Kasi Kumazga Ukavu Nkhwambura Macitiko?

ŴALENDO awo ŵakwendera maofesi gha United Nations mu Msumba wa New York, para ŵanjira mu ofesi ya Economic and Social Council Chamber, (Muntavi Wakuwona Vyacuma na Kakhaliro ka Ŵantu) ŵakuwona mipayipi ya maji, mawaya gha magesi, na mawaya gha telefoni agho ghakuwonekera pakweru kucanya kwa ofesi iyi. Mwanakazi uyo wakurongozga ŵalendo wakuŵaphalira kuti: “Siling’i ‘yambura kumarizga’ kucanya kwa ofesi iyi ncirongolero ca kukumbuska ŵantu kuti ncito ya vyacuma na kakhaliro ka ŵantu ya United Nations yikumara cara; pacali vinandi ivyo vikukhumbikwa kucitika kuti tinyolorere kakhaliro ka ŵantu.”

Nangauli Wupu uwu ukuyezgayezga comene kuti ukwezge umoyo wa ŵantu wose, kweni kukuwoneka kuti ncito iyi yifiskikenge cara. Cakukondweska ncakuti, Yesu Kristu mu uteŵeti wake pacaru capasi mu handiredi lakudanga C.E., iye wakati: ‘Mzimu wa Yehova wuli pa ine, cifukwa wali kundiphakazga kupharazga makani ghaweme ku ŵakavu.’ (Luka 4:18) Ni “makani ghaweme” nga agho wakapharazga? Ukaŵa uthenga wakukhwaskana na Ufumu weneuwo Yehova Ciuta, uyo ni ‘linga la ŵakavu mu . . . kusuzgika kwaŵo’ wazamwimika Yesu Kristu kuŵa Themba. Ncivici ico Ufumu uwu uzamucita? Yesaya wakacima kuti: ‘Yehova wa mipingo tiwacitire ŵantu ŵose ciphikiro ca vyakunona, ciphikiro ca vinyo la skaghira, ca vintu vyakunona vyakuzura na mafuta pera, ca skaghira lakukuntha makoraghene. Ndipo tiwavivye nyifwa pakuyitonda kwa muyirayira, ndipo Yehova Ciuta tiwafyure masozi ku visko vyose.’—Yesaya 25:4-6, 8.

Kasi mungatemwa kuti mumanye vinandi pakuyowoya za Ufumu wa Ciuta umo ‘uzamunyolorera kakhaliro ka ŵantu’ mwakuti kuzakaŵavye ukavu? Wonani pasi apa kuti muwone ico mungacita kuti yunji wazakamuphalirani vinandi pakuyowoya za ivyo Baibolo likuyowoya pa nkani iyi.