Kasi Citemwa Cinu Ncikuru Wuli?
Kasi Citemwa Cinu Ncikuru Wuli?
“Utemwenge munyako nga ndi wamwene.”—MATEYU 22:39.
1. Usange tikumutemwa Yehova, ncifukwa wuli tikweneraso kutemwa ŵanyithu?
PENEAPO Yesu wakafumbika za dango likuru, iye wakazgora kuti: “Utemwenge Yehova Ciuta wako na mtima wako wose, na mzimu wako wose, na vinjeru vyako vyose.” Ndipo wakayowoyaso za dango laciŵiri lakuyana na lakwamba leneilo likuti: “Utemwenge munyako nga ndi wamwene.” (Mateyu 22:37, 39) Enya, kutemwa munyako ncimanyikwiro ca Mkristu. Ndipouli, usange tikumutemwa nadi Yehova, tikweneraso kutemwa ŵanyithu. Cifukwa wuli? Cifukwa tikurongora citemwa cithu pa Ciuta mwa kupulikira Mazgu ghake, ndipo Mazgu ghake ghakutilangura kuti titemwenge ŵanyithu. Mwanteura, usange tikutemwa cara ŵabali na ŵadumbu ŵithu, citemwa cithu pa Ciuta cingaŵa canadi cara.—Ŵaroma 13:8: 1 Yohane 2:5; 4:20. 21.
2. Kasi tikwenera kurongora citemwa ca mtundu wuli ku ŵanyithu?
2 Peneapo Yesu wakayowoyanga kuti tikwenera kutemwa ŵanyithu, iye wakang’anamuranga vinandi kuruska kuŵa waka paubwezi. Iye wakayowoyanga za citemwa ico ncakupambana na ico cikuŵapo mu zimbumba panji pakati pa mwanarumi na mwanakazi. Iye wakayowoyanga za mtundu wa citemwa uwo Yehova wali nawo pa ŵateŵeti ŵake ŵakujipereka ndiposo citemwa ico iwo ŵali naco pa iye. (Yohane 17:26; 1 Yohane 4:11, 19) Mulembi wa Ciyuda—nga ni umo Yesu wakamumanyira, wakayowoya mwamahara—iye wakakolerana na Yesu kuti tikwenera kutemwa Ciuta ‘na mtima withu wose, na vinjeru vithu vyose, na nkongono zithu zose.’ (Marko 12:28-34) Iye wakaneneska. Citemwa ico Mkristu wakuŵa naco pa Ciuta na pa ŵanyake cikunjizgamo mahara na kaghanaghaniro kake. Cikucitika kufumira mu mtima na kurongozgeka na maghanoghano.
3. (a) Ni mwauli umo Yesu wakamusambizgira “Mumanyi-marango” kuti wakwenera kumumanya makora uyo ni mzengezgani wake? (b) Kasi ntharika ya Yesu yikugwira wuli ncito ku Ŵakristu mazuŵa ghano?
3 Nga ni umo Luka wakayowoyera, apo Yesu wakayowoyanga kuti tikwenera kutemwa mzengezgani withu, “Mumanyi-marango yunji” wakafumba kuti: ‘Kasi mzengezgani wane ndi njani?’ Yesu wakazgora na ntarika. Mwanarumi munyake wakatimbika, kupokeka katundu wake ndipo ŵakamusida wakhala pa singo pera. Pa kwamba musofi ndipo panyuma pake Mulevi ŵakajumpa mu ntowa iyo. Kweni wose ŵaŵiri ŵakamuleka waka. Paumaliro, Musamariya wakizanga, wakawona mwanarumi wakupwetekeka uyu, ndipo wakamulengera lusungu. Kasi ni njani mwa ŵantu ŵatatu aŵa wakaŵa mzengezgani wa muntu wakupwetekeka uyu? Zgoro likaŵa lakumanyikwirathu. (Luka 10:25-37) Mumanyi-marango wakazizwa apo wakapulika kwa Yesu kuti Musamariya ndiyo wangaŵa mzengezgani muweme kuruska musofi na Mulevi. Mwakuwonekerathu, Yesu wakavwiranga muntu yura kuti watemwenge ŵanyake mu ntowa yikuru comene. Ŵakristu nawo ŵakurongora citemwa mwakuyana waka. Aghanaghanani za wose awo ŵakuŵalongora citemwa.
Citemwa ca mu Mbumba
4. Ni nku uko Mkristu cakwamba wakurongora citemwa?
4 Ŵakristu ŵakutemwa viŵaro vya mbumba yawo—ŵawoli ŵakutemwa ŵafumu ŵawo, ŵafumu ŵakutemwa ŵawoli ŵawo, ŵapapi ŵakutemwa ŵana. (Mupharazgi 9:9; Ŵaefeso 5:33; Tito 2:4) Mu mbumba zinandi muli citemwa cakubabika naco. Ndipouli, malipoti ghakuphara za kumara kwa zintengwa, kuyuzgika kwa mbumba, na kupata panji kusuzga ŵana ghakurongora kuti mbumba zili pa suzgo yikuru comene mazuŵa ghano, ndipo citemwa ceneco cakawiro ca mu mbumba cikukwanira cara kuti cimazge vyose ivi. (2 Timote 3:1-3) Kuti mbumba zawo ziŵe na cimwemwe, Ŵakristu ŵakwenera kurongora citemwa ca nga ni ico Yehova na Yesu ŵali naco.—Ŵaefeso 5:21-27.
5. Kasi ŵapapi ŵakwenera kulaŵiska kwa njani cifukwa ca covwiro cakuti ŵalere ŵana ŵawo, ndipo ŵanandi ŵaŵa na vyakufumapo wuli?
5 Ŵapapi Ŵacikristu ŵakuwona ŵana ŵawo nga ni cuma cakuzirwa cakufuma kwa Yehova, ndipo ŵakulaŵiska kwa iye cifukwa ca covwiro pa kuŵalera. (Salmo 127:3-5; Zintharika 22:6) Mu ntowa iyi ŵakukuzga citemwa ca Cikristu, ico cikovwira kuti ŵavikilire ŵana ŵawo ku maluso ghaheni agho ŵana ŵangakumana nagho. Nga ncakufumapo cake, ŵapapi ŵanandi Ŵacikristu ŵakusanga cimwemwe ca nga ni ico mama wa ku Netherlands wakasanga. Panyuma pa kuwonelera kubapatizika kwa mwana wake musepuka—uyo wakaŵa yumoza mwa ŵantu 575 awo ŵakabapatizika ku Netherlands cirimika cajumpa—iye wakalemba mazgu agha: “Panyengo iyi, nalipirika pa ncito yane iyo nateŵeta kwa virimika 20. Nyengo yane yose na nkongono—ndiposo vyakuŵinya, kuyezgayezga, na citima—sono vyaruwika.” Iye ngwakukondwa comene cifukwa mwana wake wasanka kuteŵetera Yehova na mtima wake wose. Ciŵerengero ca ŵapharazgi awo ŵakapereka lipoti ku Netherlands cirimika cajumpa cikaŵa 31,089 kusazgapo ŵantu ŵanandi awo ŵakasambizgika na ŵapapi ŵawo kutemwa Yehova.
6. Ni mwauli umo citemwa ca Mkristu cikovwilira kukhozga cakukakira ca ntengwa?
6 Paulos wakayowoya kuti citemwa ‘ncakukakira ca ukongorekwa,’ ndipo cingasungilira mbumba nanga mungaŵa mu nyengo ya masuzgo. (Ŵakolose 3:14, 18, 19; 1 Petros 3:1-7) Peneapo mwanarumi munyake wa ku Rurutu, cirwa cicoko ico ciri pa mtunda wa makilomita 700 kufuma ku Tahiti, wakamba kusambira Baibolo na Ŵakaboni ŵa Yehova, muwoli wake wakamususka comene. Mukuruta kwa nyengo, muwoli wake wakatora ŵana, na kumuleka ndipo wakaruta kukakhala ku Tahiti. Kweni ndipouli, iye wakarutirizga kurongora citemwa mwa kumutumira muwoli wake makopara nyengo na nyengo ndiposo kumutimbira telefoni kuti wamanye usange pakaŵa vintu ivyo iye na ŵana ŵakakhumbanga. Mwanteura iye wakayezgayezga nadi kufiska mulimo wake wa Cikristu. (1 Timote 5:8) Iye wakarombanga nyengo zose kuti ŵazakaweleraneso, ndipo paumaliro pake muwoli wake wakawerako uko wakaruta. Peneapo muwoli wake wakati wiza, iye wakacita nayo ‘mwacitemwa, mwakuzizipizga, ndiposo mwakuzika.’ (1 Timote 6:11) Mu cirimika ca 1998, iye wakabapatizika ndipo wakaŵa na cimwemwe cikuru apo muwoli wake wakazomera kusambira Baibolo. Sambiro ilo likaŵa limoza mwa masambiro 1,351 agho ghakacitika mu cigaŵa ico cikalaŵilirika na muntavi wa Tahiti cirimika cajumpa.
7. Mwakuyana na mwanarumi wa ku Germany, ncici ico cikakhozga ntengwa yake?
7 Ku Germany mwanarumi munyake wakamukanizganga muwoli wake kusambira unenesko wa mu Baibolo cifukwa wakapusikika kuti Ŵakaboni ŵa Yehova ŵakakhumbanga kumunyenga muwoli wake. Ndipouli, mukuruta kwa nyengo, iye wakalembera kalata kwa Kaboni uyo wakakumana na muwoli wake pakwamba, yeneiyo yikaphara kuti: “Yewo comene cifukwa ca kumurongozgera muwoli wane ku Ŵakaboni ŵa Yehova. Pakudanga, nkaŵa na wofi cifukwa nili kupulika vintu viheni vinandi vyakukhwaskana na iwo. Kweni sono, apo nkasangikapo pa maungano na muwoli wane, nkapanikizga kuti nkabudanga. Nkumanya kuti sono nkupulika unenesko, ndipo wapangiska ntengwa yithu kuŵa yakukhora comene.” Ŵakaboni ŵa Yehova 162,932 ku Germany—na 1,773 mu virwa ivyo vikulaŵilirika na muntavi wa Tahiti—kusazgapo mbumba zinandi ŵakukolerana mu citemwa ca Ciuta.
Kutemwa Ŵabali Ŵithu Ŵacikristu
8, 9. (a) Ni njani uyo ŵakutisambizga kutemwa mbali withu, ndipo kasi citemwa cikuticiska kucitaci? (b) Perekani ciyerezgero cakulongora umo ŵabali ŵangawovwirirana.
8 Paulos wakaphalira Ŵakristu ŵa ku Tesalonika kuti: “Mwaŵene mukusambizgika na Ciuta kutemwana.” (1 Ŵatesalonika 4:9) Enya, awo ‘ŵakusambizgika na Yehova’ ŵakutemwana. (Yesaya 54:13) Citemwa cawo cikurongoreka mu milimo, nga ni umo Paulos wakarongorera peneapo wakayowoya kuti: “Teŵeterani mu kutemwa.” (Ŵagalatiya 5:13: 1 Yohane 3:18) Mwaciyerezgero, iwo ŵakucita ici apo ŵakucezgera ŵabali na ŵadumbu ŵarwari, kukhwimiska ŵakudonda mtima, na kukhozga ŵateciteci. (1 Ŵatesalonika 5:14) Citemwa cithu canadi ca Cikristu cikovwira kukuzga paradiso withu wakumzimu.
9 Mu mpingo wa Ancón—umoza wa mipingo 544 ku Ecuador—ŵabali ŵakarongora citemwa mu ntowa yiweme comene. Suzgo la makopara likapangiska kuti ciŵe cakusuzga kwa iwo kusanga ncito panji makopara, mwanteura ŵapharazgi ŵakaghanaghana za kusanga makopara mwa kuguliska vyakurya ku ŵalovi para ŵakafika kunyumba panyuma pa kuloŵa somba na usiku. Waliyose wakakoleranako na manozgero agha kusazgapo ŵana. Iwo ŵakambanga kuphika cakurya panyengo ya 1:00 a.m. mwakuti kuzakafika ca mu 4:00 a.m. apo ŵalovi ŵakuwerako ŵakaŵa kuti ŵamara kale kuphika. Makopara agho ŵabali ŵakasanga ŵakagaŵananga mwakuyana na vyakusoŵa vyawo. Kovwirana kwa nga ni uku kukarongora citemwa cawo ceneco ca Cikristu.
10, 11. Kasi tingalongora wuli citemwa ku ŵabali ŵeneawo tikuŵamanya cara?
10 Ndipouli, kuti tikurongora citemwa cithu ku Ŵakristu awo tikuŵamanya pera cara. Mpostole Paulos wakayowoya kuti: “Temwani ŵabali [wose, NW].” (1 Petros 2:17) Tikutemwa ŵabali na ŵadumbu ŵithu wose cifukwa iwo mbasopi ŵanyithu ŵa Yehova Ciuta. Nyengo za masuzgo zingapereka mwaŵi wakurongolera citemwa ici. Mwaciyerezgero, mu cirimika ca uteŵeti ca 2000, kututuka kwa maji kukasakaza vintu ku Mozambique, ndipo nkondo ya pa ŵene-naŵene ku Angola yapangiska ŵantu ŵanandi kukavuka. Ŵabali ŵanandi ŵakukwana 31,725 ku Mozambique ndiposo 41,222 ku Angola ŵakakhwaskika na vyakucitika ivi. Mwanteura, Ŵakaboni ŵa mu caru ca South Africa ŵatumizga katundu munandi kuti wakawovwire ŵabali ŵawo mu vyaru ivyo. Kunweka kwawo mwakupereka mu ‘uzali’ ku ŵabali ŵawo ŵakusoŵerwa kukarongora citemwa cawo.—2 Ŵakorinte 8:8, 13-15, 24.
11 Citemwa cikulongorekaso apo ŵabali mu vyaru vinandi ŵakupereka vyakupereka vyakuti vigwire ncito yakuzengera Nyumba za Ufumu na Nyumba Zakucitiramo Ungano mu vyaru ivyo nvikavu. Ciyerezgero ni Cirwa ca Solomon. Kwambura kupwererako kantu za masuzgo, ŵapharazgi mu Cirwa ca Solomon ŵakasazgikira na 6 peresenti cirimika cajumpa, ici nciŵerengero cikuru ca pacanya ca ŵapharazgi 1,697. Iwo ŵakakhumbanga Nyumba Yakucitiramo Ungano. Nangauli ŵantu ŵakacimbira mu caru ici, ŵabali ŵakujipereka ŵakiza kufuma ku Australia kuzakawovwira ncito yakuzenga. Mukuruta kwa nyengo ŵabali ŵakujipereka ŵakenera kuwelera kwawo, kweni pambere ŵandawere ŵakenera kusambizga ŵabali ŵa mu caru ico kuti ŵamalizge kuzenga lufura lwa nyumba. Visulo vyakuzengera Nyumba Yakucitiramo Ungano vikatumizgika kufuma ku Australia, ndipo nyumba yiweme yakusoperamo yikamara kuzengeka—panyengo iyo ŵantu ŵanandi ŵakatondekanga kumarizga vyakuzengazenga vyawo mu malo agho—uwu ukaŵa ukaboni uweme pa zina la Yehova na citemwa ico ŵabali ŵakalongora.
Nga ni Ciuta, Tikutemwa Ŵantu
12. Ni mwauli umo tikumuyezgera Yehova mu kacitiro kithu kurazga ku ŵantu awo tikupambana nawo cipulikano?
12 Kasi tikutemwa waka mbumba yithu na ŵabali ŵithu ŵakumzimu? Cara, ni ntena yayi usange tili “ŵakumuyezga Ciuta.” Yesu wakayowoya kuti: ‘Ciuta wakamanya kucitemwa caru, rekani wakapereka Kananda wake, mwakuti yose uyo wakupulikana nayo wareke kutayika, kweni waŵenge na umoyo wa muyirayira.’ (Ŵaefeso 5:1; Yohane 3:16) Nga ni Yehova Ciuta, tikutemwa ŵantu wose—kusazgapo awo tikupambana nawo cipulikano. (Luka 6:35, 36; Ŵagalatiya 6:10) Tikurongora citemwa para tikupharazga makani ghaweme gha Ufumu na kuphalira ŵanji za citemwa cikuru ico Ciuta wakurongora kwa iwo. Cakufumapo cake cingaŵa ciponosko ku awo ŵakutegherezga.—Marko 13:10; 1 Timote 4:16.
13, 14. Ni vyakukumana navyo wuli vya ŵabali awo ŵakarongora citemwa ku ŵantu ŵeneawo Mbakaboni cara, nangauli ŵakaŵa mu masuzgo ghakuru?
13 Aghanaghanirani za ŵapayiniya ŵapadera ŵanayi ku Nepal. Iwo ŵakagaŵirika cigaŵa ca kumwela ca kumanjiriro gha dazi mu caru ico, ndipo kwa virimika vinkondi ivyo vyajumpa iwo ŵalongora citemwa cawo mwakucitira ukaboni mwakuzizipizga mu msumba uwo na mu vikaya vya kutali. Kuti ŵakwaniriske cigaŵa cawo, iwo ŵakendanga maora ghanandi pa njinga ndipo malo agho ghakaŵa ghakuthukira comene kujumpa pa 40°C. Citemwa cawo “pakucita milimo yiweme” cikaŵa na vyakufumapo viweme apo sambiro la buku likakhazikiskika mu muzi umoza. (Ŵaroma 2:7) Mu March 2000, ŵantu 32 ŵakasangikapo pa nkani ya Baibolo yapakweru iyo yikadumbika na mlaŵiliri wa dera. Caru ca Nepal cikaŵa na ciŵerengero cikuru ca ŵapharazgi 430 cirimika cajumpa—kweneuko nkusazgikira kwa 9 peresenti. Yehova wakutumbika nadi kuyezgayezga na citemwa ca ŵabali ŵa mu caru ico.
14 Mu caru ca Colombia ŵapayiniya ŵapadera awo ŵakuteŵetera kwa nyengo yicoko yakugaŵirika ŵakaruta kukapharazga ku Ŵamwenye ŵa mtundu wa Wayuu. Kuti ŵacite ici, ŵakaneranga kusambira ciyowoyero cipya, kweni cilato cawo cacitemwa cikatumbikika apo ŵantu 27 ŵakasangikapo pa nkani yapakweru, mwambura kupwererako za vura yikuru iyo yikarokwanga. Kuyezgayezga kwa citemwa uko kukalongoreka na ŵapayiniya ŵapadera aŵa kukapangiska kuti ciŵerengero cisazgikire na 5 peresenti mu Colombia na ciŵerengero cikuru ca ŵapharazgi ŵakukwana 107,613. Ku Dernmark, mudumbu mucekuru wakakhumbanga kupharazga makani ghaweme ku ŵanji, kweni iye wakaŵa wakulemara. Mwambura kugongowa, iye wakapharazga ku ŵantu mwa kuŵalembera makalata. Panyengo yasono, iye wakudumbiskana na ŵantu 42 na kucitiska masambiro gha Baibolo 11. Iye njumoza wa ŵapharazgi 14,885 awo ŵakapereka lipoti mu Denmark cirimika cajumpa.
Temwani Ŵalwani Ŵinu
15, 16. (a) Kasi Yesu wakayowoya kuti citemwa cithu cikwenera kuŵa cikuru wuli? (b) Kasi ŵabali ŵakwenereskeka ŵakacita wuli na muntu uyo wakayowoyera utesi Ŵakaboni ŵa Yehova?
15 Yesu wakaphalira Mumanyi-marango kuti wakwenera kuwona Musamariya nga ni mzengezgani. Mu Cisambizgo cake ca pa Lupiri, Yesu wakalongosora kuti: “Mwapulika kuti kukaneneka, ‘Utemwenge mzengezgani wako, ndipo utinkenge mulwani wako.’ Kweni ine nkumunenerani, Temwani ŵalwani ŵinu, ndipo muŵarombere aŵo ŵakumuzikizgani; mwakuti muŵenge ŵana ŵa Ŵawiskemwe ŵa kucanya.” (Mateyu 5:43-45) Nangauli muntu watiwukire, tikuyezgayezga ‘kutonda uheni na uweme.’ (Ŵaroma 12:19-21) Usange ncamacitiko, tikugaŵana nayo cuma cithu cakuzirwa, unenesko.
16 Mu caru ca Ukraine nkani yinyake yikafuma mu nyuzipepala yakucemeka Kremenchuk Herald, kuphara kuti Ŵakaboni ŵa Yehova nkagulu kacigaruka. Ici cikaŵa cifukwa cakuti ku Europe ŵanji ŵakuyowoya mwanteura za Ŵakaboni ŵa Yehova kuti ŵakope ŵantu kuti milimo ya Ŵakaboni yikanizgike. Mwanteura, uyo wakalemba nkani iyi wakakapempheka kuti walembe cimanyisko ca kunyolorera nkani iyo. Iye wakazomera, kweni mu cimanyisko ico, iye wakalemba kuti nkani yakudanga yikaŵa yaunenesko. Mwanteura ŵabali ŵakwenereskeka ŵakamufikaso na cimanyisko cakusazgikira. Paumaliro, mulembi uyo wakamanya kuti nkani yakudanga yira yikaŵa yautesi, ndipo wakanyolorera. Iwo ŵakacita naye mwalusungu ndiposo mwakuzika, iyi yikaŵa ntowa yacitemwa yakumazgira nkani iyi, ndipo yikaŵa na vyakufumapo viweme.
Ni Mwauli umo Tingakuzgira Citemwa?
17. Ncici cikurongora kuti nyengo zose cingaŵa cipusu cara kurongora citemwa ku ŵanji?
17 Para mwana wababika, ŵapapi ŵake nyengo yeneiyo ŵakwamba kumutemwa. Kucita mwacitemwa na ŵarara nyengo zose kuti nkhwakawiro cara. Ndico cifukwa cake Baibolo mwakuwerezga-werezga likutiphalira kuti titemwanenge—ici ni cithu ico tikwenera kugwilirapo ncito. (1 Petros 1:22; 4:8; 1 Yohane 3:11) Yesu wakamanya kuti citemwa cithu cizamuyezgeka apo wakayowoya kuti tikwenera kugowokera ŵabali ŵithu “mpaka makumi ghankonde na ghaŵiri ghakwandaniskika kankonde na kaŵiri.” (Mateyu 18:21, 22) Paulos nayo wakuticiska kuti tiŵe ‘ŵakuzizipizgirana, na kugowokerana.’ (Ŵakolose 3:12, 13) Ndico cifukwa cake tikuphalirika kuti: ‘Tirondezge citemwa.’ (1 Ŵakorinte 14:1) Kasi tingacita wuli ici?
18. Kasi ncici ico cingatovwira kukuzga citemwa pa ŵanyithu?
18 Cakwamba, tikwenera kukumbukira za citemwa ico tili naco pa Yehova Ciuta. Citemwa ici cikucitiska mwankongono kuti titemwe ŵanyithu. Cifukwa wuli? Cifukwa para tikucita nteura, ici cikumukondweska nadi Dada withu wakucanya ndipo cikupereka ucindami na marumbo kwa iye. (Yohane 15:8-10; Ŵafilipi 1:9-11) Caciŵiri, tikwenera kuyezgayezga kuwona vintu nga ni umo Yehova wakuwonera. Nyengo yiliyose para tananga, tikunangira Yehova; kweni, nyengo na nyengo iye wakutigowokera ndipo wakurutirizga kutitemwa. (Salmo 86:5; 103:2, 3; 1 Yohane 1:9; 4:18) Usange tikuyezgayezga kuwona vintu nga ni umo Yehova wakuwonera, mbwenu tiŵenge ŵakunozgeka kutemwa ŵanji na kuŵagowokera para ŵatinangira. (Mateyu 6:12) Cacitatu, tingacitira ŵantu vintu nga ni umo ise tikukhumbira kuti iwo ŵaticitire. (Mateyu 7:12) Cifukwa tili ŵambura ukongorekwa, nyengo zose tikukhumbikwira kugowokereka. Mwaciyerezgero, para tayowoya vintu ivyo vyakhuŵazga ŵanyithu, tikumanya kuti ŵazamumanya na kukumbukira kuti waliyose wakubuda mu kayowoyero nyengo na nyengo. (Yakobe 3:2) Usange tikukhumba kuti ŵanji ŵaticitire mwacitemwa, nase tikwenera kuŵacitira mwacitemwa.
19. Ni mwauli umo tingapenjera covwiro ca mzimu utuŵa pa kukuzga citemwa?
19 Cacinayi, tingaromba covwiro ca mzimu utuŵa kuti wutovwire cifukwa uwo ncigaŵa ca vipambi vya mzimu. (Ŵagalatiya 5:22, 23) Ubwezi, citemwa ca mu mbumba, na citemwa ca pakati pa mwanakazi na mwanarumi nyengo zose cikucitika mwakawiro. Kweni tikukhumbikwira covwiro ca mzimu wa Yehova kuti tiŵe na citemwa ico Yehova wali naco, citemwa ico ncakukakira ca ukongorekwa. Tingasanga covwiro ca mzimu wa Yehova mwa kuŵazga Baibolo lakufunyilirika. Mwaciyerezgero, usange tikusambira za umoyo wa Yesu, tizamuwona umo iye wakacitira na ŵantu, ndipo tingasambira kumurondezga. (Yohane 13:34, 35, 15:12) Mwanteura, tingamuromba Yehova kuti watipe mzimu wake utuŵa kuti wutovwire, comene-comene mu ukhaliro uwo ukutipangiska kuti tileke kucita vintu mwacitemwa. (Luka 11:13) Caumaliro, tingasanga citemwa mwa kuskepelera ku mpingo Wacikristu. Kuŵa pamoza na ŵabali na ŵadumbu kukutovwira kukuzga citemwa.—Zintharika 13:20.
20, 21. Kasi ncirongolero wuli capacanya ca citemwa ico Ŵakaboni ŵa Yehova ŵakarongora mu cirimika ca uteŵeti ca 2000?
20 Cirimika cajumpa, ciŵerengero ca ŵapharazgi ŵa makani ghaweme pacaru cose cikaŵa 6,035,564. Ŵakaboni ŵa Yehova ŵakagwiriskira ncito maora ghakukwana 1,171,270,425 pakupharazga ku ŵantu makani ghaweme. Cikaŵa citemwa ico cikaŵapangiska kuzizipizga cithukivu, vura na kuzizima apo ŵakacitanga uteŵeti uwu. Cikaŵa citemwa ico cikaŵaciska kuti ŵadumbiskane na ŵanyawo ŵa kusukulu na ku ncito ndiposo kufikira ŵantu awo ŵakuŵamanya cara pa msewu na ku malo ghanyake. Ŵantu ŵanandi awo Ŵakaboni ŵakaŵafikira ŵakaŵa ŵambura kukondweskeka, ndipo ŵacoko ŵakasuska. Ndipouli, ŵanyake ŵakarongora kukondweskeka, mwakuti maulendo ghakuwelerako ghakukwana 433,454,049 ghakacitika, ndipo masambiro gha Baibolo 4,766,631 ghakacitiskika. a
21 Mwee, naco ncilongorero ciweme ca citemwa ico Ŵakaboni ŵa Yehova ŵali naco pa Ciuta wawo ndiposo pa ŵanyawo! Citemwa ici cizamumara cara. Tili na cisimikizgo cakuti cirimika ca uteŵeti ca 2001 tizamucitira ukaboni ukuru uwo undacitekepo ku mtundu wa ŵantu. Mpanyi vitumbiko vya Yehova vyarutirira kuŵa pa ŵasopi ŵake ŵamagomezgeko na ŵamwampu apo ‘ŵakucita vyose mu kutemwa’!—1 Ŵakorinte 16:14.
[Mazgu ghamusi]
a Kuti mumanye za lipoti la cirimika ca uteŵeti ca 2000, Wonani tcati pa mapeji 18-21.
Kasi Mungalongosora?
• Ninjani uyo tikumuyezga para tikutemwa ŵanyithu?
• Kasi citemwa cithu cikwenera kuŵa cikuru wuli?
• Kasi ni vyakukumana navyo wuli ivyo vikurongora citemwa ca Cikristu?
• Ni mwauli umo tingakuliskira citemwa ca Cikristu?
[Mafumbo]
[Chati pa peji 28-31]
LIPOTI LA CIRIMIKA CA UTEŴETI CA 2000 LA ŴAKABONI ŴA YEHOVA PACARU COSE
(Mu magazini yakusindikizga ndimo vikuwoneka makora)
[Vithuzithuzi pa peji 25]
Citemwa ca Cikristu cikukolezganiska mbumba pamoza
[Vithuzithuzi pa peji 26]
Citemwa cikutikhuŵirizga kuti tiphalire ŵanji za cilindizga cithu