Ŵakristu Ŵakusanga Cimwemwe Pakuteŵetera

“Muli cimwemwe cikuru mukupereka kuruska kupokera.”—MILIMO 20:35, NW.

1. Kasi mbukhaliro wuli uheni uwo wazara mazuŵa ghano, ndipo cifukwa ncici wuli na vyakufumapo viheni?

 CA KUUMALIRO kwa virimika vya mu ma 1900, lizgu lakuti “Ine ndine” lapulikikwa mwakuwerezgawerezga. Lizgu lakuti “Ine ndine” likung’anamura kuti “Ine nambala wanu,” ndipo likurongora ukhaliro wa kujitemwa na cigolo mwakuleka kupwererako za ŵanji. Tingasimikizgira kuti ukhaliro uwu ucali waka mu cirimika cino ca 2000. Kasi nkwa nyengo zinandi wuli peneapo mukupulika mafumbo agha, “Pali vici ca ine?” panji, “Nisangengepo candulo wuli?” Ukhaliro wakujitemwa wanteura uwu ukwiziska cimwemwe cara. Uwo ukususkana na dango ilo Yesu wakayowoya: “Muli cimwemwe cikuru mukupereka kuruska kupokera.”—Milimo 20:35, NW.

2. Calongoreka wuli kuti kupereka kukwiziska cimwemwe?

² Kasi mbunenesko kuti kupereka kukwiziska cimwemwe cikuru kuruska kupokera? Inya. Aghanaghanirani za Yehova Ciuta. Iye ndi “cisimi ca umoyo.” (Salmo 36:9) Iye wakupereka cilicose ico tikukhumba kuti tiŵe ŵacimwemwe ndiposo kuti tisange candulo. Inya nadi, iye ndi Citopoko ca “vyawanangwa viweme vyose, na vyawanangwa vyakufiskika vyose.” (Yakobe 1:17) Yehova, “Ciuta wacimwemwe,” ndi mwanangwa nyengo zose. (1 Timote 1:11, NW) Iye wakutemwa ŵantu awo wali kuŵalenga, ndipo wakuŵapa vintu vinandi. (Yohane 3:16) Aghanaghaniraniso za mbumba ya ŵantu. Usange ndimwe mupapi, mukumanya kujipereka uko mukupanga ndiposo kupereka uko mukucita pakulera mwana. Kwa virimika vinandi, mwana uyo wakumanya cara kujipereka uko mukumucitira. Iye wakulindizga waka kuti imwe mumucitirenge vintu. Kweni ndipera, imwe mukuŵa ŵakukondwa kuwona mwana winu wakukura makora cifukwa ca vintu ivyo mukumupa. Cifukwa wuli? Cifukwa ncakuti mukumutemwa.

3. Ncifukwa wuli ncakukondweska kuteŵetera Yehova na ŵateŵeti ŵanyithu?

³ Mwakuyana waka, kusopa kwaunenesko kukumanyikwa na kupereka uko nkwakuzikika pa citemwa. Cifukwa cakuti tikutemwa Yehova na ŵasopi ŵanyithu, ncintu cakukondweska kuŵateŵetera na kujipereka cifukwa ca iwo. (Mateyu 22:37-39) Uyo wakusopa na mtima wakujitemwa wakuŵa na cimwemwe cicoko comene. Kweni awo ŵakuteŵetera mwambura kujitemwa, awo ŵakutemwa kupereka vintu ku ŵanji kuruska kupokera, mwanadi iwo ŵakusanga cimwemwe. Unenesko wa mazgu agha ukumanyikwa makora mwakusanda umo mazgu ghanji gha mu Baibolo ghakugwiriskikira ncito mu Malemba mwakukoleranako na kasopero kithu. Tidumbiskanenge ghatatu mwa mazgu agha mu nkani iyi ndiposo yakulondezgapo.

Kuteŵetera Ŵantu kwa Yesu

4. Kasi “kuteŵetera ŵantu” kukuŵa wuli mu Visopo vya Cikristu?

⁴ Mu Cigiriki cakwambilira, lizgu lakuzirwa limoza lakuyowoya za kusopa ndi lei·tour·giʹa, ilo lang’anamurika “kuteŵetera ŵantu” mu New World Translation. Mu Visopo vya Cikristu, lizgu lakuti lei·tour·giʹa ŵaligwiriskira ncito kuti ŵakhazikiske  “marango gha kasopero.” a Ndipouli, marango gha kasopero gha Visopo vya Cikristu agha nga covwiro nadi cara ku ŵantu.

5, 6. (a) Kasi ndi uteŵeti wuli uwo ukacitikanga mu Israyeli, ndipo ukaŵa na vyandulo wuli? (b) Kasi ndi uteŵeti wuli wapacanya uwo ukanjira mu malo gha uwo ukacitikanga mu Israyeli, ndipo ncifukwa wuli?

⁵ Mpostole Paulos wakagwiriskira ncito lizgu la Cigiriki lakuyana na lei·tour·giʹa apo wakayowoyanga za ŵasofi Ŵaisrayeli. Iye wakayowoya kuti: “Msofi yose wakwima zuŵa na zuŵa kuteŵetera ŵantu [mtundu wa lei·tour·giʹa] na kupereka kanandi zisembe za mtundu umoza.” (Ŵahebere 10:11, NW) Ŵasofi Ŵacilevi ŵakagwiranga ncito yakuzirwa comene mwakuteŵetera ŵantu mu Israyeli. Iwo ŵakasambizganga Dango la Ciuta na kupereka sembe kuti zakwananga za ŵantu zigowokereke. (2 Midauko 15:3; Malaki 2:7) Para ŵasofi na ŵantu wose ŵakalondezganga Dango la Yehova, mtundu uwo ukeneranga kukondwa.—Duteronome 16:15.

⁶ Kuteŵetera ŵantu panyengo ya Dango ukaŵa mwaŵi wapadera comene kwa msofi Waisrayeli, kweni uteŵeti wawo wukaleka kuzirwa panyengo iyo mtundu wa Israyeli wukakanika cifukwa ca kuwura kugomezgeka kwake. (Mateyu 21:43) Yehova wakalinganizga cintu cinyake capacanya comene—kuteŵetera ŵantu kwa Yesu, Msofi Mukuru. Pakuyowoya za iye, tikuŵazga kuti: “Cifukwa wakukhalirira swi, wali na usofi wake wambura kwambukira ku yunji. Nteuraso wali na nkongono kuŵaponoskera nkanira nkanira aŵo ŵakusenderera kwa Ciuta mwa iyo, pakuti wakukhalirira swi kuŵaŵeyerera.”—Ŵahebere 7:24, 25.

7. Ncifukwa wuli uteŵeti wa Yesu wa kuteŵetera ŵantu wuli na vyandulo vyambura mayerezgereko?

⁷ Yesu wakurutirizga kuŵa msofi kwamuyirayira mwambura kusintana na munyake. Anteura, iye ndiye yekha uyo wangateŵetera ŵantu mwakufikapo. Iye wakucita uteŵeti wambura mayerekezgereko, kuti mu tempele lakuzengeka na ŵantu cara, kweni mu tempele ilo likaloskereka, leneilo ndi manozgero ghapacanya gha Yehova gha kasopero agho ghakayamba kugwira ncito mu 29 C.E. Yesu sono wakuteŵetera mu tempele Lituŵa Comene kucanya. Iye ndi “muteŵeti [lei·tour·gosʹ] wa malo ghatuŵa, na wa cihema ceneko ico kuti ŵakajinta ŵantu cara, kweni Fumu.” (Ŵahebere 8:2; 9:11, 12) Nangauli Yesu wali na malo ghapacanya, kweni ndipera, iye ndi “muteŵeti.” Iye wakugwiriskira ncito malo ghake ghapacanya agho kupereka, kuti kutora cara. Ndipo kupereka uku kukumupangiska kuŵa wacimwemwe. Iko ncigaŵa ca ‘cimwemwe ico cikaŵikika pa ntazi zake.’—Ŵahebere 12:2.

8. Ndi mwauli umo Yesu wakateŵetera ŵantu kuti pangano la Dango lihalirike?

⁸ Paliso cigaŵa cinyake ca uteŵeti wa Yesu. Paulos wakalemba kuti: “[Yesu] wali kupokera uteŵeti uweme wakuruska, mumo wariri mphemaniski wa pangano liweme lakuruska, ilo liri kwimikika na malayizgano ghaweme ghakuruska.” (Ŵahebere 8:6) Moses wakaphemaniska pangano leneilo likaŵa lufura lwa ubwezi wapakati pa mtundu wa Israyeli na Yehova. (Exodus 19:4, 5) Yesu wakaphemaniska pangano lipya, leneilo likapangiska kuŵa camacitiko kuti mtundu wupya ubabike, “Ŵaisrayeli ŵa Ciuta” awo Mbakristu ŵakuphakazgika na mzimu ŵakufumira mu mitundu yakupambana-pambana. (Ŵagalatiya 6:16; Ŵahebere 8:8, 13; Civumbuzi 5:9, 10) Mwee, nawo mbuweme wa uteŵeti uwo! Mwee, nako nkukondwa uko tili nako cifukwa cakuti tamumanya Yesu, muteŵeti wa ŵantu, mweneuyo kwizira mwa iye tingapereka uteŵeti wakuzomerezgeka kwa Yehova!—Yohane 14:6.

Ŵakristu Nawoso Ŵakuteŵetera Ŵanji

9, 10. Kasi ndi mauteŵeti wuli ghacovwiro agho Ŵakristu ŵakucita?

⁹ Palije muntu uyo wakucita uteŵeti wapacanya wakuteŵetera ŵantu kuruska Yesu. Para Ŵakristu ŵakuphakazgika ŵapokera njombe yawo yakucanya, iwo pamoza na Yesu ŵakuteŵetera lumoza nga ndi mathemba ndiposo ŵasofi ŵakucanya. (Civumbuzi 20:6; 22:1-5) Ndipouli, Ŵakristu pa caru cino capasi nawoso ŵakucita uteŵeti wacovwiro ndiposo ŵakusanga cimwemwe mu uteŵeti uwu. Mwaciyerezgero, peneapo kukaŵa njala ku Palestina, mpostole Paulos wakayeya vyawanangwa kufuma ku ŵabali ŵa ku Europe kuti vizakawovwire pa suzgo la Ŵakristu Ŵaciyuda mu Yudeya. Uwo wukaŵa uteŵeti wacovwiro. (Ŵaroma 15:27; 2 Ŵakorinte 9:12) Mazuŵa ghano, Ŵakristu mbakukondwa kucita uteŵeti wakuyana na uwu, mwakupereka mwaluŵiro covwiro para ŵabali ŵawo ŵakusuzgika na masoka gha cilengiwa panji na masuzgo ghanyake.—Zintharika 14:21.

 ¹⁰ Paulos wakuyowoyaso za uteŵeti wacovwiro unyake peneapo wakalemba kuti: “Usange nkupungulikira pa sembe na uteŵeti wa cipulikano cinu, nkukondwa, ndipo nkusekerera pamoza na imwe mose.” (Ŵafilipi 2:17) Ncito yikuru iyo Paulos wakagwilira Ŵafilipi yikaŵa uteŵeti wacovwiro uwo wukacitika mwacitemwa ndiposo mwakulimbikira. Uteŵeti wacovwiro wakuyana na wanteura uwu ukucitikaso lero, comene-comene na Ŵakristu ŵakuphakazgika, ŵeneawo ŵakuteŵetera nga ndi “muzga wa magomezgeko na wa vinjeru,” uyo wakupereka cakurya ca kumzimu panyengo yakwenerera. (Mateyu 24:45-47) Mwakusazgirapo, iwo nga gulu, ‘mbasofi ŵatuŵa,’ awo ŵapika ncito ‘yakupereka [sembe zakumzimu, NW], za mapokerereko kwa Ciuta mwa Yesu Kristu’ ndiposo ‘ŵakuthuwuska mazirwiro gha mweneuyo wakaŵacema mu cisi kwiza mu kungweruka kwake kwakuzukumiska.’ (1 Petros 2:5, 9) Nga umo wakacitira Paulos, iwo nawo ŵakukondwa mu mauteŵeti ghanteura agho ndipo nanga kungaŵa ‘kujipungura iwoŵene’ kuti ŵakwaniriske ncito zawo. Ndipo ŵanyawo ŵakucemeka “mberere zinyake” ŵakuteŵetera nawo lumoza ndiposo ŵakuŵakhozgera mu ncito yakuphalira ŵantu za Yehova na vilato vyake. b (Yohane 10:16; Mateyu 24:14) Mwee, nawo mbukuru wa uteŵeti wacovwiro uwo ukupereka cimwemwe!—Salmo 107:21, 22.

Perekani Uteŵeti Wakupatulika

11. Ndi mwauli umo ncimikazi Hana yikuperekera ciyerezgero ciweme ku Ŵakristu wose?

¹¹ Lizgu linyake la Cigiriki ilo likuyowoya za kusopa ndi la·treiʹa, ilo lang’anamurika “uteŵeti wakupatulika” mu New World Translation. Uteŵeti wakupatulika ukukhwaskana na ntowa zakasopero. Mwaciyerezgero, ncimikazi ndiposo cokoro Hana, uyo wakaŵa na virimika 84, wakuyowoyeka kuti “wakafumangamo mu tempele cara, ‘kupereka uteŵeti wakupatulika’ (NW) [lizgu la Cigiriki ilo likuyana na la·treiʹa] na kuziŵizga kurya ndipo na maŵeyerero usiku na muhanya.” (Luka 2:36, 37) Hana wakasopanga Yehova mwambura kulekezga. Iye nciyerezgero ciweme ca ise tose—ŵawukirano na ŵarara wuwo, ŵanarumi na ŵanakazi. Nga ndi umo wakacitira Hana mwa kuromba kwa Yehova ndiposo kumusopa iye nyengo zose pa tempele, uteŵeti withu wakupatulika ukusazgaposo lurombo na kufika pa maungano.—Ŵaroma 12:12; Ŵahebere 10:24, 25.

12. Ncici ico cili cigaŵa cikuru ca uteŵeti withu wakupatulika, ndipo ndi mwauli umo ico cililiso uteŵeti wacovwiro?

¹² Mpostole Paulos wakazunura za cigaŵa cikuru ca uteŵeti withu wakupatulika peneapo wakalemba kuti: “Ciuta, mweneuyo [nkuperekako uteŵeti wakupatulika, NW] mu mzimu wane mu ivangeli la Mwana wake, ndiyo kaboni wane umo kwambura kurekerezga nkumuzunulirani mu malurombo ghane.” (Ŵaroma 1:9) Inya, kupharazga makani ghaweme kuti ndi uteŵeti wacovwiro pera kwa awo ŵakuwupulika cara, kweniso nkusopa Yehova Ciuta. Kwali tasanga muntu wakutegherezga makora panji cara, ncito yakupharazga ndi uteŵeti wakupatulika uwo ukuperekeka kwa Yehova. Kuyezgayezga kwithu kwakuti tiphalire ŵanji za mikhaliro yiweme ndiposo vilato vyacandulo vya Ŵadada ŵithu ŵakutemweka ŵakucanya kukutipa cimwemwe cikuru.—Salmo 71:23.

Ni Nku Uko Tikuperekerako Uteŵeti Wakupatulika?

13. Kasi awo ŵakupereka uteŵeti wakupatulika mu cipanga ca mukati mwa tempele la Yehova lakumzimu ŵali na cilindizga wuli, ndipo mbanjani awo ŵakukondwera nawo?

¹³ Paulos wakalembera Ŵakristu ŵakuphakazgika kuti: “Tiri kupokera ufumu wambura kumanya kusunkunyika, tiŵe na kuwonga, mwakuti [tipereke uteŵeti wakupatulika kwa Ciuta, NW] na kumusekereska,  pamoza na ncindi na wofi.” (Ŵahebere 12:28) Cifukwa ca cilindizga cakusimikizgirika ca kuhara Ufumu, ŵakuphakazgika mbakusunkunyika cara mu cipulikano peneapo ŵakusopa Wapacanya Nkanira. Iwo ŵangapereka uteŵeti wawo wakupatulika mu malo Ghatuŵa ndiposo mu cipanga ca mukati mwa tempele lakumzimu la Yehova, ndipo ŵakulindizga mwakunwekera kukateŵetera lumoza na Yesu mu Malo Ghatuŵa Comene, uko nkucanya. Ŵanyawo ŵa mberere zinyake nawoso mbakukondwa cifukwa ca cilindizga cawo capacanya.—Ŵahebere 6:19, 20; 10:19-22.

14. Ndi mwauli umo mzinda ukuru wukusangira candulo mu uteŵeti wacovwiro wa Yesu?

¹⁴ Wuli pakuyowoya za mberere zinyake? Nga ndi umo mpostole Yohane wakawonerathu, mzinda ukuru wa iwo wapangika mu mazuŵa gha ku umaliro agha, ndipo “ŵakasukutura minjirira yaŵo, ndipo ŵakayituŵiska mu ndopa za Mwana-mberere.” (Civumbuzi 7:14) Nga ndi umo ŵaliri ŵasopi ŵanyawo ŵakuphakazgika, iwo nawo ŵakulongora cipulikano mu uteŵeti wacovwiro wa Yesu ndiposo mu umoyo wake wa ukongorekwa uwo wakaupereka cifukwa ca ŵantu. Ŵa mberere zinyake ŵakwandulaso na uteŵeti wacovwiro wa Yesu mu ntowa yakuti ‘ŵakukoreska pangano la Yehova.’ (Yesaya 56:6) Iwo kuti ŵakutoramo cigaŵa mu pangano lipya cara, kweni ŵakulikoreska mwakupulikira marango ghakuyowoya za ilo na kukoleranako na manozgero agho ghali kupangika kwizira mwa ilo. Iwo ŵakwendezgana na Israyeli wa Ciuta, ŵakurya cakurya cakumzimu cakuyana ndiposo ŵakugwiliraso lumoza ncito na viŵaro vyake, kurumba Ciuta pakweru na kupereka sembe zakumzimu izo zikumukondweska iye.—Ŵahebere 13:15.

15. Kasi ndi nkuni uko ŵa mberere zinyake ŵakuperekerako uteŵeti wakupatulika, ndipo ndi mwauli umo thumbiko ili likuŵakhwaskira?

¹⁵ Mwa ntowa iyi, mzinda ukuru ukuwoneka ‘wukwimirira pantazi pa cizumbe na pa maso pa Mwana-mberere, wakuvwarikika minjirira yituŵa.’ Mwakusazgirapo, mzinda ukuru ‘wuli pantazi pa cizumbe ca Ciuta; ndipo [wukupereka uteŵeti wakupatulika, NW] muhanya na usiku mu tempele lake; ndipo Mweneuyo wakukhala pa cizumbe wizamtandaulira  hema lake pa uwo.’ (Civumbuzi 7:9, 15) Mu Israyeli, ŵakung’anamuka ŵa mitundu yinyake ŵakasoperanga mu cipanga ca kuwalo ca tempele la Solomon. Mwanteura pera, mzinda ukuru ukusopa Yehova mu cipanga ca kuwalo ca tempele lake lakumzimu. Kuteŵetera mu ico kukuŵakondweska. (Salmo 122:1) Nanga kungaŵa panyengo yakuti ŵakuphakazgika ŵakukhalira ŵaruta kucanya, iwo ŵazamulutirizga kupereka uteŵeti wakupatulika kwa Yehova nga mbantu ŵake.—Civumbuzi 21:3.

Uteŵeti Wakupatulika Uwo Ngwakukanika

16. Ndi ncenjezgo wuli izo zaperekeka zakuyowoya za uteŵeti wakupatulika?

¹⁶ Mu mazuŵa gha Israyeli wamwaka, uteŵeti wakupatulika ukeneranga kuperekeka mwakukolerana na marango gha Yehova. (Exodus 30:9; Leviticus 10:1, 2) Mwanteura pera, lero paliso vyakukhumbikwira vinyake vyakuti vilondezgeke usange tikukhumba kuti uteŵeti withu wakupatulika uŵe wakuzomerezgeka na Yehova. Ici ndico cifukwa cake Paulos wakalembera Ŵakolose mwanteura: “Ise nase, . . . kuti tikureka cara kumuromberani na kumuŵeyerani, kuti muzuzgike na kamanyiro ka khumbo lake mu vinjeru na kuwamo kose kwa mzimu, kuti mwendenge kwakwenerera Fumu na kuyikondweska kose kose, pakupambika vipambi mu mulimo wose uweme, na kukulira mu kumanyiska Ciuta.” (Ŵakolose 1:9, 10) Tilije wenelero wakujisankira ise taŵene ntowa iyo njakwenelera yakumusopera Ciuta. Cimanyisko cakufikapo ca Malemba, kapulikiskiro kakumzimu, na vinjeru vyakufuma kwa Ciuta nvyakuzirwa comene. Kwambura ivi vintu vingenda makora cara.

17. (a) Ndi mwauli umo uteŵeti wakupatulika wukatimbanizgikira mu mazuŵa gha Moses? (b) Ndi mwauli umo uteŵeti wakupatulika wungatimbanizgikiraso mu nyengo yino?

¹⁷ Kumbukirani Ŵaisrayeli ŵa mu nyengo ya Moses. Tikuŵazga kuti: ‘Ciuta wakaŵarazgira nkonyoro, ndipo wakaŵapereka [kuti ŵapereke uteŵeti wakupatulika, NW] ku vita vya mlengalenga.’ (Milimo 7:42) Ŵaisrayeli aŵa ŵakawona nkongono za Yehova umo wakacitira pamaso pawo. Kweni ndipouli, iwo ŵakateŵetera ŵaciuta ŵanji mwa kughanaghana kuti vintu viŵaŵilenge makora. Iwo ŵakaŵa ŵakugomezgeka cara, ndipo kugomezgeka ncintu cakukhumbikwira usange tikukhumba kuti uteŵeti withu wakupatulika uŵe wakukondweska kwa Ciuta. (Salmo 18:25) Mbunenesko kuti mbantu ŵacoko waka awo ŵangamuleka Yehova kuti ŵasope nyenyezi panji matholi gha golide, kweni pali mitundu yinyake ya kusopa vikozgo. Yesu wakacenjezga za kuteŵetera “Usambazi”, ndiposo Paulos wakayowoya kuti kudokera nakoso nkusopa vikozgo. (Mateyu 6:24; Ŵakolose 3:5) Satana iyemwene wakujiwoneska nga ndi ciuta. (2 Ŵakorinte 4:4) Mitundu yanteura iyi yakusopa vikozgo njakuzara comene ndipo yili vipingo. Mwaciyerezgero, aghanaghanirani za muntu uyo wakujiyowoya kuti wakulondezga Yesu kweni cilato cake ncakuti waŵe musambazi panji uyo cigomezgo cake cose cili mwa iyemwene na pa maghanoghano ghake. Ni njani  uyo iye wakumuteŵetera comene-comene? Kasi tingayowoya kuti muntu uyo wakupambana na Ŵayuda ŵa mu nyengo ya Yesaya, awo ŵakazunuranga waka zina la Yehova kweni milimo yake yikuru ŵakati yikacitikanga na vikozgo vyawo vyakufipirwa?—Yesaya 48:1, 5.

18. Ndi mwauli umo uteŵeti wakupatulika ŵakawunangira mu nyengo zakale ndiposo mu nyengo yino?

¹⁸ Yesu wakacenjezgaso kuti: “Ora likwiza, penepapo uyo wakumukomani wamkupima kuti wakupereka [uteŵeti wakupatulika, NW] kwa Ciuta.” (Yohane 16:2) Saulos, uyo wakazgoka kuŵa mpostole Paulos, mwambura kukayika wakaghanaghana kuti wakateŵeteranga Ciuta peneapo ‘wakazomerezga kukomeka kwa Stefano’ ndiposo ‘wakatutira pa ŵasambiri ŵa Fumu kufinga na kukoma.’ (Milimo 7:60; 9:1) Mazuŵa ghano, ŵantu ŵanji awo ŵakucitiska kutimbana kwa pakati pa mitundu na kukomeska ŵantu ŵanandi nawoso ŵakugomezga kuti ŵakuteŵetera Ciuta. Pali ŵantu ŵanandi awo ŵakugomezga kuti ŵakusopa Ciuta, kweni unenesko ngwakuti ŵakusopa ŵaciuta ŵa nga ndi kutemweska caru cawo, kutemweska fuko lawo, usambazi, panjiso na ŵaciuta ŵanyake.

19. (a) Ndi mwauli umo tikuwonera uteŵeti withu wakupatulika? (b) Kasi ndi uteŵeti wuli wakupatulika uwo wungatipa cimwemwe?

¹⁹ Yesu wakayowoya kuti: “Ulambirenge Fumu Ciuta wako, ndipo [uperekenge kwa iye yekha uteŵeti wakupatulika, NW].” (Mateyu 4:10) Iye wakazgoranga Satana, kweni mwee, nako nkuzirwa kwa mazgu agha kuti tigwilirepo ncito! Kupereka uteŵeti wakupatulika kwa Fumunkuru ya cilengiwa cose ncintu cakuzirwa comene, ndiposo ndi mwaŵi wukuru. Ncici ico cingayowoyeka cakukhwaskana na uteŵeti wacovwiro weneuwo wukukolerana na kusopa kwithu? Kovwira ŵanyithu ncintu cakukondweska comene ico cikwiziska cimwemwe cikuru. (Salmo 41:1, 2; 59:16) Kweni ndipera, uteŵeti wanteura uwo wukutipa cimwemwe pekha usange wacitika na mtima wose ndiposo mwa ntowa yakwenelera. Kasi mbanjani awo ŵakusopa Ciuta mwakwenelera? Kasi Yehova wakuzomerezga uteŵeti wakupatulika wa njani? Tingazgora mafumbo agho para tingaghanaghanira lizgu lacitatu la mu Baibolo leneilo likukhwaskaso kusopa kwithu. Tizgorenge mafumbo agha mu nkani yithu yakulondezgapo.

[Mazgu ghamusi]

Kasi Mungazgora Wuli?

• Mbuteŵeti wuli wacovwiro uwo Yesu wakacita?

• Mbuteŵeti wuli wacovwiro uwo Ŵakristu ŵakucita?

• Kasi uteŵeti wakupatulika wa Cikristu ncici, ndipo ni nku uko ukucitikira?

• Ncici ico tikukhumbikwira kuti uteŵeti withu wakupatulika uŵe wakukondweska Ciuta?

[Mafumbo]

[Cithuzithuzi pa peji 8]

Ŵapapi ŵakusanga cimwemwe cikuru mukupereka

[Vithuzithuzi pa peji 10, 11]

Ŵakristu ŵakucita uteŵeti wakupatulika para ŵakovwira ŵanji na para ŵakupharazga makani ghaweme

[Cithuzithuzi pa peji 12]

Tikukhumbikwira cimanyisko na kapulikiskiro kakufikapo kuti tisimikizgire kuti uteŵeti withu wakupatulika ngwakuzomerezgeka kwa Ciuta