Cipharazgo Capadera

PAUMALIRO wa ungano wa pacirimika wa wupu wa Watch Tower Bible and Tract Society of Pennsylvania uwo ukacitika pa October 7, 2000, cipharazgo capadera cikapharazgika na ceyamani wa Wupu Wakurongozga, John E. Barr. Cipharazgo ici cikazikika pa nkani izo zikayowoyeka pakwambilira na Theodore Jaracz na Daniel Sydlik.—Wonani mapeji 12-16 na 28-31 gha magazini yino.

Pakuyowoya za fundo yakuzirwa comene, Mbali Barr wakati: “Gulu la ‘muzga wa magomezgeko na wa vinjeru’ na Wupu wake Wakurongozga liri na mulimo wakuzirwa comene kuruska uwo wuli kupereka ku mawupu ghake ghakuzomerezgeka mwadango. Ivyo vikulongosoreka mu marango ghakwendeskera mawupu agha ni ncito izo wupu wuliwose wukwenera kucita. Ndipouli, Fumu yithu, Yesu Kristu, wimika gulu la muzga wa magomezgeko kupwererera vyose ‘ivyo wali navyo,’ panji cuma ca Ufumu pano pacaru.”—Mateyu 24:45-47.

Pakuyowoya za wupu wa Pennsylvania, Mbali Barr wakasazgirapo kuti: “Kufumira apo wupu uwu ukalembeskeka mwadango mu 1884, wupu wa Watch Tower Bible and Tract Society of Pennsylvania wacita ncito yakuzirwa comene mu mdauko wasono. Ndipouli, ici ncirwero waka cakuzomerezgeka mwadango ico gulu la ‘muzga wa magomezgeko na wa vinjeru’ likugwiriskira ncito apo ukukhumbikwira.”

Mu nkani zawo, Mbali Sydlik na Jaracz ŵakalongosora kuti nangauli “muzga wa magomezgeko na wa vinjeru” wapika vintu vyose vya Fumu pacaru capasi, ici cikutondeska cara kuti gulu la muzga lizomerezge ŵanarumi ŵakwenereskeka pakati pa “mberere zinyake” kuti ŵapwererere milimo yinyake ya urongozgi. (Yohane 10:16) Palije cifukwa cilicose ca mu Malemba ico cikuyowoya kuti ŵarongozgi wose ŵa mawupu ghakuzomerezgeka mwadango agho ghakugwiriskirika ncito na Ŵakaboni ŵa Yehova ŵaŵe Ŵakristu ŵakuphakazgika.

Mbali Barr wakaphalira ŵategherezgi kuti sono-sono apa viŵaro vinyake vya Wupu Wakurongozga wa Ŵakaboni ŵa Yehova vyeneivyo vyateŵeteranga nga mbarongozgi ndiposo nga mbarara ŵake, mwakujipereka ŵaleka kuŵa ŵarongozgi ŵa mawupu ghose agho ghakugwiriskirika ncito na “muzga wa magomezgeko na wa vinjeru” ku United States. Ŵabali ŵakugomezgeka ŵa mberere zinyake ŵakasankika kuti ŵateŵetere mu malo mwawo.

Cakusanka ici ncakovwira nadi. Ndipo cipangiskenge kuti Wupu Wakurongozga uŵe na nyengo yakukwanira ya kunozga cakurya cakumzimu panji kupwererera vyakusoŵa vyakumzimu vya ŵabali pacaru cose capasi.

Paumaliro, ceyamani wakaphalira ŵategherezgi ŵacimwemwe awo kuti: “Penepapo ncito zakupambana-pambana za mawupu ghakuzomerezgeka mwadango ndiposo za urongozgi zapika ku ŵalaŵiliri ŵacimanyisko, . . . wose ŵakuteŵetera pasi pa urongozgi wakumzimu wa Wupu Wakurongozga. . . . Ise tose mwapempero tilaŵiske kwa Yehova kuti watipe vitumbiko vyake pa cikolerano cithu pakucita khumbo lake, kutumbika na kurumba zina lake likuru.”