Mikhaliro Yiweme Yikumara

“CINTU ca nga ni ici cikacitikanga cara,” wakayowoya nteura Helmut Schmidt, murongozgi wakale wa boma la Germany. Iye wakadandaulanga za ukhaliro wambura kugomezgeka wa ŵarara ŵa boma uwo waŵa mitu ya nkani sono-sono apa. Iye wakati: “Mikhaliro yiweme yamara cifukwa ca uzukusi.”

Ŵanandi ŵangazomerezgana naye. Mikhaliro yiweme iyo yikusangika mu Mazgu gha Ciuta, Baibolo, yeneiyo kunyuma kose uku ŵanandi ŵakayiwonanga nga mburongozgi wakumanyira ciweme na ciheni, yikuwoneka kuŵa yambura ncito. Ivi vili nteura nanga ni mu vyaru ivyo vikujithya kuŵa vya Cikristu.

Kasi Cisambizgo ca Baibolo ca Mikhaliro Yiweme Ncakukhumbikwa?

Cisambizgo ca Baibolo ca mikhaliro yiweme cikusazgapo kugomezgeka. Kweni ndipouli, utesi, vimbundi, na upusikizgi nvyakuzara. Nyuzipepala ya Times ya ku London yikayowoya kuti ŵapolisi ŵanji awo ŵakupanga kafukufuku wa ŵantu ŵakuswa marango “ŵakasanga ndrama zakukwana £100,000 cifukwa ca kuwezgeraso munkwara wakuzweteska wongo ku ŵantu ŵakuswa marango kuti ŵakaguliske kaciŵiri panji cifukwa ca kubisa ukaboni wa magulu ghakuswa marango.” Ku Austria, upusikizgi pa nkani za inshuwalansi ngwakuzara comene. Ku Germany nakoso ni nteura pera.

Ŵasayansi ŵakazizwa penepapo gulu la ŵakusandasanda likasanga “cimoza mwa vintu vyaupisikizgi mu sayansi ya ku Germany.” Pulofesa munyake mweneuyo njumoza wa “nkhwanta zakumanya za majini mu Germany,” wakacomboleka cifukwa ca kwandaniska cimanyisko cautesi ico wakasanga.

Mikhaliro yiweme yakuzikika pa Baibolo yikusazgaposo kugomezgeka mu ntengwa, iyo yikukhumbikwira kukhalirira kwambura kumara. Kweni ntengwa zinandi zikumalira mu khoti. Nyuzipepala ya Ŵakatolika ya Christ in der Gegenwart (Cikristu ca Mazuŵa Ghano) yikuyowoya kuti “nanga ni boma la Switzerland ilo ‘likusungilira mdauko wa  kakhaliro,’ kweni ntengwa zinandi zikumara nipera mu caru ico. Ku Netherlands, ntengwa 33 mwa ntengwa 100 zikumara mwa kupatana. Mwanakazi munyake uyo wakawona za kusinta kwa ukhaliro wa ŵantu mu Germany mu virimika vicoko ivyo vyajumpa wakalemba kuti: “Ntengwa mazuŵa ghano yikuwoneka nga cintu camwaka cambura ncito. Ŵantu ŵakutorana na cakulata cakuti ŵakhalire lumoza umoyo wawo wose cara.”

Ku cigaŵa cinyake, ŵantu ŵanandi ŵakuwona mikhaliro yiweme iyo yikusambizgika mu Baibolo kuŵa yamagomezgeko ndiposo yakukhumbikwa ku umoyo withu wa mazuŵa ghano. Mwanarumi na mwanakazi ŵakutorana awo ŵakukhala mu mphaka ya vyaru vya Switzerland na Germany ŵakasanga kuti kukhala mwakukolerana na mikhaliro yiweme iyo yili mu Baibolo kukaŵapangiska kuŵa ŵakukondwa comene. Iwo ŵakati, “pali urongozgi umoza pera uwo ukukhwaska cigaŵa cilicose ca umoyo. Urongozgi uwu ni Baibolo.”

Kasi imwe mukughanaghana wuli? Kasi Baibolo lingapereka urongozgi wakukhumbikwa? Kasi cisambizgo ico cili mu Baibolo ca mikhaliro yiweme ncakovwira mazuŵa ghano?