakuphalira ŵateŵeti kuti: “Ico wangamuphalirani, citani.” Penepapo Yesu wakumazga suzgo iyo. Iye wakuphalira ŵateŵeti kuti ŵazuzge viŵiya na maji, penepapo iye wakuzgora maji agho kuŵa vinyo liweme comene. Ici cikucitika nga nciyambi waka ca nkongono ya Yesu yakucitira vyakuziziswa, kupereka cimanyikwiro cakuti mzimu wa Ciuta wuli pa iye. Apo ŵasambiri ŵapya ŵa Yesu ŵakuwona cakuziziswa ici, cipulikano cawo cikukhozgeka.—Yohane 2:5-11.

Pampu pa Nyumba ya Yehova

6. Ncifukwa wuli Yesu wakukaripa pa ivyo wawona pa tempele mu Yerusalemu, ndipo kasi wakucitapoci?

⁶ Nyengo yacifuku ya 30 C.E. yafika, ndipo Yesu na mabwezi ghake ŵakuruta ku Yerusalemu kukacita Paska. Ŵacali kwenekura, ŵasambiri ŵake ŵakuwona Murongozgi wawo wakucita vintu muntowa yakuti panji ŵandamuwonepo na kale. Ŵamalonda ŵaryezi ŵa Ciyuda ŵakuguriska viŵeto na viyuni vyakuti viperekeke sembe mukati mweneco mwa tempele. Ndipo iwo ŵakupimira mtengo ukuru comene ŵasopi ŵakugomezgeka ŵa Ciyuda. Wati wazuzgika na ukari, Yesu wakucitapo kantu. Iye wakuposa kacingwe ndipo wakuŵacimbizgira kuwalo ŵamalonda awo. Wati wathira pasi ndrama za ŵara ŵasintanga, iye wakugadabura mathebulu ghawo. “Rutaninge navyo vintu ivi,” iye wakuŵalangulira awo ŵakuguriska nkhunda. Ŵasambiri ŵa Yesu ŵati ŵamuwona iye wakucita ntena mwakuthukutera, iwo ŵakukumbukira ucimi wakuyowoya za Mwana wa Ciuta wakuti: ‘Pampu la pa nyumba yinu landirya.’ (Yohane 2:13-17; Salmo 69:9) Ise nase mwapampu tikwenera kuvikilira kusopa kwithu kuti kuleke kufipiskika na mikhaliro yacaru.

7. (a) Ncivici cikucitiska Nikodemo kuti wacezgere Mesiya? (b) Kasi tikutorapo sambiro wuli pa ukaboni uwo Yesu wakupereka ku mwanakazi Musamariya?

⁷ Penepapo wali mu Yerusalemu, Yesu wakucita vimanyikwiro vyakuziziswa vinandi, ndipo ŵantu ŵanandi ŵakumugomezga. Nanga ni Nikodemo, ciŵaro ca Sanhedrin, panji khoti likuru la Ŵayuda, watoreka mtima na Yesu ndipo wakwiza kwa iye usiku kuti wasambire vinandi. Panyengo iyi, Yesu na ŵasambiri ŵake ŵali mu “caru ca Yudeya” pafupifupi myezi yinkondi na yitatu, kupharazga na kupanga ŵasambiri. Pamanyuma pakuti Yohane Mbapatizi waŵikika mu gadi, iwo ŵakufumako ku Yudeya na kuruta ku Galileya. Apo ŵakujumpa mu cigaŵa ca Samariya, Yesu wakusangirapo mwaŵi wakucitira ukaboni uwo ukaŵa na vyakufumapo viweme comene ku mwanakazi Musamariya. Kacitiro aka kakupereka mwaŵi wakuti Ŵasamariya ŵanandi ŵagomezge. Tiyeni nase tigwiriskire ncito mwaŵi wuliwose kuyowoya za Ufumu.—Yohane 2:23; 3:1-22; 4:1-42; Marko 1:14.

Ncito Yikuru Yakusambizga mu Galileya

8. Kasi ni uteŵeti wuli uwo Yesu wakuyambiska mu Galileya?

⁸ Pambere “ora” lindafike la nyifwa ya Yesu, iye wali na vinandi vyakucita mu mlimo wa Ŵadada ŵake ŵakucanya. Wali mu Galileya, Yesu wakuyambiska uteŵeti ukuru kuruska wura wa mu Yudeya na Yerusalemu. Iye wakwendendeka ‘mu Galileya mose, kusambizga mu masunagoge ghaŵo, na kupharazga makani ghaweme gha Ufumu, na kucizga mitundu yose ya ntenda, na mitundu yose ya urwali mu ŵantu.’ (Mateyu 4:23) Mazgu ghake ghakuwuska cimwemwe ghakuti: “Ng’anamukani mu mtima; cifukwa Ufumu wa kucanya waneng’enera,” ghakupulikikwa mu cigaŵa cose. (Mateyu 4:17) Pati pajumpa myezi yicoko waka, ŵasambiri ŵa Yohane Mbapatizi ŵakwiza kuzakajipulikira ŵekha ukaboni wakukhwaskana na Yesu, iye wakuŵaphalira kuti: “Rutaninge, mukamuphalire Yohane na ivyo mwaviwona na kuvipulika; ŵaciburumutira ŵakuwonaso, viti vikwenda, ŵavyoni ŵakutozgeka, ŵakumangwa-makutu ŵakupulika, ŵakufwa ŵakuwuskika, ndipo makani ghaweme ghakupharazgika ku ŵakavu. Ndipo ngwa mwaŵi mweneuyo wakuwura kusangamo kakumukhuŵazga mwa ine.”—Luka 7:22, 23.

9. Ncifukwa wuli mizinda yikuthirimukira kwa Yesu Kristu, ndipo ni sambiro wuli ilo tingatorapo?

⁹ ‘Lumbiri lwa Yesu lukuthuwuka mu caru cose zingirizge,’ ndipo mizinda yikuru yikuthirimukira kwa iye—kufuma ku Galileya, Dekapoli, Yerusalemu, Yudeya na sirya linyake la Mronga wa Yordani. (Luka 4:14, 15; Mateyu 4:24, 25) Iyo yikwiza kwa iye kuti ncifukwa ca kucizga kwake kwakuziziswa pera cara, kweniso na kasambizgiro kake kaweme. Uthenga wake ukunozga kuwupulika ndipo ngwakukhuŵirizga. (Mateyu 5:1–7:27) Mazgu gha Yesu ngaweme na ghakukondweska. (Luka 4:22) Mizinda ‘yikuzizwa na kusambizga kwake,’ cifukwa  wakuyowoya na mazaza kufumira mu Malemba. (Mateyu 7:28, 29; Luka 4:32) Ni njani uyo mpanyi wakaleka kwiza kwa muntu wa nga ni uyu? Mpanyi nase taŵa na luso lwa kasambizgiro mwakuti ŵantu ŵaweme mtima ŵize ku unenesko.

10. Ncifukwa wuli ŵantu ŵa mu cikaya ca Nazarete ŵakukhumba kukoma Yesu, ndipo ncifukwa wuli ŵakutondeka?

¹⁰ Ndipouli, mbategherezgi wose cara ŵa Yesu awo ŵali na mtima wakupulikizga. Nanga pangaŵa pakwambilira pa uteŵeti wake, apo wakasambizganga mu sunagoge la mu cikaya cake mu Nazarete, iwo ŵakakhumba kumukoma. Nangauli ŵantu mu cikaya ici ŵakuzizwa na ‘mazgu ghake gha ucizi,’ iwo ŵakukhumba waka kuwona vyakuziziswa. Mu malo mwa kucita milimo yakuziziswa yinandi kwenekura, Yesu wakuvumbula unonono mtima wawo na kuleka kuŵa na cipulikano. Ŵati ŵazuzgika na ukari, ŵara ŵa mu sunagoge ŵakuwuka, ŵakumukora Yesu, na kumufumiskira kuwalo na kuruta nayo pacanya pa lupiri mwakuti ŵamuponye kapingizgori mu cikhwawu. Kweni Yesu wakuphinginyuka mu mawoko ghawo na kufumapo kwambura kupwetekeka. “Ora” la nyifwa yake lindafike ndipera.—Luka 4:16-30.

11. (a) Ncifukwa wuli ŵarongozgi ŵanyake ŵa cisopo ŵakwiza kwa Yesu kuzakategherezga? (b) Ncifukwa wuli Yesu wakuneneka kuti wakuswa Sabata?

¹¹ Ŵarongozgi ŵa cisopo—ŵalembi, Ŵafarisi, Ŵasaduki na ŵanyake—nawoso nyengo zose ŵakusangikapo apo Yesu wakupharazga. Ŵanandi ŵa iwo ŵakusangikapo na cilato cakuti ŵategherezge na kusambira cara, kweni kuti ŵamusange kafukwa na kumukora. (Mateyu 12:38; 16:1; Luka 5:17; 6:1, 2) Mwaciyerezgero, apo wiza ku Yerusalemu cifukwa ca Paska wa 31 C.E., Yesu wakucizga mwanarumi uyo waŵa wakurwara kwa virimika 38. Ŵarongozgi ŵa cisopo ca Ciyuda ŵakumunena Yesu cifukwa ca kuswa Sabata. Iye wakuŵazgora wakuti: “Ŵadada ŵakucita kufika na ku lero, ndipo nane nkucita.” Penepapo Ŵayuda ŵakumunena kuti wakutuka cifukwa ca kujithya Mwana wa Ciuta pakumucema iye Ŵadada. Iwo ŵakupenjerezga ntowa zakumukomera Yesu, kweni iye na ŵasambiri ŵake wakufumako ku Yerusalemu na kuruta ku Galileya. Mwakuyana waka, nase tingacita makora kuleka kupindana na ŵakususka para tikugwiriskira ncito nkongono zithu kucitira ncito yakupharazga Ufumu na kupanga ŵasambiri.—Yohane 5:1-18; 6:1.

12. Ni mwauli umo Yesu wakukwaniskira cigaŵa cikuru ca Galileya?

¹² Apo kwakhala cirimika cimoza  na nusu panji kujumpirapo, Yesu comene-comene wakucita uteŵeti wake mu Galileya, wakuruta ku Yerusalemu kwekha kukaŵapo pa viphikiro vitatu vya pa cirimika vya Ŵayuda. Panyengo iyi nkhwakuti wapanga kale maulendo ghatatu ghakupharazga mu Galileya: wakwamba wakaŵa na ŵasambiri ŵapya ŵanayi, waciŵiri wakaŵa na ŵapostole 12, ndipo wacitatu ukuru comene, wakaŵa na ŵapostole ŵakusambizgika makora, ŵeneawo wakaŵatuma kukapharazga. Mwee, nawo mbukaboni ukuru wa unenesko uwo ukucitika mu Galileya!—Mateyu 4:18-25; Luka 8:1-3; 9:1-6.

Kucitira Ukaboni Mwacikanga mu Yudeya na Pereya

13, 14. (a) Kasi mpa cakucitika wuli ico Ŵayuda ŵakukhumba kumukora Yesu? (b) Ncifukwa wuli ŵasirikari ŵakutondeka kumukaka Yesu?

¹³ Nku uyambiro kwa nyengo ya cihanya ya 32 C.E., ndipo “ora” la Yesu licali kuntazi. Ciphikiro ca Misasa cili pafupi kucitika. Ŵanung’una ŵa Yesu ŵakumuciska kuti: “Wukapo pano, rutanga ku Yudeya.” Iwo ŵakukhumba kuti Yesu wakalongore vyakuziziswa kwa wose awo ŵawungana pa ciphikiro mu Yerusalemu. Yesu wamanya kale za urwani uwo wulipo. Mwanteura wakuŵaphalira ŵanung’una ŵake kuti: “Ine kuti nkukwererako sono ku ciphikiro ici cara; cifukwa nyengo yane yindafiskike.”—Yohane 7:1-8.

¹⁴ Wacali kukhala mu Galileya kwanyengo yitaliko, pamanyuma pake Yesu wakuruta ku Yerusalemu “pa kweru cara, kweni nga nku udesi.” Nadi Ŵayuda ŵakumupenja iye pa ciphikiro, ŵakuti: “Walinku yura?” Apo ciphikiro cili pafupi kumara, Yesu wakunjira mu tempele na kwamba kusambizga kwambura kopa waliyose. Iwo ŵakukhumba kumukora, mutepanji kumuŵika mu gadi panji kumukoma. Ndipouli, ŵakutondeka cifukwa ‘ora lake lindize.’ Ŵanandi sono ŵakumugomezga Yesu. Nanga mbasirikari ŵa Ŵafarisi awo ŵatumika kuzakamukora ŵakuwerako na mawoko ghawaka, ŵakuti: “Nanga ndi kale palive muntu wayowoya nga ndi muntu uyu.”—Yohane 7:9-14, 30-46.

15. Cifukwa ncici Ŵayuda ŵakutora malibwe kuti ŵamuswire nagho Yesu, ndipo pamanyuma pake iye wakuyambiska ncito wuli?

¹⁵ Mpindano pakati pa Yesu na Ŵayuda awo ŵakwimikana naye zikurutilira apo wakusambizga za Ŵadada ŵake mu tempele nyengo ya ciphikiro. Pa zuŵa laumaliro la ciphikiro, ŵati ŵakwiya na mazgu gha Yesu ghakuti wakaŵako kale pambere wandaŵe muntu, Ŵayuda ŵakutora malibwe kuti ŵamuswire nagho. Kweni iye wakubisama na kufumapo wambura kupwetekeka. (Yohane 8:12-59) Wati wafumamo mu Yerusalemu, Yesu wakuyambiska ncito yikuru yakucitira ukaboni mu Yudeya. Iye wakusanka ŵasambiri 70, ndipo wati waŵanjirikizga, wakuŵatuma ŵaŵiri-ŵaŵiri kuti ŵapharazge mu cigaŵa ici. Iwo ŵakudangira kuruta mu malo na mu cikaya ico Yesu pamoza na ŵapostole ŵake ŵakunozgekera kurutako.—Luka 10:1-24.

16. Kasi mburwani wuli uwo Yesu wakupona panyengo ya Ciphikiro ca Kupatuliska, ndipo ni ncito wuli iyo wakutangwanikaso nayo?

¹⁶ Ni nyengo yakuzizima ya 32 C.E., ndipo “ora” la Yesu likusendelera. Iye wakwiza ku Yerusalemu kuzakaŵapo pa Ciphikiro ca Kupatuliska. Ŵayuda ŵacali kumupenja kuti ŵamukome. Apo Yesu wakwenda mu khonde la tempele, iwo ŵakumuzingirizga. Ŵakumucombola na mrandu wa matusi, ndipo ŵakutora malibwe kuti ŵamukome. Kweni Yesu wakucimbira nga ni umo wakacitira pa vyakucitika vyakumanyuma. Mwaluŵiro waliso pa msewu wakupharazga, panyengo iyi wakupharazga ku muzi na muzi na ku cikaya na cikaya mu cigaŵa ca Pereya, sirya linyake la Yordani kuthyana na Yudeya. Ndipo ŵanandi ŵakupulikana nayo. Kweni muntu munyake uyo wayeya uthenga wakukhwaskana na bwezi lake la pamtima, Lazaro, wakumucema kuti wawelere ku Yudeya.—Luka 13:33; Yohane 10:20-42.

17. (a) Kasi ni uthenga wuli wamwaluŵiro uwo Yesu wakupokera apo wakupharazga mu Pereya? (b) Kasi ncivici ico cikulongora kuti Yesu wakumanya cilato ca mlimo uwo wakwenera kucita ndiposo kumanya za nyengo ya vyakucitika?

¹⁷ Uthenga wamwaluŵiro uwu wafumira kwa Marita na Mariya, ŵadumbu ŵa Lazaro awo ŵakukhala mu Betaniya ku Yudeya. “Fumu, wonani, uyo mukumutemwa wakurwara,” thenga ilo likumuphalira. “Urwari uwu kuti ngwa nyifwa cara,” Yesu wakumuzgora, “kweni ngwakurongora ucindami wa Ciuta, mwakuti Mwana wa Ciuta wacindikike nawo.” Kuti wakwaniriske cilato ici, Yesu mwadala wakukhala mazuŵa ghaŵiri kwenekura wali. Pamanyuma pake wakuphalira ŵasambiri ŵake kuti: ‘Tiyeni, tiwerere ku Yudeya.’ Iwo mwakugongowa ŵakuzgora kuti: “Rabi, Ŵayuda ŵakakhumbanga sono kumuponyani mawe, ndipo kasi mukuwererakoso?” Kweni Yesu wakumanya kuti ‘maora gha muhanya’ agho ghakhalako, panji nyengo iyo Ciuta wamugaŵira  kucitira uteŵeti wake pano pasi, njifupi. Iye wakumanya makora nkanira ico wakwenera kucita ndiposo na cifukwa cake.—Yohane 11:1-10.

Cakuziziswa Cambura Kususkika na Muntu Waliyose

18. Apo Yesu wakufika mu Betaniya, kasi ni ukhaliro wuli uwo wakuwusanga, ndipo ncici ico cikucitika pamanyuma pa kufika kwake?

¹⁸ Apo wakufika Mu Betaniya, Marita ndiye ngwakwamba kukumana na Yesu, wakuti: “Fumu, muŵenge pano, mudumbu wane nga walive kufwa.” Mariya pamoza na awo ŵakiza ku nyumba yawo ŵakumurondezga. Wose ŵakulira. “Mwamuŵikanku?” Yesu wakufumba. Iwo ŵakuzgora kuti: “Fumu zani muwone.” Ŵati ŵafika pa dindi—mpanji iyo pamuryango wake pajarika na libwe—Yesu wakuti: “Sezganipo libwe.” Kuleka kumanya ico Yesu wakukhumba kucita, Marita wakumukanizga: “Fumu, sono wakununka: cifukwa mumo wali kufwira ndi mazuŵa ghanayi.” Yesu wakumufumba: “Asi ndangukunenera, kuti usange ukupulikana uti uwonenge ucindami wa Ciuta?”—Yohane 11:17-40.

19. Ncifukwa wuli Yesu wakupempera pa mzinda wa ŵantu pambere wandamuwuske Lazaro?

¹⁹ Apo libwe lakujara pa muryango wa dindi la Lazaro likufumiskikapo, Yesu wakupempera mwakukwezga mazgu mwakuti ŵantu ŵamanye kuti ico wacitenge cicitikenge na nkongono ya Ciuta. Penepapo iye wakucemerezga na mazgu ghakuru: “Lazaro, fuma.”! Lazaro wakufumira kuwalo ndipo marundi na mawoko ghake ngakuvungika na sanda ndiposo cisko cake ncakukakika na salu. “Musutulani, mumureke warutenge,” Yesu wakuŵaphalira.—Yohane 11:41-44.

20. Kasi ni mwauli umo ŵakucitira awo ŵawona Yesu wakuwuska Lazaro?

²⁰ Pakuwona cakuziziswa ici, Ŵayuda ŵanandi awo ŵakiza kuzakapembuzga Marita na Mariya ŵakumugomezga Yesu. Ŵanyake ŵakuruta kukaphalira Ŵafarisi za ico cacitika. Kasi iwo ŵakucitapoci? Mwaluŵiro, Ŵafarisi na ŵasofi ŵarara ŵakunozga ungano wamabuci wa khoti la Sanhedrin. Ŵati ŵasoŵa cakucita, iwo ŵakudandaura kuti: ‘Kasi ticiteci? pakuti muntu uyu wakucita vimanyikwiro vinandi. Usange tikumureka waka nteura, ŵantu ŵose ŵati ŵapulikane nayo:  ndipo Ŵaroma ŵati ŵizenge na kupoka malo ghithu na mtundu witu wuwo.’ Kweni Msofi Mukuru Kayafa wakuŵaphalira kuti: “Imwe kuti mukumanya kantu cara, panji nesi kupima umo kukumwenererani kuti muntu yumoza waŵafwire ŵantu, na kuti mtundu wose ureke kumara.” Nteura kufuma pa zuŵa lira iwo ŵakapangana kuti ŵakome Yesu.—Yohane 11:45-53.

21. Kasi ciwuka cakuziziswa ca Lazaro nciyambi ca vici?

²¹ Ndico cifukwa cake iye wakacedwa kwiza ku Betaniya, Yesu wakucita cakuziziswa ico palije muntu wangacisuska. Wati wapika nkongono na Ciuta, Yesu wakuwuska muntu uyo wakaŵa wakufwa kwa mazuŵa ghanayi. Nanga ni khoti lakucindikika la Sanhedrin likucicizgika waka kuti licitepo kantu na kuti lipereke cirango ca nyifwa pa uyo Wakucita Vyakuziziswa! Mwanteura cakuziziswa ici cili nga nciyambi cakuzirwa ca pakusintira vintu mu uteŵeti wa Yesu—kusinta kufuma apo “ora lake likaŵa lindize” kufika pa nyengo apo “ora liza.”

Kasi Mungazgora Wuli?

• Kasi ni mwauli umo Yesu wakarongolera kuti wakumanya ncito yake yakupika na Ciuta?

• Cifukwa ncici Yesu wakususka sacizgo la ŵamama ŵake lakukhwaskana na vinyo?

• Kasi tingatorapo sambiro wuli umo Yesu kanandi wakacitiranga na ŵantu ŵakumususka?

• Cifukwa ncici Yesu wakucedwa kucitapo kantu pa urwali wa Lazaro?

[Mafumbo]

[Vithuzithuzi pa peji 10]

Yesu wakagwiriskira ncito nkongono zake kucitira mlimo uwo Ciuta wakamupa