Yehova Wakupereka Nkongono kwa Ŵakulopwa
Yehova Wakupereka Nkongono kwa Ŵakulopwa
‘[Yehova ]wakupa nkongono ŵakulopwa, ndipo ku mweneuyo walije nkongono wakumusazgirako.’—YESAYA 40:29.
1. Longosorani za nkongono iyo yili mu vintu ivyo Ciuta wali kulenga?
NKONGONO za Yehova nzambura cigoti. Mwee, nayo ni nkongono iyo yili mu vintu ivyo wali kulenga! Kantu kacoko comene kakucemeka atomu ncigaŵa ca vintu vyose—nkacoko comene mwakuti mu kantonyezi kamoza ka maji mukuŵa maatomu ghakukwana 100 biliyoni. a Vintu vyose ivyo vili na umoyo pa pulaneti lithu vikuthemba pa nkongono yakufumira ku dazi iyo yikucitika cifukwa ca maatomu. Kweni, kasi mbunandi wuli wa nkongono ya dazi iyo yikukhumbikwa kuti yisungilire umoyo pa caru capasi? Caru capasi cikupokera cigaŵa cicoka waka ca nkongono yose iyo yikupangika na dazi. Ndipouli, kacigaŵa kacoko ka nkongono ya dazi keneako caru capasi cikupokera nkakuru comene nkanira kuruska nkongono yose iyo mafakitale gha mu caru capasi ghakugwiriskira ncito.
2. Pakuyowoya za cilengiwa, kasi Yesaya 40:26 wakuyowoyaci za nkongono ya Yehova?
2 Usange tikughanaghanira za atomu panji za cilengiwa cose, tikutoreka mtima na nkongono za Yehova zakuzizwiska. Mwambura kukayika iye wakayowoya kuti: “Tumpuskirani kucanya maso ghinu, muwone: kasi uyo wakavilenga vyose ivi ndi njani? Uyo wakufumya ciwuru ca ivyo na kuvipenda, kuvicema vyose na mazina mu ukuru wa nkongono zake, ndipo cifukwa ca Iye ngwakukhora mu nkongono kulije cimoza cakuzgeŵa”! (Yesaya 40:26) Enya, Yehova “ngwakukhora mu nkongono,” ndipo Ncitopoko ca “nkongono” zeneizo wakagwiriskira ncito pakulenga cilengiwa cose.
Nkongono Zakuruska Ndi Zakukhumbikwa
3, 4. (a) Kasi ni vintu wuli ivyo vingativuska? (b) Ni mafumbo wuli agho ghakukhumbikwira kughaghanaghanira?
3 Peneapo nkongono za Yehova ndi zambura cigoti, kweni ŵantu ŵakuvuka. Kulikose uko tikuruta, tikuwona ŵantu ŵakuvuka. Ŵakuwuka na vyakulema, ŵakuya ku ncito panji kusukulu na vyakulema, ŵakuya kukagona ŵakuvuka comene. Ŵanji ŵakukhumba kuti ngati ŵangaruta waka kunyake kuti ŵafumemo mu vyakusuzga vyanterura ivyo. Nga mbateŵeti ŵa Yehova, nase tikuvuka, cifukwa umoyo withu wakujipereka kwa Ciuta ukukhumbikwira kulimbikira na nkongono. (Marko 6:30, 31; Luka 13:24; 1 Timote 4:8) Pali vyakucitika vinandi ivyo vikutivuska comene.
4 Nangauli ndise Ŵakristu, kuti tiri ŵakuvikilirika ku vyakumara-mahara vyeneivyo ŵantu wose wakukumana navyo cara. (Job 14:1) Urwali, ukavu, panji vintu vinyake vyakusuzga vya umoyo pamoza na vyakufumapo vyake vya kuvuska vingatikhuŵazga. Kusazgirapo pa masuzgo agha pali viyezgo vyeneivyo ŵakusangana navyo awo ŵakuzikizgika cifukwa ca urunji. (2 Timote 3:12; 1 Petros 3:14) Cifukwa ca vyakufyenyekezga vya ku caru vya zuŵa na zuŵa ndiposo kususkika kwa ncito yithu yakupharazga Ufumu, ŵanji ŵa ise tingavuka mwakuti tingaghanaghana kuti titolengemo kacigaŵa kacoko waka mu uteŵeti wa Yehova. Mwakusazgirapo, Satana Diabolosi wakuyezgayezga ntowa zinandi izo wakuzisanga kuti wamazge kugomezgeka kwithu kwa Ciuta. Pa vifukwa ivi, ni mwauli umo tingasangira nkongono zakukhumbikwira za kumzimu zakuti zitikhozge mwakuti tileke kuvuka na kutceŵa kuleka uteŵeti?
5. Ncifukwa wuli nkongono zakuruska za ŵantu zikukhumbikwa pakucita uteŵeti wa Cikristu?
5 Tikwenera kugomezga mwa Yehova, Mlengi wa nkongono zose kuti tiŵe na nkongono za kumzimu. Mpostole Paulos wakayowoya kuti uteŵeti wa Cikristu ukukhumbikwira nkongono zakuruska za ŵantu ŵambura ukongorekwa. Iye wakalemba kuti: “Tiri na usambazi weneuwu mu viŵiya vya dongo, mwakuti karuskiro ka nkongono kaŵe ka Ciuta, ka ise teka cara.” (2 Ŵakorinte 4:7) Ŵakristu ŵakuphakazgika ŵakucita “uteŵeti wa ciphemanisko” ndipo ŵakovwirika na ŵanyawo awo ŵali na cilindizga cakuzakakhala na umoyo pa caru capasi. (2 Ŵakorinte 5:18; Yohane 10:16; Civumbuzi 7:9) Cifukwa cakuti ise taŵantu ŵambura ukongorekwa tikucita mlimo wa Ciuta peneapo tikutambuzgika, tingafiska cara na nkongono zithu. Yehova wakutovwira kwizira mwa mzimu wake utuŵa, mwanteura kupereŵera kwithu kukucindika nkongono zake. Mwee, nako nkusanguruskika uko tili nako na cisimikizgo cakuti “Yehova wakufighirira ŵakunyoroka”!—Salmo 37:17.
‘Yehova Ndiye Nkongono Yithu Yikuru’
6. Ni mwauli umo Malemba ghakutisimikizgilira kuti Yehova ndiye Citopoko cithu ca nkongono?
6 Dada withu wakucanya ‘ngwankongono zakuruska’ ndipo ncipusu kwa iye kutikhozga. Tikuphalirika kuti: ‘[Yehova] wakupa nkongono ŵakulopwa, ndipo ku mweneuyo walije nkongono wakumusazgirako. Nanga mbaukirano tiŵalopwe na kuvuka, ŵapungwe naŵo tiŵawire pasi kut’aka raghali! Kweni aŵo ŵakulindirira Yehova ndiŵo tiŵapokereso nkongono zipya, tiŵawuruke na mapapindo nga ndi nombo, tiŵacamale, ndipo kuti ŵamkuvuka cara, tiŵende-ŵendenge pasi kwambura kulopwa nkongono.’ (Yesaya 40:29-31) Cifukwa ca unandi wa ntangwanika, nyengo zinyake tikuvuka nga ndi umo muntu uyo wakucita masoŵero ghakucimbira wakuvukira, mweneuyo marundi ghake ghakutondeka kuti ghacimbire. Kweni umariro wa cipharizgano wuli pafupi, ndipo tikwenera cara kulegherezga. (2 Midauko 29:11) Murwani withu, Diabolosi, wakuyingayinga nga ndi “nkalamo yakuwuruma,” ndipo wakukhumba kutilekiska. (1 Petros 5:8) Tikwenera kukumbukira kuti ‘Yehova ndi nkongono zithu na nguru yithu,’ ndipo wapanga manozgero ghakutikhozga kuti ‘wapereke nkongono ku ŵakulopwa.’—Salmo 28:7.
7, 8. Kasi pali ukaboni wuli wakuti Yehova wakamukhozga Davide, Habakuk, na Paulos?
7 Yehova wakamupa Davide nkongono zakukhumbikwira kuti ŵazizipizge mu nyengo ya masuzgo. Na cipulikano cose ndiposo na cigomezgo, Davide wakalemba kuti: “Pamoza na Ciuta tamkucita na cikanga; ndiye tiwakandizgire pasi vimpindikwa vitu.” (Salmo 60:12) Yehova wakaperekaso nkongono kwa Habakuk kuti wafiske uteŵeti wake nga ndi ncimi. Pa Habakuk 3:19 pakuyowoya kuti: “Ciuta, Yehova, ndiye nkongono zane; wakuzgora marundi ghane nga marundi gha tumbuzimawe, wakwendeska ine pa malo ghane ghapacanya.” Ciyerezgero cinyake cakuzirwa nca Paulos, mweneuyo wakalemba kuti: “Ndingamanya kucita vyose mwa [Ciuta] mweneuyo wakundikhomeska.”—Ŵafilipi 4:13.
8 Nga ndi Davide, Habakuk, na Paulos, tikwenera kurongora cipulikano mu nkongono za Ciuta kuti zitikhozge na kutiponoska. Mwakumanya kuti Fumunkuru Yehova ni Citopoko cithu ca “nkongono,” sono tiyeni tighanaghanire ntowa zinyake zeneizo tingasangira nkongono zakumzimu kufuma ku manozgero agho Ciuta wanozga mu uzali.
Vyakugaŵira vya Kumzimu Vyakuti Vitipe Nkongono
9. Kasi vyakupharazga vya Cikristu vikutovwira wuli?
9 Kusambira mwakufikapo Malemba mwakovwirika na vyakupharazga vya Cikristu kungatipa nkongono na kutivikilira. Wamasalmo wakimba kuti: “Ngwamwaŵi muntu . . . [uyo] mu dango la Yehova ndimo muli cimwemwe cake; ndipo mu dango lake wakuranguruka mhanya na usiku. Tiwakhalenge nga ndi kuni lakupandika ku mironga mu mpepete, ilo likupambika vipambi vyake mu nyengo yake, ndipo hamba lake nalo kuti likufota cara; cose ico iye tiwacite cisakatenge.” (Salmo 1:1-3) Nga ndi umo tikuryera cakurya kuti tikhozge thupi, tikweneraso kurya cakurya ca kumzimu cakuperekeka na Ciuta kwizira mu Mazgu ghake na vyakupharazga vya Cikristu kuti tikhozge nkongono zithu za kumzimu. Mwanteura, sambiro lacandulo ndiposo kuranguruka nvyakovwira comene.
10. Ni nyengo wuli iyo tingacitira sambiro na kuranguruka?
10 Nkwacandulo comene kuranguruka pa ‘vintu vya ndimba vya Ciuta.’ (1 Ŵakorinte 2:10) Kweni, kasi ni nyengo wuli iyo tingarangurukira? Mwana wa Abrahamu, Yisake, “wakafuma kuyakaranguruka ku munda na mise.” (Genesis 24:63-67) Wamasalmo Davide ‘wakarangurukanga pa Ciuta mu maulonda gha usiku.’ (Salmo 63:6) Tingaŵazga Mazgu gha Ciuta na kuranguruka pa igho na mlenji, na mise, na usiku—enya, nyengo yiliyose. Kuŵazga na kusambira kwa nga ndi uku kukurongozgera ku manozgero ghanyake ghakukhozga kumzimu—lurombo.
11. Ncifukwa wuli ncakuzirwa kuromba nyengo zose?
11 Kuromba kwa Ciuta nyengo zose kukutipa nkongono. Mwanteura tikwenera ‘kufwirirapo mu kuromba.’ (Ŵaroma 12:12) Nyengo zinyake, tikwenera kuromba mwakudunjika kuti tisange vinjeru na nkongono zakukhumbikwira kuti titonde ciyezgo. (Yakobe 1:5-8) Tikwenera kuwonga na kurumba Ciuta peneapo tikuwona kufiskika kwa vilato vyake ndiposo peneapo wakutikhozga kuti tirutirizge uteŵeti wake. (Ŵafilipi 4:6, 7) Usange tikufwirirapo mu kuromba kwa Yehova, iye wazamutitaya cara. “Wonani”! wakimba Davide, “Ciuta ndiye movwiri wane.”—Salmo 54:4.
12. Ncifukwa wuli tikwenera kuromba kwa Ciuta mzimu wake utuŵa?
12 Dada withu wakucanya wakutipa nkongono na kutikhozga kwizira mwa mzimu wake utuŵa, panji nkongono yake yakugwira ncito. Paulos wakalemba kuti: ‘nkujikama pasi makongono ku Ŵadada . . . kuti ŵamupaninge, kwakuyana na usambazi wa ucindami wake, kukhomeskeka na nkongono na mzimu waŵo mu muntu wa mukati.’ (Ŵaefeso 3:14-16) Tikwenera kuromba mzimu utuŵa, na kusimikizga kuti Yehova wazamutitumbika nawo. Yesu wakayowoya kuti: Para mwana wakuromba somba, kasi wiske wacitemwa wakumupa njoka? Napacoko pose. Mwanteura iye wakamarizga na kuyowoya kuti: “Usange imwe, mwa [ŵakwananga comene panji cara] ŵaheni, mukumanya kuŵapa ŵana ŵinu vyawanangwa viweme, asi comene kwakuruska ŵawiskemwe ŵa kucanya ŵati ŵaŵapenge mzimu mutuŵa aŵo ŵakuŵaromba?” (Luka 11:11-13) Tiyeni tirombenge na cisimikizgo ndipo nyengo zose tikumbukirenge kuti ŵateŵeti ŵakugomezgeka ŵa Ciuta ‘ŵangakhomeskeka’ na nkongono kwizira mu mzimu wake.
Mpingo Ngwacovwiro
13. Kasi ni mwauli umo tikwenera kuwonera maungano gha mpingo?
13 Yehova wakutikhozga kwizira mu maungano gha mpingo wa Cikristu. Yesu wakayowoya kuti: “Apo pali ŵaŵiri panji ŵatatu ŵakuwungana mu zina lane, penepapo nane ndiri mukati mwa iŵo.” (Mateyu 18:20) Peneapo Yesu wakalayizga layizgano ili, iye wakayowoyanga nkani yeneiyo yikakhumbikwiranga pwererero la aŵo ŵakarongozganga mu mpingo. (Mateyu 18:15-19) Ndipouli, mazgu ghake ghakukhwaska maungano ghithu ghose, gha dera, na gha cigaŵa, gheneagho ghakujurika na kujarika na lurombo mu zina lake. (Yohane 14:14) Mwanteura ni mwaŵi ukuru comene kusangikapo pa maungano gha Cikristu gha nga ndi agha, kwali pali ŵantu ŵacoko waka panji ŵanandi. Tiyeni tirongore kuwongera cifukwa ca vyakucitika ivi, ivyo vikunozgeka kuti vitikhozge kumzimu na kuticiska ku kutemwa na milimo yiweme.—Ŵahebere 10:24, 25.
14. Kasi ni vyandulo wuli ivyo tikusanga kufuma ku kuyezgayezga kwa ŵarara ŵa Cikristu?
14 Ŵarara ŵa Cikristu wakupereka covwiro ca kumzimu na cikhuŵirizgo. (1 Petros 5:2, 3) Paulos wakavwira na kukhuŵirizga mipingo yeneiyo wakateŵeteranga, nga ndi umo ŵalaŵiliri ŵakwendakwenda ŵakucitira mazuŵa ghano. Kweni ndipouli, iye wakakhumbisiskanga kuti waŵire pamoza na ŵasopi ŵanyake mwakuti paŵe kukhozgana na kusanguluskana. (Milimo 14:19-22; Ŵaroma 1:11, 12) Mpanyi nyengo zose talongora kuwongera ŵarara ŵithu ŵa mpingo na ŵalaŵiliri ŵa Cikristu, ŵeneawo ŵakucita ncito yikuru ya kutikhozga kumzimu.
15. Ni mwauli umo ŵasopi ŵanyithu ŵa mu mpingo ŵaŵira [“ŵacovwiro,” NW]?
15 Ŵasopi ŵanyithu awo ŵakupanga mpingo withu ŵangaŵa [“ŵacovwiro,” NW]. (Ŵakolose 4:10, 11) Nga ndi ‘ŵanase ŵacitemwa,’ iwo ŵangatovwira mu nyengo ya suzgo. (Zintharika 17:17) Mwaciyerezgero, peneapo ŵateŵeti ŵa Ciuta 220 ŵakafumiskika mu msasa wakutambuzgirako ŵantu wakucemeka Sachsenhausen, weneuwo ukagadikanga na ŵasilikari ŵa Nazi mu 1945, iwo ŵakenda mtunda wa makilomitala 200. Ŵakendanga nga ndi wumba, ndipo awo ŵakaŵa na nkongono ŵakavwiranga awo ŵakaŵa ŵakulopwa. Kasi cakufumapo cake cikaŵaci? Ŵantu ŵakujumpa 10,000 awo ŵakaŵa mu msasa wakutambuzgirako ŵantu ŵakafwa, ndipo pakaŵavya na yumoza wa Ŵakaboni ŵa Yehova uyo wakafwa. Nkani za nga ndi izi izo zikuŵa mu vyakupharazga vya Watch Tower, kusazgapo Yearbook of Jehovah’s Witnesses na Jehovah’s Witnesses—Proclaimers of God’s Kingdom, vyarongora kuti Ciuta wakupereka nkongono ku ŵantu ŵake, mwakuti ŵaleke kuleghelezga.—Ŵagalatiya 6:9. b
Kukhozgeka na Uteŵeti Withu wa m’Munda
16. Ni mwauli umo kutoramo cigaŵa mu uteŵeti nyengo zose kukutikhozgera kumzimu?
16 Kutoramo cigaŵa nyengo zose mu ncito yakupharazga Ufumu kukutikhozga kumzimu. Uteŵeti wa nga ndi uwu ukutovwira kudodoliska pa Ufumu wa Ciuta na kusungilira cilindizga ca umoyo wamuyirayira na vitumbiko vyake. (Yuda 20, 21) Vilayizgo vya mu Malemba ivyo tikuyowoya mu uteŵeti withu vikutipa cilindizga na kutipangiska kuŵa ŵakusimikizgira za ivyo nga ndi umo ncimi Mika yikacitira, yeneiyo yikayowoya kuti: “Ise tendenge mu zina la Yehova Ciuta witu muyaya na muyaya.”—Mika 4:5.
17. Kasi ni masacizgo wuli agho ghakuperekeka ghakukhwaskana na masambiro gha Baibolo gha panyumba?
17 Ubwezi withu na Yehova wukukhozgeka peneapo tikugwiriskira ncito comene Malemba kusambizgira ŵanji. Mwaciyerezgero, peneapo tikucitiska sambiro la Baibolo la panyumba mwakovwirika na buku la Cimanyisko Ceneico Cikurongozgera ku Umoyo Wamuyirayira, ncamahara kuŵazga na kudumbiskana Malemba agho ghalongoreka. Ici cikovwira musambiri ndiposo cikukhozga kapulikiskiro kithu ka kumzimu. Usange musambiri wakupulikiska cara visambizgo vinyake vya Baibolo panji ciyerezgero, mungamanya kusambira kwa nyengo yakujumpa pa yimoza kuti mumarizge cipaturo cimoza mu buku la Cimanyisko. Mwee, nako nkusangwa uko tikuŵa nako para tanozgekera makora na kuyezgayezga kuwovwira ŵanji kusenderera kwa Ciuta!
18. Longosorani mweneumo buku la Cimanyisko likugwiriskikira ncito mwakukora mtima.
18 Cirimika cilicose, buku la Cimanyisko likugwiriskirika ncito mwakukora mtima kuwovwira ŵantu ŵanandi kuti ŵaŵe ŵateŵeti ŵa Yehova ŵamwampu, ndipo ici cikusazgapo ŵantu ŵanandi awo walije cimanyisko cilicose ca Baibolo. Mwaciyerezgero, peneapo wakaŵa mwanici, mwanarumi munyake wa Cihindu ku Sri Lanka wakapulika Kaboni munyake wakuyowoya za Paradiso. Pakati pajumpapo virimika vicoko, iye wakamufikira Kaboni uyo, ndipo mwambura kumara nyengo mfumu wa Kaboni uyo wakambiska sambiro la Baibolo na muntu yura. Nakwene nako, muntu uyu wakafikanga kunyumba kwa Kaboni uyu zuŵa lirilose cifukwa ca sambiro, ndipo ŵakamalizga kusambira buku la Cimanyisko kwa nyengo yicoko waka. Wakamba kusangikapo pa maungano ghose, wakaleka kukoleranaso na cisopo cake cakale, na kuŵa mupharazgi wa Ufumu. Peneapo wakabapatizikanga, wakaŵa kuti wakucitiska sambiro la Baibolo na muntu uyo wakamanyananga nayo.
19. Penepapo tikupenjerezga Ufumu, kasi tikwenera kusimikizgira za vici?
19 Kupenjerezga Ufumu cakwamba kukutipa cimwemwe. (Mateyu 6:33) Nangauli tikukumana na viyezgo vyakupambana-pambana, tikulutirizga mwakukondwa ndiposo mwamwampu kupharazga makani ghaweme. (Tito 2:14) Ŵanandi ŵa ise tikufiska viyeneresko vya uteŵeti wa upayiniya wa nyengo zose, ndipo ŵanji ŵakuteŵetera kweneuko kuli kusoŵa kukuru kwa ŵapharazgi. Usange tikurutiska pantazi mwacimwemwe vyakukhumba vya Ufumu mu ntowa zinyake, tili na cisimikizgo kuti Yehova wazamuruwa cara mlimo withu na citemwa ceneico tikurongora cifukwa ca zina lake.—Ŵahebere 6:10-12.
Rutirizgani mu Nkongono za Yehova
20. Ni mwauli umo tingarongolera kuti tikugomezga nkongono za Yehova?
20 Mwakukhumbisiska na mtima wose, tiyeni tirongore kuti tikulindizga mwa Yehova ndipo tikugomezga nkongono zake. Tingacita mwanteura mwakugwiriskira ncito mwakufikapo vyakugaŵira vya kumzimu vyeneivyo iye wakupereka kwizira mwa “muzga wa magomezgeko.” (Mateyu 24:45) Sambiro la mpingo na la mwene la Mazgu gha Ciuta ndiposo mwakovwirika na vyakupharazga vya Cikristu, lurombo lwakufumira pasi pa mtima, covwiro cakumzimu kufuma ku ŵarara, ciyerezgero ciweme ca Ŵakristu ŵanyithu ŵakugomezgeka, na kutoramo cigaŵa mwakufikapo mu uteŵeti wa munda ni vintu vinyake ivyo vikukhozga ubali withu na Yehova ndipo vikutipa nkongono kuti tilutirizge uteŵeti withu wakupatulika.
21. Kasi ni mwauli umo ŵapostole Petros na Paulos ŵakarongorera kukhumbikwa kwa nkongono zakupika na Ciuta?
21 Mwambura kupwererako kantu za kutomboroka kwithu, Yehova wazamutikhozga kuti ticite khumbo lake usange tikugomezga pa iye cifukwa ca covwiro. Kumanya za covwiro ico, mpostole Petros wakalemba kuti: “Usange muntu wakuteŵeta, wateŵetenge nga ndi wali na nkongono izo Ciuta wakupa.” (1 Petros 4:11) Ndiposo Paulos wakarongora kugomezgeka kwake pa nkongono izo wakapika na Ciuta penepapo wakayowoya kuti: “Nkukondwa mu vyakutomboroka, mu vyakusunjizga, mu vyakusokweska, mu vyakuzikizga, mu vyakufinyirizga, cifukwa ca Kristu: cifukwa penepapo ndiri wakutomboroka, apo ndipo ndiri wa nkongono.” (2 Ŵakorinte 12:10) Tiyeni tirongore cisimikizgo cakuyana waka na kwiziska ucindami kwa Fumunkuru Yehova, mweneuyo wakukhozga ŵakulopwa.—Yesaya 12:2.
[Mazgu ghamusi]
a Mu mafigara, ciŵerengero ici ni 1 na maziro 20.
b Ghakupharazgika na Watch Tower Bible and Tract Society of New York, Inc.
Kasi Mungazgora Wuli?
• Ncifukwa wuli ŵantu ŵa Yehova wakukhumbikwira nkongono zakuruska?
• Kasi pali ukaboni wuli wa m’Malemba wakuti Ciuta wakukhozga ŵateŵeti ŵake?
• Kasi ni manozgero wuli agho Yehova wapanga kuti ghatikhozge?
• Ni mwauli umo tingarongolera kuti tikugomezga nkongono za Ciuta?
[Mafumbo]
[Cithuzithuzi pa peji 22]
Ubwezi withu na Yehova ukukhozgeka peneapo tikugwiriskira ncito Baibolo kusambizgira ŵanji