Ŵalaŵiliri na Ŵateŵeti Ŵakuteŵetera Ŵakwimikika Mwateokrase

“Jicenjererani mwaŵene na mskambo wose, mwa ku uwo mzimu mutuŵa wamwimikani ŵaliska.”—MILIMO 20:28.

1, 2. Kasi ni mwauli umo lemba la Yesaya 60:22 likufiskikira mazuŵa ghano?

 YEHOVA wakayowoyerathu kuti cintu cinyake cakuzirwa cizamucitika mu nyengo ya umaliro. Kwizira mwa ncimi Yesaya, Iye wakayowoya kuti: “Mucoko kwakuruska tiwaŵenge fuko, enya, mucoko uzgokenge mtundu wa nkongono; Ndine Yehova; tindicipusumpiske mu nyengo yake.”—Yesaya 60:22.

² Kasi pali ukaboni wakuti ucimi uwu ukufiskika mazuŵa ghano? Enya nadi! Mu virimika vya mu ma 1870, mpingo umoza wa Ŵakaboni ŵa Yehova wukakhazikiskika mu Allegheny, Pennsylvania, ku U. S. A. Kufuma pa ciyambi cicoko ici, mipingo vikwi-vikwi yakhazikiskika ndipo yicali kusazgikira pacaru cose capasi. Mamiliyoni gha ŵapharazgi ŵa Ufumu—mtundu wankongono—sono ŵakuwungana mu mipingo yakujumpa 91,000 mu vyaru vyakujumpa 230 pacaru cose capasi. Kwambura kukayika, ici cikusimikizgira kuti Yehova wakurutiska pantazi ncito ya kuwunganiska ŵasopi ŵaunenesko pambere “suzgo yikuru,” iyo yaneng’enera yindacitike.—Mateyu 24:21; Civumbuzi 7:9-14.

3. Kasi cikung’anamuraci kubapatizika “mu zina la Ŵawiske na la Mwana na la mzimu mutuŵa”?

³ Panyuma pa kujipatulira kwa Yehova, ndiposo mwakukolerana na urongozgi wa Yesu Kristu, ŵantu mamiliyoni aŵa ŵakabapatizika “mu zina la Ŵawiske na la Mwana na la mzimu mutuŵa.” (Mateyu 28:19) Kubapatizika “mu zina la Ŵawiske” kukung’anamura kuti ŵantu ŵakujipatulira aŵa ŵakumanya kuti Yehova ni Dada wawo wakucanya na Mupi wa Umoyo ndipo ŵakujilambika ku muwuso wake wukuru. Kubapatizika ‘mu zina la Mwana kukung’anamura kuti ŵakuzomerezga kuti Yesu Kristu ni Muwomboli, Murongozgi, ndiposo ni Themba lawo. Ndiposo ŵakuzomerezga ncito ya mzimu utuŵa wa Ciuta, panji kuti nkongono yake yakugwira ncito, kuti wurongozge umoyo wawo. Ici cikurongora kuti ŵali kubapatizika ‘mu zina la mzimu utuŵa.’

4. Ni mwauli umo ŵateŵeti Ŵacikristu ŵakwimikikira?

⁴ Pa ubapatizo wawo, ŵasambiri ŵapya ŵakwimikika kuŵa ŵateŵeti ŵa Yehova Ciuta. Kasi ni njani uyo wakuŵamika? Mazgu agho ghali kulembeka pa 2 Ŵakorinte 3:5 ghakuyowoya za iwo: “Kukwana kwitu [nga mbateŵeti] kukufuma kwa Ciuta.” Iwo ŵakukhumba kwimikika na muntu wamazaza waliyose cara, kweni kwimikika na Yehova Ciuta yekha. Panyuma pa kubapatizika kwawo, iwo ŵakurutilira kukura kumzimu nga mbateŵeti ŵa “makani ghaweme” usange ŵangazomerezga urongozgi wa mzimu wa Ciuta na kurutirizga kugwiriskira ncito Mazgu ghake.—Mateyu 24:14; Milimo 9:31.

Kwimikika Mwateokrase, Mwademokirase Cara

5. Kasi ŵalaŵiliri Ŵacikristu ŵakwimikika mwakucita voti? Longosorani.

⁵ Ulaŵiliri wakukwana wa ŵalaŵiliri ŵaluso ndiposo na wovwiri wa ŵateŵeti ŵakuteŵetera ukukhumbikwa pa kupwererera vyakusoŵa vyakumzimu vya ŵateŵeti ŵamwampu awo  ŵakusazgikira comene. (Ŵafilipi 1:1) Ni mwauli umo ŵanarumi ŵa kumzimu aŵa ŵakwimikikira? Iwo ŵakwimikika nga ni umo Visopo vya Cikritu vikucitira cara. Mwaciyerezgero, ŵalaŵiliri Ŵacikristu ŵakusoreka mwademokirase cara, ici cikung’anamura mwakusanga mavoti ghanandi kufuma mu ŵantu ŵa mu mpingo. Mu malo mwake, ŵakwimikika mwateokrase. Kasi ici cikung’anamuraci?

6. Kasi teokrase waunenesko ni vici? (b) Ncifukwa wuli ŵalaŵiliri na ŵateŵeti ŵakuteŵetera ŵakwimikika mwateokrase?

⁶ Mwakupulikikwa makora, teokrase waunenesko ni muwuso wa Ciuta. Ŵakaboni ŵa Yehova na mtima wose ŵakujilambika ku muwuso wake na kukolerana pamoza kuti ŵacite khumbo la Ciuta. (Salmo 143:10; Mateyu 6:9, 10) Kwimika ŵalaŵiliri Ŵacikristu, panji ŵarara, na ŵateŵeti ŵakuteŵetera kukucitika mwateokrase cifukwa cakuti kacitiro kakuzomerezga ndiposo na kwimika ŵanarumi ŵakwenelera, kakucitika mwakuyana na manozgero gha Ciuta nga ni umo Malemba Ghakupatulika ghakurongolera. Nga ni “mutu pacanya pa vyose,” Yehova wali na wenelero wa kusanka umo gulu lake lakuwoneka na maso likwenera kugwilira ncito.—1 Midauko 29:11; Salmo 97:9.

7. Ni mwauli umo Ŵakaboni ŵa Yehova ŵakulongozgekera?

⁷ Mwakupambana na magulu ghanandi gha Visopo vya Cikristu, Ŵakaboni ŵa Yehova ŵakujisankira ŵekha cara umo vintu vyakumzimu vikwenera kucitikira. Ŵakristu ŵaunenesko aŵa ŵakuyezgayezga kuskepelera ku marango gha Yehova. Pakati pawo, ŵalaŵiliri ŵakwimikika na ŵantu cara, panji kucita mavoti mu mpingo. Usange ŵantu ŵakucaru ŵakukhumba kujandizga kwimikika uku, ŵateŵeti ŵa Yehova ŵakuthera cara. Mwakugomezgeka, iwo ŵakurutirizga kucita khumbo la Ciuta nga ni umo ŵakayowoyera ŵapostole mu virimika vya mu handiredi lakudanga apo ŵakayowoya kuti: “Tikwenera kupulikira Ciuta kwakuruska ŵantu.” (Milimo 5:29) Ndico cifukwa cake Ŵakaboni ŵakujilambika kwa Ciuta mu vintu vyose. (Ŵahebere 12:9; Yakobe 4:7) Kurondezga kacitiro ka teokrase kukupangiska kuti iwo ŵaŵe ŵakuzomerezgeka na Ciuta.

8. Kasi kacitiro ka teokrase na demokirase kakupambana wuli?

⁸ Pakuti tili ŵateŵeti ŵa Mweneco wa teokrase Yehova, tingacita makora kumanya mpambano ya kacitiro ka teokrase na demokirase. Kacitiro ka demokirase kakukhumba kucita vintu mwakuyana na ivyo ŵantu ŵakupambana-pambana ŵakukhumba ndipo kanandi kacitiro kanteura aka kakucitika mwakunyengelera ŵantu kuti ŵavotere muntu mavoti ghanandi. Mu teokrase mulije kacitiro aka. Ŵalaŵiliri na ŵateŵeti ŵakuteŵetera ŵakusoreka na ŵantu cara; panji na wupu wakuzomerezgeka mwadango cara. Mwakuwonekerathu, pakuyowoya za kwimikika kwake na Yesu ndiposo na Yehova nga ni “mupostole wa ŵamitundu,” Paulos wakaphalira Ŵagalatiya kuti “wakimikika na ŵantu cara, panji kutumika na muntu, kweni na Yesu Kristu na Ciuta Ŵawiske, mweneuyo wakamuwuska ku ŵakufwa.”—Ŵaroma 11:13; Ŵagalatiya 1:1.

Kwimikika na Mzimu Utuŵa

9. Kasi lemba la Milimo 20:28 likuyowoyaci za kwimikika kwa ŵalaŵiliri Ŵacikristu?

⁹ Paulos wakakumbuska ŵalaŵiliri ŵa ku Efeso kuti ŵakimikika na Ciuta kwizira mu mzimu utuŵa. Iye wakayowoya kuti: “Jicenjererani mwaŵene na mskambo wose, mwa ku uwo mzimu mutuwa wamwimikani ŵaliska, kuti muliskenge ekleziya la Ciuta, ilo wali kuligura na ndopa za [Mwana wake, NW].” (Milimo 20:28) Ŵalaŵliri Ŵacikristu ŵara ŵakakhumbikwira kurutirizga kurongozgeka na mzimu utuŵa peneapo ŵakacitanga milimo yawo nga ni ŵaliska ŵa mberere za Ciuta. Usange muntu wakwimikika wakafiskanga cara marango gha Ciuta, mukuruta kwa nyengo mzimu utuŵa ukamusezganga pa mulimo wake.

10. Ni mwauli umo mzimu utuŵa ukucitira mulimo wakuzirwa comene pa kwimika kwa teokrase?

¹⁰ Kasi ni mwauli umo mzimu utuŵa ukucitira mulimo wakuzirwa comene uwu? Cakwamba, marango ghose agho ghakurongosora za viyeneresko vya ulaŵiliri wakumzimu  ghakafunyilirika na mzimu utuŵa. Mu kalata yake kwa Timote na Tito, Paulos wakalemba vipimo ivyo ŵalaŵiliri na ŵateŵeti ŵakuteŵetera ŵakwenera kufiska. Iye wakayowoya viyeneresko vyakupambana-pambana vyakukwana 16. Mwaciyerezgero, ŵalaŵiliri ŵakenera kuŵa ŵambura kalema, ŵakuzika, ŵakupokelera ŵalendo, ŵakumanya kusambizga, ŵanarumi ŵa lumbiri luweme. Ŵakenera kuŵa ŵaroŵevu cara, ŵambura kutemwa ndrama, ndiposo ŵakujikora. Mwakuyana waka, mikhaliro yapacanya yikaŵikika cifukwa ca ŵanarumi awo ŵakakhumbanga mulimo wa uteŵeti wakuteŵetera.—1 Timote 3:1-10; 12, 13; Tito 1:5-9.

11. Kasi ni viyeneresko wuli ivyo ŵanarumi awo ŵakukhumba mulimo pa mpingo ŵakwenera kufiska?

¹¹ Kusanda viyeneresko ivi kukurongora kuti awo ŵakurongozga pakusopa Yehova ŵakwenera kuŵa ŵaciyerezgero ciweme mu nkaro ya Cikristu. Ŵanarumi awo ŵakukhumba mulimo wa pa mpingo ŵakwenera kurongora ukaboni wakuti mzimu utuŵa ukugwira ncito mwa iwo. (2 Timote 1:14) Ukaboni ukwenera kuwoneka wakuti mzimu wa Ciuta ukupambika vipambi mu ŵanarumi aŵa, vya nga ni ‘kutemwa, cimwemwe, mtende, kuzizipizga, wezi, uweme, magomezgeko, kuzika, na kujikora.’ (Ŵagalatiya 5:22, 23) Vipambi ivi vikwenera kuwoneka mu kacitiro kawo na ŵasopi ŵanyawo ndiposo na ŵantu ŵanji. Mwanadi, ŵanji ŵangaruska pakurongora vipambi vya mzimu, peneapo ŵanji ŵangafiska viyeneresko vya ulaŵiliri mu ntowa yinyake yikuru. Ndipouli mu umoyo wawo, wose awo ŵakukhumba kwimikika nga ni ŵalaŵiliri panji ŵateŵeti ŵakuteŵetera ŵakwenera kurongora kuti ni ŵanarumi ŵakumzimu, awo ŵakufiska viyeneresko vya mu Mazgu gha Ciuta.

12. Ni njani uyo tingayowoya kuti wakimikika na mzimu utuŵa?

¹² Peneapo Paulos wakaciska ŵanji kuti ŵawe ŵakumulondezga, iye wakacita nteura mwakuyowoya mwacikanga cifukwa cakuti iyemwene wakamulondezganga Yesu Kristu, mweneuyo ‘wakatisidira bambiro, mwakuti tirondezge marwayo ghake.’ (1 Petros 2:21; 1 Ŵakorinte 11:1) Awo ŵakafiska viyeneresko vya mu Malemba pa nyengo ya kwimikika kwawo nga ni ŵalaŵiliri panji ŵateŵeti ŵakuteŵetera ŵangayowoyeka kuti ŵakimikika na mzimu utuŵa.

13. Ni mwauli umo mzimu ukovwilira awo ŵakuzomerezga ŵanarumi kuti ŵateŵetere mu mpingo?

¹³ Pali fundo yinyake iyo yikurongora umo mzimu utuŵa ukugwilira ncito pakuzomerezga na pakwimika ŵalaŵiliri. Yesu wakayowoya kuti ‘Ŵawiskemwe ŵa kucanya ŵakupereka mzimu mutuŵa ku aŵo ŵakuŵaromba.’ (Luka 11:13) Mwanteura para ŵarara mu mpingo ŵakukhumba kuzomerezga muntu kuti waŵe na mulimo wa pa mpingo, iwo ŵakuromba danka mzimu wa Ciuta kuti uŵarongozge. Kuzomerezga kwawo kukuzikika pa ivyo Mazgu ghakufunyilirika gha Ciuta ghakuyowoya, ndipo mzimu utuŵa ukuŵawovwira kumanya usange muntu uyo ŵakukhumba kumwimika wakufiska viyeneresko vya mu Malemba. Awo ŵakuzomerezga kuti ŵakucicizgika na kawonekero kakuwaro, maluso, panji mahara agho muntu wali nagho cara. Cakwamba ico iwo ŵakwenera kuwona ndico usange muntu uyo ngwakukhoma kumzimu, mweneuyo viŵaro vya mpingo vingamufikira kuti vifumbeko urongozgi wakumzimu kwambura kopa.

14. Kasi tikusambirapo vici pa lemba la Milimo 6:1-3?

¹⁴ Peneapo mawupu gha ŵarara pamoza na ŵalaŵiliri ŵa dera ŵakutoramo cigaŵa pakuzomerezga ŵabali kuteŵetera nga ni ŵarara ndiposo ŵateŵeti ŵakuteŵetera, kwimika kweneco kukucitika mwakuyana na umo vikacitikiranga mu virimika vya mu handiredi lakudanga. Pa cakucitika cinyake, kukaŵa kusoŵa kwa ŵanarumi ŵakukhoma kumzimu ŵakwenereskeka kuti ŵapwererere milimo yakuzirwa. Wupu wakurongozga wukapereka urongozgi uwu: “Mujipenjere mukati mwinu ŵanarumi ŵankonde na ŵaŵiri ŵa lumbiri luweme, ŵakuzura mzimu na vinjeru, aŵo tiŵimike pa mulimo uwu.” (Milimo 6:1-3) Peneapo wupu wa ŵarara wukazomerezga, kwimika kukacitika na ŵanarumi ŵakwenereskeka ŵa ku Yerusalemu. Mazuŵa ghano kacitiro aka kakurondezgekaso.

15. Ni mwauli umo Wupu Wakurongozga wukunjizgikiramo mu nkani ya kwimika ŵanarumi?

 ¹⁵ Wupu Wakurongozga wa Ŵakaboni ŵa Yehova wukwimika viŵaro vyose vya Makomiti gha Mintavi. Para ŵakughanaghanira za awo ŵangagwira mulimo wakuzirwa uwu, Wupu Wakurongozga wukukumbukira mazgu gha Yesu ghakuti: “Uyo yose viri kupika vinandi, ndiko vinandi vizamkufumbika: ndipo na kwa uyo ŵakumugomezgera vinandi, ndiko ŵizamkufumbako vyakuruska.” (Luka 12:48) Kusazgirapo pa kwimika viŵaro vya Komiti ya Muntavi, Wupu Wakurongozga wukwimika ŵarara ŵa pa Beteli na ŵalaŵiliri ŵakwendakwenda. Ndipouli, wukusanka ŵabali ŵakugomezgeka kuti ŵateŵetere mu malo mwawo pa kwimika ŵanji. Kacitiro aka nako nkakuzikika mu Malemba.

‘Wimike nga Ndi Umo Nkakulayizgira’

16. Ncifukwa wuli Paulos wakamuleka Tito ku Krete, ndipo ici cikurongoraci pakuyowoya za kwimika kwa teokrase mazuŵa ghano?

¹⁶ Paulos wakaphalira muteŵeti munyake Tito kuti: “Ndico cifukwa nkakusida mu Krete, kuti unozgenge ivyo vikakhalapo vyambura kunozgeka, ndipo kuti wimike ŵarara mu misumba yose nga ndi umo nkakulayizgira.” (Tito 1:5) Paulos wakayowoya za viyeneresko ivyo Tito wakenera kuwona mu ŵanarumi awo ŵangayenereskeka cifukwa ca mulimo uwo. Mazuŵa ghano, Wupu Wakurongozga wukwimika ŵabali ŵakwenereskeka pa mintavi kwimilira mu malo mwake pa kwimika ŵarara na ŵateŵeti ŵakuteŵetera. Awo ŵakuteŵetera mu malo mwa Wupu Wakurongozga ŵakwenera kupwererera comene na kupulikiska makora pakurondezga urongozgi wa mu Malemba pakwimika. Mwanteura, ŵanarumi ŵakwenereskeka ŵakwimikika kuti ŵateŵetere mu mipingo ya Ŵakaboni ŵa Yehova pacaru cose capasi, pasi pa urongozgi wa Wupu Wakurongozga.

17. Kasi ni mwauli umo kuzomerezgeka kwa ŵalaŵiliri na ŵateŵeti ŵakuteŵetera kukucitikira pa ofesi ya muntavi?

¹⁷ Para vizomerezgo vya kwimika ŵalaŵiliri na ŵateŵeti ŵakuteŵetera vyaperekeka ku ofesi ya muntavi wa Watch Tower Society, ŵanarumi ŵacimanyisko ŵakugomezga pa mzimu wa Ciuta kuti uŵarongozge pakwimika. Ŵanarumi aŵa ŵakucita mwakupwererera, ŵakukumbukira kuti ŵakwenera cara kuŵika mwaluŵiro-luŵiro mawoko ghawo pa muntu ŵaliyose,  mwakuti ŵaleke kusangana nayo zakwananga zake.—1 Timote 5:22.

18, 19. (a) Ni mwauli umo kwimika kunyake kukutumizgikira? (b) Kasi ncito yose ya kuzomerezga na kwimika yikucitika wuli?

¹⁸ Kwimika kunyake kungacitika mwa kutumizga kalata yakuŵa na cidindo. Kalata yakuŵa na cidindo yakufuma ku wupu wakuzomerezgeka mwadango yingagwiriskirika ncito kwimikira ŵabali ŵakujumpa pa yumoza mu mpingo.

¹⁹ Kwimika kwa teokrase kukufuma kwa Yehova kwizira mwa Mwana wake na gulu la Ciuta lakuwoneka na maso, “muzga wa magomezgeko na wa vinjeru,” ndiposo na Wupu wake Wakurongozga. (Mateyu 24:45-47) Mulimo wose wa kuzomerezga na kwimika wukurongozgeka na mzimu utuŵa. Cifukwa cakuti viyeneresko vili kulembeka mu Mazgu gha Ciuta agho ngakufunyilirika na mzimu utuŵa, muntu uyo wakwimikika wakupereka ukaboni wakuti wakurongora vipambi vya mzimu. Mwanteura, kwimika uku kukwenera kuwoneka kuti kwacitika na mzimu utuŵa. Nga ni umo ŵalaŵiliri na ŵateŵeti ŵakuteŵetera ŵakamikikira mwateokrase mu virimika vya mu handiredi lakudanga, ndimo vikucitikiraso mazuŵa ghano.

Kuwongera Urongozgi wa Yehova

20. Ncifukwa wuli tikunjizgikamo mu maghanoghano gha Davide agho ghali kulembeka pa Salmo 133:1?

²⁰ Mu nyengo iyi yakuruta pantazi kumzimu na kusazgikira kwa mulimo wa teokrase wa kupharazga makani gha Ufumu, tikuwonga kuti Yehova ndiyo wakwimika ŵalaŵiliri na ŵateŵeti ŵakuteŵetera. Manozgero gha mu Malemba agha ghakovwira kuti tiskepelere ku mikhaliro yaurunji ya Ciuta pakati pithu nga ni Ŵakaboni ŵa Yehova. Mwakusazgirapo, mzimu Wacikristu na kuyezgayezga kwa ŵalaŵiliri na ŵateŵeti ŵakuteŵetera kukovwira comene kuti tiŵe pamtende na cimango nga ni ŵateŵeti ŵa Yehova. Nga ni wamasalmo Davide, tikuciskika kuyowoya kuti: “Wonani, nako nkukongora na kunozga uko ŵanambumba ŵakukhala pamoza na mtima wakurungana!”—Salmo 133:1.

21. Ni mwauli umo lemba la Yesaya 60:17 likufiskikira mazuŵa ghano?

²¹ Mwee, nako nkuwongera uko tili nako cifukwa ca urongozgi wa Yehova kwizira mu Mazgu ghake na mzimu utuŵa! Ndipo mazgu agho ghali kulembeka pa Yesaya 60:17 ngaunenesko nadi: “Mu malo gha mkuŵa tindizenge na golide, mu malo gha cisulo tindizenge na siliva; mu malo gha kuni, mkuŵa na mu malo gha mawe, cisulo. Ŵakuru ŵinu tiŵaŵenge ŵacimango na ŵakapitao ŵinu ŵaurunji.” Cifukwa cakuti kacitiro ka teokrase karuta pantazi comene pakati pa Ŵakaboni ŵa Yehova, ndico cifukwa cake tasanga vitumbiko mu vyakucita vyose ivi mu gulu lose la Ciuta la pacaru capasi.

22. Kasi tikuwongera vici, ndipo tikwenera kuyezgayezga kucitaci?

²² Tikuwongera comene cifukwa ca manozgero gha teokrase agho ghaŵikika pakati pithu. Ndipo tikuwongeraso kulimbikira ndiposo na mulimo wakukhorweska uwo wukucitika na ŵalaŵiliri na ŵateŵeti ŵakwimikika mwateokrase. Na mtima wose tikucindika Dada withu wacitemwa wa kucanya, mweneuyo wakupangiska kuti tirute pantazi kumzimu ndipo watitumbika comene. (Zintharika 10:22) Mwanteura, tiyeni tiyezgeyezge kwendera lumoza na gulu la Yehova. Tiyeni tirutirizge kuteŵetera pamoza mwakukolerana pakutumbika, na kurumba zina likuru ndiposo lituŵa la Yehova.

Kasi Mungazgora Wuli?

• Ncifukwa wuli tingayowoya kuti kwimikika kwa ŵalaŵiliri na ŵateŵeti ŵakuteŵetera nkhwateokrase, kuti nkhwademokirase cara?

• Ni mwauli umo ŵanarumi Ŵacikristu ŵakwimikikira na mzimu utuŵa?

• Ni mwauli umo Wupu Wakurongozga wukucitira pakwimika ŵalaŵiliri na ŵateŵeti ŵakuteŵetera?

• Pakuyowoya za kwimika kwateokrase, ncifukwa wuli tikwenera kuwonga Yehova?

[Mafumbo]

[Vithuzithuzi pa peji 9]

Ŵarara na ŵateŵeti ŵakuteŵetera ŵali na mwaŵi wa kuteŵetera mwa kwimikika mwateokrase