Lipoti la Ŵapharazgi ŵa Ufumu

“Kukolerana Pakati pa Ŵantu Ŵakupambana-Pambana” ku India

“KUKOLERANA Pakati pa Ŵantu Ŵakupambana-pambana” ni mazgu agho ghakugwiriskirika ncito kung’anamura kukolerana kwa ŵantu wose ku India. Kukhala mwakukolerana mu caru cikuru ca ŵantu ŵa mitheto, viyowoyero, visopo na mafuko yakupambana-pambana ncipusu cara. Kweni ndipouli, kukolerana kwa nga ni uku kukucitika pa maofesi gha Ŵakaboni ŵa Yehova mu India, nangauli awo ŵakukhala na kuteŵetera pa malo agha ŵakuyowoya viyowoyero vyakupambana-pambana ndiposo ŵakufumira mu vyaru na vigaŵa vinandi ivyo vikupanga caru ici.

• Tiyeni tiwone ivyo vikacitikira mwanakazi munyake waciwukirano zina lake Rajrani uyo wakufumira ku Punjabi, kumpoto kwa India. Peneapo Rajrani wakaŵa pa sukulu, yumoza wa awo wakasambiranga nawo sukulu wakamba kusambira Baibolo na Ŵakaboni ŵa Yehova. Msungwana uyo wakayezgayezga kumuphalirako Rajrani ivyo wakasambiranga mu Baibolo. Cifukwa cakuti wakamanyanga makora cara Cingelezi ndiposo pakaŵavya Gongwe la Mulinda mu ciyowoyero ca Cipunjabi, msungwana uyu wakapempa Rajrani kuti wamovwire kung’anamura nkani izo zikaŵa mukati mu magazini iyi. Ivyo Rajrani wakaŵazga mu Gongwe la Mulinda vikamutora mtima comene mwakuti wakaruta pantazi mupaka kufika pa kupatulira umoyo wake kwa Yehova Ciuta nangauli ŵapapi ŵake ŵakamususkanga. Lero, wakuteŵetera pa Beteli ya ku India ndipo wakucita mulimo uwo ukajura maso ghake kuti wamanye unenesko. Iye wakung’anamura vyakupharazga vya Cikristu mu ciyowoyero ca Cipunjabi!

Wonaniso ivyo vikacitikira Bijoe, mweneuyo wakufumira ku cigaŵa cinyake ca India—kumwera kwa Kerala. Bijoe wakacimbizgika pa sukulu ya sekondare cifukwa ca kukana kunjizgika mu vikondwerero vya caru ico. Panyuma pakweruzga mrandu uwu Bijoe wakawina ndipo wakawelera ku sukulu. a Ndipo iye wakarutilira kusambira mupaka wakaruta ku koleji. Kweni ndipouli, mikhaliro yiheni iyo yikaŵa pa koleji yikasuzga comene njuŵi zake, mwanteura wakaleka kusambira. Panyengo yasono, panyuma pa kukhala pa Beteli kwa vyaka khumi, iye wakujipulika kuti wandula comene kuruska vyandulo ivyo wakatenge wasangenge kufuma ku masambiro ghapacanya cifukwa cakuti sono njumoza wa mbumba ya Beteli iyo yili na ŵantu ŵakupambana-pambana kweni ŵakukolerana.

• Norma na Lily wose ŵaŵiri ŵali na vyaka 70 ndipo ŵakhala vyokoro kwa vyaka vinandi. Wose ŵakhala vyaka vyakujumpa pa 40 mu uteŵeti wanyengo zose. Lily waŵa wakuteŵetera pa ofesi ya muntavi kwa vyaka 20 nga ni mung’anamuri wa ciyowoyero ca Citamil. Norma wakiza pa Beteli vyaka 13 ivyo vyajumpa panyuma pa nyifwa ya mfumu wake. Iwo ŵakurongora viyerezgero viweme vya kugwira ncito mwamwampu ndiposo kukoleraniska mbumba yose ya Beteli. Iwo ŵakutemwa kupokelera ŵalendo, ndipo ŵakusangwa kucezga na ŵawukirano ŵa pa Beteli, kuŵaphalira cimwemwe ico ŵali naco cifukwa ca kukhala vyaka vinandi mu uteŵeti Wacikristu. Ndipo ŵawukirano ŵakucita mwakuyana waka mwa kuŵacemera ku vipinda vyawo na kuŵawovwira para ŵakukhumba wovwiri. Mwee, navyo ni viyerezgero viweme!

Cifukwa ca kumazga kupambana maghanoghano uko kukwambiska mpindano na kuleka kukolerana mu malo ghanandi, ŵantu ŵakujipereka aŵa ŵakuteŵetera lumoza mwakukondwa ndiposo mwakukolerana nga ni viŵaro vya mbumba ya Beteli ku India.—Salmo 133:1.

[Mazgu ghamusi]

[Kulongosora Cithuzithuzi pa peji 18]

Cithuzithuzi: Mountain High Maps® Copyright © 1997 Digital Wisdom, Inc.