Kasi Ŵateŵeti ŵa Ciuta Mbanjani Lero?

“Kukwana kwitu kukufuma kwa Ciuta; ndiyoso wakatenereska ise kuti tiŵe ŵateŵeti ŵa pangano lipya.”—2 ŴAKORINTE 3:5, 6.

1, 2. Kasi ni ncito wuli iyo Ŵakristu wose ŵa mu virimika vya mu handiredi lakwamba ŵakaŵa nayo, kweni ni mwauli umo vintu vikasintira?

 MU VIRIMIKA vya mu handiredi lakwamba vya Nyengo Yithu, Ŵakristu wose ŵakanjizgikamo mu ncito yakuzirwa—mulimo wakupharazga makani ghaweme. Wose ŵakaŵa ŵakuphakazgika ndiposo ŵateŵeti ŵa pangano lipya. Ŵanyake ŵakaŵa na ncito zakusazgikira, nga nkusambizga mu mpingo. (1 Ŵakorinte 12:27-29; Ŵaefeso 4:11) Ŵapapi nawo ŵakaŵa na ncito zikuru mu mbumba. (Ŵakolose 3:18-21) Kweni ndipouli wose ŵakanjizgikamo mu ncito yikuru na yakuzirwa comene yakupharazga. Mu Malemba ghakwambilira gha Cikristu gha Cigiriki, ncito iyi yikacemekanga kuti di·a·ko·niʹa—kung’anamura mulimo, panji uteŵeti.—Ŵakolose 4:17.

² Penepapo nyengo yikati yajumpapo, vintu vikasinta. Kagulu ka ŵarongozgi ŵa cisopo kakayamba, ndipo kakakhumba cara kuti muntu munyakeso waŵe mupharazgi. (Milimo 20:30) Ŵarongozgi aŵa ŵakaŵa ŵacoko mukati mwa awo ŵakajicema kuti Mbakristu. Kweni wumba ukuru ukaŵa  wa ŵantu-bweka. Penepapo ŵantu-bweka ŵaphalirika kuti ŵali na milimo yinyake yakuti ŵacite, kusazgapo kusangula ndrama zakulipilira ŵarongozgi aŵa, ŵanandi ŵa iwo ŵakupulikizga na kulaŵiskako waka ku ncito yakupharazga.

3, 4. (a) Kasi mu visopo vya Cikristu ŵantu ŵakucita wuli kuti ŵaŵe ŵateŵeti? (b) Mu visopo vya Cikristu, kasi mteŵeti wakuŵa njani, ndipo ncifukwa wuli kacitiro aka nkakupambana na Ŵakaboni ŵa Yehova?

³ Ŵarongozgi wa visopo aŵa ŵakujithya kuti mbateŵeti (mteŵeti, lizgu la Cilatini lakung’anamurika kufuma ku lizgu lakuti di·aʹko·nos). a Kuti ŵaŵe ŵateŵeti ŵakwimikika, iwo ŵakuruta danka kukasambira ku makoleji panji ku maseminare. The International Standard Bible Encyclopedia yikuyowoya kuti: “‘Kwimika’ na ‘kuŵikika’ comene-comene kukung’anamura kupereka ncito yapadera ku ŵateŵeti panji ŵasofi mwakucita viphikiro, na kuŵapa mazaza ghakuti ŵapharazge Mazgu panji kurongozga milimo yakupatulika, panji kucita vyose viŵiri.” Ninjani uyo wakwimika ŵateŵeti? The New Encyclopædia Britannica yikuti: “Matcharitchi agho ghali na mabishopu, kwimika mteŵeti nyengo zose kukucitika na bishopu. Mu matcharitchi gha Pulezibetere, kwimika mteŵeti kukucitika na murara wa pulezibetere.”

⁴ Mwanteura, mu visopo vya Cikristu, ncito ya uteŵeti yikuperekeka bweka cara. Ndipouli, Ŵakaboni ŵa Yehova ndimo ŵakucitira ntena cara. Cifukwa wuli? Cifukwa ncakuti Ŵakristu ŵa mpingo wa mu virimika vya mu handiredi lakwamba ndimo ŵakacitiranga cara.

Mbanjani Comene-comene Awo Mbateŵeti ŵa Ciuta?

5. Mwakuyana na Baibolo, mbanjani ŵakugwira ncito nga mbateŵeti?

⁵ Mwakuyana na Baibolo, ŵasopi wose ŵa Yehova—kucanya na pacaru capasi—mbateŵeti. Ŵangelo ŵakamuteŵetera Yesu. (Mateyu 4:11; 26:53; Luka 22:43) Ŵangelo ‘ŵakuteŵeteraso aŵo ŵati ŵaharenge ciponosko.’ (Ŵahebere 1:14; Mateyu 18:10) Yesu wakaŵa mteŵeti. Iye wakati: “Mwana wa muntu wakawura kwizira kuteŵetereka, kweni kuteŵetera.” (Mateyu 20:28; Ŵaroma 15:8) Pakuti ŵalondezgi ŵa Yesu wakenera ‘kurondezga ndendende marwayo ghake,’ mwanteura ncakuziziswa cara kuti iwo nawo ŵaŵe ŵateŵeti.—1 Petros 2:21.

6. Kasi Yesu wakalongora mwauli kuti ŵasambiri ŵake ŵakwenera kuŵa ŵateŵeti?

⁶ Peneapo kukakhala pacoko waka kuti wakwere kucanya, Yesu wakaphalira ŵasambiri ŵake kuti: “Rutaninge [mukapange ŵasambiri mu, NW] mitundu yose, mukaŵabapatize mu zina la Ŵawiske na la Mwana na la mzimu mutuŵa: muŵasambizge kukoreska vyose ivyo ndamulangulirani.” (Mateyu 28:19, 20) Mwanteura ŵasambiri ŵa Yesu ŵakenera kuŵa ŵapangi ŵasambiri—kuŵa ŵateŵeti. Ŵasambiri ŵapya awo ŵakasangika ŵakenera kukoreska vintu vyose ivyo Yesu wakalangura, kusazgapo langulo la kuruta kukapanga ŵasambiri. Mwanarumi panji mwanakazi, murara panji mucoko, musambiri mweneco wa Yesu Kristu wakenera kuŵa mteŵeti.—Joel 2:28, 29.

7, 8. (a) Ni malemba ngani agho ghakulongora kuti Ŵakristu waunenesko wose mbateŵeti? (b) Kasi ni mafumbo wuli agho ghakufumbika ghakukhwaskana na kwimikika?

⁷ Mwakukolerana na languro ili, pa zuŵa la Pentekoste wa 33 C.E., ŵasambiri wose ŵa Yesu awo ŵakaŵapo, ŵanarumi na ŵanakazi, na mtima umoza ŵakakolerana kupharazga “vikuru vya Ciuta.” (Milimo 2:1-11) Nyengo yikati yajumpapo, mpostole Paulos wakalemba kuti: “Na mtima muntu wakupulikana kufika ku urunji, ndipo na mlomo wakupharazga pakweru za ciponosko.” (Ŵaroma 10:10 NW) Paulos wakayowoya mazgu agha ku kagulu ka ŵapharazgi ŵakuŵerengeka waka cara, kweni ku ‘wose awo ŵakaŵa mu Roma, ŵakutemweka ŵa Ciuta.’ (Ŵaroma 1:1, 7) Mwakuyana waka, ‘ŵatuŵa wose aŵo ŵakaŵa mu Efeso, na ku ŵamagomezgeko mwa Kristu Yesu’ ŵakenera ‘kuvwarika marundi ghawo kunozgekera ivangeli la cimango.’ (Ŵaefeso 1:1; 6:15) Ndipo wose awo ŵakapulika mazgu gha mu kalata ya ku Ŵahebere ŵakenera ‘kukoreska [“cipharazgo ca pakweru,” NW] ca cilindizga cawo kwambura kupungwa.’—Ŵahebere 10:23.

⁸ Ipo mpa nyengo wuli iyo muntu wakuŵira mteŵeti? Panyake tiyowoye kuti, mpauli apo muntu wakwimikika? Ndipo ninjani uyo wakumwimika?

Kwimikika Kuŵa Mteŵeti—Panyengo Wuli?

9. Ninjani wakamwimika Yesu, ndipo mpauli?

⁹ Pakuyowoya za nyengo iyo muntu wakwimikika ndiposo na muntu uyo wakumwimika, tiyeni tiwone ciyerezgero ca Yesu Kristu. Iye wakaŵavye satifiketi  ya kwimikika kwake panji digiri yakufumira ku seminare yiliyose ya kumumanyikwiska kuti ni mteŵeti, ndipo wakimikika na muntu waliyose cara. Ipo ncifukwa wuli tikuyowoya kuti wakaŵa mteŵeti? Cifukwa ncakuti mazgu ghakufunyilirika gha Yesaya ghakakwaniriskika pa iye: ‘Mzimu wa Yehova wuli pa ine, cifukwa wali kundiphakazga kupharazga makani ghaweme.’ (Luka 4:17-19; Yesaya 61:1) Mazgu agha mwaunenesko ghakulongora kuti Yesu wakarangurika kupharazga makani ghaweme. Wakarangurika na njani? Pakuti wakaphakazgika na mzimu wa Yehova cifukwa ca ncito iyi, kwambura kukayika Yesu wakimikika na Yehova Ciuta. Mpauli apo ici cikacitika? Mzimu wa Yehova ukiza pa Yesu panyengo iyo wakabapatizika. (Luka 3:21, 22) Mwanteura, pakaŵa panyengo ya ubapatizo wake apo wakimikika.

10. Ninjani uyo wakupangiska mteŵeti Wacikristu kuŵa ‘wakukwana’?

¹⁰ Wuli pakuyowoya za ŵarondezgi ŵa Yesu mu virimika vya mu handiredi lakwamba? Ncito yawo nga mbateŵeti nayo yikafuma kwa Yehova. Paulos wakati: “Kukwana kwitu kukufuma kwa Ciuta; ndiyoso wakatenereska ise kuti tiŵe ŵateŵeti ŵa pangano lipya.” (2 Ŵakorinte 3:5, 6) Kasi Yehova wakwenereska wuli ŵasopi ŵake kuti ŵaŵe ŵateŵeti? Awonani ciyerezgero ca Timote, mweneuyo Paulos wakati ni “mteŵeti wa Ciuta mu ivangeli la Kristu.”—1 Ŵatesalonika 3:2.

11, 12. Kasi Timote wakacita wuli kuti warute pantazi kuti waŵe mteŵeti?

¹¹ Mazgu ghakulondezgapo agha ghakuyowoya za Timote ghatovwirenge kumanya umo iye wakaŵira mteŵeti: “Kweni iwe khalirira mu vyeneivyo wasambira na kupanikizgika navyo, pakumanya aŵo wavisambirako; ndipo kuti kwamba ku wanici wako wamanya Malembo ghatuŵa, gheneagho ghakumanya kukufiskira mu vinjeru ku ciponosko mu cipulikano ico ciri mwa Kristu Yesu.” (2 Timote 3:14, 15) Cipulikano ca Timote, ceneico cikamukhuŵirizga kupharazga pakweru, cikazikika pa kumanya Malemba. Kasi kuŵazga waka payekha kukaŵa kwakukwanira? Yayi. Timote wakakhumbikwiranga covwiro kuti waŵe na cimanyisko cakufikapo na kamanyiro ka kumzimu ka ivyo wakasambiranga. (Ŵakolose 1:9) Ndico cifukwa cake Timote ‘wakapanikizga.’ Pakuti wakamanya Malemba “kwamba ku wanici,” ŵasambizgi ŵake ŵakudanga ŵakwenera kuti ŵakaŵa ŵanyina na ŵabuya ŵake, cifukwa ŵawiske ŵakaŵa ŵasopi cara.—2 Timote 1:5.

¹² Inya, ni vinandi vikakhumbikwanga kuti Timote waŵe mteŵeti. Kweni cintu cikuru ndico cakuti cipulikano cake cikakhozgeka mwa kukhalira pamoza na Ŵakristu ŵa mu mipingo iyo wakaŵa nayo pafupi. Tikumanya wuli za ici? Cifukwa apo Paulos wakakumana na Timote, muwukirano uyu “wakaŵa na lumbiri luweme mu ŵabali ŵa mu Lustra na mu Ikoniya.” (Milimo 16:2) Mwakusazgirapo, mu nyengo yira ŵabali ŵanyake ŵakatuma makalata ku mipingo iyo mwakuti ŵaŵakhozge. Ndiposo ŵalaŵiliri ŵakwendakwenda ŵakaŵacezgeranga mwakuti ŵaŵapampuske. Kacitiro aka kakovwira Ŵakristu nga ni Timote kuti ŵarute pantazi kumzimu.—Milimo 15:22-32; 1 Petros 1:1.

13. Mpanyengo wuli iyo Timote wakimikika kuŵa mteŵeti, ndipo ncifukwa wuli mungayowoya kuti kukura kwake kumzimu kukagota penepara cara?

¹³ Pakuwona languro la Yesu la pa Mateyu 28:19, 20, tingakayika cara kuti panyengo yinyake  cipulikano ca Timote cikamukhuŵirizga kuti walondezge Yesu na kubapatizika. (Mateyu 3:15-17; Ŵahebere 10:5-9) Ici cikaŵa cirongolero ca Timote ca kujipatulira na mtima wose kwa Ciuta. Wakati wabapatizika, Timote wakaŵa mteŵeti. Kufuma panyengo iyo kuruta muntazi, umoyo wake, nkongono zake, na cilicose ico wakaŵa naco wakapereka kwa Ciuta. “Uteŵeti wakupatulika” ukaŵa cintu cakuzirwa comene pa kusopa kwake. Nanga vikaŵa ntena, kweni Timote wakagota penepapo cara. Wakarutilira kukura kumzimu mupaka wakaŵa mteŵeti wakukhoma Wacikristu. Ici cikaŵa ntena cifukwa cakuti Timote wakakhalanga pamoza na Ŵakristu ŵakukhoma nga ni Paulos, wakacitanga sambiro la iyemwene, na kucita ncito ya upharazgi mwapampu.—1 Timote 4:14; 2 Timote 2:2; Ŵahebere 6:1.

14. Ni mwauli umo muntu uyo “[wakukhumbisiska, NW] umoyo wa muyirayira” lero wakurutira pantazi mupaka kuŵa mteŵeti?

¹⁴ Lero, kwimikika cifukwa ca uteŵeti Wacikristu kukuyanaso waka. Muntu uyo “[wakukhumbisiska, NW] umoyo wa muyirayira” wakovwirika kusambira za Ciuta na vilato vyake kwizira mu sambiro la Baibolo. (Milimo 13:48) Muntu wa nga ni uyo wakusambira umo wangagwiriskira ncito marango gha Baibolo mu umoyo wake na kupempera kwa Ciuta kwambura kureka. (Salmo 1:1-3; Zintharika 2:1-9; 1 Ŵatesalonika 5:17, 18) Wakukhalira pamoza na ŵasopi ŵanyake ndipo wakucitapo kantu pa vyakugaŵira na manozgero ghose ghakuperekeka na “muzga wa magomezgeko na wa vinjeru.” (Mateyu 24:45-47; Zintharika 13:20; Ŵahebere 10:23-25) Mwanteura wakuruta pantazi mu kasambizgiro.

15. Ncici cikucitika para muntu wabapatizika? (Wonaniso futunoti.)

¹⁵ Para nyengo yajumpapo, usange musambiri wa Baibolo wamutemwa Yehova Ciuta na kuŵa na cipulikano cakukhora mu sembe ya ciwombolero, iye wakukhumba kujipatulira yekha kwa Ŵadada ŵake ŵakucanya. (Yohane 14:1) Kujipatulira uku kukucitika mu pempero la iyemwene ndipo pamanyuma pake wakubapatizika kulongora pakweru kujipatulira uko wakacita ku udesi. Ubapatizo wake ndico ncimanyikwiro ca kwimikika kwake cifukwa mpanyengo iyi apo wakumanyikwa kuti ni di·aʹko·nos, mteŵeti wakujipatulira wa Ciuta. Iye wakwenera kurekana naco caru. (Yohane 17:16; Yakobe 4:4) Wajipereke yekha wamusuma kuŵa “sembe yamoyo, yituŵa na yakukondweska Ciuta” kwambura kusidako panji kuŵa na maghanoghano gha paŵiri. (Ŵaroma 12:1) b Iye ni mteŵeti wa Ciuta, murondezgi wa Kristu.

Kasi Uteŵeti Wacikristu Nivici?

16. Pakuŵa mteŵeti, kasi ni milimo wuli yinyake iyo Timote wakaŵa nayo?

¹⁶ Kasi uteŵeti wa Timote ukasazgapo vici? Iye wakaŵa na milimo yapadera nga ni mwendezgani wa Paulos. Penepapo wakafika kuŵa murara, Timote wakafwilirapo pa ncito yakupharazga na kukhozga Ŵakristu ŵanyake. Kweni cilato ca uteŵeti wake nga ni umo wakacitira Yesu na Paulos, cikaŵa ca kupharazga makani ghaweme na kupanga ŵasambiri. (Mateyu 4:23; 1 Ŵakorinte 3:5) Paulos wakamuphalira Timote kuti: “Uzize mu vintu vyose, ukuntirepo suzgo, ucite mulimo wa mpharazgi, ufiske uteŵeti wako.”—2 Timote 4:5.

17, 18. (a) Kasi mbuteŵeti wuli uwo ŵateŵeti Ŵacikristu ŵakunjizgikamo? (b) Kasi ncito yakupharazga njakuzirwa wuli kwa mteŵeti Wacikristu?

¹⁷ Ici ncakuyana waka na ŵateŵeti Ŵacikristu mu nyengo yasono. Iwo ŵakucita upharazgi wapakweru, kurongozgera ŵanji ku ciponosko kwizira mu sembe ya ciwombolero ya Yesu ndiposo na kusambizga awo mbakuzika kucema pa zina la Yehova. (Milimo 2:21; 4:10-12; Ŵaroma 10:13) Mwakugwiriskira ncito Baibolo, ŵakusimikizga kuti Ufumu  ndiwo cilindizga ciweme cekha kwa ŵantu ŵakusuzgika ndiposo ŵakulongora kuti nanga ni sono vintu vingaŵa makora usange tingalondezga marango gha Ciuta. (Salmo 15:1-5; Marko 13:10) Kweni mteŵeti Wacikristu wakupharazga kuti wanyolorere visuzgo vya ŵantu mu nyengo yino pera cara. Mu malo mwake, wakusambizga kuti ‘kusopa-Ciuta kuli na layizgano la umoyo uno, na la uwo ukwiza.’—1 Timote 4:8.

¹⁸ Mbunenesko nadi kuti ŵateŵeti ŵali na ntowa zinyake za kateŵetero zeneizo zingapambana na za Mkristu munyake. Ŵanandi ŵali na mulimo wakupwererera mbumba. (Ŵaefeso 5:21–6:4) Ŵarara na ŵateŵeti ŵakuteŵetera ŵali na ncito mu mpingo. (1 Timote 3:1, 12, 13; Tito 1:5; Ŵahebere 13:7) Ŵakristu ŵanandi ŵakovwira kuzenga Nyumba za Ufumu. Ŵanji ŵali na mwaŵi ukuru wa kuŵa ŵateŵeti ŵakujipereka kuteŵetera pa nyumba za Beteli za Watch Tower Society. Nanga viŵe ntena, kweni ŵateŵeti wose Ŵacikristu ŵakutoramo cigaŵa mu ncito yakupharazga makani ghaweme. Palije uyo wakuleka kunjizgikamo. Kunjizgikamo mu ncito iyi kukumurongora muntu kuti ni mteŵeti mweneco Wacikristu.

Nkaro ya Mteŵeti Wacikristu

19, 20. Kasi ni nkaro wuli iyo ŵateŵeti Ŵacikristu wakwenera kukuliska?

¹⁹ Ŵateŵeti ŵanandi ŵa mu Visopo vya Cikristu ŵakukhumba kuti ŵapikenge ncindi zapadera, ndipo ŵakutemwa kucemeka na mazina gha nga ni “mliska” na “bambo.” Ndipouli, mteŵeti Wacikristu wakumanya kuti Yehova yekha ndiye ngwakwenelera kupika ucindami. (1 Timote 2:9, 10) Palije mteŵeti Wacikristu uyo wakukhumba ucindami ukuru wa nga ni uwu panji kujipa mazina gha ncindi zapadera. (Mateyu 23:8-12) Iye wakumanya kuti ng’anamuro leneco la di·a·ko·niʹa ni “uteŵeti.” Verebu la lizgu ili nyengo zinyake mu Baibolo likung’anamura kuteŵetera ŵantu pa nyengo ya cakurya. (Luka 4:39; 17:8; Yohane 2:5) Nangauli kagwiriskiro ncito kake ka lizgu ili nkakuzirwa pakuyowoya za uteŵeti Wacikristu, kweni di·aʹko·nos ni mteŵeti ndipera.

²⁰ Mwanteura palije cifukwa cakuti mteŵeti Wacikristu wajitukumulire. Ŵateŵeti ŵeneco Ŵacikristu—nanga ni awo ŵali na milimo yapadera mu mpingo—mbazga ŵakujiyuyura. Yesu wakati: “Yose uyo wakukhumba kuŵa mukuru mwa imwe, waŵenge mteŵeti winu; ndipo yose uyo wakukhumba kuŵa wakudanga mwa imwe, waŵenge muzga winu.” (Mateyu 20:26, 27) Pakulongora ŵasambiri ŵake nkaro yiweme iyo ŵakenera kuŵa nayo, Yesu wakagezeska marundi ghawo, wakacita ncito ya muzga wakuyuyurika comene. (Yohane 13:1-15) Mwee, nawo ni uteŵeti wakujiyuyura! Pa cifukwa ici, ŵateŵeti Ŵacikristu ŵakuteŵetera Yehova Ciuta na  Yesu Kristu mwakujicefya. (2 Ŵakorinte 6:4; 11:23) Iwo ŵakulongora mtima wakujiyuyura pa kuteŵeterana yumoza na munyake. Ndipo para ŵakupharazga makani ghaweme, ŵakuteŵetera ŵazengezgani ŵawo na mtima wose.—Ŵaroma 1:14, 15; Ŵaefeso 3:1-7.

Zizipizgani mu Uteŵeti

21. Kasi Paulos wakandula wuli cifukwa ca kuzizipizga kwake mu uteŵeti?

²¹ Mteŵeti Paulos wakazizipizga. Wakaphalira Ŵakolose kuti wakakomwa comene mwakuti waŵapharazgire makani ghaweme. (Ŵakolose 1:24, 25) Cifukwa cakuti wakazizipizga, ŵanandi ŵakapokera makani ghaweme ndipo ŵakamba kuŵa ŵateŵeti. Ŵakababikaso nga mbana ŵa Ciuta na kuŵa ŵabali ŵa Yesu Kristu, ndipo ŵakaŵa na cilindizga ca kuŵa vilengiwa vya mzimu pamoza naye kucanya. Mwee, nayo ni njombe yaucindami cifukwa ca kuzizipizga!

22, 23. (a) Ncifukwa wuli ŵateŵeti Ŵacikristu lero ŵakukhumbikwira kuzizipizga? (b) Kasi kuzizipizga mu uteŵeti Wacikristu kupereka vipambi wuli?

²² Lero, kuzizipizga nkwakukhumbikwa comene kwa awo mbateŵeti nadi ŵa Ciuta. Ŵanandi zuŵa na zuŵa ŵakulimbana na urwari panji vyakuŵinya vya ucekuru. Ŵapapi ŵakutokatoka comene kuti ŵalere ŵana ŵawo—ŵanandi ŵa iwo ŵalije munyawo wa mu ntengwa. Na cikanga cose, ŵana ŵakukana mauryarya gha ku sukulu. Ŵakristu ŵanandi ŵakulimbana na ukavu ukuru. Ndiposo ŵanandi ŵakutambuzgika panji kukumana na masuzgo cifukwa ca “nyengo zinonono” za mazuŵa ghano! (2 Timote 3:1) Inya, ŵateŵeti ŵa Yehova pafupifupi mamiliyoni ghankondi na limoza lero ŵangayowoya nga ni umo mpostole Paulos wakayowoyera kuti: “Tikujirumba teka, nga mbateŵeti ŵa Ciuta, mu cizizipizgo cikuru.” (2 Ŵakorinte 6:4) Ŵateŵeti Ŵacikristu ŵakugongowa cara. Ŵakwenera nadi kurumbika cifukwa ca cizizipizgo cawo.

²³ Mwakusazgirapo, nga ni umo kukaŵira na Paulos, kuzizipizga kukupereka vipambi vyakukondweska. Para tikuzizipizga, tikujisungira ubwezi wapafupi na Yehova ndiposo tikukondweska mtima wake. (Zintharika 27:11) Tikukhozga cipulikano cithu na kupanga ŵasambiri, ndiposo tikusazgirako ubali wa Cikristu. (1 Timote 4:16) Yehova wasungilira ŵateŵeti ŵake na kutumbika uteŵeti wawo mu mazuŵa gha umaliro agha. Cakufumapo cake caŵa kuwunganiskika kwa ŵakukhalira ŵa 144,000, ndipo mamiliyoni ghanandi ŵali na cilindizga cakusimikizgirika ca kuzakasangwa na umoyo wamuyirayira mu paradiso pa caru capasi. (Luka 23:43; Civumbuzi 14:1) Enya, uteŵeti Wacikristu ncirongolero ca lusungu lwa Yehova. (2 Ŵakorinte 4:1) Tiyeni tose tiwongere na kukondwera kuti vipambi vyake vizamukhalirira kwamuyirayira.—1 Yohane 2:17.

[Mazgu ghamusi]

Kasi Mungalongosora?

• Kasi ni ncito wuli iyo Ŵakristu wose ŵa mu virimika vya mu handiredi lakwamba ŵakayicita?

• Ninjani uyo wakwimika mteŵeti Wacikristu ndipo mpanyengo wuli?

• Kasi mteŵeti Wacikristu wakwenera kuŵa na nkaro wuli?

• Ncifukwa wuli mteŵeti Wacikristu wakwenera kuzizipizga para wakumana na masuzgo?

[Mafumbo]

[Vithuzithuzi pa peji 16, 17]

Timote wakasambizgika Mazgu gha Ciuta kwamba ku wanici. Wakimikika kuŵa mteŵeti apo wakabapatizika

[Cithuzithuzi pa peji 15]

Ubapatizo ukulongora kujipatulira kwa Ciuta ndipo ni nyengo iyo mteŵeti wakwimikika

[Cithuzithuzi pa peji 18]

Ŵateŵeti Ŵacikristu mbakukondwa kuteŵetera