Ŵakaboni ŵa Yehova Ŵakuya Pantazi Mwacikanga!

Lipoti la Ungano wa Pacirimika

MU MAZUŴA ghakukayikiska agha, Ŵakaboni ŵa Yehova ŵakumanyikwa kuŵa Ŵakristu ŵacikanga. Ici cikawoneka makora pa ungano wa pacirimika wa wupu wa Watch Tower Bible and Tract Society of Pennsylvania uwo ukacitikira mu Nyumba Yakucitiramo Ungano ya Ŵakaboni ŵa Yehova, ku Jersey City, New Jersey, pa Cisulo, October 7, 2000. a

Mu Mazgu ghake ghakujulira, ceyamani wa ungano uwu, John E. Barr, mweneuyo nciŵaro ca Wupu Wakurongozga wa Ŵakaboni ŵa Yehova, wakayowoya kuti: “Pa mabiliyoni ghose gha ŵantu pacaru capasi, tikumanya ndipo tikugomezga kuti Mwana wakutemweka wa Yehova, Yesu Kristu, sono ni Themba kucanya, wakuwusa pakati pa ŵalwani ŵake.” Ukaboni wa cigomezgo ca nga ni ici ukawoneka mu malipoti ghankondi na limoza ghakukondweska comene ghakufumira mu vyaru vinyake.

Kutonda Kugomezga Mizimu ku Haiti

Kugomezga mizimu nkhwakuthandazgika comene ku Haiti. Mlaŵiliri wa Muntavi, John Norman, wakayowoya kuti: “Nyengo zinandi ŵantu ŵakugomezga mizimu kuti ŵajivikilire iwoŵene.” Ng’anga yimoza yikamba kukayika peneapo rundi lake likapyoka pangozi. ‘Kasi ici cacitika wuli kwa ine peneapo nkujivikilira na mizimu?’ yikazizwa. Nga ni umo ŵantu ŵanandi ŵakusambizgikira unenesko, mwanarumi uyu nayo wakasambizgika unenesko na Ŵakaboni ŵa Yehova ndipo ŵakamovwira kuti waleke kugomezga mizimu. Kuya pantazi ku Haiti kukarongoreka pa April 19, 2000, peneapo ciŵerengero ca ŵantu awo ŵakasangikapo pa Cikumbusko ca nyifwa ya Yesu cikaruska kanayi ciŵerengero ca ŵapharazgi ŵa Ufumu ŵa mu caru ico.

Mwampu mu Caru Cikuru ca Korea

Ku Korea, 40 peresenti ya Ŵakaboni ŵa Yehova ŵali mu uteŵeti wanyengo zose. “Cifukwa ca ciŵerengero cikuru ca ŵapharazgi,” wakayowoya nteura Mlawiliri wa Muntavi, Milton Hamilton, “tikukwaniska cigaŵa cithu kamoza pa mwezi, ico cili na ŵantu ŵakujumpa 47 miliyoni.” Ciŵerengero mu mipingo iyo pakuyowoya ŵakugwiriskira ncito mawoko, naco caya pantazi. Mu dera limoza ilo ŵantu ŵakugwiriskira ncito mawoko pakuyowoya, masambiro gha Baibolo ghakukwana 800 ghakucitiskika. Ici cikurongora kuti mupharazgi waliyose pa aveleji wali na sambiro limoza. Mwacitima, ŵabali ŵaciwukirano ŵakukakika na kuŵikika mu jere cifukwa ca kuleka kunjizgikamo mu vintu ivyo vikukolerana cara na mazgu gha Ciuta. Ndipouli, Ŵakristu ŵakugomezgeka aŵa ŵakutemweka na awo ŵakulaŵilira  jere ndipo ŵakupika ncito izo zikukolerana na kugomezgeka kwawo.

Kukwaniriska Vyakusoŵa vya Ciŵerengero Cikuru mu Mexico

Ciŵerengero capacanya ca ŵapharazgi ŵa Ufumu awo wakapereka lipoti mu Mexico mu mwezi wa August 2000, cikaŵa 533,665. Ŵantu ŵanandi ŵakujumpa ciŵerengero ico katatu ŵakasangikapo pa Cikumbusko. “Cilato cithu cirimika cino ncakuti tizenge Nyumba zinyakeso za Ufumu zakukwana 240,” wakayowoya nteura Robert Tracy, Mlaŵilira wa Muntavi. Mwakusazgirapo, wakayowoyaso kuti, “ŵapharazgi ŵanandi ŵakukhumbikwa.”

Ŵawukirano pakati pa Ŵakaboni ŵa Yehova ku Mexico ŵali na nkaro yiweme. Pakuyowoya za muwukirano munyake, musofi wa Cikatolika wakayowoya kuti: “Nkukhumba kuti niŵe na muntu yumoza wa nga ndiye pakati pa ŵarondezgi ŵane. Nkudokera comene ŵantu aŵa cifukwa ca cikanga cawo na kugwiriskira ncito kwawo Baibolo mwamahara. Ŵakukhozgera Ciuta, nanga ŵangakumana na suzgo wuli mu umoyo wawo.”

Kugomezgeka mu Nyengo ya Suzgo ku Sierra Leone

Kwambira mu April 1991, apo nkondo ya ŵene na ŵene yikamba ku Sierra Leone, ŵantu vikwi vinandi ŵakomeka, ŵanyake ŵapwetekeka, panji kudumulika viŵaro. “Nkondo na masuzgo vyaŵa na vyakufumapo vikuru pa umoyo wa ŵantu,” wakayowoya nteura Mlaŵiliri wa Muntavi, Bill Cowan. “Ŵantu ŵanandi awo ŵakatemwanga cara uthenga withu, sono ŵakutegherezga mwakukondwa. Mwakanandi ŵantu ŵakwiza ŵekha ku Nyumba zithu za Ufumu kwambura kuŵacema kuzakawungana nase. Nyengo zinandi ŵantu ŵakuromba ŵabali kuti ŵacite nawo sambiro la Baibolo para ŵakumana nawo pa ntowa.” Nangauli nkondo yikurutirira mu caru ico, mulimo wakupharazga wukurutilira kupambika vipambi ku Sierra Leone.

Ncito Yikuru ya Kuzenga ku South Africa

Nyengo yino, pali kukhumbikwa kwa Nyumba za Ufumu zinandi mu cigaŵa ico cikulaŵilirika na ofesi ya muntavi ku South Africa. Nyumba za Ufumu mahandiredi ghanandi zazengeka. “Mu malo mwa kucitira maungano mu visakasa panji musi mu khuni, nga ni umo vikaŵiranga kale, ŵabali ŵithu ŵakuwungana mu malo ghaweme ghakuŵa na mipando yiweme,” wakayowoya nteura John Kikot, ciŵaro ca Komiti ya Muntavi. “Nangauli zinandi mwa Nyumba za Ufumu izi nzakuzengeka mwapacanya comene cara, kweni nzakuwoneka makora, izo ni nyumba zakucindikika comene mu malo agho zazengeka. Mu vigaŵa vinyake, kukuwoneka kuti para Nyumba ya Ufumu yamara kuzengeka, mu cirimika cakurondezgapo mpingo ukusazgikira kaŵiri kuruska ciŵerengero cakale.”

Muwiro Wupya wa Ŵakaboni ku Ukraine

Mu cirimika ca uteŵeti ca 2000, caru ici cikaŵa na ciŵerengero capacanya ca ŵapharazgi ŵakukwana 112,720. Pa ciŵerengero ici, ŵapharazgi ŵakujumpa 50,000 ŵakasambira unenesko wa Baibolo mu virimika vinkondi ivyo vyajumpa. “Mwaunenesko, Yehova walenga nadi muwiro wupya wa Ŵakaboni ŵa Yehova kuti umanyikwiske zina lake!” wakayowoya nteura mlaŵiliri wa Muntavi John Didur. Iye wakasazgirapo kuti: “Virimika viŵiri ivyo vyajumpa tikagaŵira magazini ghakujumpa pa 50 miliyoni, gheneagho ghakuyana na ciŵerengero ca ŵantu ŵa mu caru ici. Mwezi wuliwose, pa avileji, tikupokera masauzande gha makalata kufuma ku ŵantu ŵakukondweskeka, kuromba masambiro gha Baibolo.”

Vigaŵa Vinyake Vyakukondweska Comene vya Programu

Daniel Sydlik, ciŵaro ca Wupu Wakurongozga, wakayowoya nkani yakukora mtima comene. Wakayowoya nkani ya mutu wakuti “Umo Wupu Wakurongozga Ukupambanirana na Wupu Wakuzomerezgeka Mwadango,” nkani iyo yalembeka mu magazini yino, njakuzikika pa nkhani iyi.

Theodore Jaracz wa Wupu Wakurongozga wakayowoya nkani yakukondweska comene ya mutu wakuti “Ŵalaŵiliri na Ŵateŵeti Ŵakuteŵetera Ŵakwimikika Mwateokrase.” Nkani iyo yalembeka mu magazini yino njakuzikika pa nkani iyo.

Nkani yaumaliro ya ungano wa pacirimika uwu, yeneiyo yikaŵa yakusampuska mtima yikayowoyeka na ciŵaro ca Wupu Wakurongozga, David Splane, iyo yikazikika pa lemba la cirimika cino. Lemba ili ndakuzikika pa mazgu gha mpostole Paulos, leneilo likuti: ‘Iŵani Ŵakufiskika na Ŵakukhozgeka mu Khumbo Lose la Ciuta.’ (Ŵakolose 4:12) Ŵakaboni ŵa Yehova pacaru cose capasi mbakusimikizga kucita ici peneapo mwakugomezgeka ŵakupharazga makani ghaweme gha Ufumu wa Ciuta pacaru cose capasi.—Mateyu 24:14.

[Mazgu ghamusi]