Iŵani Ŵakufiskika na Ŵakukhozgeka

“[Iye] wakulimba-limba mu malurombo ghake nyengo zose cifukwa ca imwe, kuti muŵe ŵakufiskika na ŵakukhozgeka mu khumbo lose la Ciuta.”—ŴAKOLOSE 4:12.

1, 2. (a) Ni mazgu wuli agho ŵantu ŵambura kupulikana ŵakayowoya ghakukhwaskana na Ŵakristu ŵakutendekera? (b) Ndi mwauli umo buku la Ŵakolose likulongosolera citemwa?

 ŴARONDEZGI ŵa Yesu ŵakaŵa ŵakukondweskeka comene na ŵasopi ŵanyawo. Tertullian (mulembi wa makani wa mu virimika vya mu handiredi laciŵiri na citatu C.E.) wakalemba za wezi uwo ŵasambiri aŵa ŵakarongoranga ku ŵana ŵaranda, ŵakavu na ku ŵacekuru. Kacitiro ka citemwa aka kakapangiska kuti ŵantu ŵambura kupulikana ŵatoreke mtima comene mwakuti ŵanji ŵa iwo ŵakayowoya za Ŵakristu kuti, ‘Awonani umo ŵakutemwerana.’

² Buku la Ŵakolose likulongora citemwa canteura ico, ceneico Paulos na Epafra ŵakacilongora ku ŵabali na ŵadumbu ŵa ku Kolose. Paulos wakaŵalembera iwo kuti: Epafra “wakulimba-limba mu malurombo ghake nyengo zose cifukwa ca imwe, kuti muŵe ŵakufiskika na ŵakukhozgeka mu khumbo  lose la Ciuta.” Mu cirimika cose ici ca 2001, lemba la cirimika la Ŵakaboni ŵa Yehova liŵenge la Ŵakolose 4:12: ‘Iŵani ŵakufiskika na ŵakukhozgeka mu khumbo lose la Ciuta.’

3. Kasi vintu viŵiri ivyo Epafra wakaromba vikaŵa vivici?

³ Namwe mungawona kuti malurombo gha Epafra ghakurombera ŵakutemweka ŵake ghakaŵa na vigaŵa viŵiri: (1) kuti iwo ‘ŵaŵe ŵakufiskika’ ndiposo (2) kuti ŵaŵe “ŵakukhozgeka mu khumbo lose la Ciuta.” Cimanyisko ici cilimo mu Malemba kuti ise tisange naco candulo. Anteura jifumbani imwe mwaŵene kuti, ‘Ncici ico ine nkukhumbikwira kuti niŵe wakufiskika na wakukhozgeka mu khumbo lose la Ciuta? Ndipo peneapo nkucita nteura, kasi cakufumapo cake cizamuŵa civici?’ Tiyeni tiwone.

Yezgayezgani ‘Kuŵa Ŵakufiskika’

4. Ni mwang’anamuro wuli ilo Ŵakolose ŵakeneranga kuŵa “ŵakufiskika”?

⁴ Epafra wakakhumbisiska comene kuti ŵabali na ŵadumbu ŵake ŵa kumzimu ŵa mu Kolose ‘ŵaŵe ŵakufiskika.’ Lizgu ilo lagwiriskirika ncito na Paulos, ilo pano lang’anamurika “ŵakufiskika,” lingang’anamura ukongorekwa, kukura kwakufikapo, panji urara. (Mateyu 19:21; Ŵahebere 5:14; Yakobe 1:4, 25) Namwe mukumanya kuti para muntu wabapatizika kuŵa Kaboni wa Yehova kuti kukumupangiska iye kuŵa Mkristu wakukhoma cara. Paulos wakalembera kalata Ŵaefeso awo ŵakakhalanga kuzambwe kwa Kolose kuti ŵaliska na ŵasambizgi ŵayezgeyezge kovwira ‘wose kufika ku umoza wa cilindizga, na wa kamanyiro ka Mwana wa Ciuta, ku muntu wakufikapo, ku ciyezgero ca msinku wa uzali wa Kristu.’ Mu cakulembeka cinyake Paulos wakaciska Ŵakristu kuti ‘mu mahara ŵaŵenge ŵakukhoma.’—Ŵaefeso 4:8-13; 1 Ŵakorinte 14:20.

5. Ndi mwauli umo tingapangira kufiskika kuŵa cakulata cithu cikuru?

⁵ Usange ŵanji mu Kolose ŵakaŵa ŵandakule kumzimu, panji kuŵa ŵakufikapo, iwo ŵakeneranga kuti ŵakule. Kasi umu ndimo vikwenera kuŵira na ise yayi? Kwali tikabapatizika virimika vyakujumpa pa khumi kunyuma uku, panji tabapatizika sono-sono apa, kasi tikujiwona kuti taruta pantazi mu kaghanaghaniro na mu kapangiro ka fundo zithu? Kasi tikughanaghanira marango gha Baibolo pambere tindapange vyakusanka? Kasi nkani zakukhwaskana na Ciuta na mpingo zicali zakuzirwa mu umoyo withu, panji tayamba kucita mwa cizgoŵi waka? Tingazunula vigaŵa vyose cara ivyo tingajisanda kuti tiwone usange tikukura mwakufikapo, kweni aghanaghanirani viyerezgero viŵiri ivi.

6. Kasi ncigaŵa wuli ico yunji wangagwirirapo ncito kuti waŵe wakufikapo nga ndi umo Yehova waliri?

⁶ Ciyerezgero cakudanga: Tiyerezgere kuti mwakulira ku malo uko ŵantu ŵakusankana mitundu panji uko ŵantu ŵakutinkana na ŵa fuko linyake, ŵa caru cinyake na ŵa cigaŵa cinyake. Kweni sono tikumanya kuti Ciuta ndi murumbacisko cara ndipo ise nase tikwenera kumurondezga. (Milimo 10:14, 15, 34, 35) Mu mpingo panji mu cigaŵa cithu muli ŵanji ŵa fuko linyake, anteura tili nawo lumoza. Anteura, kasi tikutinka ŵantu ŵa fuko ilo panji tikughanaghanira viheni ŵantu ŵa fuko ilo? Kasi ndise  ŵampindano, tikutinka mwaluŵiro usange muntu wa fuko linyake wabuda panji usange watibudira pacoko waka? Jifumbani kuti, ‘Kasi nkukhumbikwira kupanga masintiro ghakuru kuti niŵe na kawonero kambura kurumbacisko ako Ciuta wali nako?’

7. Kuŵa Mkristu wakufikapo kukunjizgamo vici vyakukhwaskana na ŵanji?

⁷ Ciyerezgero caciŵiri: Mwakuyana na Ŵafilipi 2:3, tikwenera cara “kucita kantu mu mpindano panji mu kujikuzga, kweni na mtima wa kujiyuyura muntu yose wapime munyake ndi mukuru wakuruska mwene.” Kasi tikucita wuli pa cigaŵa ici? Muntu waliyose wali na mikhaliro yiweme na yiheni. Usange cizgoŵi cithu cikaŵa ca kusanga luŵiro vifukwa pa ŵanji, kasi tasinta, kasi taleka kuŵalindizga iwo kuti ŵacite nga ndi muntu “wakufikapo”? (Yakobe 3:2) Panyengo yasono, mwakupambana na kale, kasi tikulaŵiska—panji tikupenjerezga ntowa izo ŵanji ŵakutiruska? ‘Nkhwenera kuzomerezga kuti mudumbu uyu wakuniruska pakuzizipizga.’ ‘Muntu uyu wakuwoneka kuti wali na cipulikano cakukhora comene.’ ‘Kuyowoya unenesko, iye ndi musambizgi muweme comene kuruska ine.’ ‘Mudumbu uyu wakuniruska pakujikora.’ Mutepanji Ŵakolose ŵakakhumbikwiranga kusinta mu vigaŵa ivi. Kasi ise tasinta?

8, 9. (a) Kasi Epafra wakang’anamurangaci peneapo wakarombera Ŵakolose kuti ‘ŵaŵe’ ŵakufiskika? (b) ‘Kuŵa ŵakufiskika’ cikang’anamuraci pakuyowoya za kuntazi?

⁸ Epafra wakarombera Ŵakolose kuti ‘ŵaŵe ŵakufiskika.’ Mwapakweru, Epafra wakarombanga kwa Ciuta kuti pa ukuru uwo iwo ŵakaŵira ŵakufiskika, ŵakukhoma, Ŵakristu ŵakufikapo, iwo ŵakeneranga ‘kuŵa’ nteura, panji kukhalirira nteura.

⁹ Tingaghanaghaniranga waka kuti waliyose uyo wazgoka Mkristu, nanga wangaŵa uyo ndi murara kale, wangarutirizga kuŵa wakufiskika cara. Yesu wakayowoya kuti mwana yunji wa Ciuta, uyo wakaŵa mungelo, ‘wakimirira mu unenesko cara.’ (Yohane 8:44) Mwakusazgirapo, Paulos wakakumbuska Ŵakorinte za ŵanji awo kale ŵakateŵetera Yehova kwa nyengo yitali kweni panyuma pake ŵakatondeka. Iye wakacenjezga ŵabali ŵakuphakazgika kuti: “Uyo wakuti wakwima wacenjere mzire wangawa.” (1 Ŵakorinte 10:12) Mazgu agha ghakurongora kuzirwa kukuru kwa lurombo lwakuti Ŵakolose ‘ŵaŵe ŵakufiskika.’ Para ŵaŵa ŵakufiskika, ŵakufikapo, iwo ŵakeneranga kulimbikira, kuleka kuwelera nyuma, kuleka kuvuka, panji kuyungwayungwa. (Ŵahebere 2:1; 3:12; 6:6; 10:39; 12:25) Mwanteura iwo ŵakeneranga kuŵa “ŵakufiskika” mu zuŵa lawo la kuyezgeka mwakuti ŵaŵe ŵakuzomerezgeka.—2 Ŵakorinte 5:10; 1 Petros 2:12.

10, 11. (a) Nciyerezgero wuli ico Epafra watipa cakukhwaskana na lurombo? (b) Mwakuyana na ico Epafra wakacita, ncakusanka wuli ico imwe mukukhumba kupanga?

¹⁰ Tadumbiskana kale za kuzirwa kwa kupemperera ŵanji, kuŵa ŵakudunjika pakumupempa Yehova kuti waŵawovwire iwo, waŵapembuzge, waŵatumbike ndiposo na kuŵapa mzimu mutuŵa. Malurombo gha Epafra gha ku Ŵakolose ghakaŵa ghanteura agho. Ise nase tingacita mwanteura pera—tiyeni ticite nteura—mu lurombo ulo taŵazga, sanganimo mazgu agho mungayowoya kwa Yehova peneapo mukuromba. Mwambura kukayika, cakulata cithu cikwenera kupemperera covwiro ca Yehova kuti waliyose payekha ‘waŵe wakufiskika.’ Kasi mukucita nteura?

¹¹ Mwalekeraci kuti muyowoye za ukhaliro winu mu lurombo? Muphalirani Ciuta za kuruta pantazi uko mwapanga kuti muŵe “ŵakufiskika,” ŵakufikapo na ŵakukhwima. Mupempeni iye kuti wamovwirani kumanya vigaŵa ivyo mukukhumbikwira kukura kumzimu. (Salmo 17:3; 139:23, 24) Mwaunenesko, muli na vigaŵa vyanteura ivyo. Mu malo mwakugongoweskeka cifukwa ca ivi, muphalirani Ciuta vyose vya ku mtima winu, rombani covwiro kuti murute pantazi. Rombani kwa nyengo zinandi. Ntena mwapanga cakusanka cakuti sabata yakurondezgapo iyi muzakarombe kwa nyengo yitaliko kuti ‘muzakaŵe ŵakufiskika.’ Ndipo simikizgani kucita nteura mwakurutirizga peneapo mukughanaghanira za lemba la cirimika cino. Mu malurombo ghinu, zunurani vizgoŵi ivyo vingamupangiskani kuti muwelere nyuma, kuvuka na kuleka uteŵeti wa Ciuta, ndipo rombani umo mungatceŵera kucita nteura.—Ŵaefeso 6:11, 13, 14, 18.

Pemperani Kuti Mukhozgeke

12. Ncifukwa wuli Ŵakolose ŵakakhumbikwiranga nadi kuŵa “ŵakukhozgeka”?

¹² Epafra wakarombaso za cintu cinyake ico cikaŵa cakuzirwa comene kuti Ŵakolose ŵaŵe na kimiro kakuzomerezgeka na Ciuta. Ico ncakuzirwaso na kwa ise wuwo. Kasi ico cikaŵa civici? Iye wakaromba kuti iwo ŵakeneranga kuŵa “ŵakukhozgeka mu khumbo lose la Ciuta.” Mu nyengo yawo mukaŵa visambizgo vyautesi na mafilosofe ghaheni, ndipo  ghanji mwa igho ghakahenipiskanga kusopa kwaunenesko. Mwaciyerezgero, iwo ŵakakoserezgeka kuti ŵakumbukirenge mazuŵa ghanji mwakuziŵizga kurya panji mwakunozga ciphikiro, nga ndi umo vikaŵira mu cisopo ca Ciyuda. Ŵasambizgi ŵatesi ŵakaŵika cididimizgo pa kusopa ŵangelo, vilengiwa vyankongono vya kumzimu ivyo vikagwiriskirika ncito pakupereka Dango kwa Moses. Aghanaghanirani waka za kucicizgika uko ŵakakumana nako! Pakaŵa maghanoghano ghanandi ghakutimbanizga.—Ŵagalatiya 3:19; Ŵakolose 2:8, 16-18.

13. Ni fundo wuli iyo Ŵakolose ŵakakhumbikwiranga kuyimanya kuti ŵasange candulo, ndipo ndi mwauli umo iyo yingatovwiliraso nase?

¹³ Paulos wakayowoya mwakudidimizga za ncito ya Yesu Kristu. “Umo mukamupokerera Kristu Yesu Fumu, ndimo mwenderenge mwa iyo, pakupandika na kuzengeka mwa Iyo, na kwimikika mu cipulikano cinu, nga ndi umo mukasambizgikira.” Inya, pakaŵa kukhumbikwa (ku Ŵakolose na ise wuwo) kwa kuŵa ŵakukhozgeka pakuyowoya za ncito ya Kristu mu vilato vya Ciuta na mu umoyo withu. Paulos wakalongosora kuti: “Mwa iyo kukukhalirira mu thupi uzali wose wa Ciuta, ndipo imwe muli ŵakukongora mwa iyo, mweneuyo ndi mutu wa ufumu wose na mazaza.”—Ŵakolose 2:6-10.

14. Ncifukwa wuli cilindizga cikaŵa cintu cakusimikizgirika ku awo ŵakaŵa mu Kolose?

¹⁴ Ŵakolose ŵakaŵa Ŵakristu ŵakuphakazgika na mzimu. Iwo ŵakaŵa na cilindizga capadera comene ca kukakhala na umoyo kucanya, ndipo ŵakeneranga kuŵaliska cilindizga cawo. (Ŵakolose 1:5, NW) Likaŵa ‘khumbo la Ciuta’ lakuti iwo ŵaŵe ŵakukhozgeka pakuyowoya za kusimikizgirika kwa cilindizga cawo. Kasi iwo ŵakeneranga kukayika za cilindizga ico? Cara nkanira! Kasi vingapambanaso na mu nyengo yithu yino pakuyowoya za wose awo ŵali na cilindizga cakufuma kwa Ciuta ca kukhala na umoyo mu paradiso pa caru capasi? Cara nadi! Cilindizga cakusimikizgirika ici ncigaŵa ca ‘khumbo la Ciuta.’ Sono aghanaghanirani za mafumbo agha: Usange mukuyezgayezga kuti muŵe yumoza wa “mzinda ukuru” uwo uzamupona “suzgo yikuru,” kasi cilindizga cinu ncakusimikizgirika nadi? (Civumbuzi 7:9, 14) Kasi ico ncigaŵa ca ‘kukhozgeka kwinu mu khumbo lose la Ciuta’?

15. Ni fundo wuli izo Paulos wakalongosora zeneizo zikukhwaska cilindizga?

¹⁵ Para tikuti “cilindizga” kuti tikung’anamura khumbo labwekabweka panji malanguruko waka cara. Tingawona ici mu fundo zakupambana-pambana izo Paulos wakaziyowoya ku Ŵaroma. Mu fundo izo, cilicose ico wakacizunura ncakukolerana na fundo yakulondezgapo. Tegherezgani kuti muwone umo Paulos wakulongosolera “cilindizga” mu mazgu ghake: ‘Tisekerere na mu visuzgo vyitu wuwo: uku tikumanya kuti suzgo likucitiska citatata; ndipo citatata cikucitiska cikhomeska-mtima; ndipo cikhomeska-mtima cikucitiska cilindizga: ndipo cilindizga kuti cikulengeska cara; pakuti kutemwa kwa Ciuta kwapungulikira mu mitima yitu na mzimu mutuŵa.’—Ŵaroma 5:3-5.

16. Panyengo iyo mukasambiranga unenesko wa Baibolo, ncimanyisko wuli ico mukasanga?

¹⁶ Panyengo yakwamba apo Ŵakaboni ŵa Yehova ŵakapharazga kwa imwe uthenga wa mu Baibolo, mutepanji pakaŵa fundo yinyake iyo yikamukondweskani, panyake yikaŵa fundo yakuyowoya za ukhaliro wa ŵantu ŵakufwa panji ciwuka. Ku ŵantu ŵanandi, fundo yakudanga iyo yikaŵakondweska yikaŵa yakuyowoya za unenesko wakuzakakhala na umoyo mu paradiso pa caru capasi. Kumbukirani nyengo yakwamba iyo mukapulikira cisambizgo ici. Mwee, nawo mbuweme wa cilindizga ici—urwari na ucekuru kuzamuŵavya, muzamusangwa na ncito izo muzamugwira, ndiposo kuzamuŵaso mtende na vinyama! (Mupharazgi 9:5, 10; Yesaya 65:17-25; Yohane 5:28, 29; Civumbuzi 21:3, 4) Mukasanga cilindizga cakuzirwa comene!

17, 18. (a) Ndi mwauli umo vintu ivyo Paulos wakaphalira Ŵaroma vikurongozgera ku cilindizga? (b) Kasi ndi mtundu wuli wa cilindizga uwo walongosoleka pa Ŵaroma 5:4, 5, ndipo kasi imwe muli nawo wanteura uwo?

¹⁷ Mukuruta kwa nyengo, mwambura kukayika mukakumana na ntambuzgo. (Mateyu 10:34-39; 24:9) Nanga kungaŵa mu nyengo zino, nyumba za Ŵakaboni mu vyaru vyakupambana-pambana zapokeka mwakucicizga, panji ŵacicizgikaso kucimbira na kukakhala mu vyaru vinyake. Ŵanji ŵatcayika, mabuku ghawo ghakurongosora Baibolo ghapokeka na boma, panjiso ŵaneneka mu manyuzipepala na pa wayilesi. Kwali ndi ntambuzgo wuli iyo mwakumanapo nayo, nga ndi umo Ŵaroma 5:3 ŵakuyowoyera, mungaŵa kuti mukasekerera mu visuzgo, ndipo ici cili kwiziska cakufumapo ciweme. Nanga kungaŵa umo Paulos wakalembera, visuzgo vikapangiska kuti muŵe ŵakuzizipizga. Panyuma pake kuzizipizga kukapangiska kuti muŵe na ukhaliro uweme. Mukamanya kuti ico mukacitanga  cikaŵa ciweme, mukacitanga khumbo la Ciuta, anteura mukaŵa ŵakusimikizga kuti muli na kimiro kakuzomerezgeka na iye. Mu mazgu agho Paulos wakayowoya, mukamanya kuti muli na “kimiro kakuzomerezgeka.” (NW) Mwakusazgirapo, Paulos wakalemba kuti ‘kimiro kakuzomerezgeka [kakwiziska] cilindizga.’ Mutepanji mungazizwa na mazgu agha. Ncifukwa wuli Paulos wakazunura ‘cilindizga’ mu mazgu ghake? Kasi pakudanga mukaŵavya cilindizga, apo mukapulika makani ghaweme kwa nyengo yakwamba?

¹⁸ Mwapakweru, Paulos kuti wakang’anamuranga za umo tikajipulikira pakwamba pakuyowoya za cilindizga ca umoyo wa ukongorekwa cara. Ng’anamuro lake likaŵa lakuruska apo, ndikuru comene ndipo cilindizga ici cingatipangiska kucita vinandi. Peneapo tikuzizipizga mwakugomezgeka ndiposo tikumanya kuti tili na kimiro kakuzomerezgeka na Ciuta, cilindizga  cithu ico tikaŵa naco pakwambilira cikukhozgeka comene nkanira. Cilindizga ico cikuŵa nadi ceneko, ndiposo cikuŵa cakukhora. Cilindizga cakukhora ici cikuŵara comene nkanira. Ico cikuwonekera mu umoyo withu na mu mikhaliro yithu yose. ‘Cilindizga kuti cikulengeska cara; pakuti kutemwa kwa Ciuta kwapungulikira mu mitima yitu na mzimu mutuŵa.’

19. Ndi mwauli umo tingapangiskira cilindizga cithu kuŵa cigaŵa ca malurombo ghithu?

¹⁹ Epafra wakaromba mwakufumira pasi pa mtima kuti ŵabali na ŵadumbu ŵake ŵa mu Kolose ŵapwererere na kusimikizgira za ico cikaŵa pantazi pawo, mwakuŵa “ŵakukhozgeka mu khumbo lose la Ciuta.” Mwakuyana waka, waliyose wa ise wakwenera kupempera kwa Ciuta za cilindizga cithu. Mu malurombo ghinu gha ku udesi, rombani za cilindizga cinu ca kuzakakhala mu caru cipya. Muphalirani Yehova za umo mukunwekera kuzakaciwona, iŵani na cigomezgo cose cakuti cizenge. Mupempeni kuti wamovwirani kukuzga na kukhozga cilindizga cinu. Nga ndi umo Epafra wakapemperera Ŵakolose kuti ŵaŵe “ŵakukhozgeka mu khumbo lose la Ciuta,” imwe namwe citani mwanteura. Citani mwa nyengo zose.

20. Usange ŵanji ŵaleka kuŵa Ŵakristu, ncifukwa wuli tikwenera kutceŵa kugongoweskeka?

²⁰ Mungaweleranga nyuma panji kugongoweskeka cara cifukwa ni wose cara ŵakuŵa ŵakufiskika na ŵakukhozgeka. Ŵanji ŵangatondeka, ŵangapatukira kumpepete panji ŵangaleka waka. Ici cikacitika pakati pa ŵantu awo ŵakendezgananga na Yesu, ŵapostole ŵake. Kweni apo Yuda wakazgoka wakwendera mpiska, kasi ŵapostole ŵanyake ŵakagongoweskeka panji ŵakaleka? Ŵakaleka cara! Paulos wakazunura fundo iyo yili pa Salmo 109:8 kuti walongore kuti yunji wakeneranga kutora malo gha Yuda. Wakunjira mu malo ghake wakasankika, ndipo ŵantu ŵa Ciuta ŵamagomezgeko aŵa ŵakarutirizga ncito yawo yakupharazga. (Milimo 1:15-26) Iwo ŵakaŵa ŵakusimikizga kuti ŵaŵe ŵakufiskika na ŵakukhozgeka.

21, 22. Ni mwa ntowa wuli iyo kuŵa kwinu ŵakufiskika na ŵakukhozgeka kuzamumanyikwira?

²¹ Simikizgirani kuti kuŵa kwinu ŵakufiskika na ŵakukhozgeka mu khumbo lose la Ciuta kukumanyikwa. Kuzamumanyikwa na kuwongeka. Na njani?

²² Eya, ŵabali na ŵadumbu ŵinu awo ŵakumumanyani na kumutemwani ŵazamumanya. Nangauli kungaŵa kwakuti ŵanandi ŵa iwo ŵangayowoya yayi pakweru, kweni cakufumapo cake cizamuyana na ico tikuŵazga pa 1 Ŵatesalonika 1:2-6: “Tikuwonga Ciuta mazuŵa ghose cifukwa ca imwe mose, na kumuzunulani mu malurombo ghitu; uku tikukumbuka kwambura kureka pantazi pa Ciuta witu na Ŵadada mulimo winu wa cipulikano, na kutokatoka kwinu kwa kutemwa, na kuzizipizga kwa cigomezgo mu Fumu yitu Yesu Kristu; pakuti . . . ivangeli litu kuti likiza kwa imwe mu mazgu pera cara, kweni mu nkongono wuwo, na mu mzimu mutuŵa, na mu uconteko ukuru . . . ndipo imwe mukaŵa ŵakurondezga ise na Fumu.” Ŵakristu ŵakugomezgeka awo ŵakumumanyani nawo ŵangayowoya mwanteura peneapo ŵakumuwonani kuti muli “ŵakufiskika na ŵakukhozgeka mu khumbo lose la Ciuta.”—Ŵakolose 1:23.

23. Ncici ico cikwenera kuŵa cisimikizgo cinu mu cirimika cose ici?

²³ Mwaunenesko, Ŵadada ŵinu ŵakucanya ŵakuwona ndiposo mbakukondwa. Simikizgirani za ici. Cifukwa wuli? Cili cifukwa cakuti muli ŵakufiskika na ŵakukhozgeka “mu khumbo lose la Ciuta.” Paulos wakalembera kalata Ŵakolose kuti ‘ŵendenge kwakwenerera Fumu na kuyikondweska kose kose.’ (Ŵakolose 1:10) Inya, ncamacitiko kuti ŵantu ŵambura ukongorekwa ŵamukondweske Ciuta mwakufikapo. Ŵabali na ŵadumbu ŵinu ŵa ku Kolose ŵakacita mwanteura. Ŵakristu awo mukwendezgana nawo ŵakucita mwanteura. Imwe namwe mungacita mwanteura! Anteura, mu cirimika cose ici mpanyi malurombo ghinu na nkaro yinu ya zuŵa na zuŵa vyarongora kuti muli ŵakusimikizga kuti muli “ŵakufiskika na ŵakukhozgeka mu khumbo lose la Ciuta.”

Kasi Mungakumbukira?

• Ncici ico cikunjizgikamo ‘mwakuŵa kwinu ŵakufiskika’?

• Ni vintu wuli vya imwe mwaŵene ivyo mukwenera kuyowoya mu lurombo lwinu?

• Nga ndi umo kwasacizgikira pa Ŵaroma 5:4, 5, kasi ncilindizga wuli ico imwe mukukhumba kuŵa naco?

• Kasi sambiro lithu lamukhuŵirizgani kuti muŵe na cilato wuli mu cirimika cino?

[Mafumbo]

[Cithuzithuzi pa peji 13]

Epafra wakapemperera ŵabali ŵake kuti ŵaŵe ŵakufiskika na ŵakukhozgeka pakuyowoya za Kristu na cilindizga cawo

[Vithuzithuzi pa peji 16]

Cilindizga cinu cakusimikizgirika na cigomezgo cinu cikuru viriso na ŵantu ŵanji mamiliyoni